العنوان : هوس اشعال الحرائق

القسم: #النفسي

الرقم: 48

السؤال:

  

السلام عليكم ابني عنده 7سنين   بيحب يلعب بالنار بضربه ديما وما فيش فائده منه من هو صغير

 

مرة حرق قميص أخوه هو ولابسه ربنا سترها وما حصلش حاجه ومرة لقيته بيولع ف اللحاف ومفرش السرير والحمد لله لحقته

 

هتقول لي ابعدي عنه النار بياخد فلوس من عمه ويجيب بيها كبريت بياخد من عند تيتا كبريت وهي عارفه

 

ومرة قلت لعمه ماتديهوش فلوس بيجيب كبريت بيولع ف اي حاجه ضحك وقاله ولع فيهم ولا يهمك ومش عارفة اعمل إيه

 

مرة ولعت نار وقلتله هحرقك لو ولعت تاني  بس ما فيش فائدة منه بضربه ضرب وحشي عشان خايفه عليه بجد

 

هو دماغه ناشفه جدا ولازم ينفذ اللي ف دماغه  بدأ معاه اللعب بالنار من سن سنتين ولحد دلوقتي

 

والخلافات مع زوجي عاديه جدا وانا من النوع اللي مش بيكبر الموضوع وهادئة عشان كده خلافات عاديه

 

وزوجي للاسف مش مهتم عشان مش بحكيله  بخاف عليه ليضربه ولو حكيت له بيقولي اضربيه زي اي حاجه او يقولي تربيتك

 

انا بضربه ضرب مبرح وبصراحه بقعد يومين مش بعرف انام عشان انا ضربته

 

وللعلم هو متعلق بيا جامد وبقوله انت بتحبني ما انا بضربك يقولي اه بحبك حتي لو ضربتيني ويتاسف لي جامد لو عمل حاجه غلط وبيبوس ايدي ودماغي ف خفيت ضرب اوعقاب عشان بيتاسف لي ف بيصعب عليا

 

بيبطل شويه ويرجع تاني وهو ماشاء الله متفوق وزكي جد

 

وعلي فكرة امبارح عندي مرتبتين مش بستعملهم حطهم علي بعض ف شقه تانيه لقيته مولع جمبهم بقوله ليه كده مش خايف لنتحرق كلنا قالي ما كنتش اعرف قلتله ازاي يا حبيبي كانو ولعو في الوضه كلها لحد ما وصلت الكهربا وكانت دخلت ف البوتاجاز والامبوبه انفجرت والبيت كله يتفجر وكلنا هنموت

 

قاللي ما كنتش عارف أنه ده هيحصل

 

ده اللي خلاني كتبت لكم لأن الموضوع زاد وبصراحه أخواته اتأذو  منه أخوه الاصغرمنه من مدة شهرين لقيت حروق ف رقبت أخته وايده ف بقوله مين اللي عمل كدة ف اخته قالي اقولك وما تضربينيش قلت له اكيد انت قالي اه

 

بصراحة اتصدمت أول مرة تحصل منه هو بالذات عشان ابني ده عاقل وهادئ مش عارفه ازاي حصل بصراحه مسكت كبريت ولغته ولسعته بيه عشان ميكررهاش مع أخته

 

يمكن تلومني بس أنا اتجننت وتخيلت أنه ولع فيها كنت سيبها بيلعب معاها وبباه كان نايم وما كنت بحضر الغدا وهي بتحبه جدا ومتعلقه بيه وهو حنين عليها عشان كده سببتها معاه هي عندها سنه ونص وهو تم سته الشهر ده

 

شوف لي حل اسفه علي الاطاله

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله

 

ابنك عند اضطراب نفسي نادر شوية بس موجود , اسمه "هوس اشعال الحرائق"  , واللي اسمه العلمي "pyromaniac "

 

وهو احد انواع الاضطراب السلوكي الاوسع منه اللي اسمه "اضطراب السيطرة علي الدوافع" , واللي اسمع العلمي "Impulse control disorder"

 

زي ما قلنا , انا بذكر الاسم العلمي بالانجليزي عشان لو عايزة تبحثي اكتر عن الموضوع في كتب امريكية . .

 

يعني في مظلة واسعة للاضطراب السلوكي اسمه  "اضطراب السيطرة علي الدوافع" , واللي ليه كذا شكل و نوع , ومنها المرض اللي بنتكلم عنه وهو  "هوس اشعال الحرائق" .

 

فلازم نتكلم عن المظلة الاوسع في البداية , بعدها نتناول المرض بتاعنا بالتحديد . .

 

------------------------------------------------------------------------------------

 

"اضطراب السيطرة علي الدوافع" معناه ببساطة , ان الشخص او الطفل بيكون عنده دافع او رغبة معينة , وبتكون الرغبة مش طبيعية  و مؤذية , وهو عارف انها غلط , لكن بيعملها باستمرار , غالبا هو مش عارف هو بيعملها ليه . .

 

مش بنتكلم عن رغبة عادية منطقية , يعني الرغبة ان الشخص ياكل او ينام او يتفسح او يتجوز , كل ديه رغبات طبيعية . .

 

و حتي مش بنتكلم عن رغبات غير مشروعة , يعني اللص او المغتصب او القاتل , مش من ضمن المصابين بالمرض ده .

 

انا باتكلم عن شخص محترم او طالب جامعي , او طفل برئ , بس عنده رغبة لشئ غير طبيعي , وهو غالبا مش عارف ايه سبب رغبته ديه , فبيعملها باستمرار .

 

زي مثلا "اضطراب هوس السرقة" اللي اسمه "Kleptomania" واللي فيه شخص بيكون غني او حالته كويسة , وبيكون اصلا محترم من جواه , لكن هو مش قادر يقاوم رغبته في انه يسرق , ولو حاجة بسيطة ورخيصة , السرقة لمجرد السرقة . .

 

ده لو سالتيه هو سرق ليه هيقولك مش عارف , بيكون عنده لذة رهيبة في السرقة , حتي لو يسرق ربع جنيه من واحد , وحتي لو هو مليونير  . .

 

ده مثال لاضطراب السيطرة علي الدوافع , انه بيكون عنده رغبة يعمل حاجة معينة بتمتعه  , وهو مش عارف ليه .

 

و بالطبع يختلف عن الحرامي اللي بيسرق عشان يكون يجيب فلوس , و اللي لو ان الحرامي لقي الفلوس ديه بطريقة اسهل مش هيسرق , بينما المصاب بـ "اضطراب هوس السرقة" , هيسرق ولو كان غني .  

 

لاحظي ان الاسم العلمي لمرض "اضطراب السيطرة علي الدوافع" هو "impulse control disorder"

 

كلمة disorder  معناها اضطراب او مشكلة

 

كلمة control  معناها التحكم

 

كلمة impulse  معناها الرغبة او الدافع

 

يعني ممكن نترجم اسم المرض لـ "مشكلة العجز عن التحكم في الدوافع"

 

ان الشخص او الطفل بيكون عنده دافع او رغبة , وغالبا بتكون لشئ غريب  , و مش بيعرف يتحكم فيها , وده السبب ان ابنك مش قادر يبطل يولع النار , مع انك بتضربيه بجنون  .

 

بعض علماء النفس زمان وضعو "الشذوذ الجنسي" في ضمن انواع الاضطراب ده , الا ان غالبية علماء النفس في العالم معترضين علي ده , بل انهم اصلا مش شايفين الشذوذ انه مرض , هما شايفينه عادي .

 

وعايزين نقول عدد من انواع و اشكال المرض ده عشان يكون عندك صورة كاملة عنه  . .

 

• اضطراب "Intermittent Explosive Disorder" : واللي بيكون فيه نوع من الانفجار في الغضب فجأة و الرجوع للهدوء فجأة من غير سابق انذار

 

• اضطراب  " Kleptomania" : وهو الخاص بالسرقة اللي قلناه من شوية

 

• اضطراب " Pathological Gambling" : الخاص بادمار القمار في كل حاجة في حياته

 

• اضطراب " Trichotillomania" : وهو الخاص بمشكلة شد ونتف الشعر "واحيانا أكله" بشكل جنوني من غير سبب لغاية لما يتقطع

 

• اضطراب " Compulsive buying" : المتعلق بهوس الشراء , مشكلة ان الشخص يشتري وخلاص , حتي لو مش محتاج الحاجة , و بكمية غير طبيعية

 

• اضطراب "Sexual compulsion" : واللي متعلق بهوس مشاهدة و التفكير في الأمور الجنسية  ,بشكل مبالغ فيه و غير طبيعي

 

• اضطراب "Internet addiction"  : وهو الادمان غير الطبيعي لتصفح الانترنت و المواقع الاجتماعية  , ويكون عنده سلوك يصل للعدواني اذا تم منعه عنه

 

• اضطراب  "Video Games addiction" : وهو المتعلق بادمان الالعاب الالكترونية بشكل غير معقول

 

• اضطراب  " Pyromania" : وهو الخاص باشعال حرائق , وده اللي بنتكلم عنه

 

 

كدة اظن الصورة وضحت شوية , يعني ايه اضطراب السيطرة علي الدوافع  . .

 

و الاطباء النفسيين حول العالم لسة حتي اليوم بيبحثو عن الاسباب الحقيقية للاصابة بالاضطرابات ديه , فيه تحليلات بتقول علي اسباب وراثية, او شئ متعلق بتكوين المخ نفسه .

 

فيه علماء اتكلمو عن اسباب متعلقة بالادوية اللي الام كانت بتاخدها اثناء الحمل , او زيادة نسبة التستوسيترون عند الطفل  (هرمون الذكورة) .

 

فيه علماء غيرهم اتكلمو عن اسباب اجتماعية صعبة , او استخدام العنف مع الاطفال او اسباب نفسية اخري

 

بس حتي الان لم يتوصل العلماء لاجابة دقيقة للسؤال ده . .

 

-----------------------------------------------------------------------------------------

 

ماذا بقي عن "اضطراب اشعال الحرائق" نفسه . .

 

لو عايزين نعمل تعريف بسيط ليه فممكن نقول انه رغبة متكررة و مقصودة لإشعال العديد من الحرائق مصحوبة بالتوتر و الإهتمام بالنيران ، أو الفضول حولها والانجذاب لها وبالمواضيع المتعلقة بها

 

كمان ينتاب الشخص المصاب بيها شعور بالرضا، و الإشباع عند إشعال الحرائق أو مشاهدتها أو المشاركة في عواقبها و ده بيجعل صاحبه يشعر بالارتياح النفسي

 

 

ده كان تعريفه  . .

 

طب امتي نقول ان الشخص بالفعل عنده اضطراب اشعال الحرائق , يعني ايه هي الاعراض اللي لو شفناها نقول ان الطفل او الشخص مصاب بيه ؟ ؟

 

الاعراض بتكون كالتالي  :

 

• اشعال النيران بشكل متكرر ومتعمد الحدوث من غير دافع واضح

 

• توتر و إثارة قبل اشعال النار. يعني وجهه يكون يحمل سلوكيات عاطفية ظاهرة - كتعابير الوجه، أو التغيرات في الصوت, أو الإثارة - قبل إشعال الحرائق.

 

• وجود لذة و متعة عند إضرام النار.

 

• فضول عارم تجاه الأدوات والاشياء المستخدمة لهذا الغرض كالبنزين والجاز والكبريت

 

• اهتمام شديد بمشاهدة الحرائق و هي تشتعل , سواء في الحقيقة او صور او فيديوهات

 

 

وبالتالي لو ان ابنك بالفعل شايفة ان فيه عدد من الصفات ديه . فده بيأكد ان عنده هوس اشعال الحرائق وان علاجه امر ضروري مفيهوش انتظار

      

          -----------------------------------------------------------------------------

 

          طيب ايه العلاج ؟ ؟ ؟

 

المشكلة الاساسية ان علماء النفس لسة مقطعوش باع طويل في دراسة المرض ده , بل ان اسبابه الحقيقية الكاملة لسة مش معروفة بالكامل .

 

وبالتالي , هحاول اعمل اجمال لعدد من الخطوات المستخدمة عاليا مع اصحاب المرض ده , زائد نصايح للطفل, واللي ياري يكون ليها نتيجة ايجابية

 

 

• اولا لابد انه يروح لطبيب نفسي , والأمر مفيهوش تأخير , لان اللي عنده مش مجرد شقاوة , او لعب , هو عند اضطراب نفسي حقيقي , ممكن يتسبب في وفاة شخص , او انه يدخل الاصلاحية يعيش فيها سنين وتتدمر حياته

 

خدي بالك وارد الطبيب يكون معندوش خبرة في المرض ده  ,لان زي ما قلنا هو شئ نادر و مش منتشر , فلازم تتأكدي قبل ما تروحي

 

 

 

 

• من ضمن وسائل علاج الاضطراب ده مع البالغين ما يسمي طريقة "العلاج السلوكي المعرفي" واللي بيكون فيها تواصل مباشر بين الطبيب و المريض , بهدف تغيير قناعاته و سلوكه تدريجيا . .

 

 

 

• مش هنقدر نهمل دور العوامل الاجتماعية في العلاج . .

 

 

• احيانا الصراحة و الحوار المباشر بين الطفل و الابوين , بحيث يكون فيه كلام مباشر معاه , وتشوفو هل فيه اي شئ عامل ضغط علي اعصابه او عامله توتر , ده ممكن يساعد

 

 

 

• احيانا لعب الرياضة بيفرق مع الطفل

 

 

 

• لابد يكون بعيد عن كل مصادر النار بالعافية , لازم عمه يفهم انه استهتاره ده هيجعل الطفل مجرم , ولو استمر امنعيه انه يروح عند امه او جدته  ,طالما هما بالاهمال و الجهل ده

 

 

• حاولي تقللي الضرب بقدر الامكان , او تمنعيه تماما , واستبدليه بحرمانه من شئ بيحبه , طالما هو مستمر في السلوك ده

 

 

• لازم ابوه يتحرك , ويفهم ان ابنه بيتدمر ببطئ , وانتي لازم تضغطي عليه , ولو وصل الامر انك تتوقفي عن شغل البيت (مفيش اكل , مفيش غسيل) لغاية لما يعرف ان فيه ازمة لازم تتحل

 

 

• لازم تعملي رقابة علي اخواته , لان ممكن يأذيهم فعلا 

 

 

انا مش عارف افدتك ولا لا , مشكلة المرض ده انه نادر اصلا ومفيش دراسات كتير عنه  ,سواء بالعربي او بالانجليزي , بس ذهابك للطبيب النفسي  ضرورة بالفعل , وهو هيقولك اساليب عملية تنفع معاه ان شاء الله