العنوان : العيون الجافة

القسم: #النفسي

الرقم: 82

السؤال:

 

انا نفسي ابكى خالص  بحس  أن البكى ده حاجه جميله وتريح النفس وتخلي الواحد يكون أقوى وياخد قراراته صح بعد البكي كل حاجه بتتحل

 

انا مش عارفه مش ببكي ليه مع أن بشوف ال حواليا أقل حاجه تحصل معاهم حتي لو كانت متستحقش البكاء يبكوا عليها   

 

انا مش عارفه انا قلبي قاسي لدرجه اني مش ببكي ولا انا بشوف الامور أو المواقف ال قدامي متستهلشي البكاء  ولا انا مش بعرف ابكي اصلا  مع اني لو  حصلي موقف يديقني اتاثر بيه جدا وأفضل دفنه نفسي فيه من الزعل وممكن منمش وممكن اقعد فترة كبيره حبسه نفسي ف انعزال تفكير ف الموقف ال بديقني بس اني ابكي مقدرشي 

 

وخاصة ممكن الدموع تكون  ف عيني وانا بحكي موقف لصديقتي أو لحد  من أهلي بس متنزلشي  وانا مع نفسي مقدرشي استحضر الدموع وتنزل  فعلا نفسي ف إحساس الانهيار ف الدموع  نفسي ابكى بجد

 

معلش هو سوال ممكن يكون تافه بس بيهمني جدا انا مش مجنونه زي ال بيقولوا أصحابي اني وش فقر أو انا بتمنى حاجه وحشه تحصلي  انا شايفه ان البكاء ده نعمه وان لو مفيش بكاء ايبقى مفيش ضحكه وابتسامة من القلب  وانا فعلا حاسه اني ربنا كرمني بحاجات كتير حلوه عن غيري أو ال حواليا بس انا مش مستمتعه بيها  عشان انا فيا حاجات جويا عايزة تصلح  زي البكاء 

 

نفسى ابكي بس مش عايزة حاجه تحصل وحشه بس في حاجات كتير الناس ببكي عليها مش شرط تكون حاجه وحشه  ممكن يكون البكاء إحساس بالتقصير من حاجه معينه أو تعب أو إرهاق ف الشغل أو حاجه تانيه أو نفسه مديقها أو زعل أي حاجه حتي البكاء برضو يكون ف الافراح في فرح بيبكي الواحد فيه

 

انا نفسي اجرب إحساس الدموع ده وهي بتغسل قلبي وعيوني أعتقد أكون أقوى بعد البكاء ع الرغم كل ال حواليا بشوفهم بيبكوا ع أي موقف حصل قدامي  هما يبكوا وبعدها بشوفهم  قدروا يتاقلموا عادي ويتكلموا وقدروا يتقالموا ع الوضع غير

 

انا ازعل والزعل ياثر ع شكلي وعيوني وبيان عليا بس ممبكيش  وده بيقعد معاي فترة  غير هما يعدوا بسرعه  انا بحسد الناس ال بتبكى دي بحسهم عندهم حاجه حلوه مش عندي وبقول يا بختهم

 

كان حصل موقف لما كنت في ثانوي اني كنت بحس اني فاشله عن زمايليو مكنتش عاوزة خد اي دروس بس لما كنت هسقط بقيت باعيط كتير جدا ليل و نهار

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

أهلا بيكي . .

 

إنتي ماشية بخطوات سريعة و قوية لمظلة الإضطرابات النفسية , وانا خايف انك تلاقي نفسك بتعاني من أكتر من حاجة لو استمر الحال علي ما هو عليه حاليا . .

 

انتي حاليا بتمارسي نوع من : دفن المشاعر بقوة في عقلك الباطن , وعندك رفض و إصرار مستمر في إظهار مشاعرك او التعبير عنها , و غالبا ده قرار من عقلك الباطن مش عقلك الواعي , يعني انتي مش بتعملي ده بإرادتك وقرارك , قد ما هي رغبة دفينة جواكي بتدفعك دفعا لعدم البكاء من غير ما تعرفي ليه . .

 

أكتر من سهم بيشير للي حصلك في ثانوي , إصرارك الرهيب علي عدم أخد دروس زي باقي زميلاتك , واللي تسبب بشكل ما في جعلك حاسة إنك متأخرة عنهم , وده اللي جعلك تبكي بشكل هستيري ليل و نهار , الموقف المؤلم ده , جعل عقلك الباطن يتفادي البكاء و الانهيار مرة تانية , وده غالبا السبب الرئيسي للوضع الحالي اللي بتعاني منه .

 

مش هنعيد الكلام عن فايدة البكاء لأنك بالفعل عارفاها , لكن لازم نؤكد علي ضرورة حل الأزمة اللي عندك , لأن الأزمة مش في اختفاء البكاء نفسه , لكن في الاستمرار في دفن المشاعر , و اللي هيصنع عندك كمية غير محدودة من الآثار النفسية المدمرة , واللي انتي بالفعل دلوقتي شايفاها في نفسك , لما بتوصفي ازاي بتعاني من كتر التفكير , وانك مش عارفة تنامي , والأفكار الجنونية اللي بتجيلك , وغيرها من المآسي   . .

 

-----------------------------------------------------------------------------------

 

طب و الحل ؟  

 

الحل السليم و العلمي و اللي كنت هاعمله لو انتي بنتي , اني أخدك من ايدك و اروح معاكي لطبيب نفسي فورا , وأخليه يبدأ معاكي العلاج السلوكي المعرفي CBT  , او عن طريق استخدام أحد طرق التحليل النفسي , و اللي هتكون قادرة علي سبر أغوار عقلك الباطن ,و تحديد السبب الرئيسي للأزمة عندك , والبدء في تفكيكه و حله بشكل تدريجي . .

 

الذهاب لطبيب نفسي هو بالفعل الحل المباشر و السليم اللي انصحك بيه , واللي اتمني إنه يكون متاح عندك , وميكونش فيه موانع مادية او عائلية في تحقيقه . .

 

و لما تروحي للطبيب النفسي , لازم تركزي جدا علي اللي حصل ايام ثانوي , لأنها غالبا السبب الرئيسي للي انتي بتعاني منه دلوقتي  . .

 

طيب لسبب ما مش هتعرفي تروحي لطبيب نفسي , ساعتها حاولي تمشي علي الخطوات ديه , واللي ممكن متحلش المشكلة لكن تقلل كتير من آثارها و من تواجدها عندك , كما و كيفا . .

 

 

• أولا ابدئي اتعودي انك تزيلي أسباب التوتر و القلق اللي جواكي , مشكلتك ممكن تتحل بشكل كبير لو انتي عملتي تجفيف لمنابعها , يعني لو قدرتي تقفلي أبواب المشاكل و التوتر و القلق النفسي  , أو علي الأقل تقلليهم , وهنا مش هتلاقي أصلا مشاعر سلبية عشان تدفنيها . .

 

 

 

•  لازم تعملي تغيير تدريجي في قناعتك , وبالتحديد في نقطة  : الخجل من إظهار عواطف الضعف .

 

 

• بالتوازي مع الخطوة اللي فاتت , ابدئي عودي نفسك علي "ترك مشاعرك دون حبسها او التحكم فيها" , عودي نفسك علي عدم التحكم في مشاعرك بالطريقة العسكرية ديه , انتي كدة بتدمري نفسك تدريجيا و انتي مش واخدة بالك

 

 

• حاولي تقللي , او تتوقفي تماما  , عن التفكير في المواقف السلبية اللي حصلت , ان فلانة قالت كلمة ,او فلان اتريق عليكي , او فلانة زعقت فيكي  ,او فلان احرجك بكلمة , إعادة التفكير بشكل دائم في المواقف السلبية ديه هيوصلك لحافة الجنون , هيخلي عقلك بيدور في دائرة مغلقة لن تنتهي , وبالتالي مش هتعرفي تهربي أبدا من شياطين التفكير السلبي اللي هتفتك بيكي . .

• ابدئي  بشكل تدريجي انك تعودي نفسك علي التقليل في التفكير في المواقف السلبية ديه , و بعدها اتعودي انك متفكريش فيها اساسا , لما اي موقف يحصل انتي ردي الكلمة بكلمة و خلاص , ما تعيديش و تزيدي فيها بتفكيرك عشان متحرقيش اعصابك

 

 

• واظبي علي شحن عقلك و مشاعرك لدفئ المشاعر الإنسانية , واللي موجودة بكثرة في القصص الإجتماعية , والمآسي اللي الناس عايشة فيها . .

• حاولتي تشتري كل كتب ابراهيم مطاوع  , واللي قام فيها بحل عشرات المشاكل الإنسانية العميقة , حاولي تتابعي صفحات علي الفيسبوك بتعرض قصص إنسانية حقيقية , هتلاقي ان مشاعرك هتتغير تدريجيا .

 

• لما تعملي الخطوة اللي فاتت , مهم جدا تكوني سايبة مشاعرك و احاسيسك براحتها , متكونيش مكهربة نفسك , ولا حاسة بقلق او توتر او مشاكل , لازم تكوني في حالة استرخاء و سكينة نفسية , وتكوني مُطلِقة العنان لمشاعرك الإنسانية , ما تصريش انك تعيطي او تنزلي دموع , انتي بس سيبي لمشاعرك العنان , وبعد اسابيع هتلاقي نفسك اتغيرتي تدريجيا

 

• قراءة القرآن  , وقيام الليل , والدعاء في السجود , و القراءة في الرقائق الإسلامية , بيكون ليها دور ايجابي جميل في تليين المشاعر , وفي ترقيق القلب , و ازالة اي شوائب منه

 

بالتوفيق يا رب