العنوان : التعديلات الدستورية

القسم: #السياسي

الرقم: 26

السؤال:

 

السلام عليكم ورحمة الله وبركاته  أخبار حضراتكم ايه 

 

بعد اذنكم  عايز أقرأ مقال عن المشهد السياسي الحالي بمصر وتحليل الأحداث الحاليه بما فيها تعديل الدستور ومد فترة الرئاسه وما سيترتب عليها في القريب

 

شكرا جزيلا لكم

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله و بركاته  , أهلا بيك  . .

 

التعديل الحالي المرتقب , هو التغيير العاشر اللي يحصل للدستور المصري , واللي تم وضعه في نهاية القرن التاسع عشر , وبالتحديد سنة 1882 , بعد الإحتلال البريطاني بسنة واحدة .

 

و في السنوات : 1923 , 1956 , 1958 , 1971 , 1980 , 2005 , 2007 , 2012 , 2014 , حصل تغييرات عديدة , إما بتعديل بسيط فيه , او إرساء دستور كامل جديد زي اللي حصل سنة 1956 بعد اسقاط الملكية , او 2012 بعد خلع مبارك . .

 

وللأسف دايما تعديلات الدستور بتكون مرتبطة بترسيخ سلطة الحاكم أكتر , وإعطاءه صلاحيات أكبر , والاستثناء الوحيد كان في دستور 2012 , واللي – علي عيوبه – كان الدستور الوحيد اللي وضعه نواب منتخبين بشكل حقيقي من الشعب , وهو الوحيد اللي أكد إن أي رئيس له مدتين فقط , وكل مدة 4 سنين . .

 

وفي 2014 لما تم تعديل الدستور بعد الإنقلاب, مكانش السيسي عايز يعمل تعديل في المادة الخاصة بمدة رئيس الجمهورية وقتها , عشان يتجنب إشعال نيران الغضب في صدور بعض المصريين اللي كانو لسة واثقين فيه , فسابها زي ما هي  , وهو عارف إنها مش هتكون بعيدة عن إيده . .

 

و بالفعل تم إنتخاب السيسي في 2014 لمدة اربع سنين لغاية 2018 , ثم مدة كمان لغاية 2022 , وبقي واضح إنه هو خلال سنتين من دلوقتي لازم "يقعد في البيت" وفقا  للدستور الحالي , اللي لا يسمح له بالترشح مرة تالتة . .

 

لكن السيسي – زي أي ديكتاتور – مش هيغلب إنه يعمل غطاء شرعي و قانوني لحكمه , عشان يظل في الكرسي لغاية لما يعتزل الحياة كلها , وديه الحركة السياسية اللي بيكون اسمها "شرعنة الديكتاتورية" , يعني تكون ديكتاتورية بشكل شرعي . .

 

و فكرة "شرعنة الديكتاتورية" , حاجة مش جديدة , عملها قبله عبد الناصر و السادات و مبارك بتعديل القوانين و الدساتير و إلغاء مظاهر الديمقراطية بشكل تدريجي , وعملها قبله مجلس الشعب السوري لما عمل تعديل في قانون الترشح لإنتخابات رئيس الجمهورية بخفض سن الترشيح  من 40 سنة لـ 34 سنة , وده عقب الوفاة المفاجئة لأبوه حافظ الأسد سنة 2000 , عشان يقدر بشار يترشح , وفعلا تم انتخابه والتجديد له بشكل مستمر من وقتها . .

 

كمان عملها فلاديمير بوتين – و هو من أشد الرؤساء ديكتاتورية في العالم –  لما مسك الحكم سنة 1999 بعد استقالة الرئيس الضعيف : بوريس يلتسين , و تم انتخابه فترتين , كل فترة 4 سنين لغاية سنة 2008 .

 

و لما كان الدستور الروسي بيمنع الترشح لاكتر من فترتين متتاليتين , "بوتين" استغل ثغرة في الدستور , ان الرئيس ممكن يعيد ترشحه فيما بعد في حالة ان حد غيره وصل رئيس بعده , وفعلا احضر رئيس وزراءه "ديميتري ميدفيديف" و اترشح و بقي رئيس جمهورية , وبقي بوتين رئيس الوزراء من سنة 2008  لسنة 2012 , وبالطبع كانت كل خيوط اللعبة السياسية في ايد بوتين مش ميدفيديف , يعني بالظبط عمل فكرة "المُحلل و المُحلل له" , وكانت فضيحة سياسية لموسكو علي مستوي العالم . .

 

واثناء رئاسة "رئيس الظل " ميدفيديف , عمل تعديل في الدستور الروسي , عشان تكون فترة الرئاسة 6 سنين , مش 4 سنين , وبالفعل تم الموافقة عليها من الدوما (مجلس النواب الروسي) .

 

و في 2012 تم انتخاب بوتين لمدة 6 سنين لغاية 2018 , وبعدها تم انتخابه مرة تانية لغاية 2024 , وفيه كلام ان عايزين يعملو تعديل تاني في الدستور عشان بوتين يقدر يترشح مرة تالتة في 2024 لغاية 2030 . .

 

ده طبعا غير الصين اللي اصلا مفيهاش انتخابات رئاسية بالمعني الصحيح , لكن سيطرة كاملة للحزب الشيوعي الصيني علي مقاليد الحكم , ومن سنة 2013 و الرئيس الصيني "شي جين بينغ" ماسك كل تلابيب الحكم بإيديه بلا منازع .

 

فاللي السيسي عايز يعمله شئ مش جديد ولا حاجة احنا مندهشين عشان مش بنقرأ في التاريخ ولا في السياسة , بل اننا مستغربين هو ليه اتأخر في خطوة "شرعنة" حكمه مدي الحياة السنين ديه كلها ؟ هو بالفعل من 2015 و عمل قضاء كامل علي كل حاجة حلوة في مصر , شباب و قتلهم , ناشطين و سجنهم , معتقلين و أعدمهم , ارض مصر و باعها , اقتصاد و دمره , يعني جت علي ديه ؟ ؟

 

-------------------------------------------------------------------------------------------

 

طيب تعالي نتعرف سريعا علي التعديلات ديه , اللي بالفعل مجلس الشعب المصري وافق علي الصياغة العامة ليها من ايام . .

 

التعديل المتوقع هيوصل لـ 15 مادة في الدستور , هي المواد أرقام (1 , 2 , 102 , 140 , 160 , 185 , 189 , 193 , 190 , 200 , 204 , 234 , 234 (تعديل ثاني) , 243 , 244 )

 

المكان هنا مش مناسب اني اكتب كل التعديلات , لكن لو عملت بحث بسيط علي جوجل هتلاقي كل اللي انت عايزه. .

 

و ممكن نركز علي أهم نقاط في التعديل , واللي الناس اتكلمت عليها  . .

 

• تكون مدة الرئاسة 6 سنين بدل أربع سنين

• استحداث منصب نائب لرئيس الجمهورية

• إنشاء مجلس للشيوخ (زي مجلس الشوري) , يتم انتخاب الثلثين , ورئيس الجمهورية يعين الثلث

• يكون فيه كوتة للمرأة في البرلمان , بمقدار لا يقل عن 25 % منه

• تمثيل الشباب والأقباط والمصريين بالخارج والأشخاص ذوى الإعاقة في البرلمان

• إنشاء مجلس أعلى للهيئات القضائية ويكون رئيسه هو رئيس الجمهورية نفسه

• رئيس الجمهورية هو من يحدد اختيار النائب العالم , و أيضا رئيس المحكمة الدستورية العليا

• منح القضاء العسكري صلاحية في النظر في عدد من الجرائم المدنية 

 

  وإن كان فيه نقاط لها جانب إيجابي في الحياة السياسية المصرية (زي منصب نائب الرئيس او تمثيل المرأة و الشباب و الاقباط و ذوي الإعاقة في البرلمان ) , فأغلب النقط هي مدمرة لبقايا الديمقراطية اللي كنا بنحلم بيها في بلادنا . .

 

كدة و بشكل رسمي , السيسي هيترشح لإنتخابات 2022 (لأن تم وضع مادة انتقالية بتسمح للرئيس السيسي بإعادة الترشح لفترتين متتاليتين) , و عشان مدة الرئاسة هتكون 6 سنين , فهيظل في الرئاسة لغاية 2028 , ثم يعاد ترشحه كمان مرة لست سنين تالية , يعني لـ 2034 .

 

السيسي مواليد 1954  , يعني حاليا عمره 65 سنة , فلما يقعد في الحكم لسنة 2034 هيكون عمره 80 سنة وقتها , وهيكون ظل في رئاسة مصر 20 سنة كاملة  . .

 

ده في حالة إنه كان رئيس محترم و بيخاف ربنا و بيحب شعبه و بيبني في البلد , فأصلا حرام يظل في الحكم 20 سنة لغاية لما يبقي كهل عمره 80 سنة , فما بالك بشخص بالعقلية ديه لما يمسك البلد ؟ ؟

 

قراءة معدلات التضخم و المستويات القياسية للديون اللي علي البلاد يجعل الشعر يشيب حاليا , ادينا شايفين الاسعار بتقفز بجنون ازاي , وشايفين خط الفقر اللي تم تدميره من كتر ما الناس نزلت تحته, وده نتيجة حكمه لخمس سنين بس , فما بالك لما يقعد كمان  15 سنة ؟ ؟

 

وهي الناس فاكرة انه وقتها - لو فضل عايش - هيسيب الحكم و يقعد في بيتهم , معقولة بالسهولة ديه هيتخلي عن شهوة الحكم ؟ انت قولي فيه كام رئيس سابق في بلادنا العربية كلها ؟ ؟

 

والجهلة اللي بيعملو مقارنات بين الدستور المصري , والدستور الفرنسي او الألماني (عشان الدستور الفرنسي فيه عدد مفتوح من المدد الرئاسية و انجيلا ميركيل في الحكم بقالها 15 سنة ), مش فاهمين ان هناك فيه نظام حساب دقيق جدا لأتخن مسؤول في البلد , ومن حق اي مواطن او برلماني انه يمسح بكرامة الرئيس لو تخطي حدوده او عمل جريمة واحدة , لكن عندنا اللي بيفكر اصلا يترشح للرئاسة بياخد علي قفاه , وشوفو فين سامي عنان دلوقتي . .

 

بالطبع خطوة التعديلات الدستورية هي جريمة جديدة بترسم ملامح السواد لمستقبل مصر , و بتأكد إن السيسي عمره ما هيفكر يسيب الحكم الا علي القبر , وإن كل مكتسبات ثورة يناير ذهبت مع الريح خلاص . .

 

ولما خالد يوسف – مع تحفظنا علي مواقفه السياسية من البداية أساسا – لما فكر يعترض تم ضربه تحت الحزام بفضيحة أخلاقية , ولما هيثم الحريري تجرأ برفضها , قرصو ودنه و فورا اعتذر و قال ان التعديلات الدستورية ديه مفيش احسن منها . .

 

و حاليا مفيش الا صوت النائب "أحمد طنطاوي" اللي جاهر بالإعتراض علي التعديلات , لكن الحيرة تملئ عقولنا هل ديه معارضة حقيقية مناوئة للسيسي  ,ولا "ذر الرماد علي العيون" عشان يتقال ان فيه معارضة حقيقية أهي , بدليل اننا مسمعناش ايا من غوغاء النواب اعترضه ولا قاطعه , زي ما تم مقاطعته و طرده قبل كدة في 2016 , لما عمل عدد من الإعتراضات . .

 

قد يكون وجود "أحمد طنطاوي" هو نوع من زرع الأمل في معارضي الدستور انهم ينزلو يوم الاستفتاء و يعملو حشود كبيرة قدام اللجان , علي أمل إسقاط التعديلات , و هنا نكون عملنا أكبر خدمة للسيسي في إعطاء الشرعية الكاملة و المظهر الديمقراطي علي التعديلات المخزية , خاصة لما يتم إعلان النتيجة بالموافقة علي التعديلات . .