العنوان : المشاعر العمياء

القسم: #الاجتماعي

الرقم: 66

السؤال:

 

انا عندى مشكلة مش عارفة بصراحه ... دلوقت انا اتعرفت ع واحد عالفيس هو محترم وكل حاجه يعنى هو گلامنا كله كان كمنتات لحد ملقيت هو بيعترف ب حبه وكدة منكرش انى اتشديتله ..

 

بس لما اتعرفت عليه بقي فعلا قالى انه كان عنده مشاكل عائلية من زمان يعنى من وهو صغير وان هو دبلوم ما بس ع عكسي انا فكلية ما ودى عرفاها من بدري وقال انه الى حد ما مكنش كويس مع  قبلي يعنى اعترف بنفسه انه انا مش عارفة اقولها ولا لا بس هقولها وحضرتك تعدلها (وسخ) بس مش معايا يعني

 

عرفت انه من صغره فالسوق وبياع وبعد كدة ربنا كرمه وسافر برا .. المشكلة او ال فكر فيه ان قدامى كذا عينة كدة بين طرفين طرف متعلم وطرف مش معادله وحصل بينهم مشاكل وانفصلوا  .. او مش لاقيين ياكلوا.. او ممكن يكونوا كويسين بس الاهل مش هيرضوا وهو عارف ومراعى الموضوع ده ولما اتكلمنا وعرفت كل ده مقدرتش اقوله مش هنرتبط يعنى او امشي واسيبه مرة واحدة عشان مجرحش شعوره ف انا حضرتك عاوزة افهم العلاقة بعد كدة ممكن تنجح ولا هيبقي في مشاكل

 

 ووالله مابتكلمش ع انى كلية او او لا بتكلم ع مستوى تعليم العقل ومستوى خبرته وان ممكن اهلى ميرضوش بيه يارب تكون حضرتك فهمت وعاوزة اعرف هل لو فعلا هيبقي زى مافكر ابعد او اخرج من حياته ازاى مع العلم انه مفاتش ع قربنا من بعض انا وهو كتير

 

*-*-*-*-*-*-*-*-*-*-*-*-*-*-*-*-*-*-*-*-*-*

 

 الإجابة                    :

  

أهلا بيكي . .

 

كلامنا هيدور علي نقطتين , نقطة محسومة بالفعل , ونقطة محيرة بالنسبة لك

 

النقطة المحسومة هي استمرارية العلاقة معاه  , والنقطة المحيرة ازاي تنهي العلاقة من غير ما تجرحيه .

 

 

نبدأ بالنقطة الأولي . .

 

من الواضح انك متخذة القرار بالفعل , واحنا لازم نهنيكي علي القرار ده بالفعل , فيه اكتر من سبب يؤدي لصعوبة نجاح الارتباط بينكم   . .

 

المشكلة مش في فرق التعليم  ,او المستوي الاجتماعي , ولكن في الفجوة الكبيرة اللي في طريقة التفكير, و الاخلاقيات , والتعامل , والتمسك بالدين .

 

من كلامك انه علي قدر من التساهل في الأمور الدينية – ربنا يهدينا جميعا – و ان مفيش مساحة مشتركة بينكم في الشق الاخلاقي , او شكل التعامل مع الناس .

 

حتي الفارق الاجتماعي مش سهل , وهو قادر علي هدم البيت الزوجي لو كان في تكافؤ في باقي العناصر , فما بالك لم فيه اختلاف فيها كمان .

 

انتي غالبا حسيتي باعجاب في البداية ناحيته لانك نادرة الاختلاط  بالشباب – و ديه حاجة كويسة اصلا – و بالتالي أول من تجرء و مس شغف قلبك بكلام مباشر عن الحب , صنع عندك حالة من الاعجاب المقابل , لأنه أول من طرق باب مشاعرك الانثوية .

 

بس الحمد لله انك كنتي اكتر وعي و نضوج , من انك تنساقي ورا مشاعر عمياء , او افكار غير سليمة , وانك "فقتي" سريعا من العاطفة المؤقتة ديه , وانك عرفتي ان الارتباط الرسمي محكوم عليه بالفشل للفوارق الكبيرة بينك و بينه .

 

لو كانت الفوارق بسيطة و محتملة , كنا ممكن نفكر و"ناخد و ندي" في الكلام ونشوف مدي فرص نجاح الزواج , وايه اللي ممكن يتغير في الطرفين و هكذا .

 

لكن علي وصفك ففكرة الزواج بالفعل غير سليمة , والحمد لله انك وصلتي للقناعة ديه سريعا

 

 

 

والسؤال ده ينم عن برائتك و قلة خبرتك الحياتية . .

 

لان انتي بتقيسي مشاعره بمقاييسك انتي , وبنفس تصورك للحياة , وده قد يكون غير دقيق .

 

لان هو احتمال كبير مش هيتم جرحه ولا اي حاجة لو تم انهاء العلاقة , لان تناول الشاب للعلاقة بيختلف شوية عن تناول البنت .

 

الشاب بيفكر باسلوب عقلاني اكتر , وبيكون عارف ان فيه عقبات عديدة , وان احتمال الرفض وارد , خاصة انه كمان كبير في حالة علاقته بيكي .

 

بل ان احتمال اصلا انه لسة علي تواصل مع بنات تانيين حتي الان , ويكون الماسنجر بتاعه "مرشق" بنات من فئات و اعمار و مدن مختلفة , ولسة بيكمل تسليته اللي كان بيعملها .

 

ربنا يهدينا جميعا للصراط المستقيم و يتوب علينا , وندعي ربنا يكون هداه و يكون هو بطل التواصل الغير سليم مع البنات بالشكل ده .

 

بس حتي لو كان بطّل فعلا تواصل , فهو مش هيتعامل مع انهاء العلاقة , زي ما البنت بتتعامل , ولو هيكون فيه أثر سلبي , فهيكون لفترة قليلة , وينسي الموضوع تماما بعدها .

 

فانا شايف انك متشيليش هم النقطة ديه كتير , ومتقيسيش ردود افعال الناس علي نفس رد فعلك انتي لو كنتي في موقف مشابه  ,الحياة أكبر من كدة و اعقد .

 

بس خلينا برضه نتعامل باسلوب هادي و سليم ,  و نحاول نوصل لطريقة ننهي بيها الموضوع , من غير ما يكون فيها اهانة ليه  ,او ألم نفسي  .

 

و ده هيتم عن طريق 3 خطوات لازم تتم بشكل سريع , عشان نتجنب اي تعميق للتواصل اكتر من كدة  :

 

 

• اولا القرار الحازم منك , وان هو يشوف انه قرار حازم عشان يقفل الباب , يعني من غير طبطبة , بس من غير اهانة ليه او صلف منك

 

 

 

• السبب المقنع .

 

 

• لازم التواصل بينكم ينتهي بشكل كامل , يعني بعد ما تقولي كدة يبقي فيه بلوك تماما , عشان ميكونش فيه للشيطان مدخل في المستقبل , وعشان ميكونش هو عنده عشم او امل في شئ هو منتهي .

 

وحذاري تفكري باسلوب : خلاص خلينا اصحاب بس , ده اسمه كلام فاضي , اي فرصة للتواصل معاه مرة تانية معناه معاناة جديدة ليكي وليه .

 

و متفكريش في نقطة , هو هيقول ايه لما يشوف البلوك , يقول اللي يقوله , ومتقلقيش عليه هو هيعرف يتصرف في حياته .

 

ولو هو اتجنن و عمل اكونت جديد و بعتلك منه , ساعتها خليكي حادة معاه , واياكي تبقي متساهلة مع التصرف الغريب ده , و "هزقيه" بالكلام قبل ما تعملي بلوك تاني ليه .

 

 

ان شاء الله الخطوات التلاتة يكون ليها نتيجة ايجابية , و يتقفل الباب ده تماما

​