المشاعر السلبية
الرسالة السابقة
العنوان : المشاعر السلبية
القسم: #النفسي
الرقم: 80
السؤال:
انا منغلقه ع نفسى جدا من وقت طلاقى متكلمتش غير هنا ومبكتش ونزلت دورت ع شغل من رابع يوم وفعلا بهزر جدا عكس لما اتكلمت اول امبارح حاسه انى مش مهيئه لزواج ولا لارتباط انى منستش عكس منا فاكره
هل محتاجه اروح لدكتور نفسى أتخلص من لآثار السلبيه زى محضرتك وضحت وبعد كده ابدا افتح صفحه جديده
انا نفسيا : مسالمه جدا راضيه جدا بقدر ربنا قريبه من ربنا لدرجه اقدر أفهم الحكمه ف امورى بقدر اقدر ظروف اى حد خاصًا امى وعصبيتها الشديده
مزاجيا: عصبيه مبحبش الضغط ع لاعصاب
مبحبش النكد خالص
اجتماعيا: قريبه من كل العائله عكس أهلى حتى لو ف خصومه أحب انا أقرب من قرايبى انا أسأل عن أخواتي حتى لو متصالوش كنت منتقبه ليا صاحب مسيحين وجيرانى المسحين انا مصحباهم جدا عكس المحيطين بيا معرفش أقعد لوحدى مستحيل
مبحبش أحكى مع حد خالص حتى دلوقتي مخنوقه وانا بتكلم
لو حد كلمنى ارد مسألش مسألش عكس لأول
الطلاق ممكن موجعتنيش لانى اتانيت ف القرار واخدته وانا راضيه تماماً ولو هترجع لأيام هختار نفس القرار ومهما واجهت مشاكل مبندمش
بس الصدمة ف الناس هى إلا وجعتنى الصدمة فإن اكتر الناس انا كنت فكراهم قريبين من ربنا ببصلهم كلهم بانبهار لقيت العكس تماما
صدمتى ف كل الناس الخيانه - كلام الناس - الخجل من صحابى - حقى المادى إلا هو حسيت انه متعبش وانا اضحك عليا وانى جبانه مع أن كل الحق معايا
بحس اني عايزه انتقم وجعنى إحساس الضعف متفائله ومبسبش نفسى لوحدى
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
انتي حالتك النفسية بتسوء , ولابد من علاجها فورا والا هتعاني من انهيار عصبي مفاجئ , او الدخول في مساحة الإكتئاب المظلمة . .
انتي مريتي بتجربة مؤلمة , و عانيتي من مرارة الخيانة و الطلاق , وده الي صنع عندك عدد من المشاعر المركبة زي :
-
صدمة الخيانة
-
المعاناة من فقدان الطفل
-
آلام الطلاق
-
خسارة حقوقك
-
كلام الناس ما بين شفقة او شماتة
-
التعجب من الاختلاف الحاد بين باطن و ظاهر الناس اللي تعاملتي معاهم
و غيرها من المشاعر السلبية المتراكمة . .
و هنحاول نمسك عدد من أوجه المشكلة عندك , بشئ من التحليل و التفصيل .
------------------------------------------------------------------------------------
أولا مشكلة الضغط علي أعصابك . .
زي ما ذكرتي انك قبل الزواج كنتي انسانة مرحة جدا و الضحك مش بيفارقك , ولما انهيتي الطلاق رجعتي لنفس المود تاني , بس الفرق حاليا انك بتضحكي وانتي بتضغطي علي اعصابك .
وان كان الضحك و المرح شئ ايجابي , لكن اللي بتعمليه شئ خطير جدا , انك تضطري تضحكي و تهزري و تعملي شير لحاجات كوميدية و تتبادلي التعليقات المضحكة مع صديقاتك , وانتي من جوة بتتقطعي من الحزن .
ده بيعمل نوع من الضغط الغير محدود علي اعصابك , وبيجعلك تضطري للظهور بمظهر غير مشاعرك الحقيقية , واللي هيجعل مشاعرك بتتراكم بشكل كبير جواكي , وبعدها ممكن يحصل واحد من السيناريوهات المخيفة .
اما انهيار عصبي كامل , او تعامل حاد مع الجميع , او الدخول بشكل مكثف في مود الضحك بطريقة هيستيرية او الاستمرار في اختزان المشاعر السلبية جواكي للأبد .
و كل السيناريوهات مظلمة , وكلها بالفعل بتسرع بيكي للمرض النفسي العميق .
وان كان الضحك شئ مطلوب لكن "تصفية" و"تفريغ" المشاعر السلبية اللي جواكي شئ أكتر أهمية , كمان علاج المعاناة اللي انتي بتحسيها من جواكي شئ بالغ الأهمية , عشان ترجعي زي زمان , بتضحكي من جواكي و من قلبك , مش بتصطنعي مظهر معين في حين انتي من جواكي بتغلي .
حطي لنفسك هدف انك تعملي تفريغ كامل للشحنة السلبية اللي جواكي , عن طريق انك تفضفضي لواحدة صديقة قريبة منك , او انك تعيطي سواء قدامها او مع نفسك , او انك تتصالحي مع الوضع الحالي , او اي حل تاني مناسب .
عملية تفريغ المشاعر السلبية مش هتخلص بين يوم و ليلة ,بتحتاج اسابيع او شهور حسب كميتها و حسب مقدرتك علي التعامل معاها , بس ثقي انك هتستريحي جدا اول ما يتم تفريغ الشحنة السلبية بالكامل .
--------------------------------------------------------------------------------
من ضمن الأزمات اللي عملت تعميق للمعاناة عندك هي الإحساس بالمفارقة . .
يعني الفرق الرهيب بين باطن و ظاهر الناس , خاصة أطراف الأزمة و اللي كانو مشتركين بشكل أساسي في ظلمك و اضطهادك .
و بتظهر المعاناة في شقين بالتحديد . .
الشق الأول : لما تحسي ان هما منعمين و مستريحين , في حين انتي بتصطلي بنار الغضب و الحسرة .
وديه علاجها إنك من جواكي تفتكري احنا اساسا موجودين في الدنيا ليه ؟ هو احنا موجودين عشان نشعر بالنعيم او العذاب ؟ ولا موجودين في امتحان واضح , وبوقت محدد لكل واحد فينا , وفي لحظة من اللحظات هتتسحب ورقة كل واحد فينا , وينتقل لمكان تاني في انتظار الحساب التفصيلي علي كل شئ عمله , خير او شر . .
اول ما تزرعي المفهوم ده جواكي بشكل واضح , هتعرفي ان الناس ديه مساكين , مساكين بالفعل لما يضحو بنعيم الله في الآخرة عشان شهوات او رغبات في الدنيا , هتنتهي خلال شهور او سنين .
لو لسة من جواكي الشعور بالضيق انهم بينعمو , افتكري ابو جهل لما كان بيقوم بجلد الصحب الكرام , و قتل السيدة سمية , ولما قام بإلقاء "الجزور" علي رأس الرسول صلي الله عليه و سلم , افتكري "أمية بن خلف" لما كان بيسحب سيدنا بلال فوق الجمر المشتعل حتي ان رائحة شواء جلده كانت بتفوح . .
فين ابو جهل و امية دلوقتي ؟ فين سيدنا بلال و السيدة سمية ؟ دول فيه مكان و دول في مكان مختلف . .
اللي عايز يظلمك اهلا وسهلا , اللي عايز ياكل حقك يا مرحبا بيهم , اللي عايز يقول كلمة قذرة يقول , كل واحد ظلمك ولو بمقدار شكة دبوس هيتحاسب حساب عسير قدام رب العالمين , وقتها انتي هتتمني لو كانو رموكي بالطوب و الحجارة , وانهم كانو يظلموكي الف ضعف الظلم الحالي , عشان حسناتك تتضاعف يوم القيامة .
هما دلوقتي مستمتعين و فرحانين , خليهم يفرحو , وثقي ان كل واحد ظلمك هيقطع جلده من الندم في يوم تشخص فيه الأبصار . .
حطي المفهوم ده بالك , هتلاقي نفسك استريحتي جدا .
كمان الشق التاني مرتبط بيه بشكل ما , اللي هو لما تلاقي ظاهرهم غير باطنهم , ان هما قدام الناس و علي الفيسبوك ملايكة من السما , و من جواهم شياطين الجحيم .
هو اللي يهمنا احنا كملتزمين , نظرة الناس ولا نظرة رب العالمين لينا ؟ ؟ اللي عايز يمثل علي الناس يمثل , انتي اصلا غلطانة انك بتضيعي وقتك و مجهودك في متابعة ناس ما تستاهلش دقيقة واحدة من وقتك . .
اعملي بلوك فورا ليهم علي الفيس , و اقطعي اي حبل للتواصل معاهم , وانسي اي حاجة عنهم , و ثقي ان حقك هييجي في الدنيا و في الاخرة , ده وعد الله لكل مظلوم .
وحتي حقك المادي اللي راح , سواء فلوس او قايمة او دهب او مؤخر , ثقي انك هتيجي يوم القيامة هتكوني شديدة السعادة انك مخدتيش منها مليم واحد , بل انك كنتي هتتمني بالفعل لو كان طليقك ظلمك اكتر من كدة , لما تشوفي المقابل الرباني اللي هيكون ليكي يوم القيامة , من ظلمه ليكي .
كل قرش راح منك , ثقي ان ربنا هيعوضك بيه في الدنيا و في الآخرة , في الدنيا ممكن يكون فلوس او يكون صحة , يكون اسرة حواليكي , يكون اولاد يرعوكي لما تكبري , في زوج حنين يحبك , في سعادة و راحة بال .
و في الآخرة الثواب العظيم اللي نرجوه من المولي تبارك و تعالي .
-------------------------------------------------------------------------------------------
من ضمن الحاجات اللي بتعمق عندك الأزمة : الإحساس بالنقص , والإحساس بالعار . .
و أي إحساس بالنقص او العار , سببه ان المعايير اللي عندك مش مضبوطة للأسف .
الشخص يشعر بالنقص او العار في حالة هو نفسه عمل جريمة , او وقع في مشكلة هو متسبب فيها .
لكن إنك تحسي بالشعور السلبي ده , نتيجة شئ انتي مظلومة فيه , وانتي الضحية منه , فده بسبب انك مهتمة بكلام و نظرة الناس , مش نظرة المولي تبارك و تعالي .
تقييمك الوحيد لنفسك هو : اللي باعمله ده شئ يرضي ربنا ولا لا , هل انا عملت ذنب في الشئ ده ولا لا , مش يا تري الناس هتقول ايه . .
عارفة مصطلح "تتحرق الناس" , علي الرغم ان اللفظ غير مناسب بس لازم تحطيه في بالك , وانتي مالك و الناس هتتقول ايه , اللي مش عاجبه اللي انتي فيه يتفلق نصين . .
ليكي حق تتضايقي لما يكون فيه شئ انتي غلطانة فيه , لكن انك تتضايقي من كلام الناس , يخبطو راسهم في اتخن حيط . .
لو سيدنا نوح كان اهتم بكلام الناس مكانش بني السفينة , لو سيدنا ابراهيم كان اهتم بكلام الناس مكانش كسر الاصنام , لو الرسول صلي الله عليه و سلم كان اهتم بكلام الناس مكانش دعي للتوحيد . .
انتي صح و الناس غلط , واللي مش عاجبه اللي حصل يتفلق , و اياكي تشيلي هم كلام الناس تاني .
ان كان اصحاب الفكر الهدام , زي الملحدين و اللي بيدعو لخلع الحجاب و المساواة في الميراث و غيره , ان كان هما مش هاممهم كلام الناس , وبيقولو اللي عايزينه و مصرين عليه ,هنيجي احنا اصحاب الحق و نتكسف من الناس ؟ ؟
خليكي اكثر حزم و صرامة , بل و حدة مع اي حد يفتح بقه معاكي , اي حد يقول كلمة في وشك ردي الكلمة بكلمتين و اقطعي لسانه فورا , الناس متعودة انها تتطاول علي الطيب و المسامح , بس اللي بيطول لسانه عليهم بيتلمو ساعتها و يسكتو .
اياكي تضايقي نفسك تاني باي كلام عبيط يتقال , او انك اصلا تفكري في ده . اصلا متهتميش بيه و ركزي بس في حياتك و مستقبلك .
دايما حطي في بالك ان المولي تبارك و تعالي خاطب الرسول صلي الله عليه و سلم في سورة الأنعام (وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ ۚ)
حطي في بالك دايما ان اغلب الناس كلامهم مش سليم .
-------------------------------------------------------------------------------------------
أخيرا . .
متنسيش ابدا الآتين 16 و 17 من سورة الأعلي : (بَلْ تُؤْثِرُونَ الْحَيَاةَ الدُّنْيَا وَالْآخِرَةُ خَيْرٌ وَأَبْقَىٰ) . .
كل ما تحسي بالضيق او الغضب او الندم او الحزن , افتكري ان ربنا حذرنا من اننا نحب الحياة الدنيا , و ربنا بيقولك , ان الآخرة خير منها و هي لا تقارن بها من الأساس , وكمان أبقي يعني باقية للأبد , بينما الدنيا كلها سنين و هنمشي منها .
متخليش المشاعر السلبية تلتهمك مرة تانية , انسي كل اللي حصل , وثقي ان ربنا هيعوضك خير الجزاء .