الخيال الجامح
الرسالة السابقة
العنوان : الخيال الجامح
القسم: #النفسي
الرقم: 75
السؤال:
انا عندي 24 سنه
انا شخصية خيالية كتير بتخيل كتير حاجات كتير حلوه بس لازم احط حاجه وحشه انا بحس اني ضعيفة الشخصيه وساعات بحس اني قليله اوي وماليش لازمه ف هذة الحياة وساعات بحس اني قويه وإني مش محتاجه حاجه من حد وبحس اني اعتزاز بنفسي وبكرامتي كل شئ
فمثلا بتخيل أكون غنيه ومعاي فلوس كتير بس برضو متخيل مش اعرف اصرفهم فين مثلا متخيل اني عندي عربية بس بتخيل اني مش اعرف اركن العربيه مثلا بتخيل اني أكون من صفوة المجتمع بس مش اعرف أتعامل مع الناس ازاي مثلا بتخيل اني اتجوز انسان بحبه بس ايكون ميحبنيش أو هو يحبني وانا بحبوش مثلا بتخيل حياتي اتكون روتنيه أتخيل أن انا مشهورة بس مش أبقى مرتاحه في حاجات كتير ماثرة عليا ف خيالي بس الكلام مش اعرف اوصفها
وساعات بحب اقعد وحدي واني مش بحب أكلم حد واختلط بحد ولا ادخل نفسي ف حوارات متهمنيش وساعات بتكلم كتير وبحب افتح حوارات مع الناس المهمه والناس ال بحبهم بس انا لما ال حواليا بيقولو انتي بتتكلمي كتير وانتي هبله أو غبية أو انتي طيبة ع نياتك بحبش يقولون كده عليا وبعد كده اخد قرار متكلمشي معاهم تاني
بس بمجرد انهم يجو يكلموني ويسألونى عن حاجه اتكلم معاهم عادي ومعرفشي اخد منهم موقف وبزعل بسرعه وبتصالح بسرعه اوي من مجرد ابتسامة أو كلمه من الشخص ال زعلانه منه
وده بيحسسني اني ضعيفه الشخصيه اني مش بعرف اخد موقف .... مش عارفه اعمل ايه ف شخصيتي دي
كمان انا رأي الناس بياثر عليا خالص عشان كده بتجنب اسمع حاجه من حد عليا بدايق خالص لو سمعت اي تعليق عليا
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي . .
كعادة عدد من الرسائل , اللي بيكون فيها عدد كبير من المشاكل مع بعض , و عدد من المشاكل ديه مرتبط ببعضه , فهنحاول نعمل رد إجمالي لكل مشكلة علي حدة . . .
------------------------------------------------------------------------------
نبدأ بالخيال الواسع . .
الخيال الواسع في ذاته هو ميزة , ومن العناصر المطلوب تواجدها لدي الأذكياء , لكن كعادة اغلب الصفات البشرية , ان لما تزيد كميتها عن القدر المطلوب تتحول لعيب خطير يدمر التماسك العصبي للشخص . .
يعني الخيال ليه عدد من المميزات الكبيرة زي :
-
بيصنع إبداع في التفكير , وهو اللي بينعكس فورا في القرارات المتخذة
-
بيجعل الشخص عنده القدرة علي ابتكار حلول غير تقليدية للمشاكل اللي بيواجهها
-
بيصيغ أفق أوسع , ومجال أكبر في التفكير , وبالتالي حلول قد تكون أفضل
-
الخيال بيساهم علي الاستراحة المؤقتة من المعاناة اليومية المعتادة , عن طريق الانتقال بين دروب الروايات و الاشعار و الكتب و الأفلام
لكن زي ما قلنا , إن زيادة الخيال عن القدر المناسب , او استخدامه في اوقات غير مناسبة , بيصنع عدد من العيوب الخطيرة , زي :
-
ممكن الواحد يتخذ قرارات غير منطقية , او افكار غير مقبولة ,باعتبارها مبتكرة و جميلة
-
وارد جدا يتم اتهامه بالجنون او جموح الفكر , لو هو استخدم الخيال في غير مكانه , ومع ناس مش فاهمينه
-
بيصنع عند البعض نوع من الهروب من المشاكل , و عدم مواجهة الواقع و إهماله حتي ينهار
فمن هنا نؤكد علي أهمية ضبط كمية الخيال في عقلك , عشان من ناحية متقلش او تختفي , فيتحول فكرك لفكر تقليدي سخيف بلا ابتكار , ولا يزيد في الكم و الكيف والوقت , فتستخدميه في غير مكانه او وقته , وبالتالي يتحطم الواقع عندك علي صخرة الأوهام .
-------------------------------------------------------------------------------------------
النقطة اللي بعدها هي فقد الثقة بالنفس . .
وهي ملحوظة هنا , خاصة في تأثرك السريع بكلام الناس , ورأيهم فيكي . .
والكلام عن الثقة بالنفس يطول و يطول , ومش هيكون متاح الكلام عنه في مكان محدود هنا , لكن يكفي اننا نلخص اللي عايزين نقوله في كلمتين , و عايزين نوجز مفهوم الثقة بالنفس في سطر واحد فممكن نقول : الثقة بالنفس هي الإطمئنان لقدراتك الشخصية , وعدم انتظار رأي الناس فيها . .
بس كدة , مجرد انك تطمني لامكانياتك و قدراتك الحقيقية , وتعرفي هي ايه بالتحديد , وكمان ميكونش عندك اهتمام ايجابي او سلبي برأي الناس فيها , فانتي كدة عندك ثقة بالنفس . .
و العكس صحيح , لو انتي دايما قلقانة و خايفة و مش واثقة من امكانياتك , وكلمة توديكي و كلمة تجيبك , ورأي فلان يخليكي تحسي انك كويسة , ورأي فلانة يخليكي تحسي انك فاشلة , فانتي دلوقتي تفتقدي لأساسيات الثقة بالنفس .
وان كان مستحيل الحديث عن طرق علاج الثقة بالنفس في المكان المحدود ده , فيكفي اني نورتلك الطريق عشان تعرفي مفهوم الثقة بالنفس ,و انتي من جواكي حاولي تعيدي ضبط الدفة , عشان تكوني قادرة علي إعادة توجيه نفسك للاتجاه الصحيح
------------------------------------------------------------------------------------------
نوصل لنقطة النظرة السوداء . .
و هي النظرة السودوية المتشائمة اللي انتي حاطاها في كتير من فكرك و قراراتك , وكمان خيالك . .
وهي مرتبطة بشكل ما بنقص الثقة بالنفس , انتي من جواكي عشان عندك كمية لا بأس بها من التشائم , فطبيعي انك تحسي من جواكي بنوع من "الدمار" اللي هيحصل في عدد من نواحي حياتك و مستقبلك . .
و بالتالي انك ترسمي نفس النظرة السوداء في اغلب توقعاتك , وده شئ غير سليم , صحيا او نفسيا . .
استمرارك في التعامل بالطريقة ديه , هيجعل نظرتك للأمور هتبقي سلبية جدا , وده هيدمر استقرارك النفسي , وجهازك العصبي , هتحسي دايما ان الدنيا سودا , ان مفيش أمل , ان الحياة مضلمة في وشك , ان كل حاجة مقفولة . .
بحس إنك بتعملي لنفسك نوع من العقاب , مش عارف ايه هو الذنب اللي انتي شايفاه , بس انتي بتعاقبي نفسك علي حاجة انا مش عارفها , وممكن انتي كمان مش عارفاها و مش فاكراها , بس بتتلذذي بتعذيب نفسك بتسويد كل حاجة في وشك , وده غلط , وبيفكرني باضطراب الماسوشية , الخاص بلذة تعذيب النفس . .
ان كان الخيال فيه حاجات مفيدة , فالنظرة السوداء مفيهاش اي شئ كويس , هتلاقي نفسك في المواقف الكويسة مش مستمتعة لأنك عارفة ان فيه مصايب هتيجي , وفي المواقف الصعبة هتعاني و مش هتعرفي تتصرفي . .
لابد تعودي نفسك ان يكون ليكي نظرة مختلفة , مش هقول يكون كلك أمل و تفاؤل و نظرة مشرقة , قد ما هقول ان يكون ليكي نظرة موضوعية محايدة , بحيث تدي لكل حاجة مقدارها السليم , وتتعاملي علي اساسها . .
-----------------------------------------------------------------------------------
النقطة اللي بعدها : الباب المفتوح لمسامحة الناس . .
كنا اتكلنا بالتفصيل عن الفرق بين الطيبة و البلاهة
و علي أهمية العقاب في رسالة : رقة القلب و القصاص
كمان علي استغلال الناس لكرم الاخلاق في رسالة : أختي الأنانية
ياريت تقري الرسايل ديه كويس , كاتبين فيهم تفاصيل عن ازاي ان كرم الاخلاق عن الشخص , مش معناها انه يوطي راسه دايما عن التجاوز او الظلم اللي في حقه , وانه لازم مع اي تجاوز ضده لازم ياخد حقه بالكامل , مش انه يسكت . .
كمان نفس الموضوع عندك , لما حد يظلمك وانتي عارفة انه غلطان , متسكتيش ولا تفرحي ولا تسامحي , ده مش من الاسلام ولا من الخلق ولا من المنطق , تسامحي اللي قدامك لما يعتذر , مش لما يغلط فيكي و يستمر في غلطه . .
اقري الرسايل التلاتة كويس , وهتلاقي ان انتي لازم تغيري من نفسك شوية
--------------------------------------------------------------------------------------
النقطة الأخيرة : التحكم في الكلام
ديه محتاجة اولا انك متكونيش متوترة ولا عصبية لما تتكلمي , اتكلمي بهدوء و بالك رايق و مش قلقانة من حاجة . .
ثانيا لما انتي تحلي النقطة التانية المتعلقة بالثقة بالنفس , هتلاقي نفسك بقيتي تتكلمي مع اي حد وانتي هادية و مش متوترة , وقتها هتعرفي تتحكمي في كلامك كويس . .
ثالثا متدخليش نفسك في اي جدال او نقاش مع حد من اللي بيزعقو او بيعلو صوتهم , اللي زي دول اصلا تجنبي التعامل معاهم بقدر الإمكان , الإمام الشافعي ليه جملة جميلة : إن جادلت ألف عالم غلبتهم , وإن جادلني جاهل واحد غلبني . .
النقطة الرابعة عليكي بكثرة الصمت بقدر الإمكان , متتكلميش الا في الاحتياج , وخليكي اكتر منصتة و صموتة و مستمعة , ولما تتكلمي خلي كلامك قليل مش كتير . .
كمان اقري كتير , كتر القراءة بيديلك حكمة و صياغة سليمة للكلام , وبيوسع مدارك تفكيرك و سعة أفقك , كتر القراءة بيفيد جدا في الحالة ديه
----------------------------------------------------------------------------------------------
احنا اتكلمنا عن خمس نقط : الخيال , الثقة بالنفس , النظرة السوداء , مسامحة الناس , التحكم في الكلام . .
اجتهدي بقدر الإمكان في تنفيذ النصايح اللي كتبناها هنا , وابدئي بالثقة بالنفس , لأنها لو اتحلت هتحل باقي المشاكل معاها
بالتوفيق يا رب