العنوان : طفلي يسرق !

القسم: #النفسي

الرقم: 95

السؤال:

ابني عنده ١٠ سنين وبيسرق بقاله سنتين . ايه الحل . مع العلم انه سرق اكتر من مرة و دايما بيسرق حاجات بسيطة و صغيرة

مع انه مش محتاج حاجة و اللي بيسرقه مش بيعمل بيه حاجة

وهو صغيرة ابوه كان بيضربه جامد و كان بيشوفه يتخانق معيا  و حاليا احنا منفصلين

 *-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

أهلا بيكي . .

لما السرقة بتكون بدافع معين , يعني فيه احتياج مادي , او فيه حرمان من فلوس , او فيه ضرورة , او انتقاما من شخص , او حتي لان الطفل اتربي في بيئة محيطة سلبية , بتكون جريمة اخلاقية بالطبع لكن مش مرض نفسي . .

لكن السرقة لما بتكون من غير احتياج , او رغبة محددة , فهنا لازم نفكر في المرض النفسي , وبالتحديد ما يسمي  : هوس السرقة الغير مبررة kleptomania  . .

وهو اضطراب موجود عند بعض الافراد , اللي بيدفعهم دفع للسرقة لمجرد السرقة , يعني من جواه عنده رغبة عارمة للسرقة في حد ذاتها , ومن غير ما يكون محتاج الشئ اللي بيسرقه . .

وده اضطراب يتبع لعائلة  "اضطراب السيطرة علي الدوافع" , واللي اسمه العلمي "Impulse control disorder" , واللي كنا اتكلمنا عنه في الرسالة رقم 48 , واللي بعنوان : هوس إشعال الحرائق

 ولو حد كان شاف الفيلم الأمريكي Tin Tin  , كان فيه شخصية واضحة بيسرق "المحافظ" لمجرد السرقة , عشان مصاب بالكليبتومانيا

صحيح اننا منقدرش نحسم هل ابنك مصاب بالفعل بالـ kleptomania  ولا لأ , لأن ده محتاج تشخيص كامل من طبيب نفسي في العيادة , إلا إن عدد من المؤشرات اللي انتي ذكرتيها اثارت انتباهنا , زي انه بيسرق لمجرد السرقة , وان الموضوع اتكرر , وعلي مدار سنتين كاملين . .

ده غير انه هو للأسف لم ينشئ في جو صحي نفسيا , فهو كان شاهد علي المشاجرات بين ابوه و امه , وكان بيتم ضربه بشدة لأسباب عديدة , بالإضافة للتمزق الاسري الموجود حاليا . .

ايوة هو مش مؤكد انه مصاب باضطراب هوس السرقة الغير مبرر , لكن احتمالية اصابته كبيرة

--------------------------------------------------------------------------

فالحل دلوقتي , انك تسارعي من غير إبطاء في تنفيذ الخطوات ديه 

• أولا هو لابد من زيارة طبيب نفسي متخصص , وياريت و انتي بتحجزي موعد تسأليه هو او تسألي السكيرتيرة هل هو هيقدر يفيدك في حالة كليبتومانيا ولا لا , لو قالك لا يبقي شوفي حد غيره

• لازم تدركي ان زيارة الطبيب النفسي هو مش رفاهية او شئ ثانوي , بل هو من أهم الضروريات ,وانك لازم تتعاملي مع ابنك كأنه مصاب بمرض جسدي خطير , فاي تكاسل عن الذهاب للطبيب هيدمر حياته

• لما تروحي للطبيب النفسي متقوليش ان عنده كليبتومانيا , لان وارد يتكون مجرد سلوك غير منضبط و قابل للعلاج باسلوب مختلف , الطبيب هو اللي هيقرر و يحدد

• توقفي عن ضربه حاليا , او عن تعنيفه للسرقة , الطبيب اللي هيقولك الاسلوب المناسب في التعامل معاه

• التمسك بالدين هو احد خطوات الحل بشكل متوازي , لكن مش هو الخط الوحيد , يعني من ناحية تمسكه بالصلاة و الخوف من ربنا هو شئ ضروري و مهم ابدئي في زرعه في عقله , ومن ناحية مينفعش انك تكتفي بالجانب الديني كعلاج ليه , لانه مش هيقدر يصلح الازمة اللي عنده

• خليه يحبك و يقرب منك , حافظي انه يقولك اللي بيحصل اول باول , من غير ضرب او تعنيف , عشان تكوني قادرة علي متابعة حالته بدقة

• شوفي اصحابه عاملين ازاي , زوريه في المدرسة وشوفي الشلة اللي معاه , لأن اصدقاء السوء حتي لو مكانوش هما السبب المباشر في الكليبتومانيا , فهما هيكونو سبب في استمرارها و ترسيخها عنده

• لازم تعملي علي كسب ثقه الطفل و ايجاد حوار دافيء و امن معه عشان يكون فيه قناة اتصال مستمرة معاه

• علاج حاجة زي كدة ممكن تاخد سنين , وفي الوقت ده لازم يكون سلوك الوالدين مع بعض سلوك مناسب , يعني ميشوفش منكم الا كل خير

• استمري في الثناء عليه و مدحه و تجنبي استخدام اي كلمات جارحة ليه  (يعني محدش يقوله انت حرامي ) , سواء منك او من اي حد غيرك

الرسالة التالية