العنوان : الاكتئاب المفرط

القسم: #النفسي

الرقم: 41

السؤال:

 

انا سبب اكتئابى مش لموت شخص لا الموت انا مؤمنه بيه ودا قدر وكلنا اموات وكل حاجه بس سبب اكتئابى هو انى ساذجة وغلط فى اختيارى لصداقتى

 

يعنى مثلا لما بكون محرومه حنية واهلى مفيش اهتمام وفجأة اقابل صديقة وتكون كل حياتى واعطيها سرى وامن ليها على كل دنيتى وتغدر بيا وتطلع سرى

 

وتمشى وتأنتم مع ابن عمى ويتكلموا عليا الاتنين بالسوء

 

كمان  حاجه ابويا لما اكون لسه مااجوزتش ويغدر بيا ويروح يكتب البيت بتاعنا بااسم أخويا وأرض مبانى

 

لما اغيب عمرى كله أتعلم وادخل جامعه وفى النهايه مفيش وظائف واقعد عاطلة عن العمل بلا قيمه , رغم انى نشيطه وبحب العمل

 

ايه هي طرق الخروج من الاكتئاب

 

لانى مكتئبه لدرجة انى بنت ملتزمه جدا وماكنتش عارفه اعمل ايه فاشربت سجاير بتخرجنى من الا انا فيه

 

لدرجه مش عارفه استغنى عنها وبقت ونيسى من الا فيه

 

اعمل ايه مش عارفه

 

انا  عوزة اطلع من الا انا فيه لان الزهق دمرلى الجهاز الهضمى وغير ملامح وجهى ومن جوايا كانى واحدة عندى 100سنه  وانا عندى حاليا 27

 

وساعات ببقى كويسة الاقى نفسى مخنوقه واحس ان فيه سم ساير فى جميع جسمى ومخنوقه ومش طايقه نفسى

 

وبعدت عن الناس تمام حتى اخواتى واهلى وبعد ماكان عندى عزيمه واردة جالى احباط وكرهت الدنيا ومش عوزة اعيش

 

واوقات بدعى ويقول يارب ريحنى من الدنيا ومافيها بقت مليت كان عندى روح وماتتك ارادتى  بعد ماكان عندى عزيمه وطموح

 

كل شئ ميت بالنسبة لى

 

عندك اى حل

​

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

انتي بالفعل عندك حالة متوسطة او متقدمة من "اضطراب الاكتئاب المفرط"  الي بيسموه   (major depressive disorder) , وبيختصروه بالحرف MDD

 

وحالتك قطعت خطوات كتيرة جوة الاضطراب , وده معناه انك لازم تمشي في خطوات فورية لعلاجه , مع طبيب متخصص و مع نفسك , لان استمراراها هيعمل تآكل تدريجي لجهازك العصبي و كيانك .

 

و الاكتئاب اسبابه كتير  ,  والسبب اللي انا شايفه هنا هو "خيبة الأمل" .

 

ولازم نفرق بين كلمة خيبة الامل (disappointment ) و كلمة الخيبة المستخدمة في اللهجة المصرية .

 

الكلمة التانية (الخيبة) احنا بنستخدمها للفشل , يعني الواد خاب في الامتحان , ايه الخيبة ديه , فلان خيبان .

 

لكن مصطلح خيبة الامل (disappointment ) مختلف شوية .

 

و انا تعمدت اذكر المصطلح بالانجليزي , عشان لو عايزة تعملي بحث عنها في المواقع الامريكية , هتلاقي معلومات هايلة  . .

 

يعني ايه بقي (خيبة الامل) ؟

 

يعني المزيج من الصدمة , والاحباط , والغضب , والحزن , وعدم التصديق , اللي بيصيب الشخص من تصرف حد تاني , غالبا بيكون قريب منه و كان عنده فيه امل كبير .

 

فلما الشخص يكون حاطط امل علي حد تاني , ويكون متفائل خير انه مش هيخذله ولا "هيبيعه"  .

 

فلما ييجي الشخص ده يضيع كل ثقتك فيه , ويضربك تحت الحزام بشكل مؤلم , فده بيعمل كمية حادة من خيبة الامل العميقة , اللي بتخليه مش مصدق , انت بجد بعتني ؟ انت بجد خذلتني ؟ معقولة انا كنت واثقة فيك وتعمل كدة ؟

 

و ده اللي بيحصل عند كتير من البنات اللي بيكونو متعلقين بشاب فترة , وبعدها بكل برود يقولها يا بنت الحلال انا في طريق و انتي في طريق .

 

ويمكن اللي شافو الفيلم الأمريكي اللهيب (Heat) يفتكرو مشهد في اخر الفيلم , لما (روبرت دي نيرو) فورا باع صديقته اللي كان هيسافر معاها و يتجوزو في نيوزيلاندا (إمي برينيمان) , لان البوليس جاي يقبض عليه , فورا (دي نيرو) باعها و هرب , وهي بتبصله بصة كلها دهشة و عدم تصديق و صدمة ملهاش حدود . .

 

اهو ده اقرب وصف لتعبير "خيبة الأمل" . .

 

---------------------------------------------------------------------------------

 

فاللي حصل معاكي للاسف علي مدي كذا سنة , هو سلسلة مستمرة من "خيبة الأمل" .

 

فالبداية من صديقتك اللي انتي ائتمنتيها علي اسرارك , وفورا تبيعك وتقول كل حاجة للناس .

 

كمان لما تخرج مع قريبك وتصاحبه (واكيد انتي اللي عرفتيهم علي بعض) , مش بس كدة , ده كمان تطول لسانها عليكي .

 

بعدها تيجي الضربة الأكبر من الأب , و ديه هتكون أكتر ضربة موجعة , لأنها جاية من الشخص اللي انتي بالفعل مدياله اكبر كمية من الثقة , هو فيه حد أقرب من الأب ؟ ؟

 

كمان أخوكي مشارك في الجريمة (ما لم يكون  طفل صغير مش مستوعب) , لان اصلا قبوله بانه ياخد قرش حرام وهو عارف انه حقك , جعلك تصابي بالذهول , معقولة ده اخويا اللي هو حتة مني ؟

 

فلما الوالد و اخوكي  يظلموكي بالشكل المدهش ده ,  فده خلاكي حرفيا "تضربي كف علي كف" هو ايه اللي حصل في الدنيا  ؟ ؟  الناس اتجننت ولا انا اللي اتجننت ؟ ؟

 

وانا متخيل موقفك اول ما عرفتي بالظلم الرهيب ده , متخيل شعورك مش الغضب ولا الحزن  ,لكن الصدمة و عدم الاستيعاب , هو بجد ده بيحصل ؟ بجد ابويا سرقني عيني عينك كدة ؟ بجد اخويا استحل ياكل فلوس اخته بالسحت ؟

 

وحتي الظروف السياسية و الاقتصادية مرحمتكيش , فمن ناحية فرص العمل اصلا ضئيلة من ركود الاقتصاد , ومن ناحية كتير من فئات المجتمع يا اما عندها عنصرية (مفيش شغل للستات) , اما معندهومش اي دين او اخلاق (يكون توظيف البنت ليه ابعاد تانية) , فحتي "ظلم المجتمع" كان هو كمان ضربة موجعة ليكي في مساحة "خيبة الأمل" .

 

وغالبا باقي مسلسل حياتك و باقي التفاصيل اللي انتي محكتيهاش في نفس الاطار , انك تثقي في حد , ويبيعك بعدها .

 

وده اللي صنع عندك حالة اكتئاب متقدمة , و خلاكي تشربي سجاير هروبا منها , وبقت هي ونيسك , لانك فقدتي الانس من البشر , وده اللي رسم ملامح الحزن و الكئابة علي وشك و بقي عمرك 100 سنة , وده اللي بيحرق جهازك العصبي وبالتالي تصابي بكل المضاعفات المتوقعة (قرحة , قولون , ضغط , مشاكل بالجهاز الهضمي) , وده اللي محسسك بالسم في جسمك .

 

و الأسوء من كدة . .

 

ان ده اللي دفعك دفعا لغابة العزلة التامة , بعيدا عن البشر و اخواتك و قرايبك و اصحابك , وبقي صديقك التدخين , ورفيقك الاكتئاب .

 

وبالطبع ده اللي زرع في قلبك الاحباط , و خلاكي تكرهي الدنيا , وبتدعي ربنا بالموت  . .

 

وهو ده السبب في الوصف الدقيق جدا اللي انتي قلتيه "كل شئ ميت بالنسبة لي"

 

ديه كل اعراض المصاب بالاكتئاب , و سببها جرعة زيادة من "خيبة الأمل"

 

---------------------------------------------------------------------------

 

طيب العلاج ايه ؟ ؟

 

هو فيه اصلا علاج للحوار ده ؟

 

ايوة طبعا فيه , بس محتاج منك ارادة وصبر وطولة بال .

 

  

• اولا ذهابك للطبيب النفسي مش شئ ثانوي , لكنه بالفعل ضروري .

 

لان زي ما قلت من شوية , حالتك مش في البدايات , لكن قطعت شوط كبير , وبدأت تأثر في قرارات مصيرية , وفي الشق الفسيولوجي عندك (جسديا) , فلازم تلحقي في اسرع وقت .

 

الطبيب هيكون قادر انه يحدد المشكلة سببها ايه بالتحديد , ويفكها حتة حتة , ويصبح اكبر قدر منها , ده غير ان فيه ادوية مضادات للاكتئاب , بتكون مفيدة جدا

 

 

• لازم تبدئي بحل الاكتئاب .

 

وان كان الطبيب النفسي بالفعل لازم هيهتم بيه , بس انتي لازم تحطيه في بالك , انه من اولوياتك انك تحلي مشكلة الاكتئاب , عشان متلتهمش حياتك .

 

هنا اتكلمنا بالتفصيل عن ازاي نحل مشكلة الاكتئاب

 

 

• لازم تزودي شوية من جرعة "البرود" عندك .

 

لأن الأمل الزائد في الناس زائد الاحساس بالمهانة هي اللي سببت "خيبة الأمل" , فلما يكون عندك نوع من الهدوء والبرود في المشاعر , هتجعلي اي صدمة مستقبلية ممكن تيجي , هيكون ليه اثر اقل عندك

 

 

• مهم تظبطي معيار الثقة في الناس  .

 

لان زي ما قلنا , المصدر الاساسي لخيبة الامل , هي الثقة في ناس متستاهلش الثقة  ,و ده الوصف اللي انتي وصفتيه لنفسك "السذاجة"  .

 

لكن لما تضعي كمية متوازنة من الثقة بالناس , وقتها اي صدمة منهم هيكون وقعها أقل , لأنك بالفعل مأمنتيش ليهم بالكامل

 

و هنا كنا اتكلمنا بالتفصيل عن مشكلة الثقة بالناس و آلية ضبطها في الرسالة بعنوان : الثقة العمياء

 

 

 

• السجاير , وهي ان مكانش ليها اثر نفسي مباشر , فهي هتجعلك دايما تفتكري الاكتئاب و المرارة , فحاولي تقطعي خطوات لحلها  , وتكون متوازية مع حل باقي المشاكل اللي قلناها من شوية

 

• فن التأقلم .

 

وهي بتستخدم مع الحاجات اللي غالبا مش هنعرف تغيرها , ومفيش آلية لعلاجها , زي خيانة صديقتك , او الظروف الاقتصادية في مصر

 

وحاجة زي كدة بيكون علاجها انك تنزعي من عقلي الاثار السلبية اللي سابته الاحداث ديه , وتحاولي تشوفي لو فيه طريقة لعلاج الموضوع شوية  (تاخدي كورسات عشان تشتغلي شئ تاني) , او انك تنسيه او تتناسيه (حد باعك )

 

• مشكلة العزلة .

 

خدي بالك العزلة و الانطوائية هي  أهم سبب هيزودو المشكلة , وهيوقفو اي علاج .

 

طول ما انتي لوحدك , طول ما شياطين الافكار السودا بتلعب حواليكي , ومفيش اي علاج نفسي هينفع معاكي ابدا .

 

لازم تعملي حاجتين بالتوازي : تبقي مشغولة  ,و تقابلي ناس .

 

تبقي مشغولة معناها انك تشوفي حاجة تلتهم وقتك , لو مفيش شغل يبقي دراسة او كورسات او عمل خيري او حفظ قرآن او زيارة قاريب او قراءة او اي شئ يخلي يوم مشغول ,  عشان متتعذبيش .

 

ومقابلة الناس مهمة جدا , لو اصدقائك الحاليين كلهم زفت هتلاقي غيرهم , ودوري علي الانسانة اللي تخاف ربنا  , فهتلاقيها غالبا تحترمك .

 

و اتعودي ميكونش فيه اي اسرار مع اي حد , عشان اصلا ميكونش فيه امكانية ان حد يبيعك

 

وهنا كنا اتكلمنا بالتفصيل في مشكلة العزلة  : في رسالة بعنوان : العزلة الإختيارية

 

 

• أخيرا تمني الموت .

 

وان كان ذكر الموت للعظة و للتقرب لربنا , ده شئ ايجابي , فتمني الموت شئ مدمر للصحة النفسية .

 

و هيجعلك ببساطة معندكيش قابلية لاي شئ , ولا حتي العلاج النفسي , حد يتعالج وهو عايز يموت اصلا ؟

 

و خدي بالك ان تمني الموت هو "نتيجة" مش "عرض" , يعني هو جه نتيجة حاجات كتيرة متعلقة بخيبة الامل و الاكتئاب , ودع معناه انه هيختفي فورا , اول ما باقي المشاكل تتعالج

 

-----------------------------------------------------------------------

 

حالتك ميتسكتش عليها , ونصيحة دوري علي طبيب نفسي في اقرب وقت ,وبالتوازي شوفي الخطوات اللي فاتت و طبقيها بقدر الامكان , وبالتوفيق يا رب