العنوان : الضرب بجنون

القسم: #الاجتماعي

الرقم: 03

السؤال:

 

السلام عليكم ورحمة الله وبركاته

مشكلتي اني عصبية جدا وبخرج كل غضبي علي ابني  وبضربه  بالرغم من انه طفل اربع سنين

بس برجع اندم  وبحس اني كنت فاقدة للوعي  اللي هو ازاي انا عملت كدا 

انا مش عارفه ابطل  ده ودا تاعبني نفسيآ جدا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 وعليكم السلام و رحمة الله

 

ببساطة انتي بتعملي جريمة متكاملة الأركان , في حق نفسك , وفي حق ابنك , وفي حق اخواته  , وفي حق زوجة ابنك اللي هيتجوزها في المستقبل , وفي حق ابناء ابنك اللي هيرزق بيهم قدام ان شاء الله . .

 

انتي بتصنعي وحش , هيبدأ بافتراسك انتي بعدها بافتراس اللي حواليه , ومش هيرحم حد . .

 

تعالي نمسك نقطة نقطة . .

 

نبدأ بالعصبية اللي عندك . .

 

و غالبا ما بتكون اهم سبب من اسباب خراب البيوت , سواء عصبية الست اللي بتعمل مشاكل مع زوجها و اولادها , او عصبية الراجل اللي بيطيح في الجميع  ,او عصبيتهم هما الاتنين اللي بتعصف بالبيت كله  . .

 

و طبيعي ان العصبية مرض معدي , طبعا هو مش مرض "فسيولوجي" يعني مش فيروس بيتنقل زي الحصبة , لكن المقصود بعدوي العصبية ان الطفل لابد هيتعامل في الحياة بنفس الطريقة اللي انتو بتتعاملو بيها . .

 

فلما طفل يلاقي ابوه او امه بيفكر بشكل هادي , ولما بيحصل مشكلة او خلاف او حتي خناقة , بيتم تفكير هادي و بسيط , ويتم التعامل بشكل سلس , الطفل هيفهم ان "هكذا تؤكل الكتف" , وهيتعلم الاسلوب ده . .

 

لكن لما يلاقي ان ابوه بيزعق لما الطفل يكسر حاجة , وامه بتصرخ لما هو يعمل مشكلة , و حد فيهم يديله شلوط لما يعلي صوته  ,فطبيعي انه يبهدل اخوه الصغير لما يتضايق منه  ,او يطيح في اصحابه في المدرسة , ويبقي مشروع بلطجي صغير  . .

 

عصبيتك يا فندم قد تكون السبب في خراب البيت – و العياذ بالله – خاصة  لو زوجك هو كمان عصبي . .

 

ولو مهدتش البيت – ربنا يحفظكم يا رب – فهي هتصنع اطفال عصبيين هيتعاملو مع الحياة كلها بنفس الاسلوب اللي شربه منك انتي , و ده هو اسرع طريق للإصابة بامراض السكر و القلب و الضغط و القلب , ربنا يحفظنا جميعا . .

 

---------------------------------------------------------------------------

 

انا ليا جارة , عمرها 69 سنة , تشوفيها متديلهاش 50 سنة , من نظرة الشباب اللي في وشها  . .

 

حكيلتي انها لما راحت "دريم بارك" فراحت تركب المرجيحة اللي بتقلب الناس و خطر جدا , جري عليها فورا واحد من الموظفين في دريم بارك  ,قالها ممنوع ليكي يا مدام , قالتله ليه ؟ قالها ممنوع لاي حد عنده (السكر أو القلب أو الضغط أو القلب) قالتله معنديش اي حاجة منهم , وفعلا ركبت المرجيحة  . .

 

بالرغم من انها تخينة شوية , و مش بتعمل رياضة , ولا بتركب عجل زي الاجانب  , ولا هي مهتمة بنفسها زي صوفيا لورين , هي ست بيت عادية جدا , عندها احفاد كتير   . .

 

لما سألتها ايه السبب  , قالتلي عشان الضحكة مش بتفارق بقي ابدا , وعمري ما بشيل هم اي حاجة , ولما يحصل مشكلة بعالجها بهدوء . .

 

بس كدة . .

 

بينما العصبيين , تلاقي اللي عنده 30 , شكله زي الـ 50 , وشايل عبد القادر فوق دماغه . .

 

عصبيتك هي بداية افساد حياة اطفالك للابد , وفيه اساليب نفسية و من علوم التنمية البشري بتعالج العصبية بالكامل . .

 

فارجوكي متستنيش عليها , وتعاملي معاها زي ما ببتتعاملي مع مصيبة كبيرة او مرض كبير , انك لازم تتعالجي منه بالفعل  . .

 

---------------------------------------------------------------------------

 

نوصل للضرب . .

 

كل دول اوروبا , بالإضافة  لامريكا و كندا , بتجرم ضرب الأطفال تماما , بعض الدول (زي كندا) بتعمل استثناءات قليلة جدا . .

 

و التجريم ده مش بيهزرو فيه , اكتر من أب و أم تم تهديدهم بالسجن او بسحب الطفل منهم لو حصل اي نوع من الضرب لأي سبب كان , حتي لو في ايد الطفل سيجارة حشيش  . .

 

لا شك هما مزودينها شوية , واحيانا بيكون الضرب مفيد و ضروري , لكن لازم نراعي الكم و الكيف والوقت , وأهمهم عامل الوقت . .

 

بيتقال ان مدرب الحيوانات المفترسة في السيرك , عمره ما بيضرب الاسد او النمر بالكرباج ابدا , يهوش بيه ايوة ,

يلسع بيه الهوا ممكن , يضرب بيه الارض جنب الاسد وارد , لكن يضرب الأسد بيه , مش بيحصل (ده اللي قريته مش عارف ممكن يكون بيحصل احيانا) . .

 

طب ليه ؟ ؟

 

لأن  المدرب مش عايز يخلي الحيوانات المفترسة ديه "تتعود" علي الضرب , لكن عايزها تخاف منه . .

 

ايه الفرق ؟ ؟

 

الفرق ان لو الحيوان خايف من الكرباج جدا , هيسمع كلام المدرب  ,لان بالنسبة له الكرباج ده اداة قتل , او ألمها رهيب , شوفه صوته عامل ازاي . .

 

كمان المدرب الذكي اللي يجمع بين حب الحيوان ليه , مع رهبته منه , مش بس التخويف بالضرب . .

 

لكن لو المدرب ضرب الأسد كذا مرة , هو كدة بيعمل مصيبتين مع بعض . .

 

الأولي انه بيقتل الحب في قلب الأسد ليه , ومتنسيش ان الحيوانات ديه بتحب زي البشر , وأحيانا أكتر , واسئلي في ده اي حد مربي كلب . .

 

المصيبة التانية انه خلي الاسد "يتعود" علي الضرب , فالاسد عرف ان الكرباج مش بيقتل ولا حاجة , لكن اهي لسعة وخلاص  . .

 

و بالتالي بسبب ان المدرب فقد "الرهبة" اللي كانت في قلب الاسد , ومبقاش لا فيه حب تجاهه , ولا خوف من غضبه , فالخطوة المنطقية ان المدرب هيكون وجبة العشاء للأسد . .

 

نفس القياس علي طفلك , خاصة لو كان من سن 4 لـ 15 سنة . .

 

اعتمادك علي ضرب الأطفال هتجعله بعد فترة متعود عليه , يعني بالمصري "جتته نحست" , وهتفاجئي انه مبقاش يهمه , بل و هيدخل في مرحلة "اعلي ما في خيلك اركبيه" ,ولما يكبر شوية هيعلي صوته عليكي , وبعدها يدخل في مرحلة يرد عليكي الضرب بضرب  . .

 

ارجوكي وقتها متبكيش حظك السئ في الدنيا , متقوليش انا ليه بيحصلي كل ده يا ربي , ببساطة لان اجابة السؤال انتي عارفاها   . .

 

انا اسف ان كلامي قاسي , بس لازم يكون واضح عندك مدي المشكلة اللي الولد فيها بسببك , عارف انك بتحبيه , لكن ده مش مبرر لتدمير صحته النفسية . .

 

---------------------------------------------------------------------------

 

طيب تعالي نتكلم سريعا عن اضرار الضرب للطفل ؟ ؟

 

• بيعلم الطفل اسلوب التعامل مع باقي افراد المجتمع , اقارب او ناس عادية , وهو ان الضرب وسيلة صالحة للتواصل  , ولتنفيذ ما يرغب , وده هيكون قاموسه في الحياة . .

 

• والمصيبة بتزداد في النقطة اللي فاتت ديه لو انه بقي عنده قوة جسدية وعضلات لما يكبر ,او لو عنده قلب شجاع و جامد , فهو بالفعل هيكون مفتري من غير نقاش , مش هيرحم حد , لانه "رضع" المبدأ ده من أمه

 

• لو الطفل لقي نفسه ضعيف او جبان , هيتكون عنده عقدة نفسية من اضطهاد الاطفال ليه , و من الضرب اللي اصيب بيه من صغره  معرفش يرد عليهم . .  

 

• تكوين بداية عقدة نفسية , من الحيرة الي هتصيبه ازاي ماما اللي بتحبني , ازاي بتعذبني كدة , خاصة  ان ابن الـ 4 سنين , معندوش وعي كامل لتمييز الصح من الغلط , فهو مش فاهم هو ايه المشكلة لما ادخل مسمار في فيشة الكهربا , ليه ماما بتعذبني كدة ؟ ؟

 

• قسوة القلب اللي هتنتج من تعرضه المستمر للضرب ,  اللي هتنعكس في كل تعاملاته مع البشر و الحيوان , ومع نفسه كمان . .

 

• هيتعامل مع زوجته و أولاده بنفس الطريقة اكيد , مهي دي لغة التعامل اللي اتعلمها من صغره  ,فلازم يطبقها غصب عنه في الي مسؤول عنهم , ووقتها نقول اهلا بيه في نادي "الأسر المنهارة"  لما يضرب زوجته واولاده . .

 

 

لازم الام الذكي – و الأب كمان – يمزح بين حب الطفل ليه , وبين خوفه منه , الام اللي مش عارفه توازن بينهم متخلفش اصلا , حرام عليها تجيب طفل علي الكوكب , و تصنع منه وحش آدمي عن طريق اساليب غير صحيحة في التربية , وبعدها بنندهش هما القتلة و المغتصبين جم منين ؟ ؟ جم من بيوتنا لاننا صنعناهم بايدينا  . .

 

الطفل في عمر 4 سنين بيكون شديد التعلق بأمه , وبيعتبرها هي كل الدنيا , فلما يفاجئ انها بتأذيه – وهو الوعي عنده مش كافي انه يفهم السبب – فهو بتجيله صدمة و اندهاش ملوش حدود , هي ليه بتعمل كدة . .

 

و لما يتكرر , هيوصل عنده قناعة ان ديه هي طريقة التعامل الصحيحة في الدنيا  , فهيتعامل مع اقرانه , ومعاكي كمان لما يكبر بنفس الطريقة . .

 

ضرب الطفل ممنوع الا في اضيق الحدود ,  يعني مرة في الاسبوع مثلا , ويكون ضرب غير مبرح , وميعورش , وميأذيش , وميهينش , ومش قدام الناس , ومش علي الوش  . .

 

و اي تجاوز في القواعد ديه اسمه اجرام . .

 

---------------------------------------------------------------------------

 

انتي قلتها بعدها كلمة خطيرة , يشيب لها الشعر  . .

 

قلتي "كنت بحس اني فاقدة الوعي " , واخشي انك مش حاسة بخطورتها الحقيقية . .

 

مشكلتها انك لما بتضربيه مش بتستخدمي عقلك الواعي , لكن عقلك الباطن . .

 

هو ايه الفرق ؟ ؟

 

الفرق انك مثلا لما بتكوني راجعة من الشغل للبيت , والطريق محتاج نص ساعة , فانتي ممكن اصلا تمشي في الشارع , وتركبي الاتوبيس وتنزلي المحطة , وتمشي في الشوارع و تدخلي العمارة و باب البيت , كل ده وانتي معاكي تليفون و مركزتيش خالص في الطريق . .

 

ليه ؟  ؟

 

لان انتي بالفعل حفظتي الطريق من كتر ما رحتي و جيتي , فمش محتاجة تستعملي عقلك الواعي خالص , لكن انتي اتصرفتي و نزلتي في المحطة و مشيتي في الشوارع اللي حافظاها , من غير ما تفكري , من كتر ما انتي عارفة الطريق  . .

 

يعني كل ده كان بقيادة عقلك الباطن , مش عقلك الواعي . .

 

لكن لو رايحة مكان جديد , بتركزي و تسألي  وتشوفي كل شارع  . .

 

ايه علاقة ده بكلامنا ؟ ؟

 

علاقته ان احساسك بفقدان الوعي وانتي بتضربيه , خلاني اترعب , انك بتضربيه في الوقت اللي عقلك الواعي – اللي بيفرمل اي خطوة مجنونة ممكن تعمليها – مش موجود , يعني ببساطة لو ابنك عمل حاجة رهيبة , فانتي ممكن تقتليه حرفيا , او تضربيه بشكل غير معقول و تصيبيه بعاهة مستديمة . .

 

انا باتكلم عن حاجة قابلة للتنفيذ , مش مجرد كلام فاضي تقولي عليه "بعد الشر" , انا باتكلم  عن مأساة ممكن تحصل علي ايديكي , ويارب ما تحصل ابدا . .

 

من حوالي 15 سنة , قريت في الاهرام ان راجل عنده 80 سنة , متهم بقضية قتل , قتل مين ؟ ؟ قتل ابنه اللي كان يمكن 40 سنة . .

 

ليه قتله ؟ ؟ لان الابن كان لسانه طويل و متعود يزعق في ابوه , و مرة  وهما في الغيط (الحقل) الابن زعق في ابوه قدام الناس , فالاب فجأة مسك الفاس و ضرب بيه ابنه , كرد فعل تلقائي من غير ما يفكر  . .

 

الاب فجأة لقي ابنه مرمي علي الارض و دماغه مفتوحة , هو نفسه اللي صرخ عشان يجيبو اسعاف ولا دكتور , لكن الشاب كان مات خلاص . .

 

لما وقف قدام القاضي الاب كان منهار بالعياط بشكل هيستيري , وبيقول للقاضي احكم عليا بالاعدام , عشان انا مش مصدق اني قتلت ابني بايدي , ارجوك  متسيبنيش اعيش يوم واحد . .

 

الأب المسكين كان عنده حالة شبيهة باللي بتقولي عليه , رد الفعل التلقائي , القائم علي العقل الباطن , ومع عدم وجود العقل الواعي – اللي بيفرملنا من اي عمل مجنون – و قد تفاجئي ان حصل مصيبة وانتي مش واخدة بالك , ربنا ما يجيب اليوم ده ابدا . .

 

---------------------------------------------------------------------------

 

طب الحل ايه ؟ ؟

 

انا باتعمد اخلي 80 % من كلامي , فيه تخويف و ذعر من المشكلة , عشان بس تكوني حاسة بالمقدار الحقيقي للمشكلة , ومتتعامليش معاها علي إنها حاجة عادية . .

 

 

الحل في كذا حاجة بالتوازي  :

 

 

• اولا لازم تعالجي عصبيتك , هي بالفعل مفتاح اي مشكلة ممكن تحصل,  لازم تتعودي ان لما تحصل مشكلة تهدي نفسك خالص , وتاخدي نفس عميق , وتفكري بالراحة . .

 

• كنا اتكلمنا في علاج العصبية في رسالة كابوس العصبية , و فيه متخصصين لو دورتي عليهم هتلاقيهم , في كتب كتير  بالعربي و الانجليزي , فيه فيديوهات بتشرح , فيه ادوية بتهدي الاعصاب (لا ينصح بيها الا للضرورة)  , فيه وسائل اجتماعية و سيكولوجية لعلاجها , انتي لازم تبحثي عن حلها بنفسك ومتسكتيش عليها . .

​

 

• لازم تتعلمي فن مزج الترغيب و الترهيب مع بعض , امتي تشجعيه و تبوسيه و تشكريه علي الحاجة الجميلة اللي عملها , وامتي تتضايقي منه و تعاقبيه لما يغلط , التوازن مش سهل و محتاج فنان . .

 

• العقاب مش معناها الضرب  , فيه طرق كتير و محتاجة انك تتعلميها من مدرب متخصص , او ام ذكية عندها خبرة  , منها مثلا :

 

• الحرمان من حاجة بيحبها  , يكون حرمان مؤقت

• متكلميهوش لمدة معينة

• مفيش خروج او مفيش تابلت اليوم

• مفيش اكله معينة بيحبها

• الزعيق فيه , لكن بكمية محدودة , عشان ميتعلمش العصبية

• الضرب المعقول , وده بعد ما يكون هو عرف انه غلط في كذا

• تتجاهليه تماما لفترة معينة

• تتكلمي معاه بالعقل و المنطق و الإقناع (ده يفضل للي أكبر شوية)

 

 

التعامل  مع الوسائل ديه  ,ممكن ييجي بالتوازي او التوالي , ومحتاجة فن عشان تعرفي ايه مناسب لانهي موقف , لان اساءة استخدام اي وسيلة منهم , هيضاعف من المشكلة

 

  

أخيرا . .

 

لما تعاقبيه (باحد الطرق المعقولة ) اوعي تندمي قدامه ابدا علي عقابه , او تعتذريله , لازم يكون عارف انه غلطان , وانك صح , وان هو مذنب , اوعي تعتذريله ابدا . .

 

الاستثناء الوحيد  , انك تعاقبيه علي حاجة , بعدها تكتشفي انك مخدتيش بالك من التفاصيل , وان هو مش غلطان لكن انتي ظلمتيه وانتي مش واخدة بالك , ساعتها اعتذري له عادي , وديه حاجة ايجابية