مقطع في الصلاة
الرسالة السابقة
العنوان : مقطع في الصلاة
القسم : #الديني
الرقم : 02
السؤال :
مشكلتي اني مقطع في الصلاة بحاول احيانا اصلي وقت بوقته لكن كتير بتفوت مني صلاة عشان الشغل او الجامعة او اكون في مشوار و كدة وكتير انام من غير ما اصلي خالص
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
شوف يا سيدي
مشكلة نقطة الانتظام في الصلاة ان الناس مش بيشوفوها بالأهمية المناسبة ليها , كتير من الناس بتتعامل مع الصلاة باعتبارها مجرد شعيرة من شعائر الاسلام , وعادي يا عم امشي علي سطر و سيب سطر , وربك غفور رحيم , وكدة
و الأنكي ان فيه ناس بتقارن أحيانا بين الصلاة و بين عبادات أو أخلاق أو سلوكيات أخري , و بيتعاملو مع الصلاة علي أنها شئ ثانوي , باعتبار أن تركها "لا يؤذي أحدا" بينما مثلا الكذب او الحقد او الحسد يؤذون الناس . .
وبالتالي هما شايفين أنه طالما انت انسان محترم و في حالك و مش بتأذي حد , عادي يا سيدي , ربك هيغفرهالك , ديه حتي الصلاة ديه "بتاعت ربنا"
و الفكرة ديه عجيبة و مدهشة , مع إن كمية الآيات و الأحاديث اللي شددت و أكدت علي أهمية الصلاة , و اصابت علماء الحديث بالرعب من تارك الصلاة , كمية الأحدايث ديه تجعل شعر الشخص يشيب . .
انا لا اقارن بين الصلاة و بين عبادات أخري , وكما أن الكذب ذنب , فتارك الصلاة ذنب , لكن الشئ المرعب إن العبادة الوحيدة اللي أكد الرسول صلي الله عليه و سلم ان تاركها كافر هي الصلاة , وفي أكثر من حديث . .
بعض العلماء فسرو الحديث علي محمل من يتركها جحودا وليس كسلا , وبعضهم أطلقها علي اي تارك لها . .
لكن هنا هسألك سؤال . .
يا تري عندك شجاعة انك تغامر بحاجة زي كدة ؟ ؟
يعني عندك قلب انك تقابل ربنا يوم القيامة من غير صلاة , و احتمال يا تكون كافر يا تكون عاصي ؟ ؟
هل متخيل ان بعد الكمية ديه من الاحاديث عن أهمية الصلاة , و مصيبة من يتركها , إن خلاص كدة الموضوع عادي , انت مش بتصلي بس قلبك ابيض يللا مفيش مشاكل ؟ ؟
تارك الصلاة بمنتهي البساطة هو شخص بيضع أمر ربنا في كفة , وحاجة تانية اكيد اقل أهمية في كفة تانية , وفي كل مرة بترجح الكفة التانية . .
يعني يصحي الصبح , وعقله يقول اصلي ولا افطر , لا افطر , طب اصلي ولا انزل الشغل , لا خلينا في الشغل , طب اصلي دلوقتي الضهر ولا اروح اتغدي في البريك , لا خلينا في الغدا , طب لما اروح اصلي العشا ولا اخد دش اتفرج علي الماتش , خلينا في الماتش
يوميا هو بيجعل الكفة اللي فيها أمر ربنا تخسر قدام كفة تانية فيها حاجة اكيد اقل اهمية . .
حتي لو حاجة هي من الشرع و الخلق , فتصبح محرمة فورا اذا ما تعارضت مع الصلاة , يعني صلة الرحم تكون محرمة اذا منعتك عن الصلاة , التصدق للفقراء , زيارة المريض , العطف علي الايتام , كلها تصبح محرمة قطعا اذا ما منعتك عن الصلاة
و من كرم ربنا ان اساسا مفيش تعارض من اي نوع بين الصلاة و بين اي حاجة انت عايز تعملها , بتتكلم في 5 دقايق في كل فرض , و ممكن تأديها في متسع من الوقت , ولو مسافر ولا مش عارف تصلي , صليهم مع بعض يا اخي . .
ان كان في الحرب و عند مواجهة العدو , ربنا فرض طريقة من الصلاة اسمها صلاة الخوف , يعني حتي لما يكون العدو قدامك مش هينفع تسيب الصلاة ابدا , فهل انت مدرك اهمية الموضوع ؟ ؟
في الصلاة انت بتخفض جبهتك في الأرض سجودا لرب العالمين , بتقر ليه بالعبودية , وإن فضله عليك لا حدود له , و إنه هو الوحيد الذي يملك أمرك . .
في الصلاة انت بتلح عليه عشان يشفي ابنك لما يمرض , لما يكون عليك ديون , لما تكون صابح امتحان , لما تقدم علي هجرة امريكا و هتشوف النتيجة كمان ربع ساعة , في الصلاة انت بتذلل نفسك للواحد القهار . .
الصلاة بتربطك بربنا بشكل لا يصدق , مالم تجربها حقيقي , وبقلبك و عقلك و كيانك مش بس بجسمك . .
تارك الصلاة هو انسان بيتحدي ربنا سبحانه و و تعالي , كأنه بيقوله باختصار (يارب انا مش محتاجلك , يا رب مش محتاج ادعيلك لان انا عارف اتصرف , وعارف ادبر حالي , يارب انا نفسي عزيزة فمش هوطي راسي ابدا , يارب انا عندي اولويات عن اني افضي نفسي خمس دقايق عشان اقف قدامك )
انت متخيل انت بتقول ايه لربنا , حتي لو مقصدتش ده ,فده الواقع . .
مفيش حاجة اسمها بحب ربنا وانت مش عايز تقف قدامه , انت بتضحك علي نفسك . .
مفيش حاجة اسمها مش بأذي حد و قلبي طيب , انت كدة بتأذي نفسك , وهتعرف ده يوم ما يجيلك ملك الموت ربنا يحفظنا جميعا من سوء الخاتمة
الصلاة هي البنزين اللي انت محتاجه عشان تعرف تكمل حياتك في طريقك لله , حاسس انك مش محتاجه وهتعرف تكمل لوحدك من غير الله , مفيش مشاكل , بس استحمل بقي الحياة من غير المعية الربانية . .
مش عارف تصلي في الجامع , صلي في البيت , مش عارف تقرا قران , اقرا سورة الكوثر , مش عارف تصلي في الموعد , صلي في اي وقت , مش عارف تخشع في الصلاة , صلي من غير خشوع الاول وربك هيكرمك . .
لو انتي مش محجبة , صلي والبسي طرحة في الصلاة و اخلعيها بعده , لو انت بتشرب خمرة , مضمض بقك كويس و اشرب كباية لبن و فوق و صلي , لو انت يا اخي قتال قتلة , صلي و ربك هيبعدك عن الذنب ده . .
انك تسيب الصلاة لاي سبب , اعرف انك ماشي في طريق جهنم من غير نقاش , طريق اخرته سواد والله