العنوان : السنين الطويلة

القسم: #الاجتماعي

الرقم: 19

السؤال:

 

 

مشكلتي  باختصار احنا قرايب دخلنا ف علاقة حب اكتر من مرة اتفقوا الاهل على الجواز

 

وكل حاجة بتقف بدون اى ابداء اسباب وبيرجع تانى ..

 

حاليا بقالنا 13 سنة ع الحال ده بيغيب ويرجع ..

 

انا مش فاهمة ايه اللى حاصل .. حياته العاطفية واقفة تماما مبيسمحش لحد يدخلها الا انا .. مبنشفش بعض كتير غالبا مرة كل 5 شهور مرة

 

قالى انه بدأ يحسنى زى اخته بعدها كان التصرف والكلام لا يدل على كده ابدا ..

 

بيكون معايا زى الطفل لكنى تعبت من العلاقة دى فكرت ابتدى حياتى مع ناس تانية لكنى فشلت وكان بيظهر ف الوقت وكأن قلبه حاسس ..

 

انا عايزة ارجعه اعمل ايه ارجوك .. واسفة لازعاجك

         

نسيت اقول ان فى مرة سألته ليه متجوزتش لحد دلوقتى سنك في التلاتينات قالى انه لما بيفكر بعقله بيلاقى ان مفيش واحدة تنفع تبقى زوجة ليه غيرى لكن قلبه مش مستقر

 

واما قولتله انى مش مصدقه قالى انه بيفكر ف قدام وان البعد حاليا انسب فقولتله معنى حاليا ان فى امل وانا معنديش طاقة اكمل .. قال معلش استحملينى وبعد كده رجع يتكلم كأنه مقالش حاجة

 

واصبح بارد ف الكلام ف التليفون ومبيتكلمش الا كل فين وفين

 

مع العلم ان انا في العشرينات و كل واحد عايش فى محافظة

 

و اننا كنا مخطوبين رسمى والخطوبة اتفشكلت

 

مش عارفة هو يمكن متردد  . اخر مرة اتواصلنا امبارح وكان تواصل غريب

 

كلمنى قالى مخنوق وعايز اسمع صوتك كلمته وقعدنا نتكلم ساعتين هزار وضحك واحكيلى حدوتة .. قفلنا مبسوطين جداا

 

بكلمه امبارح لقيته بيضحك وباعتلى صورة واحدة من صحباته الاجانب بيقولى ايه رأيك ف البت بتاعتى وبيضحك ولما حس انى اتضايقت

 

فضل 3 مرات يقفل ويكلمنى كل 10 دقايق بس كده

 

بس فى نقطة مهمة جدااا لازم اوضحها ودى الحاجة الوحيدة اللى متأكده منها وهو انه مش لعبى .. يعنى مبيلعبش بيا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

شوفي يا ستي . .

 

التأجيل المتتالي لإتمام الزواج , لما بيرجع لأسباب ملموسة (المرتب قليل , مفيش شقة , الدهب غالي , عمتي ماتت , لسة والدي منشف دماغه ) فهنا مفيش اي مشكلة - نفسية او اجتماعية – نقدر نتكلم فيها , لان فيه وفاق بشكل عام والعقبات هي شئ يمكن التغلب عليه بشكل او بآخر . .

 

لكن لما بيتم عمل التأجيل لسبب تاني مش مادي فدماغنا بتروح لسببين غالبا . .

 

السبب اللي بينطبق علي كتير من الحالات ديه , بتكون متلازمة (طرف بيتسلي – طرف بيتعذب) , واللي غالبا الشاب بيكون الطرف الأول و البنت  الطرف التاني , وده شفنا منه حالات كتير في الصفحة  . .

 

اما السبب التاني اللي بيوقف الزواج طالما مش السبب ملموس , بيكون ان احد الطرفين عنده "عائق نفسي" معين , ولما بقول عائق فانا لا اعني مرض نفسي , لان كلمة مرض كلمة كبيرة شوية متنطبقش علي اي حد . .

 

يعني يكون احد الطرفين متردد شوية , او عنده خوف زيادة عن اللزوم من خوض التجربة , او يكون قلقان من شئ محدد , او يكون فيه شوية اكتئاب موقفين الدنيا و هكذا . .

 

و الحقيقة ان اغلب الحالات في النوع ده بيكون للانثي مش الذكر , يعني غالبا بيكون الشاب هو اللي منتظر , والانثي هي اللي بتعاني من "عائق نفسي" يخليها بتأجل او بتفرمل الزواج , واحيانا بتلغيه تماما . .

 

كتير من الحالات بتتم علي خير, بعد التاجيلات المتتالية , ويتضح للانثي ان قلقها و خوفها كان اكتر من حجمه , وان الزواج مش حاجة مرعبة ولا حاجة زي ما كانت فاكرة  . .

 

بعض الحالات البنت بتكون مش قادرة تتخذ القرار و بتوصل لمرحلة انها تفركش خالص , او ان الشاب يزهق من كتر التاجيلات فهو اللي  يفركش  . . .

 

و كأننا لو عايزين نسرد جميع الحالات الخاصة بتعطيل او الغاء الزواج هتكون :

 

• سبب مادي ملموس (مفيش مشكلة نفسية)

• متلازمة (طرف بيتسلي – طرف بيتعذب) , غالبا بيكون الشاب اللي بيتسلي , وديه مشكلة اجتماعية اكتر منها نفسية

•  متلازمة (العائق النفسي) وديه غالبا بتكون للبنت

 

---------------------------------------------------------------------

 

لو هنحاول نعمل تصنيف للحالة اللي بتتكلمي عنها هنا  , فمش هنلاقي افضل من النموذج التالت , واللي هيكون اقرب تشخيص هنا . .

 

و لكن مع فرق ان الطرف اللي عنده عائق نفسي هو خطيبك مش انتي . .

 

وان الشئ اللي بيمنعه بالتحديد مش القلق ولا التردد  ,لكن الاكتئاب . .

 

الاكتئاب اللي واضح بشكل ما من ملامح التعامل من طرفه , واللي بيجعل صاحبه يتعامل بنوع من اللامبالاة و الاستهانة مع حاجات  كتير . .

 

و الاسوء ان المصاب بالاكتئاب بيفقد الدافع اصلا للسعادة و الفرح , وبالطبع مش هيكون عنده الدافع انه يُسعد او يـُلقي الفرحة في قلوب من حوله . .

 

و بعض الحالات الأشد قسوة , بيفقد الدافع في الحياة اصلا . .

 

متنسيش ان "توقف حالته العاطفية " زي ما ذكرتي  هو دلالة علي الاكتئاب في الاساس , الشخص المكتئب بيفقد اساسا لذة التمتع بالحياة وكل شئ فيها , فان كان الشخص العادي هيحزن بشكل رهيب لو خطيبته اللي بيحبها سابته  , فهو غالبا مش حاسس بعشر الاحساس ده  . .

 

ويمكن ده تفسير لما قالك انه حاسك زي اخته  ,هو بالفعل مش بيتسلي ولا بيلعب بيكي , زي النوع التاني  اللي قلناه , لا هو اصلا عاطفته ليكي قلت كتير  . .

 

وغالبا عنده كمان كمية كبيرة من التردد , اللي يخليه مش قادر يتخذ قرار بالزواج لمدة 13 سنة , ده عمر كامل , و مستحيل يتم تأجيل الزواج ده كله الا بتواجد عائق نفسي مش قليل , ممكن يصل بالفعل لدرجة المرض اللي محتاج طبيب متخصص . .

 

ولما قالك انك الوحيدة اللي تنفعي زوجة ليه , بس هو متردد , فده علامة كبيرة علي وجود شئ من "اضطراب التردد المفرط" عنده

 

وغالبا تصرفه معاكي زي الطفل من احد ملامح الشخصية المكتئبة , واللي بيخليه يعاني من العذاب النفسي المستمر الي هو حاسه , وغالبا هو ملوش اصحاب كتير , وانتي الوحيدة اللي قريبة منه , عشان كدة لازم يضعف امامك , ويظهر وجهه الضعيف اللي عمره ما هيخلي اي شخص حتي امه يشوفه . .

 

ولما قالك انه "بيفكر في قدام  و البعد دلوقتي احسن"  ده كان بتأثير كلا من الاكتئاب اللي مانعه انه يستمتع بحياته و زواجه منك , وتاثير التردد اللي بيخليه يسوف كل حاجة و ميتخذش فيها قرار

 

وبباسطة بيقولك استحمليني , لان هو مش حاسس بربع العذاب اللي انتي حساه من طول الخطوبة و العلاقة الغير متماسكة ديه , فالتحمل بالنسبة له عادي و عايزك تعملي زيه .

 

وده اللي خلاه بارد في التليفون و بيتكلم قليل .

 

نيجي بقي لما اتكلمتو في التليفون و هزار و بتاع , وتاني يوم بيغيظك بصور صديقاته  . .

 

بعض مصابي الاكتئاب بيقلب معاهم بنوع من قسوة القلب شوية بالإضافة انه بيكون مزاجي "مودي", واللي بتخليه لما يعامل الناس اللي بيعزهم يهزر معاهم بغلاسة شوية . .

 

ولما قالك انه مخنوق و عايز حدوته , هو بيوصفلك بالكامل معاناته من الاكتئاب اللي التهم كيانه . . 

 

وده السبب اللي خلاكي تقولي "بيكون معايا زي الطفل" لانه بيتقمص بسرعة , عايز اللي يداديه , عايز اللي يطبطب عليه , ممكن ينشف دماغه و ميعبركيش . .

 

و اظن اقرب سن ممكن نوصفه بيه هو سن "9 سنين"  , لا هو طفل كيوت طيب عنده 4 سنين , ولا هو مراهق عاقل شوية عنده 15 سنة .

 

خطيبك ببساطة بيعاني من احد درجات الاكتئاب , قد تكون بسيطة و قد تصل لمرحلة كبيرة تسمي "النمط الاكتئابي الجسيم" , واللي بيدفع الشخص انه يعتزل كتير من مظاهر الحياة  , و تخليه يفكر انه يعتزل الحياة نفسها .

 

           

---------------------------------------------------------------------------

 

طب والحل . .

 

الحل في ايده هو بالكامل , وانتي هتتخذي القرار بناء علي اللي هيعمله . .

 

لازم في الاساس يعترف ان فيه مشكلة , قد تكون مشكلة بسيطة تتحل في كام اسبوع , وقد تكون كبيرة و محتاجة شغل كتير . .

 

بس ان هو معترفش ان فيه مشكلة فأساسا محدش هيعرف يساعده , يعني لو ان فيه مريض عنده مشكلة في "الزايدة الدودية" مثلا , وهو رافض يتعالج , فاهله ممكن يتكاترو عليه و يكتفوه , وياخد بنج كلي  وتتعمل العملية غصب عنه  . .

 

لكن المريض النفسي – لو كان هو مريض بالفعل – هيتعالج ازاي غصب عنه , في حين ان 90 % من خطوات  العلاج هي سلوكيات هو هيغيرها  بإرادته . .

 

فهو ان مآمنش ان فيه مشكلة , فانسي ان  هو يتغير . .

 

طب لو هو اقتنع و عايز يتغير ,يعمل ايه ؟ ؟

 

ساعتها لازم يروح لطبيب نفسي (من غير ما تروحي معاه اكيد) , لازم يقعد معاه و يشرحله كل حاجة , يرجع معاه كدة للماضي القريب و البعيد , ويشوف ايه السبب , الاكتئاب مش بييجي من لا شئ , لابد فيه شئ سواء فجائي او تراكمي علي مدي سنين طويلة . .

 

بعدها يمشي علي خطواته  ,بيكون فيه احيانا ادوية تتاخد من "مضادات الاكتئاب" لكن طبعا هي لوحدها ملهاش لازمة ان مكانتش من ضمن خطوات علاجية نفسية متكاملة . .

 

غالبا الطبيب هيوصيه انه يكتر اصدقائه , انه يخرج عن عمد , انه ميفكرش في الشئ اللي تاعبه و قارفه ايا كان ايه , يقلل التدخين او اي حاجات بيتعاطاها , ميقعدش لوحدة كتير , يقلل مشاهدة افلام او روايات او كتب ذات طابع ميلودرامي . .

 

فيه "باقة" من النصايح المهمة اللي اي طبيب نفسي عارفها و بيتعامل معاها , بالإضافة لدوا كويس , هتتغير حالته تدريجيا . .

 

بس المهم هو يكون عنده ارادة لأن فيه مثل بيقول "اذا كان الطبيب حكيما و المريض مطيعا زالت اسباب العلة" , يعني كل كلام الطبيب و ادويته و حواراته ملهاش لازمة ان معملش هو تنفيذ ليها . .

 

واحنا عملنا بالفعل بوست طويل عن الاكتئاب , اقريه بالكامل وشوفي لو هو يقدر يمشي علي محتواه بشكل او باخر , هنا الرابط :

       

---------------------------------------------------------------------------

 

طب ماذا عنك انتي :

 

لو هتاخدي رأينا , فالارتباط بيه لو ظل في الحالة ديه , معناها  وأد اي احتمال لاستمرار الزواج . .

 

اياكي يكون دافعك للزواج منه هو الشفقة او المساعدة , ده مينفعش دافع للزواج اصلا , وان كان عندك دلوقتي كمية كبيرة , فبعد الزواج هيختفي تدريجيا  , ومش هتستحملي المعيشة معاه ابدا . .

 

و بالتالي قرارك بالارتباط بيه يكون مرتهن بأمر واضح , هو انه يتعالج و يتغير . .

 

و ده معناه , انك في الاول لو قولتيله انت محتاج تتعالج  ,سواء عن طبيب او لو عنده حد من اصدقائه عنده الوعي الكافي انه ياخد بايده من الاكتئاب , لما تقوليله ده لو رفض , يبقي هو اللي بيحكم علي ارتباطكم بالاعدام . .

 

لو رفض لحي عليه مرة و اتنين و تلاتة , وبعدها تعاملي معاه بحدة اكتر , انك يا فلان بتدمر نفسك و انا مستحيل ارتبط بشخص بيقتل نفسه ببطئ . .

 

لو لسة رافض فاربطي علاقته معاه بانه يتعالج , لو لسة رافض فانتي عملتي اللي عليكي , واستمرارك معاه معناه تدمير لحياتك الشخصية . .

 

ايوة ممكن الام او الاب او الاخ او الاخت او القريب او الصديق انه يلازم صديقه المكتئب و يتابع معاه سنين طويلة , بس "الخطيبة" او "الصديقة" مينفعش تعمل كدة , لان هو بالفعل مش عايز يعمل اي خطوة في علاج نفسه . .

 

احنا مش بنتكلم ان فيه شخص "معوق او كفيف" فاحنا بنسانده و نكافح معاه , احنا بنتكلم في شخص قاعد في حفرة عميقة , ومش عايز يبذل اي مجهود عشان يطلع , طب هنعمل ايه اكتر من كدة ؟ ؟

 

طب لو وافق وراح للدكتور ؟ ؟

 

شجعيه فورا و خليكي معاه خطوة بخطوة . .

 

و خدي بالك ان اغلب اللي بيروحو يتعالجو نفسيا , مش بيكملو , اما لزهق او لتعبه من الخطوات العلاجية اللي بتكون مرهقة اساسا . .

 

فبرضه لو شفتيه زهق و مش عايز يكمل , تتعاملي معاه نفس التعامل لو كان رفض  , ويكون فيه مهلة معينة تنتهي بالانفصال التام . .

 

طول ما هو شايفك موجودة , وبالتليفون هيعرف يتواصل معاكي , وانك منتظراه العمر كله فهو مش هيتغير , وهيفضل في مكانه للابد , لكن لما يلاقيكي بالفعل جادة و انك قطعتي كل علاقتك بيه , وبلوك من الفيس و الواتس , ممكن ده يكون دافع بالفعل انه يتغير عشان ميخسركيش . .

 

الشفقة و العطف بيكونو مع اللي بيحاولو يتعبو عشان نفسهم , لكن او اشفقتي عليه العمر كله , فثقي انه مش هيتغير  , وهتلاقي الـ 13 سنة بقم 30 سنة وانتي في انتظار