الهَوَس الإلكتروني
الرسالة السابقة
العنوان : الهَوَس الإلكتروني
القسم: #النفسي
الرقم: 106
نلتقي مجددا مع عدد من الأسئلة المجمعة , والتي تستعرض عدد من الأسئلة التخيلية و الإجابة عنها
-------------------------------------------------------------
# : جزء كبير من وقتي بيروح علي الفيس و انستاجرام , سواء احط صوري او اشوف صور صاحباتي , هل انا طبيعية ؟
* : لا مش طبيعية
-------------------------------------------------------------
# : مش طبيعية ازاي و كل البنات كدة اصلا , فيه بنات تانية بيعملو اكتر من كدة
* : انتشار الغلط لا يبرره , كل ده غلط , لكن النسب مختلفة من واحدة للتانية
-------------------------------------------------------------
# : و ايه بقي الغلط في حاجة زي كدة , مهو انا في الصيف و مش ورايا مذاكرة
* : الغلط في نقط كتير مش هاقدر اسردها كلها , بس كون انك شايفة ان الصيف معناه انك تضيعي وقتك فديه مشكلة تانية محتاجة حل
-------------------------------------------------------------
# : برضه معرفتش ايه المشكلة اني اهتم بصوري علي الفيس و انستا و اتابعهم ؟
* : مشاكل كتير , بس اهمهم انها بتجعلك مربوطة بعالم افتراضي دائم من صنع الاخرين , وده بيدمر الشخص تدريجيا
-------------------------------------------------------------
# : ازاي ؟
* : انه يخلي الواحدة عندها نوع من الهوس باللايك و الشير و الكومنت , وده بيصنع كل انواع المشاعر السلبية لما يقل اهتمام الناس بيكي , او يتحولو لواحدة تانية
-------------------------------------------------------------
# : معقول ده بيحصل ؟
* : طبعا , تخيلي لما تحطي صورتك وانتي لابسة طقم جديد , وتلاقي اللايكات عليها قليلة او معدومة , في حين ان زميلتك اللي هي اقل منك في الجمال اخدت لايكات اكتر , معقولة مشاعرك مش هتتحرك سلبا ؟
-------------------------------------------------------------
# : الحقيقة هتتحرك
* : و ديه بداية المشاكل بس مش نهايتها , وهتجدي نفسك في سباق لن ينتهي من متابعة الموضة و المكياج و الفساتين و خلافه , وتلاقي العالم بتاعك اتحول لعالم ديجيتال , و كل ده في الاخر فقاعة كبيرة
-------------------------------------------------------------
# : يعني ايه فقاعة ؟
* : يعني علي فراغ , تلاقي واحد ادمن لصفحة فيها مليون متابع , و اي بوست عنده فيه الاف التعليقات , فده يصنع عنده شعور زائف بالتفوق و النجاح , يا تري هو عامل ايه في دراسته ؟ عامل ايه في شغله ؟ هل هيكون زوج ناجح ؟ كل ديه اسئلة محتاجة اجابات
-------------------------------------------------------------
# : طب ما هو الفيس الوسيلة الوحيدة اللي باتكلم فيها مع الناس
* : و ديه ازمة تانية , ان علاقاتنا بالناس بقت عن طريق شاشة الموبايل , ده بيصنع المزيد من الانطوائية و بيقتل الروح الاجتماعية , و بالطبع بيؤثر سلبا علي كل حاجة في حياتنا
-------------------------------------------------------------
# : مهو انا مليش اصلا صديقات و باتكسف اتعرف علي واحدة جديدة
* : طول ما انتي في ايدك الموبايل مش هيكون ليكي صديقات , انسيه لمدة اسبوع هتلاقي نفسك بتندمجي مع العالم الحقيقي مرة تانية , وبتقابلي بشر عاديين
-------------------------------------------------------------
# : تفتكر الموضوع سهل اني اسيب الموبايل ؟
* : مش لازم تتخلصي منه بالكامل , بس متمسكيهوش اكتر من ساعة في اليوم , هتلاقي الدنيا اختلفت