مضطرة لخلع الحجاب
الرسالة السابقة
العنوان : مضطرة لخلع الحجاب
القسم: #الديني
الرقم: 04
السؤال:
متفقة جدا ان خلع الحجاب حرام ومتفقه جدا اننا لازم نحافظ ع دينا .. بس انا ظروفي مختلفهه عارفه كمان ان كلمهه ظروفيي ديي تافهه بس بججد انا حالهه مختلفه تمام
اولا انا والدي ووالدتي متوفيين من صغري معرفش حد من عيلتي خالص ولا في اصلاا
اتربيت مع عم محمد بوابنا بعد موت بابا ولما كبرت اشتغلت
ومع زيادهه شغلي طلعت برهه مصر كنت بصرف ع نفسي بالعافيهه اتفوقت فمجالي جدا بس المرتب كان بيقعدني اكتر من 4 ايام بالجوع
كان لازم اقبل السفر علشان اقدر اكمل حياتي شروط الشركهه ممنوع الحجاب وناا كان لازمم اضحيي
مكنش معايا حد فمصر يقف جمبي
انا مدمراني حرفيا فكرهه اني بقيت من غيير حجاب بقالي 4 سنين بحاول ومش عارفهه حتا اغير الشركهه لان كل الشركات ال تقبل بتفوقي دهه شروطها عدم الحجاب
مع اعلم اني مريضه وبتالج من كذا حاجهه ومصاريفي كتير.. هل اقعد من غير شغل واسيب كل حاجهه للموت ولا اكمل انا حرفيا مش عارفهه افككر
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
فيه صلاة اسمها "صلاة الخوف", واللي تم سرد خطواتها في سورة النساء, وهي الطريقة اللي بنصلي بيها الصلوات العادية الخمسة , ولكن في حالة الحرب . .
و العلماء قالو ان ديه يتم أدائها في حالة مواجهة العدو بالفعل , وفيها خطوات ان الجيش بينقسم نصفين نصف يصلي و نصف يراقب العدو , وبعد ركعتين يعملو تبديل و هكذا . .
ايه علاقة ده بسؤالك ؟ ؟
علاقته ان العلماء استنتجو منها مبدأ مهم جدا في الاسلام , ومفيهوش اي نقاش . .
ان مهما كانت الظروف قاسية , عليك انك تلتزم بشرع الله . .
يعني حتي لما يكون الجيش الاسرائيلي في الناحية التانية من خط بارليف , قوم "صلي" واوعي تكسل عن الصلاة , حتي لو بشكل مخفف عن الطريقة العادية . .
بل ان في الشرع ,لو شخص مشلول بالكامل , ومش قادر يحرك اي جزء من جسمه , ساعتها هيصلي بعينيه , يعني برضه ميقدرش يسيب الصلاة . .
كلامنا دلوقتي مش عن الصلاة , لكن عن الحجاب , واللي نقدر نعمل عليه نفس القياس . .
و ده معناها ان انتي بتركك للحجاب بترتكبي ذنب مستمر , ومكملة فيه , و مفيش نية لتركه في القريب العاجل , والمشكلة ان مفيش اي عذر مقبول . .
---------------------------------------------------------------------------
وقبل ما نتكلم علي الحل , عايز بس اوضحلك ببساطة مشكلة وضعك الحالي . .
أولا انتي بتعملي نوع من المعاصي , اللي ذنوبه بتتضاعف رغما عنك , يعني لما واحد يقعد في البيت و يشوف فيديو كليب فده ذنب بينه و بين نفسه , وليه مقدار معين من السيئات . .
لكن لما واحدة تخرج من بيتها من غير حجاب , ففعليا كل شاب و رجل يشوفها , هو ليه ذنب , وهي ليه مثله , فشوفي العداد بيقول كام . .
و كل واحدة شافتك , وانتي شجعتيها علي فكرة ترك الحجاب , حتي لو متكلمتيش معاها اساسا , لكن هي تشجعت لما شافتك , فشوفي سيئاتها بكام و اجمعي عندك . .
و كل شاب بصلك و بص لغيرك من غير المحجبات , و ده عمل تأثير تراكمي في علاقته السلبية بزوجته (وده بيحدث) , فانتي ليكي نصيب من المشكلة ديه . .
كل طفلة شافتك و اعجبت "بجمالك" و قررت انها لما تكبر متتحجبش ابدا , وبالفعل نفذت ده لما كبرت , فانتي كمان ليكي نصيب في المأساة المستمرة ديه . .
واخدة بالك ان الذنب الفردي , يختلف تماما عن الذنب مع الناس . .
بل ان بعض العلماء قالو ان الاصرار علي الصغيرة يجعلها كبيرة ,يعني فيه فرق بين واحد بيحاول يمسك لسانه انه ميكدبش , وفجأة وقع في الكدب من غير ما يقصد , وبين واحد هو مستمر علي الكدب و مش هامه حد اصلا . .
فالخوف انك من النوع التاني , اللي يوميا بتخرجي بشعرك عادي , وانتي ناوية ان بكرة و بعده و الشهر جاي هتكملي علي نفس الحوار , ده اسمه "إصرار علي الذنب" , واللي بيجعل الصغيرة (ده لو كان عدم الحجاب صغيرة) بيجعلها كبيرة , يعني راسها براس الزنا و القتل و العياذ بالله . .
و طبعا عدم الحجاب بيجر معاه شوية حاجات معاه , برفان , علي هدوم ضيقة , علي ضحك مع زميلي في الشغل , علي حضور البارتي بتاع فلانة , علي كلمتين و هزار علي الواتس , و العداد شغال وانتي مش واخدة بالك . .
---------------------------------------------------------------------------
و هنا هتقولي انتي سؤال . .
مش لما اكون غير محجبة و محترمة , احسن ما اكون محجبة و سافلة , انت يا ادمن متعرفش بعض المحجبات بيكونو عاملين ازاي . .
و هنا لازم اسيب الكيبورد و اضرب كف علي كف . .
هو انا لازم اقارن بين حاجتين الاتنين زي الزفت . .
ما طبعا فيه محجبات و زبالة , وفيه كتير بنات بتلبس النقاب بس عشان يعرفو يعملو اللي عايزينه , واخلاقهم مخيفة . .
بس انتي شايفة ان هو ده القياس ؟ ؟
هو انا لازم اقارن بين السل و الجدري ؟ ؟ بين السرطان و الايدز ؟ ؟ بين اشيل 3 مواد او 5 مواد ؟ ؟
مفيش خيار اسمه اكون محجبة و محترمة , وخلقي بيتضرب بيها المثل ؟ ؟
طبعا فيه , وهتلاقي مئات الآلاف من البنات المحترمات , اللي بيجمعو بين الحجاب بمواصفاته السليمة , وبين الخلق السليم , وكمان انهم شيك و بيهتمو بتناسق الالوان و نضافة هدومهم , وبين النجاح العلمي و العملي في حياتهم , وانهم محافظين علي بيتهم و اسرهم بشكل جميل . .
فيه و الله مئات الالاف من حالات النجاح المبهرة , بس انتي مش عايزة تشوفي الا من منظور واحد . .
---------------------------------------------------------------------------
ولما هنبص في كلامك , هنكتشف ان فيه عدد من البدائل موجودة , بس اخشي انك مشفتيهاش , او انك بتتجاهليها , لان احيانا الانسان بيكون عايز اختيار معين , عقله بيعمل ما يسمي "التذكر الانتقائي", واللي بيقنعه ان ده هو الاختيار الوحيد , وان مفيش اي بديل تاني , بينما هو لو دور هيلاقي بالفعل بدائل موجودة . .
لا شك ظروفك القاسية كانت متعبة جدا , و"قاصمة" للضهر , بس زي ما قلنا , مفيش عذر للاسف , وانتي حالتك مش هتكون اصعب من شخص راقد علي السرير طول حياته و بيصلي بعينيه . .
وفاة والديكي "رحمهما الله" , وتجاهل باقي اسرتك ليكي , ونشأتك في بيت غريب , هي مأساة كبيرة , وذنب لا يغتفر لكل افراد اسرتك , واللي سابو بنتهم بتعاني بشكل كبير هنا و هناك . .
و من كرم ربنا عليكي انك ما رحتيش في سكة ابعد من الطريق الحالي , فيه بنات بتجعلهم ظروفهم يروحو لمساحات بشعة لا يمكن ذكرها , و يظل منقدرش نقول عليهم انهم "غصب عنهم" او "مظلومين" . .
و ده لأن المولي تبارك و تعالي أعطي الفرصة كاملة لجميع البشر , للوصول للجنة , او للسقوط في غضبه والعياذ بالله , وده معناه ان مفيش حد معذور للاسف , والا كنا نلتمس العذر لفرعون , اللي وجد ان سيدنا موسي جاي يتحداه و يزلزل العرش من تحته "فاضطر" يحاربه . .
---------------------------------------------------------------------------
وقبل ما نتكلم عن الحلول و البدائل , خليني اقول اني سعيد انك من جواكي عندك الدافع للتخلي عن المعصية ديه , والا مكنتيش بعتي سؤالك هنا تسالي علي حل , و كمان انك قلتي بالحرف (انا مدمراني حرفيا فكرهه اني بقيت من غيير حجاب بقالي 4 سنين) . .
وجود الوازع الديني ده , علامة علي إن المولي تبارك و تعالي يحبك , وانه (يبْسُطُ يدهُ بِاللَّيْلِ ليتُوب مُسيءُ النَّهَارِ، وَيبْسُطُ يَدهُ بالنَّهَارِ ليَتُوبَ مُسِيءُ اللَّيْلِ) بنص الحديث اللي رواه مسلم . .
الله تبارك و تعالي يبسط يده ليكي لمساعدتك علي التوبة , والدليل ان من جواكي عندك النغزة اللي بتلومك علي عدم الحجاب , وبتدفع دفعا ليه . .
طب ايه الحلول . .
فيه عدد من الافكار , اللي ممكن تتناوليها و تحطيها علي معيار "الممكن و المتاح" , و تشوفي ايهم قادر علي خل مشكلتك . .
اكيد لازم نقول ان وضعك صعب , مش هينفع نتجاهل وفاة والديكي , او تخلي اسرتك عنك ,او اضطرارك انك تشتغلي و تصرفي علي نفسك , ولكن مع كل ده , فيه اولويات , وفيه نقاط حمراء مفيهاش نقاش , ومنها كل اللي بيؤدي الي غضب الله والعياذ بالله . .
تعالي نفكر في البدائل ديه , وحتي لو هما شكلهم "مستحيل" تعالي نفكر بهدوء وروية , ونشوف مين فيهم ممكن . .
بل حتي ممكن نفكر في عمل "تعديل" لاحد البدائل اللي هيتم ذكرها , علي اعتبار ان مالا يدرك كله , لا يترك جله . .
بس ارجوكي وانتي بتفكري , حطي قدامك اليوم اللي كلنا هنمر بيه , وهيتروكنا فيه كل واحد لوحده , من غير لا صديق ولا قريب ,مش معاكي يا فلوس ولا منصب ولا وظيفة , ومفيش الا حاجة واحدة بس هي اللي هتحدد انتي في نعيم او جحيم العياذ بالله . .
كتير من الناس مش بيحبو يفكرو في الموت , وده السبب الرئيسي في تسويف التوبة , والاصرار علي الذنب . .
---------------------------------------------------------------------------
ايه بقي البدائل :
- اولا انك تنشفي دماغك و تلبسي الحجاب , وتروحي نفس الشركة . .
فكرة قد تبدو مجنونة بس جربيها , هما محتاجينك وانتي عندك خبرة بالفعل اربع سنين , فمش سهل يقولولك يللا مع السلامة , ممكن يحصل نوع من الضغط عليكي او يقنعوكي , بس انتي خليكي عنيدة , ممكن وقتها يوافقو , او حتي يغيرو موقعك في العمل بحيث تكوني بعيدة عن العملاء مثلا , لو كانو هما بيتقمصو من الحجاب . .
- شوفي شركة تانية في نفس المجال , ما اظنش ان كل الشركات في الدولة اللي انتي عايشه فيها بنفس الغباء , اي دولة في العالم بتقبل الحجاب عادي , حتي لو عايشة في الفاتيكان , اكيد لو دورتي هتلاقي , بس انتي محتاجة يكون عندك نية حقيقية للبحث و يكون ربنا مطلع عليها , وقتها هتلاقي . .
- شوفي شركة تانية في مجال مختلف , انتي مذكرتيش انتي شغالة ايه , بس انا مش شايف فيه اي مجال في الدنيا بيشترط عدم الحجاب , ده حتي في مجال ضيافة الطيران , المضيفة اللي بتتحجب بينقلوها اقسام ادارية بس تظل شغالة
شوفي مجال مختلف و ثقي ان ربنا مش هيخذلك ابدا , وحتي لو لقيتي شغل متعب اكتر , او بمرتب اقل مفيش مشاكل , والحديث واضح اللي رواه بن حنبل (إنك لن تدع شيئاً لله عز وجل إلا بدلك الله به ما هو خير لك منه) , فيه رواية تانية ضعيفة بنفس المعني (مَنْ تَرَكَ شَيْئًا للهِ عَوَّضَهُ اللهُ خَيْرًا مِنْه)
بالمعني واضح , والوعد يأتي من الرسول صلي الله عليه وسلم ,اتركي جمالك و رغبتك في عدم الحجاب , اتركيها لله , وربنا هيعوضك خيرا منها اكيد , خدي بالك انتي لو شكيتي في الوعد ده يبقي عندك مشكلة في العقيدة نفسها , ده الرسول اللي وعدك مش حد عادي . .
- فكري تروحي بلد تاني , سواء بلد عربي تتفهم الحجاب , او بلد اسلامي زي تركيا او ماليزيا ,او حتي لو فيه فرصة تروحي اوروبا , هتلاقي الجالية العربية هناك واسعة جدا , وفرص العمل متاحة . .
- هل ممكن ترجعي مصر ؟ فكري فيها ممكن تلاقي بديل , صحيح ملكيش حد هناك ,بس مفيش مشاكل ترجعي و تعيشي في مدينة تانية , والحياة في مصر ارخص شوية . .
- فكري تغيري مجال عملك , يعني طالما انتي شغالة في مجال يستحيل الحجاب معاه (وانا مش عارف فيه اصلا حاجة كدة ولا لا) فكري انك تطوري نفسك و تاخدي كورسات في مجال معين , وتشتغلي في مجال تاني معندوش الشرط ده
- لو فيه امكانية الشغل اونلاين , لو عندك مهارات الترجمة او التصميم او البرمجة او التسويق , ممكن يكون فيه فرصة تشتغلي من البيت بمرتب معقول
---------------------------------------------------------------------------
الحلول مش هتخلص , وانتي هيكون عندك نظرة اوسع مني في ايجاد حل , لانك انتي صاحبة القضية , وعارفاها عن اي حد تاني . .
بس هي الفكرة هل انتي واثقة في ان ربنا هينصرك ولا لا , ده بس الحوار كله . .
شوفي الاية التانية و التالتة في سورة الطلاق :
(وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ )
وبالرغم من ان الآيات تم ذكرهم في خضم أحكام الطلاق والعدة و هكذا , إلا انها شديدة التطابق مع حالتك , ومع اي حالة شبيهة , وانتي هتندهشي من مدي ملائمة كل كلمة فيها مع الموقف عندك . .
في الاول ربنا بيقول (وَمَن يَتَّقِ اللَّهَ يَجْعَل لَّهُ مَخْرَجًا) يتق يعني يخاف , اللي بيخاف من ربنا , ربنا هيجعل له مخرج . .
خدي بالك (المخرج) بيكون من حاجة ملهاش حل , يعني من ازمة انتي مش شايفالها حل او سبيل "للخروج" من الازمة , هنا ربنا يقول , ان يا عبد لا تقلق , اللي يخاف من ربنا , ربنا هيرزقه هذا المخرج . .
وبعدها . .
(وَيَرْزُقْهُ مِنْ حَيْثُ لَا يَحْتَسِبُ) , ربنا ذكر الرزق , لانه عارف انه هو اغلب اسباب بعدنا عن طاعته , وتمسكنا بالمعصية , هنا ربنا يذكر ان هو اللي هيرزق , لا تقلق يا عبد . .
مش بس كدة , ده كمان قال (مِنْ حَيْثُ لَا يَحْتَسِبُ), يعني الرزق هييجي من مكان انتي هتندهشي منه , هتيجيلك فرصة العمل من اخر شخص كنتي تتوقعي انه يتصل بيكي , هتجيلك مكافأة من مصدر عمرك ما فكرتي فيه , هتجيلك المهنة في مجال مفكرتيش فيه في حياتك , (مِنْ حَيْثُ لَا يَحْتَسِبُ) يعني هتكون مفاجأة ليكي , مكافأة انك اتخذتي امر ربنا اولوية عن اي حاجة تاني . .
و بعدها . .
(وَمَن يَتَوَكَّلْ عَلَى اللَّهِ فَهُوَ حَسْبُهُ) , عارفة يعني ايه واحد (يوكل) محامي , يعني يخليه هو اللي بيتصرف باسمه و بقراراته من غير ما يرجع اليه . .
و هنا مع الفارق , التوكل علي الله , معناها بالبلدي (ارمي حمولك علي الله) , (انسي همومك و اعرفي ان ربك هو اللي هييسرها) من الآخر . .
يعني متفكريش في الايجار ولا الدوا , ولا القسط , ولا اي حاجة , ارمي ده كله علي ربك , وثقي انه هيجيبلك الحل , طبعا ده مع العمل بالاسباب , مش الواحد يريح في البيت و يكسل . .
انتي قدامك الاختيار , بين طريقين . .
واحد فيهم هيكون ربنا وكيلك , وهو هيختارلك , وانتي هتنامي مطمنة ان رب العالمين معاكي . .
وفيه نفس الوقت , انتي عارفة انك ماشي في طريق , آخرته رضا ربنا و الجنة , وبالتالي لو جالك الموت في اي وقت , انتي جاهزة للقاء الله . .
الخيار التاني مرعب , اولا انتي هتعيشي في الكوكب علي مسؤوليتك , يعني انتي تخليتي برغبتك عن رعاية و حماية ربنا ليكي , ومنك لباقي للناس و مشاكلها بشكل مباشر . .
والاسوء انك يوميا بتجاهري بمعصيته ,نوع من التحدي , شعري باين , المكياج , البرفان , من غير ما تعملي ادني اهتمام لما أمرك به , وانتي عارفة ان ده طريق آخرته مخيفة , ربنا يحفظنا جميعا . .
ولو حسيتي الموت بيقرب منك , مش هتكون عارفة هتقولي اي لربك , اللي هيسألك علي مجاهرته بالمعصية بشكل يومي . .
من فترة نشرنا بوست تفصيلي عن الحجاب , اقريه هتلاقي فيه تفاصيل إضافية , هنا الرابط