التوهم المرضي
الرسالة السابقة
العنوان : التوهم المرضي
القسم: #النفسي
الرقم: 47
السؤال:
انا متزوجة وعندي ٣اولاد وبعد الولاده التانيه كانو توام كان حياتي طبيعيه جدا
لحد ما في يوم تعبت بالليل كان ضيق نفس روحت وكشفت الدكتور قالى معندكيش حاجه
بعد كام يوم تعبت تاني تعب غريب لا باكل ولا بشرب وتعبانه مش عارفه مالي بس كنت حاسه بالم في قلبي فروحت لدكتور تاني قاللي عندي قصور في القلب
الخوف كله تملكني ما اقدرتش انام وبدات المعاناه
روحت عملت ايكو الدكتور قاللى قلبك سليم بس بردو قعدت محبطه نفسيا واهملت ولادي وحاسه بالم في قلبي بردو
فروحت لدكتور نفسي قالي ده اكتئاب شديد خدت العلاج ومفيش تحسن بس العلاج عملي الام في جسمي كله ارهاق وتعب من اي مجهود وده تعب نفسيتي اكتر
ومن يومها وانا على الحا ل ده ومش لاقيه حل
انا اسفه طولت على حضرتك ارجو المساعده
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي يا فندم , والف سلامة عليكي .
فيه مرحلتين للمرض اللي حصلك .
مرحلة فسيولوجية , ومرحلة سيكولوجية .
فسيولوجية يعني "جسدية" , يعني مرض من الامراض العادية في الجسم . .
سيكولوجية يعني "نفسية" , يعني شئ متعلق بالاضطرابات و السلوك و التفكير . .
في البداية انتي حسيتي بأعراض ألم حقيقي , سواء ضيق في الصدر او التنفس أو ألم في القفص الصدري .
رحتي لطبيب و قالك مفيش حاجة , روحتي لطبيب تاني , وقالك علي مرض "القصور القلبي" . .
كل ده كانت المرحلة الأولي , الفسيولوجية , واللي بس فيها مشكلة جسدية
وهنا دخلنا في المرحلة التانية الاصعب . .
وهي المرحلة اللي ظل المرض الفسيولوجي موجود , لانه لسة متعالجش , ودخلنا في شئ شديد الخطورة , وهو المرض السيكولوجي , واللي اسمه "التوهم المرضي" , واسمه بالانجليزي (Hypochondriasis)
ايه بقي التوهم المرضي ؟
هو ان الشخص يتوهم ان عنده مرض وهو مش عنده , او ان الانسان يكون عنده بالفعل مرض معين , لكن هو يتعامل معاه بشكل مبالغ فيه .
واخشي ان انتي عندك النوع التاني , او ماشية في خطواته .
وهو ان انتي عندك شئ معين في جسدك "قصور في القلب" , لكن انتي بتتعاملي معاه علي انه "نهاية العالم" .
ومشكلة التعامل ده , انه بيصنع من المشكلة الصغيرة , كارثة كبيرة انتي مش قدها , وبيجعل الشئ المقدور عليه , وحش مفترس لا يمكن الوقوف امامه .
النوع التاني من اللي عنده "التوهم المرضي" , بيكون عنده مرض حقيقي , مش بيخترعه , لكن بيديله اكبر بكتير من حجمه , وبالتالي بيساهم في تدمير حالته النفسية بشكل مستمر .
---------------------------------------------------------------------------------
وعشان تعرفي التأثير المدمر ليه , تخيلي معايا الموقف ده .
لو ان طالب ذاكر و تعب و اجتهد , وعرف يحقق حلمه و يدخل كلية الهندسة .
وفي الترم الاول من اول سنة , ذاكر نص نص , و نجح في كل المواد , باستثناء مادة واحدة سقط فيها , و هيمتحنها في الترم التاني .
و هنا حياته اتغيرت . . .
بقي شديد الاكتئاب , حالته النفسية زفت , مش طايق يكمل حد ولا حتي يبص في المراية , و بيعيط ليل و نهار .
و لما بدأ الترم التاني فقد كل أمل , ومبقاش يروح الكلية , و مهما يحاول اهله او اصحابه معاه مفيش فايدة فيه , دماغه ناشفة ان مفيش امل , واني هسقط و مش هاعرف اكمل في الكلية .
و بالطبع معرفش يمتحن الترم التاني , وتم طرده من الكلية .
وهنا بقي نسأل سؤال , يا تري اللي طرده انه بالفعل فاشل , ولا انه اقتنع انه فاشل ؟ ؟
هل اللي طرده ان امكانياته قليلة في التحصيل , ولا انه آمن ان امكانياته ضعيفة , علي الرغم من اقناع كل اللي حواليه بالعكس ؟
ملاحظة ازاي ان هو عمل "تضخيم" هائل , لازمة صغيرة حصلتله ؟
هل هو سقط في المادة ؟ ايوة
هل فشل فيها ؟ ايوة
بس هل معني كدة ان مفيش امل , وان مش هيعرف يكمل ؟ ؟ اكيد لا
ولو خدتي بالك ان اللي منعه من التحصيل و المذاكرة , مش انه فاشل , لكن انه اقتنع انه فاشل . .
وهو ده بالظبط اللي حصل معاكي بالظبط . .
انتي جسمك سليم تماما , ومفيهوش اي مشاكل حقيقية, باستثناء شئ محدد اسمه القصور في القلب .
وبالتأكيد ده مش المرض القاتل اللي يعني حتمية الوفاة , والا كان حذرك الدكتور فورا . وقالك علي عملية او غيرها . .
بل انك لما رحتي للدكتور و عمل "ايكو" الراجل حلفلك ان قلبك سليم , وان المشكلة محدودة , وليها علاج زي باقي مشاكل القلب .
بس انتي مصرة ان فيه مصيبة , وان ملهاش حل , وان الموت جاي بعد بكرة . .
يجيلك كبار الدكاترة و يحلفولك ان انتي مكبرة الموضوع , بس انتي مصرة . .
طب نعمل ايه ؟ ؟
و ايه الفرق بينك و بين الطالب , اللي هو بالفعل عنده مشكلة صغيرة , بس هو مصر ان فيه مصيبة ملهاش حل . .
انتي ببساطة بتدمري حياتك , وبتقتلي نفسك ببطئ . .
والمشكلة انك بتخلي حياتك جحيم عليكي و علي اللي حواليكي . .
يعني اكيد زوجك و اولادك , والوالد و الوالدة و اخواتك , وكل اللي بيهتم بيكي , اكيد متضايق من حالتك ديه , وزعلان عشانك . .
وانتي بدل ما تبسطي الموضوع علي نفسك و عليهم , محسسة نفسك ان خلاص , ديه اخر ساعات ليا في الحياة , وابدئو انصبو الصوان يا جماعة من دلوقتي . .
هل ده منطقي ؟ ؟
علاج التوهم المرضي , بيبدأ من عندك انتي , في انك تقتنعي ان الموضوع اخد حجم اكتر من الطبيعي , وانك لازم تبصيله بالحجم السليم .
والمؤلم ان انتي اصبتي بالاحباط الشديد , وبالالم المستمر , والاكتئاب الشديد , واهملتي اولادك , و كل ده متوقع من اللي بيستمر في مشكلة التوهم المرضي .
بل ان الانيل ان جسمك قد يقاوم العلاج الطبيعي لقصور القلب , يعني ان كان فيه طريقة لعلاج المرض الفسيولوجي اللي عندك . فحالتك النفسية المنهارة هتوقف اي علاج .
انتي معيشة نفسك في مأساة , وهي من صنعك والمأساة ديه هتقلب بمشكلة حقيقية ان متمش حلها في اسرع وقت .
--------------------------------------------------------------------------
وكل خطوات العلاج في ملعبك انتي . .
احيانا الاطباء بيستخدمو تكنيك "البلاسيبو" لكن برضه هيظل غير فعال طالما انتي من جواكي عندك يقين ان مفيش امل , وان اللي عندك هو "وفاة حتمية"
وان كنا نتوقع التضخيم ده من طفل صغير معندوش وعي , او بنت مراهقة تمر بمرحلة حساسة من حياتها , فمينفعش نتوقعه من واحدة بالغة , وام لـ 3 اطفال , وعندها الوعي الكافي .
المشكلة مش هتتحل الا بيكي, ولما انتي من جواكي تبدأي تتعاملي مع المرض بحجمه الحقيقي ,مش بالشكل اللي انتي متصوراه عنه .
ارجعي للطبيب النفسي تاني , ولو هو مكانش فاهم شوفي غيره , وبالتوازي تابعي مع طبيب القلب وثقي بكلامه , لو قالك الموضوع سهل يبقي سهل , هو مش هيكدب عليكي . .
بالتوفيق يا رب , والف سلامة عليكي