العنوان : أزمة التلعثم

القسم: #النفسي

الرقم: 77

السؤال:

 

سلام عليكم

 

انا عمري 19 سنة , مخطوبة , عندي مشكلة تواصل كبيرة جدا مبعرفش اعبر عن مشاعري يعني مابتوصلش .ساعات باتلعثم في الكلام .وحتى بعض افكاري مع اني اجتماعية جدا  ، في العمل بشتكي من مشكلة ديه وكمان عائلتي

 

مع المشكلة ديه معي من الطفولة لانهم كانو بيضربوني كتير, واحيانا بتزيد لما بكون متوترة او قلقانة  كماان انا عندي لدغة في حرف الثاء

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله

 

الوصف الأدق اللي ممكن نقوله علي التلعثم هو : تزاحم الأفكار و المشاعر , مع صعوبة إخراجها . .

 

و ده اللي بيحصل بالفعل معاكي , دماغك بيكون فيها مئات الأفكار و المشاعر و الرؤي و وجهات النظر و الكلمات , لكن لما بتبدأي تعبري عنها , بتعجزي لسبب ما .  .

 

الموضوع مشابه لو فيه اتوبيس و مليان ركاب , ولما الباص وقف كل الركاب عايزين ينزلو في نفس اللحظة من غير اي ترتيب او نظام , كلهم مستعجلين و عايزين ينزلو في نفس الوقت . .

 

وقتها ايه اللي هيحصل , ان هيحصل تزاحم غير محدود عند باب الخروج , وفي الآخر محدش هيقدر يخرج اصلا , لأنهم متزاحمين في باب الخروج  , هو ده التلعثم . .

 

و من نفس المثال ممكن نستنتج الحل . .

 

---------------------------------------------------------------------------

 

عشان نتجنب الزحام في بوابة الخروج , لابد نعمل حاجتين بالتوازي . .

 

اننا نجعل الاتوبيس فيه ركاب أقل + اننا نتجنب خروج الركاب بسرعة , لكن يكون الخروج بهدوء و بطئ .

 

و ده نفس طريقة حل مشكلة التلعثم عند الإنسان .

 

فحل التعلثم ببساطة هو استخدام نفس طريقة الأتوبيس لكن يتم تطبيقها في العقل البشري .

 

فإن كان العقل فيه الآلاف من الأفكار المزدحمة , وفي نفس الوقت بوابة خروجها (الكلام) هي ضيقة و صغيرة , فالحل وقتها يكون في خطوتين بالتوازي . .

 

اننا من ناحية نعمل نوع من تقليل الأفكار و المشاعر اللي في العقل . .

 

بالإضافة لعمل نوع من تنظيم خروج هذه الأفكار , بطريقة هادئة  و منظمة . .

 

--------------------------------------------------------------------------------------

 

فالخطوة الأولي : تقليل الأفكار والمشاعر بتكون كالتالي  . .

 

المقصود بها مش ان الشخص ميكونش بيفكر , او انه يكون ساذج , او يكون متبلد الحس .

 

لكن انه يعمل نوع من تقليل الافكار السلبية اللي هي غالبا بتعمل المشكلة ديه , بالإضافة انه يقلل من التفكير في الأشياء اللي ملهاش لازمة .

 

فلو إن مثلا "س" اتكلمت معاكي في التليفون بشكل مختصر و قفلت معاكي الكلام سريعا, فلو إنك ظللتي تفكري ليه هي عملت كدة , ومعاملتها اتغيرت ليه ؟ طب ايه اللي حصل ؟ يا تري فيه مشكلة  ؟ . .

 

لو انك تركتي عقلك فريسة لعدد كبير من الوساوس و الأفكار الغير منطقية و الاحتمالات , هتجدي ان عقلك بقي فيه كمية ضخمة من الأفكار و المشاعر الغير مناسبة و الغير سليمة في الأساس  . .

 

أو لما تعرفي ان "ص" قالتك عليكي كلام معين , فلما عقلك يبدأ يعمل شحن من الأفكار والمشاعر السلبية تجاهها , فده هيعمل نفس التأثير الخاص بملئ عقلك بأشياء لا فائدة منها .

 

و كلا الأمرين اللي بيتسببو في صناعة ازدحام غير طبيعي في عقلك من الأفكار و المشاعر  , واللي بتسبب عندك التعلثم بشكل كبير .

 

-----------------------------------------------------------------------------------------

 

الخطوة الثانية : تنظيم الخروج .

 

زي ما قلنا في الاتوبيس المزدحم , ان المشكلة مش بس في زيادة عدد الناس , كمان في الخروج بشكل سريع غير منظم . .

 

فلو إن الاتوبيس مزدحم جدا , لكن تمت عملية الخروج بشكل هادي و منظم , وقتها مش هيحصل عملية الازدحام اللي وصفناها من شوية . .

 

كذلك الأمر في العقل البشري , حتي لو كان عقلك ملئ بالأفكار و المشاعر , لكن انتي عندك الهدوء الكافي و التنظيم و الترتيب لإخراج الأفكار و المشاعر بشكل مرتب و سليم  ,وقتها مش هيحصل التعلثم .

 

فتنظيم خروج المشاعر و الأفكار هو شئ شديد الأهمية , وهو اللي هيساعدك بشكل كبير في تجنب مشكلة التعلثم .

 

و فيه عدد من الخطوات , واللي لو عملتيها هتلاقي ان الخروج بقي منظم اكتر .

 

• ​

 

• أولا لازم يكون فيه نوع من تخفيف التوتر و الضغط علي أعصابك , أهم سبب لزيادة التلعثم هو : التوتر و الإحساس بوجود مشكلة ما . .

​​

• لابد تعملي ازالة للتوتر و الشعور بالهدوء و السكينة قبل الكلام مع اي شخص , و فيه عشرات الخطوات اللي محتاجة تعرفيها لإزالة التوتر , و الضغط علي أعصابك

 

• لابد تتجنبي اي إحساس بفقد الثقة بالنفس , وجود اللثغة عندك ممكن يكون أحد اسباب فقد الثقة بالنفس , بينما انتي لو صنعتي نوع من السلام النفسي داخلك ,و التعايش مع وجود اللثغة , بل و التعامل معها علي انها شئ طبيعي لا تخجلي منه , ده هيعمل تخفيف كبير للضغط علي اعصابك , وبالتالي كلامك هيكون سلس و ميسر

 

•  محتاجة تعملي انتقاء ايه اللي يتقال و ايه اللي ميتقالش , لما تكوني في موقف معين , تكوني مخططة ايه اللي يتقال و ايه اللي ميتقالش , وايه ترتيب النقط ورا بعض بشكل منظم , وقتها اتكلمي بهدوء و بنظام في نقطة ورا نقطة , وهتلاقي الدنيا بقت اسهل .

 

• متسمحيش لحد انه يقاطعك في الكلام , المقاطعة بتعمل عند الشخص توتر و لغبطة في ترتيب الكلام , لو حصل  مقاطعة من حد وقفيه في الكلام لغاية لما تخلصي كلامك

 

• لو كان فيه ممارسات قمعية او إهانة أو ضرب من أفراد الاسرة , فلازم ده يتوقف فورا , لأن ده مسبب رئيسي لعدد من الإضطرابات النفسية للاطفال و المراهقين , ومنها فقد الثقة بالنفس و التعلثم

 

 

 

 

 

 

• كتابة الأدب من الاساليب الرائعة لتنظيم الأفكار و المشاعر , امسكي ورقة و قلم و ابدئي فورا في كتابة قصة قصيرة , متفكريش في مستوي الجودة او متانة اللغة العربية حاليا  , ابدئي بس في كتابة قصة قصيرة. .

 

• أخيرا متنسيش ان سنك 19 سنة , وهو ما يجعلك في قلب سن المراهقة , وبالتالي انتي بالفعل بتمري بتغييرات عنيفة في عقلك و جسمك و مشاعرك , و خلال سنوات قليلة هتحسي بتغييرات أكتر و بنضوج اكبر في عقلك و تفكيرك