العنوان : هرم مازلو

القسم: #النفسي

الرقم: 13

السؤال:

 

السلام عليكم ورحمة الله وبركاته

 

انا عمري 18 عام مشكلتي اني معنديش ثقة بنفسي وبحس اني مش محبوبه من الناس اللي حواليا

 

ساعات كتير بغيب عنهم عشان اشوف هيسألوا عليا ولا لاء محدش بيفتكرني اصلا

 

حاسه ان اهلي مش بيحبوني دايما بحس اني تقيله ع ناس كتير برغم انهم بيقولوا انهم بيحبوني بس بحس الناس كدابين لاني بشوفهم بيعملوا كده مع غيري وفي الاخر بيشتموا عليهم

 

حتي ماعنديش الجرأة اني اواجههم واقولهم بتعملوا كده ليه

 

نفسي اموت عشان استريح من الناس واريحهم مني

 

انا مش المفضلة في حياة حد انا مجرد صديقة عادية واخت مفروضة علي اخواتي وبنت مفروضة علي اهلها

 

انا ملتزمة وبحاول اقرب من ربنا اكتر بس ساعات بكون مخنوقه اوي

 

عاوزة اعرف اعمل ايه ومشكلتي دي هفضل فيها علي طول ولا اقدر اغيرها

 

ارجو الرد

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم  السلام و رحمة الله . .

 

مشكلتك لحسن الحظ سهلة و مقدور عليها  , ومحتاجة بس شوية تغيير قناعات عندك , بعض التغيير في معايير تقييمك , وأسلوب تعاملك . .

 

عشان اقدر اوصف مشكلتك  , لازم الاول نتعرف علي مصطلح اسمه "تقدير الذات" . .

 

و المصطلح ده , يمكن من أهم الفروق بين الانسان و الحيوان , بل ان بعض الحيوانات – زي الكلاب – فيها جزء كبير من الشعور ده . .

 

عشان نفهمه لازم نتعرف علي شئ مهم في علم النفس , اسمه "هرم مازلو" . .

 

واللي فيه قام عالم النفس الأمريكي "ابرهام مازلو" بعمل تصنيف لاحتياجات الانسان , علي مستوي خمس درجات , من الادني للأعلي . .

 

• فأقل درجة هي الاحتياجات الجسدية : الأكل , الشرب , النوم . .

• واللي فوقيها هي احتياج الأمان : الشعور بالسلامة , السعي وراء الصحة

• واللي فوقيها الاحتياج الاجتماعي : الصداقة , الاسرة

• واللي فوقيها التقدير : الثقة , الاحترام

• وأعلي الهرم تحقيق الذات : زي الابتكار

 

هتلاقي ان الانسان و كل الحيوانات مشتركة في اول درجتين

 

و ان الانسان و بعض الحيوانات عندها الدرجة التالتة

 

 و الانسان و قليل من الحيوانات عندها الرابعة

 

وحده الانسان اللي عنده الخامسة

 

و الكلام هنا عن الدرجة الرابعة , ما يسمي الشعور بالتقدير . . 

 

 واللي ممكن نقول عليه هو  :  الشعور ان الناس بتحترمني , وتقدرني , وبتهتم بيا , وبتحبني , وبتراعي شعوري , وبتفهم قصدي ايه , و بتعطيني القدر المناسب ليها

 

الشعور بالتقدير بينعكس في ان الشخص يلاقي نظرات الاهتمام من اللي حواليه  , سواء بيه او باللي بيعمله

 

الشعور بالتقدير معناها ان يكون ليه مكان مميز بين اصدقاءه و معارفه واقاربه , حتي لو متكلمش كتير

 

و اظن هو ده مفتاح مشكلتك بالتحديد . .

 

انك مش لامسة اي اهتمام او تقدير او احترام من دوائرك المحيطة , وبالتالي ده عمل طعنة قاسية لذاتك و كرامتك , وجعلك تفضلي الموت علي الإهانة ديه  .

 

و هنا لازم اقولك انك غلطانة تماما . .

 

--------------------------------------------------------------------------

 

عشان تعرفي انتي غلطانة في ايه  ,لازم بداية متنسيش ان سنك 18 سنة , وده اللي ممكن نفهم منه حاجتين مهمين جدا . .

 

أولا انك في سن بالفعل حساس جدا , و بتمري بمجموعة من التغييرات الفسيولوجية و السيكولوجية مش قليلة , ده غير انتقالك من مرحلة ثانوي بانغلاقها الشديد , لمرحلة الجامعة باختلافها الكبير عن اللي قبله

 

كمان انتي في سنين يتم تشكيل وعيك و قراراتك بالكامل , و هتحسي بنوع من عدم الاستقرار ,و الأضطراب النفسي و العاطفي بشكل كبير . .

 

عشان كدة في افلام الرعب , اكتر فئة بيجيبوهم كضحية للمس من الجن و الأشباح بيكون اللي زيك , فتاة مراهقة في بداية العشرين . .

 

فديه حاجة حطيها في بالك قبل اي شئ , واعرفي ان من الأشياء المرتبطة بالمرحلة  السنية ديه , هو الشعور بالحساسية الكبيرة لردود الأفعال , و تضخيم تفسير الأفعال عن حقيقتها , واللي بيطلق عليها البعض لفظ "أفورة"

 

النقطة التانية الخطيرة المتعلقة بسنك , هي تعاطي المجتمع مع المرحلة السنية ديه بالتحديد . .

 

لو احنا عملنا تقسيم عام كدة  للفئات العمرية اللي بنمر بيها , فممكن نقول ان فيه اربع مراحل اساسية . .

 

• مرحلة الطفولة : من الولادة وممكن نقول لعمر 15

• مرحلة المراهقة  : من 15 لـ 25 مثلا

• مرحلة النضج : قول من 25 لـ 50

• مرحلة الكهولة : فوق الـ 50

 

صحيح ان التقسيم ده مش دقيق , لكن انا بس عايز اعمل خطوط عامة . .

 

لو هنبص علي المراحل الأربعة , هتلاقي حاجة مهمة . .

 

ان المرحلة الأولي (الطفولة) بتحظي باهتمام الجميع , وبيكون ليهم مشاعر "الحب" , الكبير قبل الصغير , ودايما بيكونو علي الحجر . .

 

و ان المرحلة التالتة  (النضج) بتحظي باحترام اغلب الناس , وبيكون ليهم مشاعر "التقدير", خاصة لو كان شاب ناجح في عمله و حياته

 

و المرحلة الرابعة (الكهولة)  , بتحظي باحترام الجميع , وبيكون ليهم مشاعر "احترام الكبير"

 

فهتلاقي ان المرحلة التانية هي المظلومة غالبا . .

 

لا هما اطفال فنحبهم لبرائتهم , ولا هما ناضجين فنحبهم لنجاحهم , ولا هما كبار فنتحرم كبر سنهم . .

 

تحسي انهم "وقعو من قعر القفة" بالمعني الحرفي , لا طايلين براءة اطفال , ولا نجاح الكبار . .

 

وطبعا ده مش ذنبك , لكن ذنب مجتمع معاييره مش دقيقة في الحكم علي الناس , بس بالفعل هتلاقي ان الفئة ديه هي أقل فئة بتنال تشجيع و تعاطف  واكتر فقة بتعاني في اللوم و التقريع , يمكن عشان السلبيات الموجودة في المرحلة  ديه . .

 

ليه بقول كل ده ؟

 

عشان تعرفي انه شئ شبه طبيعي و منتشر , وانك لازم تتوقفي عن تفسير الامور في غير نصابها الصحيح . .

 

---------------------------------------------------------------------------

 

كل ديه كانت مقدمة لابد منها , تعالي نمسك رسالتك نقطة نقطة  . .

 

• بتقولي ان معندكيش ثقة في نفسك , والشعور انك مش محبوبة , طبيعي انك تحسي بده , طالما انتي مؤمنة بوجود تجاهل من كل معارفك , واول ما ده هيتعالج هترجعلك الثقة فورا

 

• انك تغيبي عنهم و تشوفي هيسألو ولا لا , خليني اقول انك مزوداها شوية , لأن الاهتمام لا يقاس بالشكل ده , و انتي لو رحتي تقابلي صديقاتك , فممكن تكون واحدة فيهم مش موجودة , وانتي متاخديش بالك منها , و عدم سؤالك عنها اكيد لا يعني انك مش مهتمة بيها , صح ؟

 

 

• شعورك ان اهللك مش بيحبوكي او تقيله عليهم , نفس الفكرة , انتي مزوداها شوية , وبتعملي تفسير لامور بشكل اكبر من حجمها  . .

 

 

• طبعا اي حد يتكلم في وشك و يشتم في ضهرك يبقي انسان معندوش دين او خلق  , ولو هما اساسا بيقابلو الناس بوش , وبيتكلمو عنهم ورا ضهرهم , يبقي ده سوء خلق . .

 

 

• كون انك تواجهيهم وتقوليلهم انتو بتعملو كذا , ممكن متكونش فكرة كويسة  , لان زي ما قلنا حالا , ان بعض القناعات اللي عندك هي تفسير زيادة عن اللزوم لاشياء طبيعية , وبالتالي مش هينفع تقوليها . .

 

 

• بتقولي انك مش المفضلة عند حد من صديقاتك  , وانك مفروضة علي اخواتك و أهلك  , ده كلام مش دقيق

 

 

• التزامك وقربك من ربنا ,و تمسكك بالصلاة و القرآن هو أول طريق العلاج , بس خدي بالك انه مش الخطوة الوحيدة , يعني مينفعش اننا نكتفي بالخطوات الدينية لعلاج المشكلة , والا مش هتتحل ابدا . .

 

• بالنسبة لسؤالك , هل ده هيستمر ؟ الاجابة لا مش هيستمر , لانك من ناحية سنك هيزيد شوية , وهتقربي من مرحلة "النضج" , ونجاحاتك هتزيد في الحياة , ومن ناحية لو ابديتي المزيد من الاهتمام للناس , هتلاقيهم فورا بيبادلوكي الحب و الاهتمام

 

 

• تمني الموت هو أكبر خطأ ممكن تعمليه , ربنا وهبنا الحياة عشان نعبده , و نطيعه في الارض مش عشان نتمني اننا نغادرها في اسرع وقت . .

 

---------------------------------------------------------------------------

 

وبالتالي عشان ننهي الموضوع , انتي محتاجة تعملي كذا حاجة

 

• تغيري من نظرتك للناس , وان هما مش زي ما انتي متخيلة

• ابعدي عن البنات اللي بتغلط في الناس

• ابدئي اظهري كمية اكبر من الاهتمام و الحب للناس , وهتلاقيهم يبادلوكي زيه

• تمسكي اكتر بالدين , لكن اعرفي انه مش الخطوة الوحيدة