العنوان : تطوير الذات

القسم: #النفسي

الرقم: 64

السؤال:

 

 السلام عليكم .. شوفت بوست ال ٩ حاجات اللي بيدلوا على الإكتئاب و كلهم عندي إلا الأفكار الإنتحارية الحمد لله ..

 

 وده لإني مؤمن إني لسه عندي وقت في الإمتحان ومش هقطع الورقة علشان مش عارف أحل ندخل بقى في الموضوع ..

 

 أنا عندي 24 سنة و  بمر بكل الحاجات دي و كمان عارف السبب .. والسبب بإختصار هو إني شاب خلصت جامعتي والحمد لله ما أتكتبش عليا جيش فالمفروض ادخل ع المرحلة اللي بعد كده وهي الحياة العملية بقى والإستقرار وتكوين الذات وما إلى ذلك (ملحوظة أنا بشتغل من زمان من وانا بدرس وأشتغلت حاجات كتير جدا)

 

 لكن دلوقتي المفروض أشتغل بشهادتي ولما أصتدمت بالواقع و إني ما أشتغلتش بالشهادة اللي تعبت عشان أخدها

 

واللي تاعبني إني حاليا رافض إني أشتغل أي شغلانة وخلاص .. لإني شايف إني من حقي أشتغل بشهادتي وكمان الشغلانات اللي موجودة رواتب قليلة جدا .. فمبقاش عندي حماس تماما وبقيت شايف المستقبل مالهوش أي ملامح تقريبا

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

 

الإجابة                    :

 

 وعليكم السلام و رحمة الله

 

اهلا بيك يا سيدي . .

 

في البداية لازم نأكد علي معني مهم , متعلق بالاكتئاب و الانتحار , قبل ما نمسك تفاصيل سؤالك .

 

ان الاضطراب النفسي اللي اسمه "اضطراب الاكتئاب" , مش هو نفسه "الشعور بالاكتئاب" .

 

بل ان الانسان اللي متضايق و عنده زعل و شعور بالضيق و الاكتئاب , وبيعيط كتير , ممكن نقول ان احتمال كبير معندوش اضطراب الاكتئاب .

 

لان مريض الاكتئاب اساسا مش بيحس بحاجة , مش بيحس لا بفرح ولا زعل , لا ضيق و حزن , هو اساسا مش حاسس بحاجة .

 

هو عنده نوع من التبلد الشعوري,  نتيجة تراكمات كتيرة , او نتيجة هشاشته النفسية , او صدمة عصبية معينة .

 

بل ان بعض المتبحرين في علم النفس , قالو ان اصلا ترجمة  الاضطراب النفسي اللي اسمه   "Major depressive disorder" , ترجمته لـ "اضطراب الاكتئاب" ترجمة ممكن متكونش دقيقة , عشان ميحصلش لغبطة عند الناس في الفرق بين المتضايق , وبين مريض الاكتئاب , واللي هو بالفعل متبلد الشعور بشكل كبير .

 

عشان كدة مرضي الاكتئاب معرضين اكتر للاسف لفكرة الانتحار , مش عشان هما متضايقين , لكن عشان هما مش حاسين بحاجة اساسا .

 

عارف مصطلح "فلان جتته نحست"  اهو ده احد التوصيفات اللي ممكن نقولها علي المصاب باضطراب الاكتئاب .

 

ده غير ان الشعور بعلامات مرض الاكتئاب مش معناها انك مصاب بيه , لابد من زيارة طبيب نفسي متخصص , يعمل معاك احد الاختبارات الخاصة بالمرض ده , قبل ما يقول هو عندك ولا لا  .

 

 

بقول كدة عشان تشيل من بالك كل الافكار عليه , وعشان تواجه مشكلتك بهدوء اعصاب , وتفكر بالراحة ازاي تفك شفرتها , وتحلها بشكل بسيط , خاصة ان هي اصلا مش معقدة للغاية .

 

-----------------------------------------------------------------------------

 

ماذا عن المشكلة اللي عندك . .

 

هي مش مشكلتك لوحدك , هي بالفعل شئ شائع جدا و منتشر , مش بس في مصر , لكن في اغلب الدول اللي بتعاني من مشاكل اقتصادية , وفساد اداري , وتخبط بيروقراطي .

 

بل ان كتير من الناس اللي مكانوش بيعانو منها  ,بدأو ينضمو ليها تدريجيا في السنين الاخيرة , كتير من اللي كانو شغالين في تخصصهم  ,ومستريحين , غصب عنهم بدأو يدورو علي اي شغل عشان يسد الفجوة بين الاحتياجات المادية المتتالية و الدخل المتدني , فلا تتعجب لما تلاقي محاميين و مدرسين و محاسبين , شغالني علي توكتوك او بيطير بالفيزبا عشان يوصل بيتزا لبيوت الناس .

 

نفسيا لما تعرف ان المشكلة شائعة , هتحس بنوع من الراحة شوية , ان ده مش ذنبك , ولا ان ده خطئك  ,لكن هو شئ شائع رغما عنك , و نتيجة ظروف اقتصادية و سياسية مؤلمة , يطول الحديث عنها .

 

بس يعني هي ملهاش حل  ؟ ؟

 

لأ مين اللي قال , ممكن يكون ليها عدد من الحلول , واللي هنحاول نسردهالك دلوقتي . .

 

هنقولك هنا عدد من الخطوات واللي لو نفذتهم , ممكن تلاقي اختلاف في رؤيتك للمشكلة , واسلوب حلها

 

 

 

والخطوات بتدور في فلك : طور نفسك عشان تشتغل بتخصصك . .

 

• انت كخريج حديث , خبرتك قليلة في تخصصك , خاصة ان مجال شغلك كان بعيد عن دراستك , وبالتالي منطقي انك تلاقي فرص عمل محدودة في المجال بتاعك , وبمرتبات تعبانة .

 

• طب ماذا عن فكرة انك تختلف عن باقي الخريجين لنفس تخصصك , ماذا عن فكرة انك تتميز عنهم بحاجات معينة  ,حتي لو خدت منك وقت و جهد و فلوس .

 

• فممكن تعمل حاجة من الحاجات ديه , وتشوف انهي فيهم مناسبة اكتر انها تعمل تطوير ليك , وتخلي صاحب العمل يقتنع بالفعل انك تستاهل مرتب اعلي, وهو كمان اللي يتحايل عليك عشان تشتغل معاه  . .

 

• انك تعمل دراسات عليا في تخصصك , حتي مش لازم تستني لما تخلص الماستر , مجرد انك ببتبدأ فيه , ده هيخلي الـ (سي في ) بتاعك مختلف عن اقرانك , وهيوضح لصاحب العمل انك مجتهد , وماشي في خطوات في تطوير نفسك

 

• انك تتدرب في نفسك مجالك  , في مكان كويس و اسمه كبير , حتي لو من غير مرتب , صحيح ده شئ مرهق ماديا , بس لو اتدربت معاهم كام شهر , هيفرق كتير في اي مكان تروحله

 

• انك توافق في البداية علي مرتب قليل , لغاية لما تاخد خبرة كويسة , تأهلك انك تشتغل في مكان احسن بمرتب افضل

 

• انك تاخد كورس معين قريب من تخصصك , سواء انجليزي او كومبيوتر او غيره , من الاشياء اللي هتساعد في مجالك

 

• انك تحضر دبلومة في مجال قريب من تخصصك , او شئ مساعد (دبلومة تربوية مثلا ), وده احيانا بيفيد في انه بيفتحلك فرص عمل اكتر

 

• انك تنزل تقابل ناس متخصصين في مجالك  ,وبقالهم سنين طويلة شغالين فيه ( مثلا استاذ جامعي او مؤلف كتاب) , وتستأنه انك هتاخد من وقته عشر دقايق, و تقوله باسلوب مهذب و لطيف , انك عايز تستفاد من نصيحته و خبرته في انه يقولك تعمل ايه عشان تشتغل في المجال ده , وما اظنش حد هيرفض يساعدك بالاسلوب المهذب ده

 

• انك تدور بشكل حقيقي , حتي لو في مكان ابعد من المدينة اللي انت فيها , ومفيش مشكلة انك تتصل بالمؤسسة او الشركة , وتاخد منهم موعد , وتروح بنفسك و تعرض نفسك عليهم , احيانا الشجاعة و عمل خطوة ايجابية زي كدة بيعمل انطباع ايجابي جدا عند صاحب العمل , وابدأ بمرتب قليل مش مشكلة

 

• مفيش مشكلة انك تاخد طريق غير مباشر , عشان تشتغل في تخصصك ,  فلو مكانش فيه  طريق مباشر و سريع انك تشتغل في المجال اللي بتحبه , فمش هتكون ازمة لو اشتغلت في مجال تاني لفترة محددة (سنة مثلا) , علي ما تقدر تنتهي من احد الخطوات المساعدة (الدبلومة , الانجليزي , الماستر , التدريب عشان تاخد خبرة ) , وبالتالي من السنة الجاية تقدر تشتغل في مجالك , فكر خارج الصندوق

 

 

• لازم تعمل خطة لنفسك  , وتستغل وقتك و ميكونش بيضيع منك في حاجات هايفة , لازم متعديش سنة 2019 الا وانت بالفعل تكون عملت خطوة او اتنين في تطوير حياتك , وتكون خبرتك اختلفت , الا هتفضل طول عمرك في نفس مكانك . .

• و هنا كنا قدمنا نصايح مهمة في النقطة ديه ,في المشكلة اللي بعنوان : الثروة المفقودة

 

 

• فكرة الارتباط حطها في بالك , وشوف بنت من اسرة محترمة , مش عارضين بنتهم للبيع , للي يدفع اكتر لكن فاهمين ان اساس الزواج هو الانسان المحترم مش هيتدفع كام , وهما اللي هيقولولك ان الشروط المادية سهلة , وان ابدئ جوازك باسهل حاجة و كما بعدها براحتك

 

• بالتوازي مع ده كله : شوف مشاكل الناس الحقيقية , واعرف باقي الناس حواليك بتتألم قد ايه ,هتلاقي ان ده  هيخفف عنك جدا شعورك بالضيق او الاكتئاب , وهتحس ان مآسي الناس اكبر بكتير من اللي انت بتعانيه , وهتحمد ربنا جدا  , ان مشاكلك كلها في حدود المعقول , مقارنة بمآسي ناس تانية

 

• اياك تنسي انك تستعين بالله دايما , وتشكيله همك , وتدعيله بفك كربك , ولو نيتك صافية لله , هتلاقي نتيجة مدهشة  ,انت نفسك هتستغرب منها

 

 

 

اظن انت لو طبقت عدد من الخطوات ديه , هتلاقي ان فرص العمل ممكن تكون متوافرة بشكل اكبر في تخصصك

 

و هنا كنا اتكلمنا عن مشكلة شبيهة , لو قرأتها هتفيدك جدا , بعنوان : الخبرة المطلوبة