العنوان : التدخل السافر

القسم: #الاجتماعي

الرقم: 79

السؤال:

 

أنا عندي مشكلة أنا متجوزه من تلت سنين حماتى وعيالها قرفونى فى عشتى مش عوزانى أبقى أحسن من عيالها وجوزى ديما بيسمع كلامها بيخاف منهم ومن زعلهم

 

لما بطلب منه إى طلب يقولى قولى لامى

 

هو كويس وطيب بس مسيطرين عليه هو مسافر ولما بيبعتلى حاجه بياخدوها بجد طهقانة من عشتى مش ادره أكل ولا أشرب فى شقتى وهوه أهم حاجه أمه

 

بجد شوفولى حل نفسي أعيش أنا وجوزى مبسوطين نفسي يسمع كلامي ويحترمني ويعملى حساب زى ما بيعمل لأمه وأخواته

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله . .

 

طيب المشكلة اللي بتعاني منها هي في مرحلة متوسطة , لا هي صغيرة فنقولك هي سهلة مفيهاش مشاكل , ولا هي كبيرة فنقولك ملهاش حل الا الطلاق و العياذ بالله . .

 

المشكلة موجودة , وانتي الضحية , و الجاني يتمثل في اتنين : حماتك بقسوتها , وزوجك بسلبيته . .

 

اتكلمنا اكتر من مرة علي علاقة الكنة بالحماة , علي أهمية إن الزوج يكون عادل الي حد كبير , عشان ميسمحش لزوجته انها تؤذي امه , زي ما بيحصل في اغلب الحالات , ولا يسمح لأمه انها تؤذي زوجته , زي ما بيحصل في عدد من الحالات .

 

صحيح إن كفة الزوج ممكن بل ولازم تميل شوية ناحية أمه , بإعتبار ان بره لأمه هو فريضة و ضرورة , لكن مش لدرجة انه يسيب أمه تظلم مراته بالشكل المستمر ده .

 

ولأن الظروف الاقتصادية المدمرة في البلد كلها , اجبرت الملايين من ارباب الاسر إنهم يسيبو زوجاتهم و اولادهم و يسافرو بعيد عنهم عشان لقمة العيش , فمش هنقدر نقولك اضغطي عليه عشان يسيب شغله و يرجع , ولا تطلبي منه شقة منفصلة , لان واضح ان ده مش متاح وده مش متاح  .

 

فهنقولك علي عدد من الحلول اللي ممكن تحل المشكلة بشكل جزئي , او علي الاقل تخفف من تأثيرها ولو بمقدار ما , ونتمني ان الخطوات ديه يكون ليها تاثير ايجابي .

 

• أولا اقرأي رسالتي  : أمي و مراتي , وأزمة التحكم , لانها بتتكلم بالتفصيل عن علاقة الحماة مع الكنة , واللي هتلاقي في كل رسالة فيهم شئ هيفيدك

​

 

• حاولي "تكبري دماغك" عن الهدايا اللي بتروح منك , انا عارف انه شئ مهين , وان العبرة مش بالمحتوي لكن بالتعامل الغير مناسب , بس انتي لو بالفعل نسيتيها شوية , و استغنيتي عنها من جواكي , هتلاقي ان جزء كبير من المشاكل اتحل . .

 

• حاولي تحسني علاقتك بيها , انا عارف ان هي اللي بتبدأ الظلم , بس انتي لما تعامليها بشكل كويس جدا , بطريقة مبالغ فيها , هتلاقيها من جواها استغربت انتي ازاي بتعامليها كويس قوي كدة , في حين هي بتتجني عليكي , واحتمال كبير تلاقيها اتغيرت تماما ناحيتك

 

 

• بقدر الامكان متضغطيش علي جوزك عشان يبعت فلوس , لو انتي شايفة ان مرتبه مش كبير , وانتي حاولي تتصرفي بالمتاح حاليا لغاية لما ربنا يفرجها

 

 

• لو حصل موقف فيه ظلم كبير من حماتك ليكي , متكلميهاش وحش , لكن لما تكلمي جوزك اشرحيله اللي حصل بهدوء , وعرفيه انك مردتيش الغلط بغلط, وقوليله يتصرف , لو هو بيحبك فهو هيعاتب امه حتي لو بشكل بسيط عشان المشكلة متتكررش

 

 

• افتكري حماتك في اي هدية ولو صغيرة , مثلا في عيد الام ولا في دخلة رمضان , حتي لو تعملي صينية كيكة ولا بسبوسة , الحاجات ديه علي بساطتها بس بتعمل تاثير ايجابي جدا , وجوزك نفسه هيعرف انك بتعاملي امه معاملة ايجابية , وهيحبك اكتر

 

 

الخطوات ديه حتي لو محلتش المشكلة , فهي هتقلل من تاثيرها بشكل كبير , جربيها و احنا معاكي في اي استفسار

​