عاوزة اعرف ازاى قارة افريقيا مليانة ثروات وفى نفس الوقت مليانة مجاعات وفقر بالشكل دا

وانعدام الخدمات الصحية والتعليمية وانتشار الأوبئة والجماعات المتطرفة على الرغم من وجود مصادر طبيعية اكتر من الدول الغربية

وسمعت معلومة لا اعلم مدى صحتها بأن فى أنواع من الأحجار الكريمة لا توجد غير فى افريقيا فازاى يكون دة حالها

​

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

الاجابة سهلة و مختصرة : لأن بقاء الشعوب الافريقية جائعة , وعارية , ومريضة , وفي حالة صراع دائم , هيجعل كل ثرواتها تكون في ايدي الدول القوية في العالم (اوروبا . امريكا , الصين , روسيا ) بشكل اسهل . .

بينما صحوة الشعوب الافريقية , واهتمامها بنفسها , ويقظة الوعي السياسي و الاجتماعي عندها , هيصنع حكومات قوية , هتحاسب الدول الكبري علي كل صغيرة و كبيرة ,و مش هتبيع اي جزء من الثروة الا بحقه .وتمنه الحقيقي . .

 

ديه الاجابة اللي علي الرغم من اختصارها الا انها شاملة لكل الحقائق المؤلمة . .

 

---------------------------------------------------------------------------

 

تعالي نتكلم في البداية علي ثروات القارة السوداء .

أفريقيا فيها احتياطي فوق الـ 225 مليار برميل من البترول , وده معناه ان لو كل دول العالم خلص فيها البترول و اعتمدت بس علي بترول افريقيا , فده هيجعلها تستهلك فيه فوق الـ 8 سنين بشكل متواصل .

 

الا ان احتياطي الغاز يمثل 500 الف مليار متر مكعب , وده اللي يكفي العالم لمدة 9 سنين متواصلة , لو بس اعتمدو علي الناتج الافريقي .

ده غير ان فيها 35 % من احتياطي اليورانيوم العالمي . .

ده غير اكتر من 52 % من احتياطي الذهب علي مستوي العالم . .

و 40 % من احيتاطي الالماس . .

و 90 % من احتياطي البلاتين . .

و 95 % من الكروم . .

و 65 % من المنجنيز . .

 

ده غير الكميات الغير محدودة من الثروات الطبيعية , مياه عذبة , اراضي خصبة , غابات مطيرة , ثروات حيوانية هائلة . .

كمان التنوع الجغرافي و الجيولوجي في القارة السمراء , وهو اللي قادر انه يصنع اقتصاد يناطح باقي دول العالم . .

و لكن المشكلة مش في الموارد , ولكن الوضع السياسي القاتم , اللي بيتحكم في كل شئ . .

و كانت بداية الأزمة , في الاستعمار . .

 

----------------------------------------------------------------------------

 

في بدايات القرن العشرين , وبالتحديد سنة 1913 , كانت كل دول افريقيا مستعمرة , الأربعة و خمسين دولة في افريقيا بالكامل , باستثناء اثيوبيا في الشرق و ليبيريا في الغرب . .

 

وكان النصيب الأكبر لفرنسا واللي التهمت غرب افريقيا بالكامل (زي تونس و المغرب ومالي و النيجر) , ثم بريطانيا واللي سيطرت علي الشمال الشرقي و دول الجنوب (زي مصر و السودان وكينيا و بتسوانا و جنوب افريقيا ) , والباقي متوزع بين البرتغال(انجولا , موزمبيق) و ايطاليا (ليبيا , الصومال) و اسبانيا (الصحراء الغربي , غينيا الاستوائية) و المانيا (الكاميرون , تنزانيا) و بلجيكا (الكونغو).

 

اذن دول اوروبا الاستعمارية سكاكينها كترت , اول ما شافت القارة السمراء مفتوحة الابواب, وتسابقو باساطيلهم و مدافعهم لاستعمارها الفوري .

 

و وقتها كان فيه 3 اهداف اساسية لاي مستعمر .

الحاجة الاولي الثروات المعدنية المهولة (وقتها البترول مكانش تم التوسع في اكتشافه) , التانية الابعاد الاستراتيجية للتحكم في شرق العالم , التالتة الطاقة البشرية المجانية , والمتمثلة في ملايين "العبيد السود" , واللي مش بيكلفو الدولة المستعمرة اكتر من لقمة و بق مياه لكل واحد .

 

و بدأت حركات التحرر التدريجي للبلاد الافريقية , ومع ان اول دولة تتحرر بشكل فعلي كانت جنوب افريقيا اللي تحررت من الاحتلال البريطاني سنة 1910 , الا ان اغلب دول افريقيا بدأت تتحرر من الخمسينات .

وتوالت حركات التحرير , لغاية لما تحررت آخر دولة وهي جيبوتي من الاستعمار الفرنسي سنة 1977

 

والحقيقة ان كلمة "تحررت" لازم نقف عندها شوية . .

فيه دول بيتم احتلالها , ولما بتتحرر , بتستعيد الحرية والاستقلال بشكل كامل , وبيكون للشعب كامل الارادة في ادارة بلادهم , من غير اي تدخل للمستعمر القديم عليه .

 

متنساش ان امريكا نفسها كانت متجزئة بين بريطانيا و فرنسا و اسبانيا , ولما استعادت حريتها علي ايد جورج واشنطن , وتم تأسيس الولايات المتحدة , الشعب هو اللي مسك السلطة بالكامل , بعيد عن اي تأثير من التاج البريطاني .

كذلك لما نص دول اوروبا استعادت حريتها بعد دحر هتلر في الحرب العالمية التانية , بالتأكيد كلها نالت استقلال كامل .

 

بل و حتي الدول النامية , يعني الهند و باكستان تم احتلالهم من بريطانيا لمدة 190 سنة كاملة (1757 - 1947) , وهولندا احتلت اندونيسيا 340 سنة , ولما تم الاستقلال للاتنين بعد الحرب العالمية التانية , كل دولة فيهم تم ادارتها من شعبها بشكل كامل , و حتي التأثيرات اللي ظلت للمستعمر في الحكم , اختفت مع مرور السنين .

 

------------------------------------------------------------------------------

 

لكن وضع افريقيا مختلف . .

لما بدأ المستعمرين يعطو الاستقلال للبلاد الافريقية , كان عليهم انهم يتأكدو انها مش هتخرج عن سيطرتهم , وان الثروات الهائلة اللي في بطنها , لابد وان تذهب في النهائية للعواصم الاوروبية . .

و بدأت سلسلة من اختيار حكام "مناسبين" لإدارة البلاد , لما الاسياد الاوروبيين يرحلوا .

 

وكان الهدف واضح للحكام , انت ليك الحكم , واحنا لينا اللي في باطن الارض . .

و عشان تتحقق مصالحنا احنا الاتنين (المستعمر السابق و الحاكم الموجود) , فبالتأكيد مش هيكون فيه اي نوع من الديمقراطية او تداول السلطة او الرقابة الشعبية علي البلاد .

لان اي مسمي حقيقي لتداول السلطة , و وجود رقابة جادة من برلمان منتخب , هيأتي برقبة الاتنين مع بعض : مصلحة المستعمر , و بقاء الحاكم الديكتاتور .

 

وكان ببساطة أهم اسلحة الثنائي الشيطاني (المستعمر - الحاكم) هي : الجهل , الفقر , المرض , الفتنة . .

يعني الاربع اركان المهمة , اللي هتهد كيان اي دولة مهما كان قوية , فما بالك بدول هشة من الاساس .

وبالتالي صارت شعوب الدول الافريقية هي الاكثر جوعا , مع وجود اراضي زراعية و كميات مياه لا تصدق , و الاكثر فقرا , في حين تلمع أطنان الذهب في جوفها , والاشد مرضا بتركها عن عمد , والاكثر جهلا برغبة حكامها , والاكثر حروبا داخلية .

و موضوع الحروب الأهلية ديه أزمة كبيرة جدا . .

 

يعني بس في القرن العشرين حصل اكتر من 16 حرب اهلية في افريقيا , راح ضحيتها الملايين من ابنائها .

 

فكلا من ( أنجولا , اثيوبيا , بوروني , السودان , الصومال , موزمبيق , النجير , اريتريا , الكونغو , سيراليون , روديسيا , الجزائر , تشاد , رواندا , غينيا بيساو , افريقيا الوسطي ) عانو معاناة رهيبة من حروب اهلية او صراعات داخلية , فتكت بابناء الدولة الواحدة , وزرعت كميات لا تنتهي من العداوة بين الشعوب والقبائل .

 

ويكفي انك تشوفي الحرب الاهلية الرواندية , اللي حصلت في التسعينات (1990 - 1993) , واللي يقدر عدد ضحايا بفوق الـ 700 الف مواطن رواندي . .

 

و نيران الحرب الاهلية اللي كانت في التسعينات , اشتعلت بالفعل من الخمسينات لما كانت تحت الاحتلال البلجيكي , لما قامت الفوات المستعمرة بالفصل بين قبيلتي "التوتسي" , و "الهوتو" , وكانت بتتعامل بشكل مختلف تماما عنهم , وده اللي جعل "حزب حركة استقلال الهوتو" يبدأ هجماته علي قبائل "التوتسي" سنة 1959 , و اشتعلت الخلافات تدريجيا .

 

و ده اللي جعل الالاف من جيل "التوتسي" يشعلو الحرب الاهلية سنة 1993 , انتقاما من اللي حصل لابائهم علي يد قبائل "الهوتو" , واستمرت الحرب 3 سنين .

 

ده مثال بسيط , ازاي الدول المستعمرة كان يهمها ابقاء النيران مشتعلة في احراش افريقيا , عشان تلتهم اي انجاز حضاري ممكن يتم , ويجعل الشعوب تسيطر علي ثرواتها مرة تانية

 

-------------------------------------------------------------------------

 

لكن بداية من 2000 , بدأت الصورة تختلف شوية .

 

بدأت أطراف جديدة تطرق الابواب الافريقية ,بنظرة مختلفة و خطط جديدة .

بدأت الصين تنتبه للفرص الضخمة في افريقيا , من ايدي عاملة رخيصة , واسواق هائلة , وفرص لا تعوض .

بدأت تركيا تحاول توسع دورها السياسي و الاقتصادي .

بدأت الامارات تستكشف الثروات التجارية الكامنة .

بدأ الكيان الصهيوني يشوف مصلحته وسط الحوار ده كله .

وبدأ المستثمرين يأتون من كل فج عميق , معاهم خطط , ودراسات , والدولار الأخضر اللي يذلل كل العقبات .

بدأت تشق الطرق , وتبني المدن , و تدور تروس المصانع , و تفجر الوديان , و تحفر القنوات , و تنطلق القطارات محملة بالبشر و البضائع و الاحلام .

 

بدأ يحصل تغير حاد في بعض المدن والعواصم , وبدأ المواطن الافريقي البسيط يتطلع لحياة مكانش متخيلها .

بدأت مدن زي "كيب تاون , لاجوس , دربان , نيروبي , لواندا , بريتوريا ,وأكرا " بدأو ينافسو بقوة علي ألقاب "النمور الافريقية" .

وبرضه رغما عنا هييجي نفس السؤال .

 

يا تري التطورات الاقتصادية ديه , هيكون ليها اثر حقيقي في تطوير القارة السوداء ؟

 

الحقيقة انا اشك ان ده يحصل .

لان طالما محصلش ان فيه "ديموقراطيات" و "حريات" حقيقية في اي بلد بينمو , فلازم نشك فورا في مدي مقدرة النمو الاقتصادي ده في خدمة اهلا البلاد .

 

لأن ببساطة , اي نمو اقتصادي هيحصل في غياب الحريات و تمكين الشعب من الحكم بالشكل الكامل , هيكون قصور من الرمال , تذوب مع اول موجة حقيقية , ولن ينال الشعب منها الا الفتات المتساقط من مائدة الشبعان .

و ادينا شفنا في دول زي (مصر , سوريا , لبنان , الجزائر , ليبيا) , لما بدأ يحصل نوع من النمو الاقتصادي بداية من السبعينات و حتي الان , شوف مواطني الدول دول نالو قد ايه من "الثروات الطائلة المتوقعة" .

 

بينما دول زي (كوريا الجنوبية , سنغافورة , ماليزيا , هونك كونج) لما تم تطبيق الشكل الديموقراطي و تعميم الحريات بشكل كبير , عملت قفزات واسعة في دخل المواطن و الخدمات اللي بيشوفها .

 

الاستثناء الوحيد هو دول الخليج , و اللي بيجمع بين ديكتاتوريات عاتية , و دخل عالي و خدمات للمواطنين , تفسيره ببساطة ان عدد السكان قليل جدا ,و الثروات هائلة جدا , فبعد ما بيتم السرقات و المحسوبيات و الاكراميات , بيتبقي كتير قوي , واللي يملي جيوب و بطون الملايين القليلة اللي موجودة في الخليج .

 

لكن لو كانت ثروات الخليج في حدود المعقول , لكني هتلاقي حالهم اصعب من المواطن المصري و السوداني , مع النظام الشمولي الواسع هناك

 

---------------------------------------------------------------------------

 

فتلخيصا لكل اللي اتقال , افريقيا غنية جدا بالثروات , فقيرة جدا في الحريات , يحكمها فسدة ميهمهومش الا بقاء الكرسي حتي و ان ولع الشعب بالكامل , بموافقة و مباركة اوروبية امريكية بالكامل .

 

وفي نفس الوقت , فالخطوات الاقتصادية الواسعة في البلاد , هتنعكس علي عدد معين من المواطنين , بينما مئات الملايين هيظلو يعيشو في نفس الفقر و الجهل و المرض

​