العنوان : المشاعر المُضطربة

القسم: #العاطفي

الرقم: 16

السؤال:

 

هو ينفع الانسان يدعي ان الحاجة تبقا خير ليه ؟؟ برغم ان مثلا ربنا كتبها انها مش خير ممكن يغير الاقدار ويحولها لخير فعلا !!

 

احنا عندنا 19 سنه و هو في كلية و انا كلية تانية بس نفس الجامعة , احنا سبنا بعض  ومستنين يجي وقتنا المناسب للخطوبة و كدا

وسبب سيابنا لبعض اني اتعصبت وقولتله مش عايزاك  من ساعتها الكلمة وجعااه ومش راضي يرجع

 

انا وهو شخصيتناا تقيلة اووي وهو بذات .. انا زيادة اني دبش بطريقة غبية .. انا وهو بنتكلم كاصدقاء عاادي

و حصل انه حبني كنا بنتكلم شات

 

اول مرة نتقابل كان عندنا حفلة ف المجمع وكداا روحت الحفلة و اتفقت معاه ع انه هيجي برغم انه ماكنش عاوز مش بيحب الحفالات و الجو داا بس جه عشاني

 

اخدت صاحبتي و روحتله عشان كنت مكسوفة هو قرب وكدا وقفنا سوا وقتها مكملناش دقيقة قلي يلا روحي لصحابك و انا همشي هتمشي فين هروح تروح ايه دي اول مقابلة ليناا ايه اللي انت بتعمله دا

 

قلي اصلي اتخنقت

 

قولتله قبل ما يمشي انا فرحانة اني شوفتك انهاردة وكدا هز راسه ومشي وانا روحت لصاحبتي عشان هنروح سوا حتى مواقفش يركبني

 

ضغطي على و تعبت و كنت هقع من صاحبتي ف الشارع بسبب اللي هو عمله داا كانت مقابلة بايخة .. اول ما روحت عند صاحبتي البيت قولتله الكلام دا انها كانت مقابلة سخيفة و عملت عكس ماكنتش متوقعة

قلي مانتي كنتي حلوة حصل ايه وقلي انتي كنتي متوقعة ايه يعني

 

قولتله حسيت ان اللي معايا ف الشات غير اللي ف الفون غير اللي ف الحقيقة قلي انا كماان حسيت كدا وماتكلمتش

قولتله نعم انا كنت بتضحك وبهزر انت بتجبها فيا تقلب الايه

 

قلي لاء والله ماقصدتش بس مشاعري اتلغبطت .. من هناا عرفت انه كاان بيستعبط وكل دا كان وهم قلي والله انا مش كداا مش معقول كل دا بتضحك عليكي ولو كنت عاوز اضحك عليكي كنت كملت و طلعت منكك باي حاجة وخلاص لكن انا بعاتبكك وكدا

 

المهم قلي طيب سبيني افهم ايه اللي حصل اجمع نفسي يعني و هكلمكك قولتله لاء قررت خلينا صحاب

 

كلمني فون قولتله لاء انا مش هرجع انت قفلتني قعد يتحايل عليا قولتله عاوز ايه قلي عايزاك سكت قلي قولي انك مش عاوزاني بقا قولتله شطور عرفت منين قلي انتي بتكلمي بجد قولتله اة اكد عليا تاني وقلي احلفي حلفت

 

بحاول اصالح فيه من ساعتها واقوله كان رد فعى لغلطك اللي عملته لان كلامك وجعني مش راضي

قلي الكلمة وجعتني والله مش قادر انساها

 

وماكنش بينام عشان يروح كليته كان بيروح مطبق و نبرة صوته اتغيرت اول ما قولتله مش عايزااككك كان بيعيطط وهو قلي كداا ..

 

انا اسفه لو كنت بضغط عليكك ولا حاجة لاني تعباانة و كل يوم عيااط و حساسية ف جسمي كله وبنزف من منخيري والله وعياط ف كل سجدة

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اهلا بيكي . .

 

فيه شوية من كلامنا مش هيعجبك , وهتحسي ان احنا باردين شوية , او اننا مش فاهمينك , او معندناش مشاعر , بس احنا مش بنكتب الرد اللي صاحب الرسالة عايزه , احنا بنكتب الرد اللي صاحب الرسالة محتاجه , و احيانا بيكون فيه فرق بين ده و ده .

 

فحتي لو كان جزء من كلامنا سخيف و بارد , فثقي اننا بنقول الكلام اللي في مصلحتك , واللي عرفناه من رؤيتنا لعدد كبير من المشاكل الزوجية و الاسرية المستمرة . .

 

في البداية عندنا علامة استفهام  , مش لاقيين لها اجابة , وهي : هو ده حب اصلا ؟ ؟

 

ممكن اه و ممكن لا , واغلب الظن ان لا   . .

 

انتي و هو سنكم في حدود الـ 20 سنة , وهي سن بيحصل فيها تغييرات جسدية و عاطفية و نفسية كبيرة , وهي بوابة الانتقال من عالم الطفولة و المراهقة , لعالم الرشد و النضج . .

 

و في السن ده  , بيحصل نوع من عدم الدقة  اللي بيكون في ذهن و مشاعر و عقل و كيان الذكر و الانثي  . .

 

فكلا من الشاب و البنت في المرحلة السنية المهمة ديه , مش بيكون دقيق في حكمه و تقييمه للجانب العاطفي , وبيكون فيه شوية تسرع في الاعجاب بشخص , او كراهيته فورا . .

 

و اكتر من علامة شفناها في قصتك , مخليانا بنميل اكتر ان اللي حصل نوع من : الإعجاب السريع , مش الحب كحب . .

 

مفهوم الحب أكبر بكتير من اللي انتي شفتيه و قابلتيه , و أكتر عمق , واشد متانة , الحب الحقيقي بيحصل من تراكم معرفة و احتكاك و تواصل لشهور , مش من ايام و اسابيع . .

 

أغلب الظن ان اللي حصل بينكم هو : مشاعر مضطربة سريعة , فيها قرارات عاجلة , و عواطف متخبطة , وده اللي حصل معاكي, وده اللي حصل معاه . .

 

بالفعل انتي مش بتحبيه , انتي بتحسبي انك بتحبيه , وهو لما عيط مكانش بيحبك , هو كان بيحسب انه بيحبك . .

 

انا مش بقول انه كان بيمثل عليكي او بيخدعك , انا عارف انه مكانش كدة , لكن كلا منكم كان مشاعر سريعة للتاني , وجبة "تيك اواي" في السريع , وده بالفعل مش حب . .

 

المشكلة ان افلام تامر , وروايات المستغانمي , وأشعار نذار , و صفحات الفيس اللي كلها بوستات من نفس الاطار , المشكلة الحاجات ديه بتعمل صياغة غير سليمة لمفهوم الحب , وهو شئ مش واقعي , وغير موجود في الاساس . .

 

الحاجات ديه خلتنا نظن ان الاعجاب حب , وان المشاعر السطحية هي عاطفة عميقة , وان الاحلام الوردية بتتحقق , وان من نظرة عين ممكن قلبين يتشابكو بشكل عميق , وتستمر العلاقة بينهم سنين طويلة لغاية لما يتجوزو . .

 

للاسف ده مبيحصلش , الحب محتاج عشرة و تفاهم و مساحات مشتركة , محتاج يكون فيه صبر وطولة بال و هدوء و تحمل من الطرفين , وواضح ان ده مش موجود بينكم دلوقتي . .

 

 

واللي عمله في الحفلة ممكن يكون سببه انه مش بيحب جو الحفلات , وممكن يكون عشان انتي معجبتيهوش لسبب معين . .

 

و موقفه الحالي المصر علي التعامل البارد معاكي , هو كمان ليه تفسيرين محتملين . .

 

إما إن كرامته ناقحة عليه لما انتي اصريتي انك مش عايزاه , وحلفتيله كمان . .

 

او انه ببساطة زهق منك و بيشوف غيرك , و وارد يكون بيكلم بنات دلوقتي . .

 

و التفسيرين الاتنين بيصبو في اتجاه واحد , وهو ان هو لا يصلح كخطيب او زوج . .

 

لو كان هو كرامته نقحت عليه , ومش قادر يستحمل كلمة انتي قلتيها في لحظة تعصب , فهل ده سلوك يصلح لشخص هيبني حياة زوجية مستمرة و مستقرة ؟ ؟

 

اي زواج بيكون فيه عقبات , وعدد من المشاكل , وحل المشكلة بيكون بطول البال الموجود عند الزوج و الزوجة .

 

و لو كانت البنت سريعة القرارات , او عنيدة شوية , فممكن نفهم ده , لكن ان الزوج كمان يكون دماغه صغيرة بالشكل ده , فده شئ غير مقبول , وهيهد فورا الحياة الزوجية . .

 

هل متخيلة بعد الزواج لو حصل موقف اكبر من كدة , هل متخيلة رد فعل مشابه للي عمله هيكون عامل ازاي ؟

 

هل هتكوني سعيدة ان يحصل طلاق ؟ او حتي يستمر الزواج مع حياة باردة زي ما هو بيعمل دلوقتي ؟ ؟

 

ولو كان التفسير التاني اللي حصل , انه زهق منك سريعا , وعايز يقلبك عشان يشوف غيرك , فديه إشارة واضحة انه مش قد مسؤولية ولا زواج , وانه بتاع تسلية , مش بتاع ارتباط . .

 

 

 

لكن لما تفكري تاني في اللي قلناه , هتعرفي انه اساسا مكانش ليكي عشان يضيع منك , وان انسان بالصفات اللي فيه حاليا مش مؤهل انه يكون زوج و اب . .

 

ممكن بعد سنين فكره ينضج شوية , ويكون علي درجة اكبر من التعقل و الصبر و الهدوء , وقتها ممكن يكون مناسب انه يتجوز , لكن للاسف ده انسان مراهق بيتصرف تصرفات اطفال , وبالفعل مش هينفع ليكي زوج . .

 

هدي نفسك تماما , واعرفي ان ربنا كرمك انه مطولش معاكي من الاصل , وان صفاته بانت سريعا قبل ما يكون فيه خطوبة او زواج , وقتها الألم هيكون اشد . .

 

متبكيش عليه , ومتحسيش ان كنز راح منك , وثقي ان ربنا هيعوضك خير منه , وان استمراره معاكي في الاساس كان هيتحول لكابوس مؤلم

 

سامحينا لو كان كلامنا مش زي ما انتي كنتي عايزة , بس خبرتنا الحياتية , واحتكاكنا بانواع كتير من البشر , خلانا نقدر نحدد الصح من الغلط بشكل كبير , ونصيغلك ده علي هيئة نصايح مهمة , هتفيدك اكيد

 

بالتوفيق يا رب

 

​