العنوان : بوصلة الحياة

القسم: #النفسي

الرقم: 43

السؤال:

 

 هو انا مش عارفه ابتدى  الكلام ازاى .. بس انا بقالي كام سنه في الحال دة .

 

انا مبقتش عارفه انا عايزة ايه ولا اعمل ايه في حياتى ودايما حاسه باحباط وكآبه من كل حاجه . وماليش نفس لاى حاجه .

 

ومش لاقيه شغل حتى يخرجنى من الحاله الي انا فيها . وحاسه ان الدنيا مقفله في وشي من كل ناحيه . حب وجواز وشغل وعلاقات مع الناس . كله بايظ . حتى فقدت القدرة علي التركيز في اى حاجه بعملها . وبنسي كتير جدا

 

يعني حاسه انى تايهه ومش لايقه حل

 

و الاسباب كتير  بس الاسباب راحت وسايبه اثر

 

انا بدور علي حل  وللاسف مش عارفه

 

يمكن لو كنت اشتغلت في المجالي الي بحبه كنت نسيت شويه بس انا عندى وقت فراغ قاتل والعمر بيجرى وفرصي في كل حاجه بتقل جدا

 

انا عندى ٣٥ سنه كنت بشتغل وعندى مشروعى الخاص وكان عندى فلوسي

 

جه حد بوظلي كل دة ابتديت انى ادور تانى علي وظيفه ومع السن دة طبعا مفيش وظايف مناسبه

 

سبب تانى

 

انا كل ما برتبط بحد الموضع مش بيكمل مش عارفه لي وهما الي بيسبونى

 

يمكن حاله اليأس الي انا فيها مهليانى مش علي طبيعتى بس انا مش عارفه اخرج منها ازاى

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

شوفي يا ستي .

 

انتي عندك ازمة بتحصل عند البعض , وهي حالة "التوهان" في الدنيا , لما فجأة بوصلة الحياة بتلغبط معاكي , وبتفقدي كتير من أهداف حياتك اللي كانت عندك من سنين طويلة . .

 

وهنا الواحد بيبص حواليه ويقول , انا فين  ؟ باعمل ايه هنا ؟ انا اصلا موجود ليه ؟ باعمل ده كله لمين ؟

 

و تظل الاسئلة الجنونية ديه تعتصر العقل , ومتسيبهوش الا وهو مدمر داخليا , خاصة لما ميكونش حقق نجاح حقيقي في حياته

 

و في بعض الأحيان الشخص مش بيستحمل المعاناة ديه , فبيلجأ للمخدرات عشان ينسي .

 

و في حالات اخري بيلجأ للهروب الكامل من حياته  , ربنا يحفظنا .

 

انا اعتقد – و اتمني – انك تكوني لسة في الخطوات الاولي, و متكونيش فكرتي في مساحات اعمق من كدة , او اشد سواد .

 

وانتي محتاجة تحطي في بالك أهمية و ضرورة انك تحلي المشكلة اللي معاكي , لان استمرارك في المنحدر ده هيجعلك فورا تتجهي للاماكن المظلمة اللي جبنا سيرتها دلوقتي  .

 

يعني حل مشكلتك بقي ضرورة حياتية , مش بس عشان "تتحسن حالتك المزاجية" لكن عشان تنقذي نفسك من انك تقعي في مأساة كبيرة و حتي لو انتي مش بتفكري فيها دلوقتي , فممكن تفكري فيها قدام لو الأمر تفاقم .

 

-------------------------------------------------------------------------------

 

وعشان نبدأ نحلل سؤالك , لازم الأول نفرق بين حاجتين , فيه بينهم تداخل في رسالتك  . .

 

اسباب و نتايج . . .

 

فيه من ضمن النقط اللي ذكرتيها , اسباب للمشكلة ديه , و فيه نتايج حصلت .

 

فاننا نفرق بينهم ديه خطوة مهمة , عشان نعالج الاسباب , مش النتايج , لان بمجرد علاج الاسباب النتايج هتتحل . .

 

زي الشخص اللي عنده زكام , فلقي ان جسمه سخن جدا , هو لازم يعالج الزكام مش السخونية , هو لو عالج الزكام جسمه هيرجع طبيعي ,  لكن لو هو مجرد عمل تبريد لجسمه المشكلة مش هتتحل . 

 

من النقاط اللي انتي ذكرتيها , فيه اسباب صنعت المشكلة , وفيه نتايج ظهرت علي السطح اول ما المشكلة بقت موجودة و راسخة .

 

الأسباب هي :

 

• وقت فراغ قاتل

• مشتغلتيش في مجالك

• انهيار مشروعك القديم , وخسارة فلوسك

• الاحساس بالخديعة او الخيانة من اللي بوظ المشروع

• فشل الارتباط

 

أما النتايج فهي :

 

• الشعور بالتوهان في الحياة (مش عارفة عايزة ايه , ولا اعمل ايه)

• اكتئاب مستمر

• احباط

• مفيش نفس لاي حاجة

• الاحساس الدنيا مقفلة

• مفيش تركيز

• النسيان

• فشل الارتباط

 

هتلاحظي ان "فشل الارتباط" تم ذكره في السبب و النتيجة , لانه بشكل ما كان هو احد اسباب بداية المشكلة , ولما الموضوع تفاقم , عمل تعميق للمشكلة و جعل احتمالية اي فشل جديد اكبر .

 

تعالي نمسك الاسباب واحد ورا التاني , ونشوف امكانية حلهم .

 

---------------------------------------------------------------------------------

 

نبدأ بموضوع الشغل . .

 

كون إنك مشتغلتيش قبل كدة في مجالك , فده شئ في الماضي مش هنعرف نحلله او نتكلم عنه  , والكلام غالبا مش هيفرق في حاجة , لكن ممكن نتكلم في الخطوة الحالية .

 

مين قال ان سن 35 هو سن كبير عشان تبدأي حاجة جديدة  ,او تشتغلي في مشروع او شغل خاص ؟

 

مش هجيبلك الامثلة المتكررة بتاعت الراجل ابو دقن بتاع كنتاكي بدأ و عمره كام سنه , والحوارات ديه , انا هجيبلك مثال تاني  .

 

لو فيه "احمد" و "مصطفي" , الاتنين عملو سباق بس لمسافة طويلة , قولي مثلا 50 كيلو  .

 

لو ان احمد بدا بداية سريعة , وقطع مسافة كبيرة , في حين مصطفي لسة قاعد مريح في بداية السباق .

 

وبعد فترة , احمد (اللي هو سابق ) بدأ يريح شوية بشوية , ومصطفي (اللي متأخر) تحمس و بدأ يجري بسرعة رهيبة .

 

ففي حين احمد ماشي علي مهلة شوية , مصطفي (لو عنده همة كافية) هيعرف فورا يعوض الفارق اللي بينهم , بل و يتخطاه و يفوز عليه .

 

و هنا لازم اؤكد علي حاجة  .

 

الواحد احيانا بيستمتع انه يحط في باله ان كل اللي حواليه سبقوه و تقدمو عنه بكتير , وان هو في قاع السباق .

 

بيستمتع بالاحساس ده , عشان يكون مبرر ليه لتأخيره او لقلة انجازه .

 

و ده مش صحيح , اعملي تقييم حقيقي لاغلب اللي حواليكي , هتلاقي ممكن نسبة 20 % بس اللي نقدر نقول عليهم عملو نجاح في حياتهم , والباقي لسة بيخبط هنا او هناك .

 

يعني حتي كتير من اللي سبقوكي كتير , هما لسة في دواير مغلقة بيلفو حوالين نفسهم , مش عارفين يخرجو منها .

 

وانتي فعليا ممكن تبدئي من دلوقتي و تتفوقي عليهم بكتير . .

 

يعني مثلا تعلم "التصميم و الجرافيكس" محتاج 3 شهور , و كمان عليهم قولي سنة خبرة , هتلاقي نفسك بقيتي متميزة .

 

تعلم البرمجة محتاج حوالي 6 شهور  , وقدهم محتاجة تدريب  .

 

تعلم لغة جديدة محتاج تقريبا سنة .

 

انك تاخدي مايجستير ادارة الاعمال (MBA) محتاج تقريبا سنة و نص  .

 

انك تاخدي دبلومة في تخصص ما محتاج سنة .

 

الماجيستير تقريبا سنتين  .

 

فانتي عندك مجموعة من الاختيارات الرائعة , واللي لو شفتي حاجة فيهم و خلصتيها للاخر , هتلاقي نفسك تميزتي جدا عن كل اللي كانو معاكي في بداية المشوار .

 

بل ان فكرة بداية مشروع جديد , الفكرة مش وحشة , محتاجة دراسة و تخطيط كويس و راس مال معقول .

 

وبالتوازي البحث عن عمل فكرة كويسة, ايوة صعب بس مش مستحيل , ولو دورتي ممكن تلاقي .

 

طالما انتي حاطة فكرة السن في ذهنك هتتعقدي , ومش هتوصلي ابدا , ولو بالفعل آمنتي انك قادرة تعملي كذا هتعمليه .

 

انتي في حفرة كبيرة من صنع ظروفك و صنعك انتي كمان , والسلم موجود بس انتي مش عايزة تخرجي

 

------------------------------------------------------------------------------------

 

بالنسة لوقت الفراغ .

 

من غير مبالغة , مفيش شئ اخطر عليكي من وقت الفراغ ده .

 

لانك مع الفراغ , مش هتلاقي حاجة تعمليها الا انك تستحضري كل شياطين الاحباط و اليأس و الملل و الغضب و الهم , وتجعليهم يتنططو فوق دماغك  .

 

وقت الفراغ هو بوابة مآسي كتير عند آلاف الشباب , واللي انتهي بيهم الحال للمخدرات و السقوط الاخلاقي و الانتحار .

 

و اصلا من حسن حظك انك مولودة في عصر, سهل جدا انك تقتلي بيه الملل , وتشغلي نفسك بيه .

 

يعني انتي لو تتخيلي حال الناس في الخمسينات مثلا , كانت اقصي آمالهم انهم يقرأو عدد قديم من مجلة "الكواكب" , او يشوفو فيلم لعبد الحليم في السينما مرة كل شهرين  .

 

ولما الراديو اخترعوه  وبقي شغال كام ساعة في اليوم , كان قمة السعادة والمتعة وقتها .

 

فهما كان عندهم بالفعل وقت فراغ قاتل , واحنا وضعنا مختلف  .

 

كمية الكتب , والروايات . والافلام العادية و الوثائقية , والبرامج , والكورسات والمحاضرات اللي موجودة في الكنز اللي اسمه "انترنت" ملهاش نهاية .

 

مشكلتنا كشعوب عربية اننا منعرفش عن النت الا اكتر جوانبه "هيافة" , و "تفاهة" , في حين الكنوز موجودة و مستنية اللي يدور .

 

وحتي بعيدا عن النت , عندك طرق كتيرة لاستغلال وقتك , وانك تعملي شئ مفيد و تستمتعي بيه, وتحققي احد الانجازات اللي انتي محتاجاها , الطرق اكتر من انك تقدري تعملي 1 % منها حتي , الواحد عمره كله مش هيستع لده من كترها

 

يعني ممكن اسردلك دلوقتي عدد من الحاجات اللي تقدري تواظبي عليها بقدر الامكان

 

• تقري روايات

• تقري كتب عادية (تاريخ , سياسة , اقتصاد , مجتمع)

• تشوفي افلام عادية

• تشوفي افلام وثائقية

• تاخدي كورس في تخصص معين

• تتعلمي هواية معينة (الرسم , النجارة ,الحفر علي الخشب)

• تتعلمي لغة جديدة

• تتابعي تحليلات اقتصادية او سياسية لمواضيع معينة

• تساهمي بوقتك في عمل خيري معين :  ملجأ ايتام

• تتطوعي في مساعدة كبار السن او المرضي

• تتطوعي لعمل خيري (محو الأمية , تعليم اطفال)

• تعملي دبلومة في تخصص معين

• تعملي دراسات عليا

• تاخدي كورسات في مكان متخصص

• تحفظي القرآن

• تتعلمي التجويد و القراءات

• تسافري  وتشوفي ناس جديدة

• تعملي نشاط رياضي مستمر (جيم , فقد الوزن . . )

• تتدربي بدون مرتب في احد المجالات

• تتعلمي مهارة جديدة و تنمي نفسك فيها (برمجة , تصميم , كيروشيه  . . )

 

انا هنا كتبتلك 20 حاجة , كل واحدة فيهم محتاجة عمر كامل ,بس انتي شوفي انهي فيهم بتحبيه , وعيشي معاه  .

 

بس خدي بالك ان المشكلة مش في انك تعرفي ايه اللي ممكن تعمليه . .

 

لكن انك تصبري علي الحاجة لما تخلصيها .

 

لانك ممكن تتحمسي في الاول و تبدأي شئ معين , بعدها تفقدي الحماس و تسيبيه و ترجعي لوقت فراغك تاني .

 

فده محتاج منك ارادة قوية ,  وعزيمة مستمرة عشان تكملي حاجة لاخرها , وتعرفي ان فيها علاجك بالفعل .

 

وقت الفراغ شئ قاتل , احذري منه ولازم تتخلصي منه .

 

فيه افكار تانية , انك مثلا تجيبي حيوان اليف "قطة او كلب" ده هتلاقيه يملي جزء كبير من وقتك بالفعل , ويعطيكي احساس باهمية وجودك .

 

فيه فكرة تانية مجنونة شوية , لو انتي عايشة لوحدك انك تتبني طفل ,واللي بالفعل هيملي عليكي حياتك و هيصنع داخلك هدف للحياة و النجاح فيها

 

سهل انك تقتلي وقت الفراغ  ,بس لابد يكون عندك ارادة و صبر عليها .

 

وهنا مشكلة كنا اتكلمنا فيها عن استغلال الوقت هتفيدك في رسالة : الثروة المفقودة 

 

------------------------------------------------------------------------------------------

 

السبب اللي بعده هو  : انهيار مشروعك القديم , والاحساس بالخديعة من الشاب الاولاني  . .

 

وديه علاجها انك تبطلي تفكير فيها , بس كدة , لان حاليا مفيش شئ هنقدر نعمله عشان نعالج مشكلة حصلت بالفعل من سنين .

 

لما تبطلي تفكير فيها , وتخلي عقلك يتخلص من اي اثار ندم او احباط او يأس من اللي حصل , هتحسي بالراحة .

 

و من الطرق اللي تخليكي تحسي بالراحة , انك تتخيلي مصير اكثر سواد و اشد قتامة , واللي كان ممكن يحصل , بس ربنا ستر معاكي و محصلش .

 

يعني كان ممكن مثلا مع انهيار المشروع ان يكون فيه شيكات عليكي و تدخلي السجن سنين طويلة , وده حصل مع ناس كتير للاسف .

 

كان ممكن مش بس تخسري فلوسك , كمان يجيلك جلطة او ازمة قلبية و تعيشي حياتك كلها في عذاب .

 

كان ممكن الخسارة تتعدي حدودها الخسارة المادية و تصل لاي مساحة في المشاكل الاخلاقية و العياذ بالله  . .

 

فلما تعرفي ان اللي حصل , كان ممكن يحصل اسوء منه بكتير , هتعرفي انك في نعمة الالاف  يتمنوها ,سواء من المسجونين بسبب شيكات او المرضي بسبب ازمات زي كدة

 

 

اما فشل الارتباط , فالكلام فيه يطول , واظن لو انتي قرأتي عدد من المشاكل العاطفية في صفحتنا هنا , هتلاقي الصورة اتضحت عندك اكتر , وعرفتي ايه المشكلة وازاي تتحل .

 

------------------------------------------------------------------------------

 

ده كدة كان استعراض للأسباب و حلولها .

 

و ثقي انك اول ما تحليها , تدريجيا هتلاقي النتائج اتحلت او اختفت . سواء من اكتئاب او احباط او ان ملكيش نفس , او فقد التركيز او النسيان .

 

انتي بس محتاجة ارادة في اهم خطوة : قتل الفراغ , واللي هيؤدي بالضرورة الي حل مشكلة : الشغل  .

 

فلو انتي عملتي لنفسك هدف  ,ان خلال 3 شهور من دلوقتي هتكوني خلصتي كورس في شئ معين , هتلاقي وقت فراغك راح , وفرص العمل هتزيد .

 

وكمان متقفليش باب الارتباط لو اتقدملك شاب مناسب , مفيش حاجة اسمها سن كبير و سن صغير , الاربتاط  و الزواج مش بيعرف حد زمني .

 

توكلي علي الله , تمسكي بالصلاة و قيام الليل و الدعاء بالتوازي مع ده كله , وثقي ان حياتك هتتغير بشكل مدهش