العنوان : الخوف من الفشل

القسم: #النفسي

الرقم: 39

السؤال:

 

الخوف من الفشل اى الطريقه اللى نتخلص فيها من المخاوف دى

 

زى انا مثلا  فى 3 ثانوى وعلمى علوم كمان وحاسه أن المواد كلها بتصعب وخايفه أن حلمى ميتحققش

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

سؤالك علي الرغم من بساطته  ,لكن اجابته عميقة و متعبة . .

 

السؤال واسع  , و محتاج يتعمله غطاء واسع من الشرح و التفصيل . .

 

لان وارد تكوني قصدك نقص الثقة بالنفس  , او الهمة الضعيفة , او عدم وضوح الرؤية الكاملة ليكي , او الخطة الغير متقنة , او التنفيذ الغير سليم , او مشكلة سوء تنظيم الوقت . .

 

سؤالك واسع , ومش هنعرف نجاوب الا علي نقطة واحدة بالكتير , خلينا نختار النقطة اللي انتي حددتيها , وهي : الخوف من الفشل .

 

الخوف من الفشل في الاساس من الاشياء الصحية , واللي لازم تتواجد عند اي شخص عايز ينجح في حياته , و اختفائها يشير بقوة الي ان ده انسان معدوم الاهداف و الطموح , او انه واثق من نفسه لحد الغرور  .

 

مهو الشخص اللي مش خايف من الفشل تماما , يا اما بالفعل معندوش اي طموح  ويسبح في بحر من اللامبالاة , يا اما أوداجه منتفخة غرورا , انه هينجح من غير نقاش .

 

 ده غلط , وده غلط .

 

فتواجد الخوف من الفشل في ذاته امر صحي , ويشير انك ماشية في الطريق السليم .

 

------------------------------------------------------------------------------

 

بس المشكلة بتظهر لما تتزايد كمية الخوف من الفشل , لدرجة انها بتصيب بالفشل نفسه .

 

لان الخوف ان وصل لمستوي اعلي من المطلوب , فهو ببساطة هيزرع داخلك "القلق" , و "التوتر" , و "التردد" بكمية اكتر بكتير من اللي انتي محتاجاها , وبالتالي لابد هيفرمل اي نجاح عندك , وهيكون عقبة قدام اي انجاز .

 

القلق و التوتر والتردد , اللي هيجعلوكي مش قادرة تتخذي اي قرار سليم , ولو اتخذتيه مش هتنفذيه ,و لو نفذتيه مش هتقدري تستمري في تطبيقه .

 

عرفتي ازاي الخوف المبالغ فيه من الفشل , بيصنع الفشل نفسه .

 

كمان حاجة تانية خطيرة , بيصنعها الخوف من الفشل , وهي مشكلة الثقة بالنفس .

 

يعني ان كان اختفاء الخوف من الفشل , مصاحب للثقة بالنفس الزائدة لدرجة الغرور , فالخوف المبالغ فيه من الفشل , مصاحب دايما بنقص الثقة بالنفس , واللي هي كمان علي نفس القدر من الضرر .

 

لان خوفك من انك تحلي وحش في الامتحان , هيجعلك من جواكي مرعوبة من كابوس الامتحان , وبالتالي هتتبخر من جواكي الشجاعة الكافية لمواجهة الاسئلة , خاصة لو كان الامتحان شفوي زي ما بيحصل في بعض الكليات .

 

وياما شفنا طلبة مذاكرين كويس جدا , وبالفعل المنهج في دماغه , بس ييجي يوم الامتحان و يضرب لخمة , والدكتور يسأله علي حاجة بسيطة هو عارفها و حافظها , لكن فجأة تتطاير ذاكرته و يعتصره القلق و التوتر .

 

والمشكلة بتتفاقم لما بتيجي قرارات مصيرية  .

 

يعني مهندس اتخرج و جاتله فرصة عمل في دبي , في شركة كبيرة مش بيهزرو هناك , فخوفه من الفشل ممكن اصلا يجعله يرفض العرض و ميسافرش , لانه مرعوب من جواه من الفشل , فاتخذ قرار انه مش هيسافر .

 

وياما بنات رفضو فرص زواج كانت كويسة بالفعل , بسبب انهم من جوة خايفين من شئ ملوش وجود , خايفين من فشل الزواج , مع انهم لما عملو تقييم كامل للشاب كان بالفعل كويس و صفاته هايلة .

 

فان الخوف من الفشل يمنعك من قرارات مصيرية , فديه حالة مرضية لابد تعالج , والا دمرت حياة الشخص .

 

---------------------------------------------------------------------------

 

طب نوصل للسؤال المهم . .

 

ازاي اعرف مقدار كمية "الخوف من الفشل" انها مناسبة ولا كتيرة ولا قليلة ؟

 

فعلا سؤال حيوي , لاننا شفنا ان الكمية لو قلت فالشخص هيتحول لكائن مستمتع باللامبالاة , او من اللي غرقان في بحر الغرور .

 

ولو الكمية زادت , فهتهجم عليكي كل شياطين القلق و التوتر و التردد و قرايبهم  .

 

 

فيه عدد من الأسئلة , واللي تسئليها لنفسك , واجاباتك هترسم شخصيتم بالكامل , وهتعرفك انتي فين .

 

واجابة الاسئلة تكون بالدرجات مش بالردود العادية ,  لكن بالارقام , بحيث الرقم يتراوح من 1 لـ 5   , بحيث الارقام تعني :

 

1   :    النفي بشدة

2   :   النفي

3  :     وسط

4  :    التأييد

5 :     التأييد بشدة

 

و الاسئلة كالتالي :

 

• لما بتحصل مشكلة معينة في الحاجة اللي باعملها  , باهتم بيها و بفكر ازاي تتحل

 

• لما ببدأ عمل بكون مهتم بيه بشكل كبير عشان ينجح

 

• بالي بينشغل بشكل كبير بأي حاجة مهمة باشتغل فيها

 

• لما حد بيقولي نصيحة او اقتراح في شغلي , بفكر فيها كويسة  وبقيمها بشكل موضوعي

 

• ممكن اعيد التفكير في الحاجة كذا مرة قبل ما باعملها حتي لو اتخذت فيها قرار

 

• حصل قبل كدة اني مكملتش حاجة كنت باعملها , عشان كنت حاسس انها هتبوظ

 

• احيانا ببقي هتجنن من كتر التفكير في الحاجة عشان اقرر اعملها ازاي

 

• بتأثر بسرعة بقرارات الناس و انطباعاتهم عن الحاجة اللي انا باعملها

 

• انا شايف هدفي واضح , ومخطط كمان 5 سنين هكون فين

 

• احيانا مش باعرف اواجه الناس و اتكلم علي الملئ , عشان بارتبك فورا

 

 

اجابات الاسئلة العشرة ديه , هتحدد انتي فين من "الخوف من الفشل" .

 

لو جبتي درجة اعلي من 45 , يبقي نسبة الخوف من الفشل عندك زيادة شوية , وبالشكل الغير مناسب

 

لو جبتي من 35 لـ 45 , فممكن نقول ان الرقم معقول , وان النسبة عندك متوازنة .

 

اقل من 35 , فممكن يكون فيه نوع من "البرود" و "اللامبالاة" , واللي ممكن تكون السبب في الفشل

 

 

 

و بعدها تمسكي الرد ده من الاول , وتشوفي كل المخاطر المصاحبة لزيادة او نقص "الخوف من الفشل" , عشان تشوفي انهي فيهم موجودة عندك , وتبدئي تحليها تدريجيا