العنوان : بين الحزن و الإكتئاب

القسم: #النفسي

الرقم: 69

السؤال:

 

 

السلام عليكم ورحمة الله وبركاتة.

 

معلش سؤال ممكن يكون غريب شوية.

 

ايه الفرق بين الحزن والإكتئاب ؟

 

وهل فترة الإكتئاب ممكن تكون منقطعة من حين للآخر مثل الحزن ولا لازم تكون متواصله ؟

 

وازاي أعرف إن الإنسان ده وصل بالفعل لمرحلة الإكتئاب الحقيقي وأن الذي به لم يكن مجرد مرحلة بسيطة من الحزن فقط ؟

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله . .

 

سؤالك بالغ الأهمية , مش غريب ولا حاجة , بل هو بالفعل مفيد جدا , خاصة للتفريق بين أمرين الناس بتتلغبط بينهم . .

 

وهو الشخص اللي يشعر "بالحزن الشديد" , او الشخص المريض بـ "الاكتئاب" . .

 

و الفرق بينهم إن الأول هو شخص عنده مشاعر معينة , و يشعر بالحزن لسبب معين , لكن هو إنسان طبيعي . .

 

بينما التاني هو عنده اضطراب نفسي حقيقي , ومشكلة كارثية قد تصل للإنتحار . .

 

و الخلط بين الأمرين , بيعمل أحد مشكلتين . .

 

المشكلة الأولي إن لو شخص عنده مشاعر حزن طبيعية , يتم التعامل معه علي إساس انه مريض اكتئاب , و بالتالي ممكن أهله يكبرو الموضوع و يروحو بيه لطبيب نفسي , او هو نفسه – عن طريق الإيهام – يظن إنه وقع بالفعل في فخ الاضطرابات النفسية العميقة , ويتعقد . .

 

والمشكلة التانية أخطر . . إن لو شخص مصاب باضطراب الإكتئاب الحاد , ان اللي حواليه يتعاملو معاه علي اساس إنه حزين , ويحاولو يخففو عنه , زي ما بيخففو عن الشخص الحزين , هو الأمر اللي مش هيعالج المشكلة بل أحيانا بيعمقها , لغاية لما نكتشف انه عمل مصيبة او وقع في فجوة المرض النفسي . .

 

فالتفريق بينهم شئ بالغ الأهمية فعلا , وهي حاجة لابد كل واحد فينا يعرفها , لأننا معرضين اننا نقابل النوع ده او ده بشكل دائم في حياتنا . .

 

و هنحاول هنا نتكلم عن عدد من الفروق بينهم بناء علي معايير معينة , عشان الصورة تكون أوضح . .

 

و لاحظي اننا بنتكلم عن حاجتين مختلفتين , "الحزن" كمشاعر طبيعية و مفيهاش ضرر (بل ان عدم وجودها معناه مشكلة) , وبين اضطراب الإكتئاب (Major depressive disorder) , كمرض نفسي لابد من علاجه , فمش عايزين نلغبط بين المصطلحين . .

 

وياريت لو مكنتيش قريتي الرسالتين اللي عملناهم عن الإكتئاب , أعراض الإكتئاب , الإكتئاب المفرط

 

 

-----------------------------------------------------------------------------

 

• السبب :

 

الحزن كمشاعر طبيعية , لابد يكون فيه سبب معين , ممكن سبب كبير (وفاة , فشل في الدراسة , خسارة فلوس , انفصال او طلاق ) , وممكن يكون سبب يبدو هايف , لكن بالنسبة لصاحبه مشكلة كبيرة (خسارة مباراة , وفاة شخص مغني , ممثل اتجوز . .  ) , ايا كان ,فلازم يكون فيه سبب معروف . .

 

الإضطراب كمرض نفسي , ممكن يكون فيه سبب ظاهر , وممكن ميكونش فيه سبب , يعني ممكن يكون فيه سبب معين يتسبب في حدوثه  ,وممكن يحصل إضطراب الإكتئاب من غير سبب باين في الصورة . .

 

غالبا حتي في حالة عدم وجود سبب , بيكون فيه سبب بس مختفي شوية  ,يعني ممكن حتي المريض النفسي هو ذاته مش عارفه , بس الطبيب النفسي لو شاطر بيعرف يوصل للسبب ده , واللي بيكون مدفون في اللا وعي الخاص بالمريض نفسه . .

 

فالشئ الأول اللي ممكن نفرق بين ده و ده , هو وجود السبب . .

 

                   --------------------------------------------------------------------------

 

• تأثير الوقت :

 

الشخص الحزين , الحزن بتاعه بيقل بمرور الوقت , ممكن يكون معدل تناقص الحزن سريع (خلال يومين تلاتة يروح الحزن تماما) , وممكن يكون المعدل بطئ (يحتاج الأمر لشهور او سنين  لغاية لما يروح الحزن) , بس في كلا الأمرين , الوقت بيساعد و بيقلل الحزن , والشخص الحزين نفسه حاله بيتحسن تدريجيا مع الوقت. .

 

 

المريض باضطراب الإكتئاب مختلف , الوقت مش بيعالج المشكلة , ده أحيانا بيزودها . .

 

مريض الإكتئاب , إكتئابه مش بيقل مع الوقت , ولو اتساب مع نفسه او في مكان مع ناس , فتدريجيا مش هينسي حزنه و يندمج في المجتمع , لأ اكتئابه هيظل زي ما هو , وأحيانا بيزيد و بيتعقد . .

 

و هنا الخطورة اللي بتحصل للي بيصاب بمرض الإكتئاب , ان أهله او رفاقه يحاولو يدمجوه في المجتمع , و يمارس حياته الطبيعية "عشان الحزن بتاعه يروح" , من غير ما يفهمو إنه مش حزين , لكن مصاب بمرض نفسي , ومش هيختفي مع الوقت , لكن محتاج علاج نفسي فورا .

 

--------------------------------------------------------------------------------

 

• تغير الظروف  :

 

الشخص الحزين  , حزنه بيقل لما الظروف تتغير , يعني مثلا هو سافر , او قابل ناس جديدة  ,او اترقي في شغله , او ناس زارته و قعدت معاه شوية , او فيه موسم وصل (شهر رمضان مثلا بدأ) , او هو راح يحج , او حتي فيه ظروف سياسية في البلد حصلت . .

 

كل الحاجات ديه بتأثر في كمية الحزن , وغالبا بتجعله أقل و تساعد علي التخفيف منه . . 

 

بينما المريض بالإكتئاب يختلف . .

 

الحاجات اللي فاتت ديه كلها , واختلاف الظروف ملهاش تأثير يذكر في كمية الإكتئاب اللي عنده , ولو تم إجباره علي الإندماج مع الناس ممكن ده يأثر سلبا و يعمل تعميق في حالة الإكتئاب اللي عنده  , ممكن مثلا لو فيه مناسبة سعيدة (فرح حد في الاسرة) يفرح مؤقتا و يرجع لاكتئابه تاني .

 

--------------------------------------------------------------------------------

 

• العوامل الوراثية  :

 

العوامل الوراثية ملهاش تأثير يذكر في كمية الحزن للشخص , ولكن اللي بيعمل الحزن الظروف نفسها ,و طباع الشخص . .

 

بينما مرض الإكتئاب مرتبط بشكل ما بالعوامل الوراثية , وبالتاريخ المرضي في أسرته , وياتري مين من أسرته كان عنده نفس المرض  , او عنده أمراض نفسية أو عصبية اخري . .

 

مش شرط ابناء الشخص المصاب بالإكتئاب يكون عندهم نفس المرض  ,بس بيكون ليها تأثير ما .

 

--------------------------------------------------------------------------------

 

• ممارسة الحياة  :

 

و ده من أهم الفوارق , واللي لازم ناخد بالنا منها جدا . .

 

الشخص المصاب بالحزن بيمارس حياته بشكل طبيعي , هو أيوة ممكن يكون فيه شوية فرق في الكم و الكيف بسبب حزنه , لكن بشكل ما بيمارس أغلب انشطته اليومية عادي . .

 

فحتي لو حصل حالة وفاة , فتجد إن أقارب الشخص المتوفي , بعد ايام يبدأو اللي بيروح الكلية و اللي هيروح الشغل  , واللي هيفتح الفيسبوك ,وهكذا , وحتي بعد مرور عدد من الشهور ممكن يفتحو التليفيزيون , وممكن يروحو المصيف , ويحضروا أفراح   , وده لا يتنافي مع كمية الحزن اللي كانت موجودة عندهم بالفعل . .

 

مريض الإكتئاب مختلف ,هو أصلا فيه عراقيل من جواه تمنعه من أغلب أنشطته اليومية , سواء كانت حاجات عادية او اشياء مفرحة , عنده نوع من "فقدان الرغبة" في عمل اي شئ , وغالبا  مش بيعمل الا الحاجات اللي بيضغطو عليه فيها , وبيعملها من غير نفس . .

 

واخدة بالك من فكرة "اختفاء الرغبة من عمل أي شئ" , ده أهم شئ بيتم تمييز بيه مريض الإكتئاب .

 

--------------------------------------------------------------------------------

 

• اليأس :

 

 

 

والنقطة ديه مرتبطة بالسعادة , ان الشخص المصاب بالإكتئاب غالبا مفتقد للسعادة بشكل مستمر , بينما الشخص الحزين بعد فترة بيبدأ يشعر بيها بشكل طبيعي . .

 

--------------------------------------------------------------------------------

 

• الانطواء  :

 

الشخص الحزين بيكون أقرب للإجتماعية ,  و بشكل ما بيكره إنه يكون لوحده . .

 

و حتي لو في بداية حزنه كان عايز إنه يكون لوحده عشان محدش يشوفه مكسور (خاصة لو شاب) , فده بيكون شئ مؤقت , و بيختفي بعد فترة . .

 

بينما الشخص المصاب بالإكتئاب هو اصلا بيحب العزلة  , ومش عايز يخرج و يندمج في المجتمع , وبيفضل و يختار كل الأنشطة اللي هيكون فيها لوحده , ولو بإيده يعتزل الناس كلها . .

 

مش معني كدة إن اي شخص انطوائي او منعزل انه مصاب بالإكتئاب , أي شخص مصاب بالإكتئاب بيميل للعزلة , لكن العكس مش لازم يكون صح . .

 

--------------------------------------------------------------------------------

 

• طريقة التفكير  :

 

الشخص الحزين بيقدر يفكر و يتخذ قرارات سليمة , ممكن يكون ده صعب عليه في بداية مشكلته  ,لكن تدريجيا بيعرف يتصرف . .

 

الشخص المصاب بالإكتئاب مختلف  ,أحيانا بيحس إن عقله فيه شوية تشويش , يحس إنه تايه  ,يحس إن فيه مشكلة بس هو مش عارف ايه هي , او عارفها بس يائس تماما من حلها . .

 

و ده السبب الرئيسي اللي يخلي المصاب بالإكتئاب مينفعش تتكلم معاه بالمنطق , يعني مينفعش تقعد مع صاحبك المصاب باضطراب الإكتئاب علي القهوة , وتكلمه بالمنطق و العقل ان فك شوية يا اخي , و هدي نفسك , ويللا نذاكر , وشوف مستقبلك . .

 

اساسا هو ذهنه مش هنا , وعقله مش بيفكر بالشكل العادي , والاسلوب ده مش بينفعه , بل أحيانا بيأذيه من الضغوط النفسية اللي بتتسبب ليه  .

 

--------------------------------------------------------------------------------

 

• الأثر الديني  :

 

وديه نقطة خلاف رهيبة بين الناس . .

 

أغلب الناس مؤمنة , إن التدين و التمسك بكتاب الله يمنع الإكتئاب , وإن الإلتزام هو علاج اضطراب الإكتئاب , وبالطبع ده  غير سليم . .

 

لازم الناس تؤمن إن إضطراب الإكتئاب ده مرض , زيه زي السكر و النقرص و السرطان و الحمي , مرض عادي جدا يصيب المؤمن و الكافر والجميع . .

 

هو لما سيدنا سعد بن ابي وقاص أصابته الدمامل يوم فتح القادسية  ,كان ممكن يعالج الدمامل بالتدين ؟ او بالقرآن والسنة ؟ ؟

 

ده نوع من تحميل الدين غير محمله , ولم نر من الرسول صلي الله عليه و سلم او من الصحب الكرام انهم عملو علاج لأي مرض بالدين , الا لو كان خط موازي للعلاج الطبي , زي الرقية الشرعية . .

 

الإكتئاب هو مرض نفسي و عقلي , وبيشترك فيه الجزء الفسيولوجي (الجسدي) والسيوكولوجي (النفسي) و السيسيولوجي (الاجتماعي) مع بعض , هو ينفع شخص مصاب بالهلاوس , ولا واحدة عندها فوبيا الأماكن المغلقة نعاجلها بالدين ؟ ؟

 

مش عايزين نخترع شئ الرسول صلي الله عليه و سلم نفسه مأمرناش بيه , ده مش تدين ولا فكرة سليمة . .

 

و فيه سكرين شوت منتشرة , والناس كلها بتشيرها , وهي الطبيب النفسي اللي بيقول ان يزورني كل انواع الناس , الا حفظة كتاب الله , الفئة ديه اللي عمرها ما بتمرض نفسيا . . . بالله عليكم ده كلام ؟  ؟

 

طب لو احنا شفنا شخص متدين و عنده اضطراب الفصام , يبقي ساعتها نقول العيب من الدين ؟ ولا انه مش حافظ كتاب الله  ؟ ولا نقول ايه ؟ ؟

 

مش عايزين ننشر كلام فاضي من غير ما نتيقن من صحته , وهو في الأساس يتعارض مع ثوابت الدين , وبالطبع عدد من المتدينين يزورو الأطباء النفسيين بشكل عادي  , زيهم زي باقي الناس  . .

 

اضطراب الإكتئاب هو مرض نفسي , يصيب الجميع , و علاجه باستخدام العلم بالتوازي مع الدين اللي هو اصلا فيه شفاء روحي لجميع المشاكل . .

 

لكن اني أعالج شخص مصاب باضطراب الإكتئاب  , عن طريق القرآن , او صحبة الصالحين , بالظبط زي اني اقول لشخص مصاب بالسكر , سيبك من الأنسولين و خليك في السيرة النبوية , او شخص عنده الغنغرينا , ان سيبك من الجراحة و اقرأ في كتب الفقه , ده لا دين ولا علاج . .

 

ايوة التمسك بالدين و كتاب الله و الصلاة بيكون ليه تأثير في الصحة النفسية بشكل عام , ده كلام سليم , لكن تجاهل الأسلوب العلمي , والخطوات السليمة لعلاج مرض نفسي خطير زي الإكتئاب , و الاعتماد علي الدين وحده هو شئ غير صحيح .

 

بعض الناس مش هيعجبها كلامنا , واللي غالبا بينظرو للدين بمنظور عاطفي شوية , وأؤكدلهم تاني , اننا بنلتزم باللي قال عليه الرسول صلي الله عليه و سلم و الشرع الحنيف , و كلاهما أمر بالتماس الأساليب الدنيوية في العلاج من الأمراض . .

 

--------------------------------------------------------------------------------

 

• مشاكل جسدية :

 

الشخص الحزين بيتعامل مع جسده بشكل طبيعي حتي في ايام حزنه  ,او ممكن يكون فيه شوية إهمال فترة حزنه بعدها يكون طبيعي . .

 

بينما المصاب بالإكتئاب , غالبا بيكون فيه إهمال كبير بالنظافة الجسدية , ورغبته في الاستحمام و تغيير ملابسه و الحرص علي حسن مظهره . .

 

كمان بيكون عنده شوية اضطراب في نومه  ,اما بينام كتير جدا , او ينام قليل , او مش عارف ينام الا اقل القليل . .

 

كمان عنده مشكلة في الشهية , يا اما بياكل كتير جدا و يتخن  , يا بياكل قليل جدا و معندوش شهية و بينحل بشكل مستمر . .

 

--------------------------------------------------------------------------------

 

 

• التفكير في الموت :

 

ديه كمان علامة مهمة في التفريق بينهم . .

 

الشخص الحزين مش بيفكر في الموت ولا الانتحار , ممكن يفكر فيه سريعا في بداية حزنه , بشكل مؤقت و هاجس سريع , لكن لما يعدي كام يوم ميفكرش فيه . .

 

بينما المصاب بالإكتئاب مختلف , هو شايفه بالفعل حل لمشاكله, وهو المخرج من المعاناة اللي فيها , وبيفكر فيه بشكل حقيقي . .

 

بعضهم بيكون عنده الشجاعة انه يفكر في الانتحار , وبعضهم بيحاول , والبعض مش بيقدم ولا يفكر في الإنتحار بس هو من جواه يتمني الموت . . 

 

--------------------------------------------------------------------------------

 

• العلاج  :

 

الحزن علاجه سهل , شوية تخفيف من الأسرة و الأصدقاء , علي شوية تغيير في الجو , و كمية من الدعم النفسي و الإجتماعي , وعدد من القناعات الدينية بتعمل تخفيف سريع للحزن .

 

 

الإكتئاب مختلف , كل اللي قلناه فوق ممكن يكون ليه شوية تأثير إيجابي  وممكن ميكونش ليه اي تاثير علي الإطلاق , بس حتما الدعم النفسي والتواجد حول الشخص بيفرق ايجابا . .

 

بس الخط الأساسي لعلاج اضطراب الإكتئاب هو الذهاب للطبيب النفسي , واللي بيمارس عدد من خطوات العلاج النفسي + علاج دوائي , لأن عدد من الأدوية بيكون مفيد جدا في تخفيف حدة الإكتئاب . .

 

لكن الأهم إن المحيطين بالشخص المصاب بالإكتئاب , يكون عندهم الوعي الكافي لحسن التعامل معاه  ,من ناحية ميعملوش إهمال له ويسيبوه , ولا انهم يتعاملو معاه علي إنه حزين , ولا إنهم يدمجوه رغما عنه في المجتمع , ده مش هيصلح اي مشكلة . .

 

لازم تزداد ثقافتهم عن مرض الإكتئاب (Major depressive disorder) وبالطبع لازم يتابعو مع طبيب نفسي متخصص , يتعاملو معاه بحكمة و روية  . .