العنوان :  وش فقر

القسم: #الاجتماعي

الرقم: 64

السؤال:

 

انا اتخطبت من سنة و 4 شهور وبعدها حصل حاجات حلوة ووحشة زي اي حد في الدنيا . المشكلة ان عدد من صديقاتي وقاريبي بيقولو اني وش فقر علي خطيبي . مع ان فعلا ربنا كرمه جدا مع الخطوبة و شغله اتحسن

 

خطيبي بيقولك سيبك يا بنتي من الهبل ده وهو متمسك بيا جدا بس الكلام بيقهرني خاصة بييجي من ناس بحبهم

​

هل فعلا فيه حاجة اسمها كدة

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

مفيش اي حاجة اسمها "وش فقر" . 

 

لا في الدين ولا في العلم ولا في المنطق ولا في علم النفس . .

 

كل اللي تبجح و قالك الكلام ده , هو إنسان يفتقد لأدني مقدار من الذوق و الإحساس , بل و الفهم كمان . .

 

للأسف اي حد بيردد الكلام المتخلف ده , لا يطلق عليه إلا : جاهل . .

 

أيوة جاهل , ولو معاه شهادة  الدكتوراه من جامعة هارفارد . .

 

مش بس جاهل , ده كمان مش فاهم "ألف باء" دينه , ومعندوش وعي او إدراك بالأسس اللي علمهالنا الرسول صلي الله عليه وسلم

 

و هما ان كانو غلط بلسانهم الطويل , فانتي غلطتي انك سكتي , طيبة قلبك اللي عمقت المشكلة , و كان المفروض من أول يوم تقطعي لسان اي جاهل يقول كلام زي كدة . .

 

تعالي اشرحلك  التفاصيل . .

 

----------------------------------------------------------------------------------

 

فيه حديث مهم عن الرسول صلي الله عليه و سلم ( لا عَدْوَى وَلا طِيَرَةَ وَلا هَامَةَ وَلا صَفَرَ ) رواه البخاري .

 

و اللفظ الثاني (وَلا طِيَرَةَ) معناه ان الشخص لا يتطير , يعني لا يتشائم من شئ ما , لأن العرب قبل الرسول صلي الله عليه وسلم كانو يتطيرون , يعني كان لما يخرج يروح مشوار يبص علي اول طائر في السما , لو وجده مشي يمين , يتفائل و يكمل المشوار , لو وجده طار ناحية الشمال , يتشائم و ميروحش المشوار . .

 

و لما الرسول صلي الله عليه و سلم نهي عن التشائم بكل أنواعه , فده لأنه من أساسيات العقيدة , لأن اللي بيؤمن ان الطائر ده هيعمل مشكلة , او ان يوم التلات نحس  ,او ان يوم 13 في الشهر يوم مش كويس  ,او ان فلان اللي شفته الصبح قفل عليا اليوم , او ان فلان ده وشه فقر , هو عنده مشكلة حقيقية في العقيدة . .

 

كل الافكار المتخلفة ديه تتعارض مع أسس العقيدة , ان المقادير بيد الله وحده , لا البومة بتفرق في حاجة , ولا نعيق الغراب , ولا يوم 13 فيه مشكلة , ولا ان برجك بيقولك متخرجش النهاردة علي الشغل . .

 

وبالتالي اي حد يقول عليكي ان وشك فقر , هو جاااااااااااهل , وكلمة جاهل هي اكتر كلمة مؤدبة انا اقدر اوصف بيها الخلل اللي في دماغ اللي يقول كدة , لو تركت لنفسي العنان هقول كلام غير مناسب علي الإطلاق   . .

 

عارفة رواية "قنديل أم هاشم" ؟ ؟  عارفة الست العجوزة اللي كانت عايزة نقط من زيت القنديل اللي في مسجد ام هاشم عشان تنقط بيها في عين بنتها , عشان عينها تخف ؟ ؟

 

اهو كل واحد بيقول انك نحس علي خطيبك , لا يقل جهل عن الست العجوزة ديه , علي الاقل الست ديه كلامها يتعارض مع العلم , فما بالك باللي كلامه يتعارض مع العلم و الدين و المنطق . .

 

ولما تحطي في بالك ان اللي بيقول كدة جاهل , هتعرفي كذا حاجة بالغة الأهمية :

 

 

• إنك أولا لازم تعامليهم  , زي ما بتتعاملي مع الشخص الجاهل , هو لما مهندس متخصص , يكون واقف في موقع البناء , وبيشرف علي سمك عمود الخرسانة , واللي عمل له تصميم دقيق , وييجي واحد من العمال ويقوله يا هندسة العمود شكله خاسس شوية , عايزين نحط فيه كمان سيخين تلاتة حديد , المهندس هيرد عليه يقوله ايه ؟ ؟

 

 

 

• اياكي تتضايقي من جواكي . . لو ان طالب دراسات عليا , ضيع 4 سنين من عمره في دراسات عميقة , لغاية لما وصل للرسالة اللي اتعملت في ملف صغير من 20 صفحة مثلا , وجه واحد "أمي" ميعرفش يفك الخط , وقاله بقي ديه الرسالة اللي ضيعت عليها 4 سنين من عمرك , اما انت خايب . .

 

 

 

• لما يستمرو في الكلام ده , سكوتك وقتها يبقي غلط , لأن معروف ان الشخص الطيب الهادي, الناس بتتمادي في إنهم يؤذوه , بينما الشخص طويل اللسان , اللي محدش يقدر يدوسله علي طرف , الناس بتكون حذرة معاه . .

 

 

• لما حد يستمر في الاسلوب الغير مقبول ده , يبقي فورا اقطعي علاقتك معاه , ومفيش مشكلة تكون قطيعة لمدة سنين , طالما هما بيتطاولو بالاسلوب المتخلف ده . .

 

​