العنوان : ملامح الطريق

القسم: #النفسي

الرقم: 65

السؤال:

​

عمري ٢٣ سنة وخريجة كلية كويسة دا يدي انطباع لبنت ناضجة وعارفة كويس هي عاوزة ايه ومخططة لأهدافها انما انا مش كدا خالص ..انا نفسي اعمل لنفسي هدف واخطط له وللاسف مش عارفة اصلا انا عاوزة ايه فكرت احضر دراسات عليا بحيث احس ان ليا كيان ومش محتاجة لحد بس مش عارفة ابدأ ازاى ..مش عارفة اذاكر ..او بكسل او مش متشجعة..نفس اسافر و الف الدنيا ..شغلي مش مستريحة فيه واخد كل وقتي يمكن دا سبب تاني بحيث اني بروح يادوب اكل وانام ...

  

نتيجة لكل دا انا احساسي حاليا واحدة مالهاش هدف ولا في حياتها العملية ولا العاطفية ..مشتتة جدا ومش عارفة اختار ولا اميز ودايما مترددة .

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اهلا بيكي

 

شوفي يا ستي . .

 

لازم في البداية احييكي لطموحك و خططك و انك عايزة تعملي تطوير لنفسك , قليل من الناس اللي بيفكرو زيك , سواء شباب او بنات ,وبالفعل لو باقي الشباب عندهم نفس الاحساس و نفسك الطموح كان حالنا اتغير تماما . .

 

انتي عندك الطموح و النية والرغبة , بس عندك شوية لغبطة في الوسيلة و الآلية لتتنفيذها , فهنساعدك حالا في تحديد ملامح الطريق ليكي . .

 

انتي في البداية عملتي غلطة صغيرة  , وهي اللي وصلتك لحالة الحيرة ديه , وهي انك رسمتي لنفسك عدد من الاهداف الكبيرة والايجابية و الجميلة مع بعض . .

 

ايه ده ؟ هو غلط الواحد يكون ليه اهداف كبيرة ؟ ؟

 

مش غلط , رسم الاهداف في حد ذاتها شئ ايجابي جدا , لكن المشكلة في محاولة تنفيذها كلها مع بعض , ده شئ مش واقعي , وغير متاح , خاصة مع الظروف الصعبة اللي بنعيشها في البلد حاليا   . .

 

فإنك تكوني عايزة :

• تعملي ماستر

• تاخدي كورس انجليزي

• تشتغلي

• تتفسحي و تخرجي

• تحوشي فلوس

 

انك تحاولي تحققي الخمس حاجات ديه مع بعض , شئ مش واقعي , وهينتهي بيكي الحال معرفتيش تعملي حاجة فيهم للاخر , غير ان هيكون عندك الشعور بالاحباط , وهتتهمي نفسك انك فاشلة .

 

المثل بيقول : كتير النط قليل الصيد , فلما تحاولي تحاربي في كذا مجال في نفس الوقت , هتفشلي فيهم كلهم .

 

عارفة فكرة ان الدبوس , السن بتاعه رفيع جدا , فيقدر يخترق الجلد او القماش , لان السن صغير فعرف يوصل .

 

بينما الدبوس او كانت راسه اعرض شوية , مش هيقدر يخترق , نفس الفكرة , علي قد ما تكون اهدافك محددة و بسيطة وواضحة , علي قد ما هتقدري تنفذيها ,و علي قد ما هتكون واسعة و كتيرة و شاملة , علي قد ما هتدوري في فلكها من غير ما تحققي منها شئ . .

 

انا عارف ان الشخص اول ما بيتخرج , بيكون عنده نظرة شديدة التفاؤل للكوكب , و بيكون عنده حماس يهد جبال , بس لازم الحماس ده يتم ضبطه , والتحكم فيه , عشان يكون عنده "نفس طويل" يكمل المشوار للاخر , ويصبر علي المعاناة المعتادة الموجودة في طبيعة الامور , خاصة اننا عايشين في مصر , مش في سويسرا حيث الظروف الاقتصادية و بيئة العمل مختلفة .

 

----------------------------------------------------------------------------

 

فانتي محتاجة تعملي نوع من اعادة ترتيب الاهداف اللي ذكرناها (ولو فيه غيرها) , عشان ترسمي لنفسك خط واضح , ايه الاكثر اولوية , وايه اللي يليه و هكذا .

 

و تحطي في بالك ان مفيش مشاكل انك تعملي هدف ورا التاني , بشكل متتالي  , مش بشكل متوازي , وديه هي الصورة الواقعية والمنطقية لتحقيق اي مجموعة من الاهداف عند الشخص

 

وممكن تكون اول خطوة هي : (تحديد ايه هي الاهداف الرئيسية و بالغة الاهمية , والتي لا تنازل عنها ) . .

 

وهنا محتاجك انك تبصي لقدام , مش دلوقتي , يعني تقولي لنفسك : ياتري سنة 2030 انا عايزة اكون عاملة ازاي ؟ ؟

 

لما تشوفي صورتك بعد 11  سنة من دلوقتي , هتقدري تحددي ايه المهم وايه الهايف, ايه اللي لازم يتنفذ , وايه اللي ممكن يتأجل او يتلغي خالص .

 

ومتعتمديش علي الذاكرة او التفكير الفلسفي , هاتي فورا ورقة و قلم و استعيني بيهم في سرد و كتابة كل الاهداف اللي في بالك , وابدئي اكتبي مميزات و عيوب و نقاط قوة و نقاط ضعف كل حاجة فيهم , وبناء عليه شوفي ايه المهم , وايه الاقل اهمية . .

 

فالخطوة الاولي هتكلل بالنجاح  ,لما يكون معاكي لستة جميلة  , مكتوب فيها : هدف رقم (أ) هو كذا كذا , هدف رقم (ب) هو كذا كذا , والقايمة تكون مستمرة و مفصلة . .

 

هنا بقي تروحي للخطوة التانية

 

 

و الخطوة التانية هي عمل جدول زمني لتحقيق الاهداف ديه . .

 

 

الجدول الزمني هيكون بشكل تقريبي , يعني خلال سنة 2019 هكون بدأت في الماستر , وعلي اول 2020 اكون خلصت اغلب الرسالة  ,وعرفت احوش شوية فلوس , وعلي اخر 2020 , اكون خلصت الماستر بالكامل , واشتغلت في مكان نضيف . .

 

وبالتوازي يكون فيه حاجات تانية , لان الحياة مش كلها دراسة او شغل , يعني لو انتي محبة للخروج و الفسح , تعملي هدف ليكي انك هتسافري مكان كذا وكذا جوة مصر سنة 2019 , والبلد الفلانية في 2020 , وهكذا .

 

مش لازم الخطة الزمنية تكون دقيقة جدا , بل ان التفاصيل الدقيقة فيها هو شئ مش منطقي , لكن تكون خطوط عامة تبني عليها حياتك .

 

و خدي بالك ان فيه اهداف هتكون بالتوازي و اهداف بالتوالي . .

 

يعني ايه ؟

 

يعني فيه حاجات ماشية بالتوازي مع بعض , ومفيش تعارض بينهم , مثلا (الشغل , الكورس , تزوري قرايبك , تستمري في حفظ القرآن . . )

 

و فيه اهداف هتكون بالتوالي , لان مش هينفع تبدأي في حاجة الا لما تخلصي اللي قبلها , فمثلا انك تشتغلي في مكان انترناشونال محتاج تخلصي الماستر , وعشان تعملي  الماستر لازم تكوني خلصتي الايلتس , فيتم ترتيب الاهداف المتوالية بشكل منظم و سليم . .

 

و لا بأس بالاستعانة بمتخصصين في مجالك , يساعدوكي بالمشورة او النصيحة , يعني روحي الجامعة عندك , وشوفي دكتور محترم و قوليله انك عايزة 5 دقايق من وقته , عشان يقولك نصايح , علي ايه نقطة البحث في الماستر اللي هتفيدك في تخصصك , بدل ما تضيعي سنين في ماستر و يطلع ملوش فايدة كبيرة .

 

فعمل خطة زمنية لاهدافك هو شئ مهم , واللي علي اساسه هتمشي في الخطوة التالتة .

 

 

 

و ده محتاج منك كذا حاجة . .

 

اولا – و هي اهمهم – التخلص من كل العوائق اللي بتفرملك عن تنفيذ الاهداف  . .

 

و من كلامك , انا شايف ان الشغل واكل كل وقتك , من الصبح لغاية بالليل , اغلب ايام الاسبوع , ديه مطحنة كبيرة , هتلتهم وقتك بالكامل , ومش هتخليكي قادرة علي عمل اي شئ .

 

و من حسن حظك انك بنت , مش شاب مضطر انه يشتغل غصب عنه , بمرتب كبير عشان يعرف يفتح بيت و يرتبط .

 

ميزة انك بنت , انك مش محتاجة "تتبهدلي" في مطحنة شغل و تضيعي علي اساسها اهدافك اللي حطاها في بالك .

 

عشان كدة قلتلك من شوية , تخيلي نفسك سنة 2030 عاملة ازاي , علي قد ما تكون الصورة ديه واضحة قدامك , علي قد ما هتتحركي بقوة لاهدافك  .

 

فنصيحتي ليكي , ان لازم يكون فيه تغيير كامل في نظم الشغل ده .

 

يعني انك تشتغلي بوقت اقل , حتي لو المرتب نزل النص , ايوة هتخسري شوية فلوس , بس هتكسبي الاهم منه بكتير , وهو وقتك الغالي , اللي هيتم ترجمته لرسالة ماجيستر هتفرق معاكي كتير .

 

فممكن تروحي لصاحب الشغل , وتقوليله ان ظروف وقتك مش هتسمح انك تكملي بالنظام ده  ,فانا محتاجة اني اشتغل بس 4 ايام في الاسبوع , وبنص المرتب اللي انتي بتاخديه .

 

او تشتغلي 6 ايام عادي , بس نص الوقت , يعني تمشي من الشغل قبل العصر , او اي جدول زمني يتوافق مع دراستك و رسالتك

 

لو وافق , يبقي كويس , موافقش تقوليله مع السلامة , مش هاضحي باهداف كبيرة , عشان كام جنيه باخدهم في الشغل .

 

وساعتها سيبيه , ودوري علي شغل وقت قليل بمرتب قليل , وان شاء الله تلاقي .

 

او ممكن تعملي فكرة بديلة , انك تشتغلي لفترة معينة (مثلا لمدة 6 شهور كمان) , ومن بعدها تكوني حوشتي شوية فلوس , تسيبي الشغل و تتفرغي تماما للرسالة

 

بل ان لو لغتك الانجليزي كويسة , ففرصة انك تشتغلي اونلاين من البيت مش مستحيلة , انتي بس محتاجة شوية صبر في البحث الاونلاين , وهتلاقي حاجات كويسة .

 

ايوة انتي خسرتي شوية فلوس ,بس كسبتي وقتك الاغلي من كدة , واللي هيتم تحويله لبناء مستقبلك .

 

ايوة هتعيشي كام سنة في "تقشف" , بس انتي بتصنعي مستقبلك , واللي هيكون اكيد شئ يشرف .

 

 

الخطوة الرابعة , هي تنظيم وقتك . .

 

خدي بالك الخوف لو سبتي شغلك , او اشتغلتي بنظام وقت اقل , انك تضيعي وقتك بعد كدة , وده وارد .

 

سواء علي الفيس , او التليفيزيون ,او صديقاتك , او غيره من الحاجات اللي بتاكل في الوقت اكل .

 

فلازم يكون عندك ارادة قوية , و تدريب مستمر ازاي تستغلي وقتك بشكل مناسب .

 

و متبدئيش سخنة قوي , عشان متقعيش في النص , يعني متخليش اليوم كله مذاكرة , عشان مش هتستحملي . لازم يكون في جدولك خروجات مع صديقاتك  , زيارة اقارب , تشوفي الدنيا , وهكذا , فلو انتي ذاكرتي 5 ساعات يوميا ده كويس جدا .

 

واحنا هنا اتكلمنا بالتفصيل عن تنظيم الوقت , في الرسالة اللي بعنوان : الثروة المفقودة , هتفيدك كتير

 

 

 و نصيحة أخيرة حطيها في بالك دايما ,متضيعيش هدف كبير بعيد , عشان هدف قريب هايف     . .

 

بالتوفيق يا رب