العنوان : المعاناة المستمرة

القسم: #الاجتماعي

الرقم: 24

السؤال:

 

سني 21سنه

 

لما كنت ف 2ثانوي ارتبطت بواحد جارنا كان واخد دبلوم شكله مش حلو انا مهمنيش كل ده يمكن كنت سازجه اوهبله عشان كانت بتعامل بحسن نيه

 

كلمته وحبيته فضلنا سنه مع بعض بعد كده طلب مني حاجات مش كويسه امارفضت مره واتنين واكتر هددني يقول لاهلي ويفضحني لومعملتش كده  انا مرضتش اعمل كده قال لاهلي وفضحني قدام قرايبي

 

مش عايزه اقولك قد ايه اناا عشت اسود ايام حياتي من تعذيب واهانه وحبس وجرجره من ع السلم

 

كل يوم ببقي بصلي واخويا يحط رجله فوق دماغي ويدوس جامد و ضرب بكرباج

 

حاولت اهرب مرضتش عشان محدش يقول كسره رقبته اخواتهاا وكلاام كتييير

 

عمي كان يقولهاا ادبحها دي فاجره عمتي تقولها ارميها من فوق واخواتي البنات يقوله دي مش محترمه جابتلنا العار اغسل عارك بالرغم اخواتي متعلمين وجامعات

 

انا توبت وبقيت اصلي واقرب من ربنا بس كان عذاب اهلي ليا بيكرهني ف نفسي لدرجه حاولت اتنحر بس معرفش اومقدرتش اضيع عمري

 

ماما 54سنه كانت كل يوم تضربني اول تصحي وتقولي قومي قامت قيامتك اي مخليكي نايمه لحد6الصبح كانت والله كل يوم تصحيني 6 وتمرمط فياا

 

كانت تتكلم باعلا صوت انتي ملكييش حق ف البيت ده عينك مكسوره انتي مش كلمتي فلااان انتي نسيتي نفسك وتقولي كلاام وسخ ياازانيه  يااكذا واناا كنت ضعيفه معنديش غير دمعتي

 

كنت اجي ارد واقولها حرام عليكي تجبني من شعري هتعرفيني الحلال والحرام بقت تعامل اختي اصغر مني احسن مني كل حاجه تقول عليها تجبهالها الكلام الحلو ليهاا اللبس الاكل تخرج مع صحابهاا كل حاجه متاحه ليها انا كانت ترميلي بواقي الاكل اللي ذايد منهم باكل واقول الحمدلله

 

اختي دي كانت بتكلم واحد وكنت اعرف بس مرضتش اتكلم واقول لاهلي كنت بقولها اسراري باعتني اول محطه كانت اقرب وحده لياا  كلااام كتتير اووي

 

اتقدملي ابن خالي بعد ماعرف كل المشاكل دي وانا وافقت بس ماما بقاا قالته دي مش محترمه ولاتنفع معاك ف بيت

 

 الكل طبعا هيقولي انتي غلطانه ومش غلطانه اها غلطت اماوثقت ف واحد قذر وكلب زي ده بس ماغلطتش اناا مرضتش اعمل حاجه غلط وكلنا عندنا مشاعر وكلكم حبيتوا ومحصلش نصيب

 

انا اهلي اسوأ اهل ف الدنياا انا بتمني كنت ابقي يتيمه ع الاقل كنت هلاقي الغريب حنين محدش يقولي بكره تندمي ع اهلك لان بصراحه مش شايفه انهم اهل كويسين ولابيحبوني

 

واناا يوم ماهتجوز مش هرجع للبيت ده تاني انا لياا 5او6سنين بتعذب وراضيه ديما ببين للناس اني اسعد وحده ومش بيهمني حاجه عشان مش عايزه شفقه من حد 

 

بس ربنا كبيير يمكن اماتكلمت وقولت الكلام ده ارتحت

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

"حماقة أهل في التعامل مع مشاكل شابة مراهقة , مما يدفعها للاكتئاب الحاد"

 

ده بيكون تشخيص كتير من حالات اكتئاب المراهقات  , واللي يتطابق بشكل كبير مع حالتك . .

 

الحماقة اللي بيكون دافعها الحقيقي هو "الشكل قدام الناس" مش المعيار الحقيقي للصح و الغلط . .

 

يعني ببساطة لو انت البنت عملت شئ ذنبه قليل و شكله مخيف , هيكون اسوء بكتير عندهم من انها تعمل شئ ذنبه كبير و شكله مقبول عند الناس . .

 

فلو ان بنت بتشرب سجاير مثلا , كتير من الاهالي بيتعاملو معاها علي انها "سافلة و منحطة و تربية قذرة" بالرغم من ان السجائر من الصغائر . .

 

وفي نفس الوقت لو البنت بتتكلم عن واحدة مش موجودة (وده اغلب سلوكنا للاسف) فمحدش اصلا هياخد باله , مع ان الغيبة من الكبائر . .

 

فالمعيار اللي الاهالي بيحكمو عليه هو : الناس هتقول ايه , مش ربنا هيقول ايه . .

 

طبعا غير المعيار العنصري في التفريق بين الذكر و الانثي في الذنوب . .

 

فلما الشاب يتعرف علي 7 ولا 8 بنات , يبقي هو النمس اللئيم و ديك البرابر , و ابن ابوه بصحيح , وتبقي امه فرحانه و فخورة بيه  ,ولما البنت تتعرف علي شاب , تبقي هي العاهرة اللي جابت شرف اخواتها في الارض . .

 

اكيد ده ذنب و ده ذنب , ولا يجوز لواحدة تتعرف و تصاحب شاب , بس انا باتكلم عن المعايير المختلة في المجتمع . .

 

و الكارثة في التعامل مع البنت لما تغلط , باسلوب شديد الوضاعة والغباء   . .

 

فهما بغبائهم الشديد , كل اللي بيعملوه فيكي انهم بيزقوكي اكتر انك تكرهيهم و تسيبي البيت , بيخلوكي تكفري بحياة الاسرة الهادئة , بل بيخلوكي تندمي انك موافقيتش الحيوان الاول اللي دعاكي للفاحشة . .

 

اب وام واخوة مفيش عندهم اي قدر من الذكاء الاجتماعي  , والفهم السليم لاسلوب الاحتواء و ادخال الفرد لما يغلط في حضن الاسرة عشان يفهم الصح ايه و الغلط ايه . .

 

لا  , هما تعاملو باسلوب شديد الغباوة , واللي بس عشان يرضي غرورهم المريض  , يجعلهم يشعرو بانتصار وهمي عليكي . .

 

-------------------------------------------------------------------------------

 

 

ومعناه بالكامل هو  : ان اي شخص يتهم بنت انها قامت بفعل الفاحشة , فلازم يجيب 3 شهود غيره وهو يكون الرابع , ويقسمو امام القاضي انهم شافوها بعنيهم بالفعل . .

 

مش "خمنو" , ولا "توقعو" ولا "حسو " , لأ شافوها بالكامل  . .

 

ولو ان الشخص اللي اتهم البنت بالفاحشة معرفش يجيب 3 كمان  ,ساعتها القاضي يجيب الشخص اللي بلغ انه شاف ده  , ويجلده 80 جلدة وسط الناس عقابا ليه انه قال الكلمة القذرة ديه . .

 

بل المدهش ان لو واحد ماشي في الشارع , وتصادف انهم شاف بعنيه حادث زنا متكامل  - ربنا يحفظنا – فبرضه ميقدرش يبلغه عنه القاضي الشرعي , والحل انه يروح بيتهم , ويدعو لهم بالهداية . .

 

ونفس الموضوع لو اتنين ماشيين مع بعض , ونفس الموضوع لو تلاتة . .

 

فالحد الادني انهم يكونو 4 ماشيين في الشارع و يشوفو ده . .

 

لما انا كنت صغير و عرفت الحكم ده اندهشت , وسألت الشيخ في المسجد  ,قلتله بقي اكتر من واحد يشوف جريمة , وميبلغش عنها  , ويفضلو ساكتين , طب ليه كدة ؟ ايه الحكمة ؟ ؟  , ازاي يعني هيتصادف يكونو 4 ماشيين و يشوفو ده ؟ ,  ده احتماله صفر في المية ؟ كدة مش هيكون فيه اي تبليغ عن اي حادث زنا في الشرع الاسلامي ؟ ؟

 

 

قالي لان ربنا عايز الاعراض تتستر , عايز اسرار الناس تكون محفوظة , عايز المجتمع يحافظ علي نفسه اكتر , عايز الاتهام بالتهمة الشنيعة ديه يكون في اضيق الحدود , مش لبانة في بق الناس . .

 

فربنا سبحانه و تعالي يريد ان المجتمع يكون مستور , و بعض الاهالي بغبائهم بيستمتعو بنشر الاتهامات القذرة بلا حساب . .

 

ولو كنا في مكان يتم فيه تطبيق الشريعة , كان القاضي هيجيب اسرتكم كلها فرد فرد , واولهم ابوكي الكبير و امك المريضة واخواتك المتعلمين , ويتجلدو 80 جلدة قدام الناس , لانهم قالو شئ مشافوهوش . .

 

ربنا عالم بالضعف الكبير في نفسية المراهقات , والروح الهشة عندهم , فهو يراعي هذا الضعف , لكن ابوها وامها مش فاهمين اي شئ من ده . .

 

ومن سنين قرأت فتوي لشخص في السعودية , بيقول يا شيخ انا عملت الفاحشة وعايز اتوب , ايهما اولي اني اروح اسلم نفسي للقاضي الشرعي عشان يجلدني 100 جلدة , ولا اني اتوب الي الله في صمت من غير ما اي حد يعرف , قاله من غير تردد توب الي الله , ومتقولش لاي حد , وثق ان ربنا هيغفرلك . .

 

---------------------------------------------------------------------------

 

فحاليا انتي عايشة في وضع لا يمكن وصفه , من معاناة مستمرة , و عذاب نفسي رهيب , وألم لا ينتهي , والمأساة انه جاي من الناس اللي المفروض هما سترك و غطاكي و سندك . .

 

يعني جاي من الناس اللي اصلا الشخص بيروح يترمي في حضنهم لما يقابل مآسي الحياة , ده يجعل الشخص يسأل نفسه  , طب هي هتروح فين تشتكي و تتكلم . .

 

والمفروض اخوكي اللي يكون في جيلك و متفهم شوية , ودارس في الجامعة ,  المفروض يكون اكتر تفهم  وتعقل , الا انه واضح انه ماشي في ركب الجهلة من غير تفكير , مع العذاب الغير متوقع اللي بتلاقيه منه . .

 

وأمك اللي قد تتفهم طبيعة الانثي , في السن الحرج ده , اضطرت انها تعزف علي نفس اللحن القاسي , من الكلام الجارح اللي بيقتلك بالتدريج  . .

 

والغريب فكرة رفض زواجك , لان حتي الاسر الاكثر جنونا و تشدد , بيرحبو فورا بفكرة "التخلص" منها , وان جوزها يشيل الشيلة ويتعامل معاها , خاصة انه بالفعل عارف "الحوار كله" . .

 

فرفضهم للزواج يوحي بنوع من "العقاب من اجل العقاب" , يعني مش مجرد "ذر الرماد عن العيون"  , لا ده تصرف مدهش لا يفسر الا انهم عايزين يقتلوكي بالحيا . .

 

يعني لا عايزين تتقبلو اعتذارها , ولا توبتها , ولا توضيح اللي حصل , ولا انها تتجوز , مستنيين ايه طيب ؟ تشوفو جثتها مقطوعة الشراييين ؟ ؟

 

وبالطبع انك "سترتي" اختك عن الكلام مع الشاب , ده تصرف ايجابي منك (بشرط تكون مش لسة بتكلمه حاليا) , لان مقابلة الاساءة بالاساءة لن يزيد البيت الا اشتعال عليكي و عليها . .

 

والمؤلم نفسيا , ان – واضح من كلامك – انك مش من البنات الضعيفة والمغلوب علي امرها , واللي تفرغ مشاعرها فورا , لكن من النوعية الصبورة القوية اللي مترضاش تظهر ضعفها , او حزنها ابدا . .

 

وده جعلك تتجنبي اظهار اي ضعف او حزن عليكي قدام زمايلك  ,و انك بتتسلحي بقناع السعادة و المرح , وممكن السخرية و عشان تظهري قدام زميلاتك في الكلية انك اسعد واحدة في الدنيا . .

 

و استمرار الشكل ده قد يؤدي لنتيجة نفسية كارثية , جهازك العصبي مش هيستحمل ابدا الضغط الغير معقول , والمعاناة المستمرة من تحمل عذاب البيت , وادعاء السعادة و الضحك مع زميلاتك , هتتجنني حرفيا  . .

 

مهو يا اما الشخص يكون سعيد في بيته و قدام الناس , يا اما يكون حاسس بالتعاسة في بيته , وبيعيط قدام الناس , لكن عزة نفسك اللي بتمنعك من البكاء و الشكوي و اظهار  المشكلة قدام زميلاتك , وبيمنع نزول دمعة وحدة من عينيكي تعبر عن الغليان اللي جواكي , هيؤدي حتما لانفجار رهيب . .

 

انتي بالوضع الحالي ,و بدون عمل "تنفيس" لغضبك و حزنك , ومع استمرار تراكم جميع المشاعر السوداء جواكي و استمرار البسمة علي وجهك قدام الناس , فانتي بتقتربي جدا من حالة "فصام" حادة (سيكزوفرينيا), او الاسوء "اضطراب ثنائي القطب" , واللي هتكوني فيه عايشة حياتين بالمعني الحرفي , وتبدأ ذاكرتك ووعيك في الاختلال  , وفي الفصل بين شخصيتين عايشين جواكي , وساعتها نقول اهلا بيكي في مستشفي الامراض العقلية . .

 

تغيير الوضع ده ضرورة عاجلة , ولازم تعملي المستحيل عشان يتصلح . .

 

 

 

و كمان عشان تعرفي ان مهما الشيطان حاول يدخلك من اي مدخل , اياكي تفكري في الاقتراب مرة تانية من نفس المساحة مهما كانت الضغوط . .

 

الله يغفر و يسامح و يكفر الذنوب , لكن يكون فيه نية صادقة و عزم أكيد علي التوبة  . . 

 

-----------------------------------------------------------------------------------

 

طب والحل ؟ ؟

 

انا اقدر بثقة اقولك حلول في "التوبة لربنا" او في "تحسين الحالة النفسية عندك" ,  لكن مش عارف هلاقي حل في التعامل مع الاهل بالعقلية ديه ولا لا . .

 

فحاولي تطبقي النقط الجاية ديه  , واللي هتحل النقطة الاولي اكيد (التوبة) , وغالبا التانية (الحالة النفسية) , واحتمال التالتة (تعاملهم معاكي)

 

 

• زي ما قلنا , هنحاول نصلح من نفس نقطة البداية , والجميل انك ذكرتي بالفعل انك تبتي الي الله بشكل كامل ,  واتمني انك تستمري و متتوقفيش , و مترجعيش للمساحة المظلمة في حياتك لاي سبب , وتحت اي ضغوط . .

 

-------------------------------------------------------------------------------------------

 

 

• الاصرار علي الشكل الإيجابي . .

 

-------------------------------------------------------------------------------------------

 

• اياكي تيأسي من طول أمد الخطوة التانية (المظهر المحتشم) , مفيش مشكلة انك تستمري عليها  سنين طويلة , القاعدة بتقول "لازال الباب يُطرق حتي كان ان ينفتح"

 

-------------------------------------------------------------------------------------------

​

 

• متنكريش ومتدافعيش عن نفسك و متجادليش معاهم ولا تبرري . .

 

-------------------------------------------------------------------------------------------

​

​

 

• حققي نجاح في حياتك هما يشوفوه , وياريت يكون نجاح من اللي "يدخل مزاجهم" , انا مش عارف طبيعة المكان اللي انتي عايشه فيه ومعاييرهم عاملة ازاي , بس شوفي ايه الحاجة اللي لما اهلك يشوفوها في اي بنت  , يفتخرو بيها . .

 

-------------------------------------------------------------------------------------------

​

 

• بعد ما تنفذي الخطوات الخمسة اللي فوق (ومش قبلها) ابدئي اتكلمي مع اقرب حد في اسرتك ليكي (ممكن تكون والدتك)  و قوليلها بالراحة كدة , انا اتغيرت و تبت الي الله و بقيت واحدة تانية , و (قولي اسمك) القديمة ديه ماتت خلاص   وانا بقيت واحدة تانية . .

 

​

-------------------------------------------------------------------------------------------

​

 

• لازم تنفسي غضبك . .

 

-------------------------------------------------------------------------------------------

 

 

• اياكي شيطانك يخليكي تفكري في اي خطوة جنونية من نوع (الهروب او الانتحار) الحمد لله ان باين من كلامك انك اعقل من كدة , وانك عارفة ان ده هو الدمار الكامل لكل حاجة في حياتك  . .

 

 

• خليكي متفتحة لفكرة الزواج , صحيح انهم رفضو قبل كدة ابن خالتك , بس انا واثق موقفهم هيتغير لما يشوفو واحدة جديدة قدامهم , بعد ما تكوني بالفعل طبقتي الكلام اللي قلناه  , وقتها لما يتقدملك حد محترم هما هيبدأو يفكرو بعقولهم , وانتي لو شفتيه مناسب متتردديش ,  لان ديه هتكون الخطوة الحاسمة لعلاج المشكلة من الاساس . .

 

 

• لما تتجوزي متقطعيش الحبال بينك و بين اسرتك , لو هما ظلموكي فانتي احسن منهم  ,لو هما لسانهم زفر فانتي محترمة من جواكي و مش هتقفلي باب التواصل معاهم , عامة ديه خطوة مستقبلية متشيليش همها دلوقتي

 

 

قبل ما اقفل الكلام , عايزك تفتحي كتاب الرحيق المختوم , وتقرأي حادث "الثلاثة الذين خلفو"

 

وهي قصة الصحابة التلاتة ( كعب بن مالك , مرارة بن الربيع  , هلال بن أبي أمية ) , واللي تخلفو من غير عذر عن غزوة تبوك , اصعب غزوات الرسول صلي الله عليه وسلم . .

 

لما رجع الرسول صلي الله عليه وسلم , جاء اليه المنافقين , واللي هما برضه مراحوش الغزوة معاه , لكن كانت اعذارهم هايفة و "مضحكة" , زي ما "الجد بن قيس" قال مش عايز اروح اغزو في تبوك لان بنات الشام جميلات جدا و انا خايف علي نفسي من الفتنة . .

 

لكن الصحابة الافاضل التلاتة , عرفو ان الغلط ميتصلحش بغلط تاني , وان اصلاحه الوحيد هو الروشتة العلاجية المكونة من (التوبة – الاعتذار – تغيير السلوك - الصبر) . .

 

ايه ده  ؟   احنا شفنا الخطوات ديه فين قبل كدة ؟ ؟  بنشبه عليها , صح ؟ ؟

 

خلينا مع قصة الصحابة التلاتة . .

 

وبالفعل هما تابو ربنا , واعتذرو للرسول صلي الله عليه و سلم , واستمرو في التزامهم مع الصحابة  بشكل مستمر , وصبرو عليه بالكامل . .

 

و الرسول صلي الله عليه و سلم – قبل ما تنزل الآيات بالتوبة عليهم – أمر الصحابة بالمقاطعة التامة ليهم   , محدش يكلمهم ولا يبص في وشهم رضي الله عنهم , وحتي زوجاتهم يعتزلوهم لغاية لما ربنا ينزل فيهم حكمه  . .

 

الصحابة التلاتة شعرو بالضيق الرهيب , ده مش ابوه زعلان منه , ولا اخوه بيقوله كلمه , ده الرسول صلي الله عليه و سلم بنفسه مش قادر يبص في وشهم  , لا هو ولا اي حد من الصحابة , ولما كان حد فيهم يلقي السلام علي حد من الصحابة  , مكنش حد بيرد امتثالا لأمر  الرسول صلي الله عليه و سلم . .

 

شئ يجنن بالفعل  , لما تحس ان خيرة اهل الارض مش عايزين يبصو في وشك , لما تحس ان الصحابة الكرام مش يعبروك عشان ذنب معين تم منك . .

 

لكن بذكائهم التلاتة , صبرو علي الروشتة العلاجية (التوبة – الاعتذار – تغيير السلوك - الصبر), ومحدش فيهم تخلف حتي عن صلاة الجماعة مع الرسول و الصحابة , ولسان حالهم بيقول , لو انتو مش هتبصولنا , احنا مش هنسيبكم لغاية لما ربنا يشوف مننا اننا بالفعل اتغيرنا . .

 

و فجأة نزلت الآية 118 من سورة التوبة , واللي زلزلت المدينة بالكامل , واللي بدأت بالتوبة علي المؤمنين بشكل عام , ثم اختص الله تبارك و تعالي التلاتة دول بذكر خاص لهم : 

 

(حَتَّىٰ إِذَا ضَاقَتْ عَلَيْهِمُ الْأَرْضُ بِمَا رَحُبَتْ وَضَاقَتْ عَلَيْهِمْ أَنفُسُهُمْ وَظَنُّوا أَن لَّا مَلْجَأَ مِنَ اللَّهِ إِلَّا إِلَيْهِ ثُمَّ تَابَ عَلَيْهِمْ لِيَتُوبُوا ۚ إِنَّ اللَّهَ هُوَ التَّوَّابُ الرَّحِيمُ )

 

واخدة بالك الوصف الرباني الدقيق لحالتهم النفسية  , شايفة التشابه بين اللي انتي حاساه و هما حاسينه  ,شايفة المصطلح الجميل في الآية (وَضَاقَتْ عَلَيْهِمْ أَنفُسُهُمْ)  , يعني حتي صدرهم كان اضيق من انه يستوعبهم , تخيلي . .

 

معقولة انتي مشكلتك هتكون اكبر من مشكلتهم  , اشك . .

 

لما نزلت الآية ارتجت المدينة بالهتاف و التكبير و الفرح الشديد , ولكي ان تتخيلي حالة  الفرح الغير معقولة اللي اجتاحت الصحابة الكرام وهما بيحتضنوهم ويرحبو بيهم , الصحابة نفسهم كانو متضايقين من مقاطعتهم , وكانو منتظرين ربنا يفرج عنهم هذا الكرب , ويخرجهم من سجنهم النفسي . .

 

ثقي ان زي ما ربنا فرج عنهم , فهيفرج عنك بالكامل . .

 

ثقي ان زي ما هما استخدمو روشتة (التوبة – الاعتذار – تغيير السلوك - الصبر) و نفعت معاهم , فانتي لو استخدمتيها هتنفع معاكي , مشكلتك اقل من مشكتلهم , و حل مشكلتك هيكون اسهل من حل مشكتلهم . .

 

بس اياكي تنسي ان الآية اللي بعدها علي طول بتقول ( يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ )

 

يعني الشئ اللي بتحتاجيه لنجاح تطبيق الروشتة  ,هو انك تتمسكي بتقوي الله , وتكوني صادقة مع نفسك

 

معنديش كلام تاني اقوله  ,مشكلتك صعبة ومؤلمة و تبكي القلوب , ولكن حلها انتي عرفتيه و انتي اللي عليكي تطبيقه

 

بالتوفيق يا رب