العنوان : زوجي المجنون

القسم: #الاجتماعي

الرقم: 23

السؤال:

 

انا متجوزه من عشرين سنه

 

اتجوزت وانا عندي 16 سنه مكنتش فاهمه حاجه في الدنيا كان لمه حد بيضيقني مكنتش برد علي اي حد ممكن كنت اعيط بس

 

مشكلتي بقا الي عرفتها بعد طفلي الاول عرفت ان هو بتاع حريم وكانت اول صدمه ليه شوفته مع وحد في البيت من تحت في وضع مخل جدا

 

ورحت قلت لامه وهي اتحايلت عليا اني مقلش لحد

 

ساعتها وبما ان كنت في الوقت ده صغيره جدا كان عندي وقتها 17 سنه زعلت شويه وبعدين سكت وعشت عادي

 

بعدها اكتشفت مواضيع كتير جدا كنت بزعل شويه واسكت

 

وفي مره شفته بيبص علي حد من اخواتي البنات كنت في بيت اهلي وانا شفته بيبص علي اختي من الشبك بتاع الحمام

 

وسعتها كتمت وماوجهتوش خالص وكل شويه بقيت اكتشف حاجه جديده في موضيع الحريم دي

 

ومره شفته بيبص علي مرات اخوه من شبك المطبخ وسعتها وجهتو وزعقت وقلتله هنزل اقول لابوك

 

اتحايل عليا وقالي اخر مره قلتله شرطي الوحيد انك تكشف عند دكتور نفسي ووافق في سعتها  وبعد كده خلاص ولا اكن حاجه حصلت

 

دا غير الشتيمه باقذر الالفاظ ومد الايد قدام اولادي وكذا مره اقله بلاش شتيمه وتهزيق قدام الاولاد  لا حيات لمن تنادي

 

وكمان ماشي ورا اخته وامه وكلامهم ماشي عليه حتي مصاريف بيتي مدخلين فيها لو قلولو امنع المصريف بيمنعها وكل اسراري الشخصيه الشخصيه جدا مع اهلووكذا مره سمعتهم بيتكلمو عليه وهو معاهم 

 

وحصلت مشاكل كتير معاهم لانهم مش بيقولوا كلمت حق ابدا في حقي وعلي طول يسلطوه عليه  وتفصيل كتير جدا واسراري معا اهله واصحابه واي حد يقعد معاه بقيت احس اني معنديش معه سر واحد 

 

ولمه بنتخانق بيكدب وبيفهم الناس حاجات كتير محصلتش فبقيت انا كمان اضطر اشرح لناس الكلام الغلط الي هو مفهمه لناس

 

وبقت حياتنا هو يقول وانا اقول محصلش عشان عاوز يداري علي هو بيعمله 

 

وكمان فوق ده كله بخيل بخيل جدا ومش بيصرف عليه ولمه اكون عيانه ولا بيهتم ولا كاني موجوده اصلا ممكن ميخشش الاوضه الي انا فيها خالص او يروح يرميني عند اهلي يكشفو عليه واخف وبعد كده ارجع البيت تاني وممكن التلفون حتي مايسألش بيه

 

بقيت احس من نحيتو احساس غريب ان هو سبب تعبي في الدنيا لان انا دلوقتي مش بخف ابدا علي طول عيانه واطلع من حاجه اخش في حاجه  ضغط عالي ومشاكل في القلب وقرحه في المعده ورمتزم وصداع دايم مش بيروح لدرجه اني قعدة 6 شهور مشلوله ايد ورجل بتيجي احيانا وتروح احيانا

 

عمره مافرحني وقالي محتاجه حاجه بخيل جدا 

 

اخر مشكله حصلت بينا كانت بسبب وحده وكان بيكلمها وبيقابلها وانا لمه عرفت متكلمتش وبعد فتره عرف ان انا عرفت انا اتصلت عليها واتكلمت معها وقلتلي فعلا بيتكلمو معا بعض هي وحده هو مأجر عنده محل قلتلها انا هاقول لجوزك كنوع من التهديد فقط قلتلي ابوس علي رجلك متعمليش كده  وانا هاجي ابوس علي رجلك قلتلها اوعي اشوفك هنا وقفلت معها

 

هي راحت اتصلت عليه وحكتلو وقلتلو سيب المحل مراتك هتعملي مشاكل هو راح اتصل علي عمي وقله اني السبب في انو هايسيب المحل ومهموش انا لمه عرفت ان هو اتصل علي عمي انا اضيقت اوي رحت اتصلت علي عمه كان جه خدني قبل كده وانا زعلانه عند بيت اهلي

 

ده كلو وانا متكلمتش معه في اي حاجه بس طبعا باين علي وشي وهو كمان كان بيعملني اوحش معمله وكان بيذلني عشان يسيب جنيه في البيت وانا معايا اربع اولاد

 

لحد مافي يوم كان تحت ولقيته طالع يشتمني ويقلي بتتصلي ليه علي ابن عمها قلتله والله مااعرف ابن عمها والله مااعرف حد غير هي والي عرفته بعد كده ان هي الي اتصلت وقلتلو كده ويوميها ضربني ضرب جامد قدام اولادي حتي بنتي كانت بتحوش عني زقها خبطها واولادي جتلهم هسترية عياط من المنظر ولم عليه البيت وهو بيضربني وشتيمه قذره جداواهلو طلعلو كملو عليه وقلولي انتي هاتخربي البيت ومحدش قله الي بتعمله غلط

 

مشيت رحت بيت اهلي بعتلي ناس وهو جه اتخنقنه قدام الناس ومشي وحرمني اني اشوف عيالي وخد منهم التلفونات كمان

 

وبعدين في ناس تاني جم عشان يخدوني وانا مرضتش اروح لحد ما واحد صحبه جه وجابه معه وقعدنا واتكلمنا وكان بيكدب كتير قدام الناس وانا كنت هاتجنن وفي الاخر روحت عشان اولادي انا قلت اروح عشان خطر ولادي محدش وافق علي الموضوع ده وقلولي كده غلط

 

يعني الناس مش بتشوف غير غلط الست وانا لو غلط من كتر الي عمله فيه تعبت وانا دلوقت روحت بس نفسيتي وحشه جدا جدا مش حابه البيت ولا هو لانو جه عليه كتير اوي وخله شكلي كمان قدام الناس اني واحده شكاكه وغياره 

 

وانا والله مش كده انا بتكلم لمه بشوف بعيني وممكن متكلمش كمان نفسيتي وحشه اوي ومش عارفه اعمل ايه هموت من التفكير مابقتش احس معه بالامانه خالص معنديش سر معه ودي تعباني جدا 

 

اعمل ايه في نفسيتي دي الي مأثره علي صحتي وعلي فكره اولادي 19 سنه و16سنه و12سنه و9 سنين ياريت رد يريحني انا تعبت من الدنيا والناس مش بتحس بحد حتي اهلي يقلولي استحملي عشان عيالك وانا تعبانه اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

لا حول ولا قوة الا بالله العلي العظيم . .

 

كل ما توصلنا قصة مأسوية , نقول احنا مشفناش شئ بالبشاعة ديه , ونفضل متأثرين بيها لغاية لما توصلنا قصة أكثر بشاعة , وأشد هولا , فنضرب كف علي كف من النوعيات الغير مألوفة من البشر اللي بنشوفها  . .

 

زوجك يا فندم مريض نفسي متكامل الاركان , يعني مسابش مرض الا و اخد منه شوية , "ليه في كل خرابة عفريت" في عالم الإضطرابات السلوكية  . .

 

يعني بداية من اضطراب الشذوذ الجنسي المسمي بالتلصص البصري  (Voyeurism ) للعنف المبالغ فيه  ,للكذب المستمر , للهلوسة في تصديق خيالات نفسه , للشك و الارتياب , للاكتئاب المستمر , للعصبية و انتهاء بالسادية المفرطة . .

 

ولو هجيب عليكي غلط معين , فغلطك انك اساسا استمريتي معاه السنين ديه كلها  , واضح انك اتجوزتيه من اكتر من 20 سنة باعتبار اكبر ابناءك 19 , معقولة صابرة عليه 20 سنة كاملة ؟ ومستنية انه يتغير او ينصلح حاله ؟ ؟

 

أومال هو الطلاق مشروع عشان  ايه ؟ يعني لو ماكنتش ديه حالة ينفع فيها الطلاق , اومال هينفع لمين   ؟ ؟

 

يعني ارتكب الفاحشة  , وعنده شذوذ "التلصص البصري" , وكذاب , بخيل , وعصبي , وبيضرب بجنون , و بيفضحك في الشارع , و مش مراعي زوجة او طفل , منتظرة ايه عشان تفكري في الطلاق ؟ ؟

 

منتظرة انه يجيب سكينه و يقطعك حتت ؟  او يرمي واحد من ولادك من الشباك ؟ ساعتها هتقولي اني هاستحمل و اكمل عشان باقي الاولاد ؟ ؟ ده كلام ؟ ؟

 

ان كان الاستعجال في التفكير في الطلاق هو مشكلة اجتماعية عند بعض الاسر , فعدم التفكير فيه اطلاقا هو مشكلة تانية , ده انسان بيدمرك ببطئ , وبيقتل اولاده جسديا و نفسيا , انتظارك معاه معناه تدمير ليكي و لاولادك   . .

 

اللي زي ده محتاج واحدة عبدة تحت ايده يتحكم فيها بالريموت , او واحدة تانية لسانها و ايديها طوال  , و تطلع عين اللي خلفوه , عشان يعرف ان الله حق  . .

 

لكن استسلامك ليه من اول غلطة , جعله يتمادي و يستمر , و "يدخل بحماره" و يعمل كل اللي عايزه . .

 

ولو انتي من اول سنة جواز , كنتي اتخذتي قرار حاسم بالطلاق , كنتي جنبتي نفسك و اولادك مصير اسود انتي عايشاه حاليا  , وكنتي وفرتي سنوات طويلة من عذاب مستمر . .

 

ازاي زوجة تشوف زوجها بيخونها و تسكت اساسا ؟ ؟ اصلا ازاي تكمل حياتها معاه و تجعله يمسها بجسده اللي نجسه بالقذارة ؟ ؟

 

الاستثناء القليل ان الزوج لو تاب الي الله توبا نصوحا , وغير من حاله تماما , وقتها بعض العلماء قالو ينفع تكمل معاه عادي , وواضح ان زوجك مش كدة خالص , ده تخطي حافة الجنون من زمان . .

 

سكوتك من البداية علي حقك , خلاه يعرف ان مراته "طيبة و علي نياتها" و بالتالي جعله يتمادي في شذوذه الغريب , وفي مد ايده , وفي فضحك في الشارع , وفي قتلك ببطئ . .

 

و الغريب ان سبب رفضك للطلاق هو الاولاد , هو انتي اصلا شايفة انهم في وضع مناسب دلوقتي ؟ ؟

 

يعني هل هما عايشين بمستوي لائق من الاساس ؟ ؟

 

انتي حاليا عندك 4 اولاد في سن المراهقة , نشأو في جو ملوث بعرق الخيانة و قذارة الالفاظ و الاهانة المستمرة لامهم , هل تتوقعي انهم يعيشو حياة سوية مستقرة ؟ ؟

 

لو انهم اصيبو باحد الإضطرابات السلوكية المتعلقة بالعصبية او الاكتئاب او الفصام في الشخصية او العنف المفرط , يبقي ده ذنبه هو في التسبب بيه , وذنبك انتي كمان في انك جعلتيهم يتربو في البيئة القذرة ديه . .

 

لو من اول ما شفتي الوجه القبيح لزوجك المضطرب نفسيا  ,لو انك طلبتي الطلاق , حتي لو تهربي علي مدينة تانية ميعرفش يوصلك فيها , لو اشتغلتي انتي و اولادك اي شئ , هيكون اكرم بكتير من الحياة المزرية اللي هما عايشينها بالفعل . .

 

اسف لقسوة كلامي عليكي , بس هو ان كان مجرم بفعله , فانتي مقصرة بسكوتك , وبتقييمك الغلط , و بالقرار الغير مناسب اللي مكانش عندك شجاعة كافية لاتخاذه من عشرين سنة . .

 

المفكر و المناضل الأمريكي مارتن لوثر كينج  ليه جملة جميلة (أسوء مكان في الجحيم محجوز لاولائك الذين يقفون علي الحياد في المعارك الأخلاقية العظيمة )

 

صمتك و عدم تحركك في الهروب من جنونه , هو ذنب لا يغتفر في حق اولادك . .

 

 

 

استمرارك في الحياة معاه لأي سبب هو اكمال لجريمته في تدمير الاولاد , و تقصيرك في السكوت عليها . وهو شئ غير مقبول ولا ليوم واحد . .

 

زوجك مش عنده اضطراب نفسي طبيعي عشان نقول انه يروح يتعالج  ,زوجك علاجه السجن الطويل  . .

 

وبالتالي عشان مفيش اي امل انه يتغير او يتحسن ,فمفيش حل الا الطلاق فورا . .

 

فهيكون عندك عدد من الخطوات اللي ممكن تفكري فيها و تمشيها بالترتيب . .

 

• اولا خدي راي حد بيفهم في عيلتك , وياريت لو محامي , او انك معاه تروحي لمحامي  , عشان تشوفي لو تم طلب الطلاق ايه مدي سهولة الاجراءات , و هل هيتنفذ بالفعل ,و لا قبضة الشرطة هتكون رخوة في المكان اللي انتو عايشين فيه

 

• لو ظهر عندك بوادر ايجابية ان بالفعل الطلاق هيتم , فانتي  فورا هتحتفظي بحضانة 3 من اولادك , والرابع هيخير في المعيشة معاكي او مع ابوه , وغالبا هيختارك

 

• هو هيكون ملزم بالنفقة الشهرية , وغالبا هيتهرب منها , فانتي لازم تشوفي اي حل للمصاريف و الانفاق , حتي لو انتي وولادك اشتغلتو اي شئ

 

• ياريت لو تقدري تتنقلي مدينة تانية في محافظة تانية , من غير ما هو يعرف اي شئ عنكم , لان اي تواصل قدام بينكم هيفتح الباب للشيطان عنده انه ينتقم منك , وهو مجنون و يعملها

 

• لو المحامي قالك انك هتخسري عفشك او دهبك او المؤخر او النفقة او اي حاجة  , ضحي بأي حاجة , المهم تهربي من الجحيم في اسرع وقت

 

• لو انتي عرفتي ان القانون مش هيفيدك , وانك مش هتعرفي تتطلقي منه او مش هيعرفو ينفذو ده , فشوفي لو فيه اجراءات قانونية ضده  ,باعتبار بيضرب زوجته و يأذي اولاده , وارجوكي  متخليش الشفقة و رقة القلب تمنعك من انه يتعاقب , لو انتي مسامحاه فحرام عليكي اولادك

 

• لو ده كمان مفيش سكة منه , فلازم تشوفي حد من قرايبك يتدخل عشان ينقذك من العذاب ده

 

• لو مفيش امل في اي سبيل قانون , فممكن تفكري في فكرة الهروب من البيت مع اولادك , وتروحي مدينة تانية ميعرفكيش فيها و تعيشي هناك , هي فكرة مجنونة لكن قد تحل المشكلة

 

 

انا عارف ان ظروفك صعبة , وانك كنتي ضحية لانسان مضطرب نفسيا  ,لكن صمتك قدام معناه قتل لاولادك , ارجوكي متسكتيش