العنوان : الخطوبة الشائكة

القسم: #الاجتماعي

الرقم: 16

السؤال:

 

انا عندي ابن خالتي كان بيحبني وجه اتقدملي كذا مره وبابا وماما مش بيوافقو عليه

 

وفي الاخر وفقو وفيه ناس وقعو بين الاختين فالخطوبه اتفسخت

 

و دلوقتي انا مش عارفه اعمل اي وماما هي اللي قالتله نفشكل الخطوبه وهو جايب اللوم ع امي وبيقول انها مش شرياه

 

وجيت كلمته فقالي النفوس مش صافيه بين الاهلين وهو بيحاول يبعدني ويقولي انا خايف عليكي وانا مش عارفه اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

أغلب الأسئلة اللي بتيجي في محور "الارتباط الغير مكتمل – الحب المسدود – فشل استمرار العلاقة" , بيكون سببها المتلازمة اللي اتكلمنا عليها قبل كدة , اللي اسمها "شاب بيتسلي – بنت مخدوعة" , واللي فورا بانصح البنت انها تقطع اي تواصل مع الشاب لانه بس بيستلي . .

 

لكن من الواضح ان السؤال ده من نوع مختلف , فإن كان في الأمثلة اللي بقول عليها , دايما الشاب بيخترع حجج و قصص و حوارات , عشان ميجيش يتقدم للبنت بشكل رسمي , او يسوف الموضوع , فهنا حاجة تانية . .

 

هنا الشاب بالفعل جه و خبط البيت من بابه , اكتر من مرة , وقوبل بالرفض كل مرة

 

ولما اتقبل طلبه أخيرا , تدخل "ولاد الحلال"  و عملو مشاكل و اتفسخت من طرف والدتك . .

 

وحاليا هو بيحكم صوت العقل ان مفيش فايدة , وانه مش هيحارب طواحين الهوا , وانتي – رغما عنك – بتحكمي صوت قلبك انك عايزاه باي طريقة . .

 

و هنا فيه علامة استفهام شديدة الأهمية لازم نطرحها , لانها أساسية في تحليل المشكلة و اتخاذ قرار فيها ؟ ؟

 

يا تري سبب الرفض المتتالي قبل كدة ايه ؟ , وليه بعدها تم فشكلة الخطوبة ؟ ؟

 

فيه احتمالين لازم نفكر خلالهم  . .

 

الاحتمال الأول ان هو بالفعل فيه مشكلة مش صغيرة , ويكون فيه شئ معين انتي مذكرتيهوش هنا , ممكن الشئ ده انتي مش شايفاه مصيبة كبيرة , بس الاب و الام ليهم رأي تاني . .

 

في نفس الاحتمال وارد يكون فيه سبب انتي مش عارفاه بس الوالد والوالدة عارفينه ومش عايزين يقولوه لسبب معين , واكيد لو سالتيهم هيقولولك مفيش سبب بس مش  هتتجوزيه و خلاص , اسكتي و ارحمينا . .

 

لأن برضه مش منطقي يتم رفض شاب جاي يطلب ايد بنتهم , ولما يتم الموافقة اخيرا يتم ايقاف الخطوبة , من الباب للطاق  . .

 

الاحتمال التاني ان يكون فيه تعنت و ظلم من الوالد والوالدة , ويكون فيه نوع من "تحقيره" او "اساءه تقييم ليه"  او "حاطين عينيهم علي حد تاني احسن منه"  . .

 

و الاحتمال ده طبعا قائم ووارد , وبيحصل في كتير من الأسر للأسف  , وغالبا بيكون لسبب مادي : لسة شاب مكافح , مرتبه قليل , شقته بعيدة و صغيرة , مش هيعرف يجيب دهب , ابن طنط نوال زميلتي اغني منه و هيتقدملك , وكل التفاهات ديه , اللي بتتسبب غالبا بخراب البيت في الآخر . .

 

اكيد لو الابوين شايفين ان الزوج عاجز عن فتح البيت يبقي حقهم يرفضو  ,لكن لو كان هيفتح البيت بمستوي متوسط او حتي ضعيف , وهو انسان محترم و علي خلق وفيه توافق و تناسب بينهم , فرفضه يعتبر جريمة , هتدفع تمنها بنتهم في زواج تعيس قادم . .

 

ولاننا معندناش المعلومات الكاملة اللي نقدر نحسم بيها التساؤل  . بين الاحتمال الاول (هو غير مناسب بالفعل ماديا او خلقيا او دينيا) , و الاحتمال التاني (هو مش عاجبهم مع انه مناسب) , فهنجاوب علي الاحتمالين . .

 

---------------------------------------------------------------------------

 

خليني ابدأ بالاحتمال التاني , لان اجابته مش هتكون طويلة . .

 

في حالة عرفتي انه بالفعل مش مناسب , فلازم تؤمني ان قرار والديكي هو الصح , حتي لو مش شايفاه مريح ليكي . .

 

مش دايما بتكون القرارات الصح سهلة علي الواحد , لو هتاخدي راي طفل في اول يوم يروح المدرسة , تحب تروح ولا تقعد في حضن ماما , مكانش فيه اي طفل اتعلم , لو هتاخدي رأي شاب رايح الجيش يدافع عن بلاده , تحب تروح ولا تقعد في الأمان كانت انهارت كل جيوش العالم . .

 

احيانا بنكون مجبرين علي قرارات واحداث معينة , احنا مش بنحبها , لكن بتكون هي بالفعل الصح . .

 

لو ان رؤية الوالد والوالدة سليمة , وان هو مش مناسب , فالأفضل تقتنعي بفسخ الخطوبة , و تسمعي صوت العقل , اللي خطيبك بالفعل سمعه و اخد بعضه ومشي  . .

 

عارف انك ممكن تشوفي الدنيا سودا , ويختفي كل طموح و امل في الدنيا  ,بل و قد تتمني الموت , لكن اعرفي ان كل ديه اعراض مؤقتة , وتدريجيا هتنسيه – حتي لو بتحبيه اكيد – وان ربنا سبحانه و تعالي وقاكي من مصير مظلم كان منتظرك معاه لو اتجوزتيه . .

 

انك تتأخري في الجواز كام سنة و تتجوزي غيره  ,او حتي انك متتجوزيش خالص , احسن بمراحل من الزواج من رجل يعذبك , او يهينك  ,او يطلقك قدام , ومعاكي اطفال . .

 

افتحي قلبك للدنيا , ومتتعامليش ان الحياة توقفت , كملي حياتك عادي , ولما يتقدم شاب تاني محترم لازم تفكري فيه بجدية , و تتجنبي الرفض الأعمي . .

 

زي ما قلنا عشان مش معانا معلومات فمش قادرين  نحدد هو انهي فيهم  ,فانا باتكلم عن الاحتمالين . .

 

---------------------------------------------------------------------------

 

ماذا عن الاحتمال الاول , ان هو انسان محترم و مناسب بالفعل , بس فيه نوع من التعنت و الظلم تجاهه . .

 

هنا هنضطر ندخل في "ارض الالغام " المتعلقة بالتوازن بين تحقيق رغبة مهمة (الزواج من انسان محترم) , و طاعة مفيهاش نقاش (بر الوالدين) , وهنحاول نجيب مساحة مشتركة ليهم من غير ما نضحي بحاجة منهم . .

 

فممكن تعملي الخطوات ديه بالترتيب . .

 

• اقعدي مع بابا او ماما او الاتنين (كل واحد لوحده) و اعرفي منهم بالهداوة كدة و الكلام البسيط , ايه اسباب الرفض , وحاولي تعملي تقييم لكل سبب فيهم علي حدة , وتشوفي بالفعل هما عندهم حق ولا فيه تعنت . .

 

 

خدي بالك انتي بتقعدي معاهم عشان تفهمي ايه الموضوع , مش عشان تقنعيهم برأيك . .

 

• فيه حالة ان الشاب بالفعل مناسب , وان والديكي متعنتين  , تواصلي مع ابن خالتك وناقشيه ازاي ممكن يتم تغيير رأيهم فيه , ممكن يكون فيه سلوك معين لو هو عمل تغيير فيه او فكرة لو طرحها ان الموضوع يتحل

 

• حاولي تشوفي الناس اللي اتدخلت بين امك و خالتك بالمشاكل , لما اتدخلو عملو ايه , عشان انتي ممكن تصلحي الموضوع بذكاء , ولو الموضوع يتصلح ممكن يتم الموافقة علي الخطوبة

 

• حاولي تروحي لحد كبير في عيلة والدتك , بحيث يكون عارف كويس كلا من (امك , خالتك , ابن خالتك) , واحكيله الحوار كله , واسمعي منه , سواء رأيه في الموقف , او (لو هو شايف انه كويس) اسمعي منه اقتراحات لحل المشكلة

 

• اعملي جلسة أخيرة للاقناع لكلا من ابوكي و امك , كل واحد لوحده , واشرحيلهم ان ابن خالتك هيتغير بالفعل , و ان المشكلة اللي حصلت انتو فهمتوها غلط , وانه بالفعل شاب مناسب , ويارب حد فيهم قلبه يحن و يوافق

 

• في حالة فشل كل الخطوات ديه , فاياكي انك تعندي او تتعصبي , او تتخذي اي قرار مجنون , لانك هتكوني انتي الخسرانة الوحيدة في اي خطوة زي كدة

 

 

يارب يكون التحليل و الخطوات ديه فيها الحل , ابدئي نفذيها و ان شاء الله يكون لها اثر ايجابي