العنوان : وسواس الأمان

القسم: #النفسي

الرقم: 71

السؤال:

 مشكلتي انى اتجوزت فى بيت عيلة وكان زوجى بيقولى دايما اقفلى كويس وانتى نازلة وانا ماكنتش بسمع الكلام لأننا فى بيت عيلة وأمان ومفيش حد غريب عشان احرص

 لكن للاسف اتسرقت والمشكلة مش التحويشة اللى راحت لأ المشكلة انى بقيت شكاكة جدا وخوافة وبفترض سوء النية للناس( يعنى الاول الناس كلها كانت حلوة ودلوقتى الناس كلها بالنسبة لى وحشة)  وجبانة لو سمعت صوت بخاف ان يكون حد دخل مستخبى لى فالشقة او حد بيحاول يفتح عليا الباب اوالشباك

بقيت بتاكد من الحاجة ميت مرة يعنى اتأكد انى قفلت الشقة والشبابيك كويس وبعد مانزل السلم اطلع اتأكد تانى وانا اصلا عارفة انى قافلة كويس

 نفسيتى تعبت ومقدرتش استحمل ونقلت مكان السكن لكن برضو ملازمنى الخوف والشك والتأكد من كل حاجة وافتح الشنطة بتاعتى طول الطريق عشان اتأكد ان المحفظة والموبيل موجودين مش اتسرقو او وقعو

 وكتير بينى وبين نفسى افضل اقول انا بكرهك انا بكرهك لنفسى عشان قرارات غلط اخدتها فالموضوع دا يمكن عشان ماكنتش انانية ومافكرتش فى نفسى وبس وعملت حساب ناس تانية نفسى ارجع زى ماكنت انا تعبت

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

شوفي يا ستي .

انتي عندك بدايات اضطراب الوسواس القهري OCD  و اللي بيجعل الشخص يكون عنده هاجس معين , و يلح عليه بشكل مستمر , وبطريقة غير معقولة .

و كنا اتكلمنا بالتحديد عن الـ OCD  في المشكلة اللي بعنوان : ثلاث مرات  

لكن النقطة الايجابية ان الوسواس ده مكتسب , مش متواجد عندك من صغرك .

طب ايه الايجابي في ده ؟

ان الشخص اللي عنده الوسواس القهري من صغره , ده بيكون علاجه متعب و طويل , واحيانا بيكون مفيش طريقة اساسا لعلاجه  ,واللي بيعمله الاطباء انهم يخلوه يتعايش مع الوسواس ده من غير ما يأثر علي حياته , ومن غير ما يأذيه او يأذي غيره .

لكن النوع المكتسب – و اللي بييجي غالبا بعد حدث مهم معين زي اللي حصل عندك – بيكون سهل علاجه الي حد ما , و بيعتمد علي قوة الحدث , ومدي تأثيره , والاهم هو مدي نضج ووعي الشخص نفسه .

و من كلامك حاسس ان انتي عندك الوعي الكافي  , والنضج الكامل , اللي هيساعدك كتير علي تجاوز الازمة ديه , وحل المشكلة من غير ما يكون ليها اثر ان شاء الله .

و أظن ان الوسيلة المناسبة لعلاج مشكلتك , ما يسمي :  العلاج السلوكي المعرفي  CBT , واللي هي اختصار : Cognitive behavioral therapy

العلاج السلوكي المعرفي بيستخدم غالبا مع الاشخاص اللي عندهم نضج كافي , وعندهم وعي كامل بمشكلتهم , وعايزين يحلوها , فممكن يستخدم مثلا مع مرضي الاكتئاب , القلق , العصبية .

و احيانا يستخدم مع المصابين بالوسواس القهري , لو كان المشكلة عندهم بسيطة او مكتسبة  ,زي اللي عندك دلوقتي .

و فكرته تقوم علي ان الاخصائي او الطبيب النفسي , يحاول انه يبحث في اصل المشكلة و جذورها , ويتعرف مع صاحب المشكلة علي المتسبب الرئيسي في المشكلة , وبعدها يحاول تبديل عدد قناعات الشخص ويعمل نوع من تصحيح مفاهيمه  , عشان يخفف الضغط النفسي الكبير اللي علي اعصابه .

و غالبا الـ CBT   بيجيب نتيجة ايجابية , لو كان الشخص المصاب متعاون و مرن التفكير .

--------------------------------------------------------------------------

كمان لازم في البداية تؤمني ان الغلطة من البداية مكانتش كبيرة اساسا , يعني انتي مش اللي سبتي الباب مفتوح , او رامية الفلوس في الشارع , انتي عملتي اللي عليكي بس المجرم كان هيتصرف في كل الاحوال .

يعني لازم تقتنعي ان حتي لو كنتي عملتي كل الحرص اللازم , فغالبا كان هو هيلاقي طريقة عشان يسرق الفلوس , و مكانش هيغلب .

الشخص اللي بيسرق بيكون عنده بدل الطريقة عشرة , ولما يقف قدامه طريق , بيعرف يتصرف في طرق تانية .

ممكن يكون حصل شوية من عدم الحرص , لكن في الاخر انتي مكنتيش تعرفي باللي هيحصل , وانتي حاولتي تاخدي بالك بس هو كان هيتصرف حتي لو انتي عملتي كل احتياطاتك .

لما تحطي القناعة ديه في بالك , هتلاقي ان كتير من الضغط اللي علي اعصابك هيتشال , لازم تؤمني بده عشان فعلا تبدئي تستريحي شوية .

احنا أيوة مطالبين اننا نعمل اللي علينا عشان نحافظ علي حاجتنا , بس لما تحصل مشكلة معينة , فاسلوب جلد الذات مش هيفيد حد , ومش هيعمل اي اثر الا انه يزود في عذابك المستمر .

الغلطان هو مش انتي , فارجوكي توقفي عن تعذيب نفسك اكتر من كدة .

ولما تتخيلي سيناريوهات اسوء من اللي حصلت , هتلاقي ان ربنا كان لطيف بيكم .

يعني الحرامي ده لو كان اقتحم البيت و انتي فيه , وقتها من تهوره كان ممكن يأذيكي انتي او طفلك ,ساعتها الخسارة مش هتتعوض بالفعل , وكنتي وقتها هتتمني انه لو كان سرق الفلوس وانتي مش موجودة , في داهية الفلوس طالما انتو بخير  .

فلما انتي تتخيلي سيناريوهات اسوء , بس ربنا حفظكم منها , هتعرفي ان اللي حصل – علي الرغم من مشاكله – فهو افضل بكتير من مشاكل تانية كانت ممكن تحصل و تعمل أذي غير محدود .

وديه نفس فكرة ان الشخص يقارن نفسه دايما بشخص اقل منه في الظروف الدنيوية , عشان يحمد ربنا دايما علي حاله  ويحس بالسعادة في وضعه الحالي , اللي هو شايفه مؤلم , بالطبع مع عدم توقفه عن الطموح و السعي .

وانا استوقفني الوصف اللي قلتيه لما بتكلمي نفسك (بكرهك انا بكرهك لنفسى عشان قرارات غلط اخدتها فالموضوع دا يمكن عشان ماكنتش انانية)

انتي يا فندم بتمارسي اسلوب ممنهج في جلد الذات ,  وتعذيب نفسك , وبطريقة غير مبررة , ولا عقلانية ولا سليمة  .

و الاسلوب ده مؤذي جدا للحالة النفسية للشخص , و هيؤدي فورا للاكتئاب .

الرسول صلي الله عليه و سلم علمنا (أن ما أصابك لم يكن ليخطئك , وما أخطئك لم يكن ليصيبك) , فانك تعذبي نفسك بالشكل ده , و تقعدي تسترجعي احداث الماضي بالاسلوب ده , ده شئ غير سليم , وغير منطقي .

لازم تخففي عن نفسك , ترحميها من العذاب اللي انتي بتعذبيها ده , وتؤمني ان الفلوس لما اتسرقت , فهي ارحم بكتير من ان انتي او ابنك كان يحصل ليكم اي نوع من الايذاء لا قدر الله , وقتها كنتي انتي هتتمني لو كانت بس الفلوس اتسرقت .

• انسي الموضوع ارجوكي , عارف انه صعب بس حاولي بقدر الامكان تنسيه و متشغليش بالك بيه تاني

• ان مقدرتيش تنسيه يبقي تبطلي تفكير فيه  ,يعني خلاص انتي مش قادرة تنسي اللي حصل , ماشي بس تتوقفي عن التفكير فيه مرة تانية , اعادة التفكير بتعذبك علي الفاضي ومحدش بيستفاد اي شئ , بل ان فيه طعن في فضيلة الرضا بقضاء الله , اللي احنا مأمورين بيها

• لازم تعملي تصالح مع نفسك , لازم تؤمني انك مكنتيش غلطانة بالشكل اللي انتي متخيلاه وقتها , وان اللي حصل مش نتيجة انانية منك , لكن انك مكانش عندك الخبرة الكافية للتعامل مع الامر , وانتي معذورة

• اشغلي نفسك بقدر الامكان , متسيبيش نفسك فاضية عشان الافكار و الوساوس مش هترحمك , حاولي تخلي جدول يومك مشغول باشياء مفيدة  ,او حتي حاجات هايفة بس مش مؤذية

• ياريت ابنك ميشوفش منك الا الوجه الهادي بس , لان كتير من الاضطرابات النفسية بتتنقل فورا من الام لابنها , لانه هيقلدها و يعمل زيها مهما هي حاولت تمنعه , فلازم يشوف منك الهدوء و الابتسامة

​

الرسالة التالية