العنوان : الحـُطام

القسم: #النفسي

الرقم: 04

السؤال:

​

السلام عليكم

عندي مشكلة مش عارفة اتعامل معاها

انا بنت 31 من اسرة مفككة عندي اخوات كل واحدة منهم في وادي واب وام مطلقين وفي وادي تاني

دايما حاسة بالغربة ان مليش حد غير عقد شخصية سببها تحرش في سن صغير وعمل من سن صغير وقابلت معظم نوعيات الناس , معظمهم مستغل وحقير

بحاول اكمل دراستي  , بس دايما حاسة اني زهقت عايزة اموت

معنديش اصدقاء  معاملاتي مع الاخرين في اضيق الحدود . وبحاول متعاملش معاهم اصلا

لو حد في مشكلة بحاول اساعده علي قد ما قدر خصوصا الاطفال  لان اهاليهم مش بيهتموا بيهم

تنصحني بايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله . .

 

انتي عايشة في واقع مؤلم , و زنزانة كبيرة , مش اللي اللي صنعتيها , بس انتي مش عايزة تخرجي منها . .

 

نقول تاني . .

 

الواقع اللي انتي عايشة فيه مؤلم جدا , ويهد الجبال  , وانتي كنتي ضحية مجموعة من افراد معندهومش اي احساس بالمسؤولية , غير أفراد غيرهم قمة في السفالة و والانحطاط , المأساة اللي انتي فيها انتي ضحيتها , بس في نفس الوقت انتي عليكي الذنب انك مخرجتيش منها . .

 

و صدقيني الخروج منها ممكن , صحيح مش سهل بس متاح  , وأخشي انك معملتيش المحاولات الكافية لكسر جدران السجن المظلم ده . .

 

ببساطة انتي كنتي ضحية إهمال أسري من أبوين دمرو حياتك , وحتي مفهموش الاسلوب السليم للتعامل مع الاطفال بعد الطلاق , إضافة لمأساة التحرش بيكي و انتي صغيرة . .

 

وارد يكون فيه مشاكل تانية لم تـُذكر  , إما لحرجك من ذكرها , او انك بالفعل مش فاكراها , وده ممكن يحصل سيكولوجيا و ان عقلك الواعي ينسي أحداث مهولة  , كحيلة للهروب من الألم الشديد المصاحب ليها . .

 

و كل ده صنع عندك عقدة نفسية من التعامل مع البشر , وجعلك في بداية الطريق (ان مكنتيش بالفعل مصابة بيه) لما يسمي (رهاب البشر ) او ما يطلق عليه Anthropophobia  , وهو الخوف غير الطبيعي من التعامل مع أي إنسان , الا القلة القليلة اللي انتي مستريحالهم . .

 

و الحقيقة ان المشكلة كلها مش في اللي حصلك , لكن من اللي ممكن يحصلك من (رهاب البشر) . .

 

يعني المشكلة مش في اللي حصل بالفعل في السنين اللي فاتت , لان فيه نماذج معروفة و مشهورة , وتعرضو لأقسي مما تعرضتي ليه , وتمكنو من تجازوه و تحقيق نجاح مدهش , واشهره (اوبرا وينفري) . .

 

لكن المشكلة في الاثر اللي ممكن يعمله من مجموعة العقد النفسية المركبة , واللي هتستوطن عقلك و كيانك , وهتحولك إلي حـُطام  , وبقايا إنسان , يسعي للتخلص من حياته في اسرع وقت . .

 

---------------------------------------------------------------------------

 

تعالي في البداية نسرد عناصر المأساة . .

 

• اسرة مفككة , وسببها ( الطلاق  , إهمال الابوين و الاخوة لكي )

• اضطرار تحمل المسؤولية والعمل من وانتي طفلة

• التحرش في سن صغيرة

• الصدام مع انواع حقيرة من الناس

• عدم وجود اصدقاء , والاحساس بالغربة

• الإحساس بالضيق , وخواطر الموت

 

النقط الأربعة الأولي , انتي ضحيتها , والنقطتين الخامسة و السادسة انتي غلطانة انك سايباهم

 

لو بدأنا بالنقطة الأولي . .

 

وجود الطلاق في حد ذاته مش بيكون سبب في الأزمات النفسية للأطفال , لكن المشكلة في التعامل و التصرف قبل و اثناء و بعد الطلاق . .

 

المشكلة ان احنا كعرب مش بنعرف الوسط , يا اما نكون حبايب يا اما اعداء , يا إما نكون ازواج يا اما نجرجر بعض في المحاكم , قليل من الأزواج اللي بيكون عندهم وعي كافي انهم يعامل بعض بشكل محترم , ومن غير عداء بعد الطلاق . .

 

احنا بنتعامل ان الطلاق معناه الخيانة و اشتعال نيران الكراهية بين الابوين , وان كان ده ملوش ضرر ملموس في حالة عدم وجود اطفال , فهو كارثة في حالة وجود اطفال , خاصة لو كانو صغار  . .

 

 

 

الطلاق في حد ذاته مش نهاية العالم , والا مكانش بقي حلال في الإسلام , ولكن فيه قواعد في التعامل بعد الطلاق , وأهمها عدم إساءة كلا من الطليقين للتاني ابدا , بل و حث الاطفال علي حبه و احترامه , والتأكيد ان احنا الاتنين كويسين بس مش مناسبين لبعض . .

 

---------------------------------------------------------------------------

 

بالنسبة لاضطرارك تحمل المسؤولية مبكرا , ديه برضه مشكلة تانية , واللي اغتالت داخلك حلم و براءة الطفولة , وجعلتك في صدام مبكر مع مآسي الحياة . .

 

عمالة الأطفال جريمة , وبتزداد المأساة مع اصطحابها للتعامل مع أوباش المجتمع , مما يجعل الطفل عاجز امام اي سفيه او منحط . .

 

مش فاهم ازاي جميع اقاربك تخلو عنكي  في اللحظات الحاسمة ديه  , ده ذنب لا يغتفر , و نتيجته هتظل باقية لعقود . .

 

و التحرش احنا نعجز عن الحديث عنه , لأن مهما قلنا كلمات فهي ستظل عاجزة عن وصف عِظم المأساة , يكفي ان تعرفي ان أقسي عقوبات القوانين في اوروبا و امريكا , هي للمتحرشين بالاطفال , اما مغتصب الاطفال في امريكا فبيتم اعدامه فورا بالكرسي الكهربي , وفي اوروبا السجن مدي الحياة , بعد الغاء عقوبة الاعدام في كافة اوروبا . .

 

أخشي ان الحالة اللي انتي وصلتي لها تكون محتاجة تواصل مباشر مع طبيبة نفسية محترفة , و احنا كصفحة علي الفيس بوك مش هنقدر نقدم اكتر من كلمات , مهما فعلت فهي مش هتحل المشكلة جذريا . .  

 

لازم تفكري جديا في الذهاب لطبيبة نفسية خبيرة , لان حالتك قد تكون بالفعل شديدة الخطورة . . 

 

---------------------------------------------------------------------------

نوصل لجدران الزنزانة . .

 

وهي اللي تم بناءها حواليكي , لتلقي بيكي في سجون الوحدة الموحشة والمرض النفسي العميق , واللي مش هتسيبك الا وانتي حـُطام كامل . .

 

جدران السجن تتلخص في نقطتين , واللي بيأدو الي نتيجتين مخيفتين . .

 

النقطة الأولي هي : الخوف من الناس , واللي هتؤدي إلي : الاحساس بالغربة

 

النقطة التانية هي : الإحساس بالضيق الرهيب , واللي هتؤدي إلي التفكير في الانتحار

 

النقطتين دول , والسببين التابعين ليهم , هما الجدران الأربعة للسجن اللي حاجب عنك ضوء الشمس , وهواء الحياة . .

 

بس المدهش ان باب السجن مفتوح , الخروج ممكن , بس انتي لسبب ما مستصعبة الموضوع , ومش عايزة تجربي تخرجي . .

 

ايه ده  . . هو بجد ممكن اخرج من السجن ده ؟ ؟

 

قطعا ممكن , كل اللي حصلك كان في إطار "المشاكل" , ولم يصل لإطار "المآسي"

 

احيانا الإنسان – لا شعوريا – بيميل لتضخيم المشكلة عنده  , وده – رغما عنه – بيعمله للإبقاء علي مشاعر الحزن و الكآبة اللي بتعطيه إحساس إنه "شهيد"  , و "ضحية" المشاكل المتتالية , والحياة القاسية . .

 

الشعور ده بالكامل من عقلك الباطن , بيتم صياغته هروبا من مواجهة الحياة أساسا , والاكتفاء باجترار احزانك , ويصبح بالنسبة لكي حديث الصباح و المساء  . .

 

بينما لو هتعملي مقارنة موضوعية حقيقية  , بين ظروفك وظروف ناس تانية , هتندهشي ان انتي في جنة بالنسبة لما تعرضو اليه . .

 

ماذا عن التعذيب الجسدي الرهيب اللي بيصيب الابناء من بعض الآباء . .

 

ماذا عن شعور الحرمان المستمر لاطفال اتولدو في فاقة شديدة , وفعليا بينامو من غير عشا ؟ ؟

 

ماذا عن الاغتصاب الكامل اللي بيحصل لاطفال  وقاصرات و مراهقات . .

 

ماذا عن حمل مبكر , نتيجة زواج بقرار متسرع , أو الأنيل نتيجة اغتصاب . .

 

ماذا عن زواج من شخص اكبر منك ب 30 سنة , مشغلك خدامة عنده , يسومك سواء العذاب , وينال وطره منك حينما يشاء . .

 

ماذا عن طفلة ولدت وهي عمياء او مشلولة , وحرمت من نعمة يتمتع بها من حولها . .

 

بل ماذا عن فتيات نشأو – رغما عنهم  او بارادتهم – في بيوت قوادة , و يبعن اجسادهن باسعار بخس . .

 

 

صدقيني يا ابنتي , لو قارنتي حالك بمئات المآسي الاخري , هتكتشفي انك في جنة  بالنسبة لهم , و هتفاجئي ان بعضهم تمكن بالفعل من تخطي كل ده , وصار ناجح في حياته او حياتها . .

 

اللي حصلك مش قليل , بس مش اللي يهدك او يجعلك تفكري في التخلص من حياتك , والتعرض لغضب الله  ربنا يحفظنا , اللي حصل مشكلة ,لكنها هتتعالج لو انتي عندك ارادة . .

 

 

---------------------------------------------------------------------------

 

ايه ده , هو بجد فيه حل ؟ يعني ممكن اكون انسانة طبيعية ؟ ؟

 

اكيد , باب السجن مفتوح لو عايزة , صحيح الطريق مضلم شوية , وفيه شوية مطبات , بس هو مين قال ان الحياة اصلا سهلة بشكل عام ؟ و مين قال ان ظروفك هي الأسوء ؟ ؟

 

فيه طرق و خطوات , لو اتبعتيها هتندهشي من التغييرات اللي هتلاقيها , بس صدقيني من غير رغبة حقيقية عندك , وارادة قوية , مفيش اي حاجة هتتم . .

 

هحاول اسرد عدد من الخطوات اللي حاولي تنفذيها علي قد ما تقدري , افتكري ان حياتك بالفعل مرتبطة بمدي جديتك في انقاذ نفسك من السجن ده . .

 

 

• أولا لابد من الذهاب لطبيب نفسي متخصص , ويفضل طبيبة  , انتي متعلمة و مش هتفكري زي الجهلة اللي بيتعاملو مع الطبيب النفسي انه للمجانين , الطبيب النفسي بيستخدم في دول اوروبا بشكل دوري عند اغلب الاسر , للمساعدة في اتخاذ القرارات , و مسيرة الحياة . .

 

---------------------------------------------------------------------------

 

 

• الاصدقاء , وهو شئ لا نقاش فيه , سجنك مش هتخرجي منه الا بإن يكون معاكي عدد لا بأس به من الاصدقاء و المعارف , واللي هيملو عليكي حياتك , بدل ما هي مظلمة بالشكل ده . .

 

---------------------------------------------------------------------------

 

 

• لابد تمارسي حياة اجتماعية كاملة , عن طريق "ربط" نفسك  بعدد من المشاوير والخروجات , اعمال خيرية في ملجئ ايتام , كورس بتاخديه , قرايب بتزوريهم  , مكتبة بتروحيها , مسجد تحفظي فيه القرآن . .

 

---------------------------------------------------------------------------

 

 

•  اضحكي , ايوة فعلا الضحك بيكون ليه تأثير علاجي ساحر في المواقف المشابهة , خاصة ان الاكتئاب بيغزو روحك

 

---------------------------------------------------------------------------

 

 

• أخيرا عليكي بالفهم السليم لأسس الدين , اقرأي القرآن , وفي ايدك تفسير مبسط , اتعرفي بالتفصيل علي قصة سيدنا موسي , و سحرة فرعون , بني اسرائيل , وحادث الإفك , وتفاصيل غزوة حنين , وبقرة بني اسرائيل . .