العنوان : المزاح القاسي

القسم: #النفسي

الرقم: 37

السؤال:

 

بنتي عندها خمس سنوات بتحب الهزار مع الولاد جدا  , يعني مثلا عمامها خالها

 

انا مشوفتش منهم حاجه وحشه بس بخاف ممكن تهزر مع ضيف عندنا ممكن حد غريب لو احنا في مشوار بره وحد كلمها بلطافه ممكن تهزر بايديها

 

المشكله انها ممكن تهرز وترخم علي اي حد مثال خالها جاي يزورنا من اول مدخل مبطلتش ضحك وتطلع علي كتفه وتضرب فيه وتغلس عليه قيس علي كده مع اي حد ممكن صاحب باباها او صاحب عمها وضحك بصوت عالي

 

وانا شايفه ان دي مشكله مش عارفه ليها حل وغلبت من التوجيه والكلام

 

وفي حاجه كمان البنت طالعه من الحمام النهارده بتضحك وبتقول الشطافة بتزغزغني انا اتصدمت من الكلام , واول مرة تقول حاجة زي كدة

 

وانا احيانا بكون عصبية معاها

 

بالنسبه للي بتشوفه في التلفزيون كرتون  او كراميش او طيور الجنه

         

اما التاب غابت فترة كده من سنه او اكتر تشوف سبايدر مان واليسا لما اخدت بالي عملت تقنين محتوي معدش يظهر

 

حاليا مشغوله بيوميات زوجه مفروسه وعيال كده بيعملوا تحدي اكل وشرب  بس انا مش بسيب لهم التاب كتير

 

ياريت لو في حل تدلوني

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

اهلا بيكي يا فندم  . .

 

نمسك الاول نقطة المزاح القاسي مع الناس .

 

بنتك من النمط الاجتماعي , واللي بياخد علي الناس بسرعة , وديه حاجة كويسة اصلا  , و بيفتقدها كتير من الاطفال .

 

فانفتاح الطفل علي الناس , سواء المعارف او الاغراب علامة تدل علي الصحة النفسية للطفل  , بل وانه هيكون اجتماعي و شجاع و قيادي .

 

لكن محتاجة يكون فيه شوية رقابة عليها , لان الطفل المنفتح جدا علي الناس , بيكون عرضة للتحرش بيه اكتر من المنطوي , لأن الطفل المنطوي و الخجول مش هيروح مع اي شخص ميعرفوش اي مكان , ولا هياخد عليه , بينما المنفتح ممكن بسهولة يروح معاه اي مكان وهو مآمن له .

 

فلازم تحطي ده في بالك , ويكون فيه رقابة مستمرة عليها سواء مع قريب او غريب , حد معرفة او حد جديد , لانها مش في سن تقدر تدافع عن نفسها , او تميز الصح من الغلط .

 

ربنا يحفظها من اي ايذاء ,لكن الحذر واجب , واي ضرر هيحصلها هيبقي بسبب اهمال الوالدين فورا  ,ديه حاجة مفيهاش اي تساهل .

 

بالنسبة للعنف اللي عندها  , غالبا ليه 3 اسباب محتملة .

 

ممكن يكون سبب واحد فيهم , او اتنين منهم , او التلاتة مع بعض .

 

• طابع شخصي فيها

• مكتسب من الاسرة او اصدقاء

• انعكاس للي بتشوفه

 

 

 

العلماء المتخصصين في "علم نفس الطفل" , بعد عدد كبير من التجارب وصلو الي ان الطباع اللي في اي طفل , بتعتمد علي حاجتين .

 

جزء موروث  , وجزء مكتسب .

 

الجزء الموروث يعني مولود بيه , لاسباب جينية معينة , اما وراثة عن الاباء و الاجداد , او تركيب معين في الجينات , او حتي نوعية الاكل او الادوية اللي كانت بتاخدها الام و هي حامل .

 

بل ان بعض العلماء اتكلمو عن نوعية الحاجات اللي كانت الام بتسمعها وهي حامل , موسيقي هادية ولا عنيفة ولا كلام هادي .

 

ففي الجزء الخاص بـ "الطابع الشخصي للطفل" , بنتكلم عن شئ هي مولودة بيه بالفعل , وموجود عندها لاسباب مختلفة  , يعني زي ما فيه اطفال شعرهم اصفر و اطفال شعرهم بني , وزي ما في اطفال سمر و اطفال لونهم قمحي , كمان فيه اطفال هاديين و اطفال اكتر عنف .

 

الا ان لحسن الحظ الحاجات ديه قابلة للتقويم و التعديل , بشكل تدريجي وواحدة واحدة , لغاية لما توصل للسلوك السليم اللي يتماشي مع المجتمع .

 

التقويم مش سهل بس مش مستحيل , محتاج خبرة و وقت وصبر , بس نتيجته ايجابية ,خاصة احنا مش بنتكلم في اضطراب نفسي جاد , لكن في نمط معقول يسهل تغييره .

 

و هنذكر في آخر الرسالة عدد من الخطوات اللي هتفيد في التقويم

 

 

 

و ده ممكن يكون من العصبية اللي شافتها منك , او جايز من حد من الاطفال اللي بتلعب معاهم .

 

وارد تكون شافت ده بالفعل من قريب او من فترة , واترسخ في ذهنها و بتكرره , علي اعتبار انه اسلوب مناسب في التعامل مع الناس .

 

والسبب التالت مرتبط بيه شوية , وهو اللي بتشوفه في التاب او التليفزيون .

 

 والحقيقة اني لازم ابدي اندهاشي  من نوعية الحاجات اللي بتشوفها  . .

 

يعني بنت في سن 5 سنين , لما تشوف سبايدر مان  , ديه مشكلة . .

 

ولما تشوف زوجة مفروسة , ديه ازمة . .

 

ولما تشوف تحدي ومنافسات عنيفة زي كدة , ديه مصيبة .  .

 

اخشي ان تأثير اللي بتشوفه عليها مش قليل يا فندم , و الكمية ديه من الاعمال الصاخبة , ان مكانتش هي السبب الرئيسي في العنف اللي بتمارسه , فعلي الاقل هي بتجعله مستمر معاها .

 

بل ان الكرتون نفسه و كراميش و غيرها , بتقتل خيال الطفل , وبتعمل نوع من تدني الذوق العام الخاص بيه .

 

فما بالك لما تشوف سبايدر مان  ,واللي رغما عنها هيحقن داخلها كميات لا تنتهي من العنف و الاكشن . .

 

طبعا لابد من انتقاء ايه اللي تشوفه , واساسا ينصح ان الطفل قبل 7 سنين , انه ميكونش بيشوف اي شئ علي التليفزيون او التاب , ده سن يجري و يلعب , يمسك صلصال و يشكله , يرسم و يشغبط , يحفر في الرمل او حتي الطين , يبني مكعبات و يهدها , امه تمسكله قصة تقراهاله.

 

مش سن انه يقعد متنح قدام التاب او التليفزيون بالشكل المخيف ده .

 

فورا قللي جدا معدل مشاهدتها بشكل عام علي التليفزيون و التاب , يعني خليها ساعة في الاسبوع مش اكتر من كدة , وطبعا يتم منع كل المواد الصاخبة ديه عنها .

 

-----------------------------------------------------------------------------

 

اما بالنسبة لمشكلة " خيالها واسع " لما دخلت الحمام , فانا مش شايف انه ازمة ولا حاجة , الاطفال عندهم خيال اكبر من البالغين , وطبيعي انها تقول حاجة غير مألوفة زي كدة  .

 

بل انها حتي لو قالت شئ يخوف شوية , زي مثلا "العروسة بتاعتي كلمتني و قالت انها زعلانة مني" , حتي لو قالت شئ يرعب زي كدة , فده طبيعي للاطفال , احنا نقلق لما حاجة زي كدة تتكرر بشكل مستمر , غير كدة مفيش مشاكل .

 

بل ان الخيال الواسع اصلا حاجة هايلة , ياريت هي تحتفظ بالخيال الواسع ده سنين طويلة , ومتاجيش المدرسة و تقتل خيالها بالمناهج العقيمة  .

 

نوصل بقي لعلاج مشكلة العنف اللي عندها , وخطوات التقويم , واللي حاولي تطبقيها بالقدر الممكن .

 

• يتم قفل باب كل المشاهدات الغير مناسبة علي التليفزيون و التاب فورا , متشوفش الا حاجات هادية تماما , وفترة قليلة اسبوعيا

• حاولي تقللي جدا اي عصبية قدامها , عشان تبدأ تتعود علي جو هادي يخلو من اي صخب

• لو فيه موسيقي او اغاني بتسمعوها , ياريت تبقي هادية جدا من غير اي ازعاج

• يتم التنبيه علي كل اللي يزوروكم , قرايب او ضيوف , ان هي لو هزرت جامد انهم يتضايقو منها و انهم ميرحبوش بالهزار ده او يتجاوبو معاها , عشان هي تحس انهم اتضايقو

• طبعا مفيش حد منهم هيعاقبها او يزعقلها , بس هما يكونو متضايقين و يبعدوها عنهم بهدوء , عشان تحس ان محدش مستريح للي بتعمله

• لازم انتي او ابوها (الاب افضل) يكون حازم معاها في النقطة ديه , ان يا فلانة لو ضايقتي عمو منك تاني هنزعل منك

• لو اتكرر منها ده يكون فيه موقف سلبي منك و من الاب , مش ضرب ولا زعيق , لكن تبريق بالعينين , او كلمة حازمة زي "وبعدين , قلنا ايه" , او التجاهل تماما و محدش يعبرها , او العقاب بالحرمان من شئ بتحبه , او الضرب في حالة هي زودتها جدا , ويكون ضرب خفيف بغرض الغضب مش الألم

• لو هي قاومت نفسها و بقت مؤدبة حتي لو خمس دقايق تكافئيها و تحضنيها و تشكريها علي اللي عملته , وتأكدي عليها انها تستمر في ده

 

 

 

لو استمريتي يا فندم علي الخطوات الـ 8 دول فترة , ثقي انها هتتغير ايجابا ان شاء الله

 

ومتنسيش تشوفي السؤال ده  ,لانه هيفيدك كتير في مشكل بنتك , بعنوان : ابني مش بيحترمني