العنوان : الفرصة الأخيرة

القسم: #الديني

الرقم: 28

السؤال:

 

 

ياريت تنظروا لقصتي بعين الرحمه

 

انا مجوزه بقالي سبع سنين من واحد جارنا وصاحب اخويا هو اتقدم وانا وافقت بس بعد فتره حسيت انوا مش ده الانسان المناسب وانوا زي اخويا

 

حاولت افسخ الخطوبه بس للاسف امي كانت بتضربني واخواتي قالولي انتي هتصغرينا مع الناس

 

المهم اتجوزتوا ومعنديش اي خبره كنت لسه في سن المراهقة ماليش اي تجارب وخلفت علي طول منو وبعديها بأربع سنين خلفت تاني وكنا عايشين كل واحد في وادي تاني خالص الي بيجمعنا العشره والولاد بس

 

حاولت اطلق كذا مره بس معرفتش

 

المهم انا شغاله وقابلت شاب حببتوا وهو حبني ويمكن اكتر مني اهتم بيا وكان بيخاف عليا بيغير لو حد كلمني

 

المهم اتقبلنا في بيتي وكنت عارفه اني مجرد هنقعد لوحدينا شويه وخلاص ومش هقدر اديلوا حاجه بس هو مقدرش يمسك نفسوا ونام معايا بجد غصب عني

 

بس حسيت بحبوا واتعلقت بيه وكانت الدورة الشهريه  كانت خلصانه من كام يوم

 

المهم الموضوع اتكرر كذا مره واتعودنا علي بعض والمصيبه اني حملت منوا وحاولت كتير اجهضوا معرفتش وهو فضل معايا  وقالي عادي نجيبوا  وانا كمان عيزاه ومقدرش اموت ابني

 

بس انا حاولت أطلق ومعرفتش ومستحيل اطلق وحاولت ابعد عنوا وهو مش راضي وعايز يبقي معايا ونستمر في الحرام وانا مش حابه كده وفي نفس الووقت مقدرش اعيش من غيروا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

لا حول ولا قوة الا بالله . .

 

كلام مؤلم , وتفاصيل دامية , و حزن رهيب هبط عليا و انا بقرأ كلماتك والله . .

 

انتي يا سيدتي ارتكبتي كبيرة من الكبائر , جريمة تجلب غضب ربنا عليكي , بإغواء من شاب قذر هو أدني من الحيوان , وأكثر سفالة من كفار قريش نفسهم , اللي محدش فيهم كان ممكن يزني مع امرأة متزوجة .

 

و للأسف هو مغتصبكيش , للأسف انتي اللي صنعتي الجو الملائم و المناسب للفاحشة , واللي بدأتيها اصلا من انك تتعرفي علي شاب وانتي متزوجة , وانك تحبيه و تخليه يحبك , لأ و ايه , وبيغير عليكي , ده كلام بالله عليكي ؟ ؟

 

و الجريمة انتي صنعتيها لما خليتيه يدخل بيتك , بعدها متلوميش حد , متقوليش كان غصب عني , هو كشاب سافل لما يتم دعوته لبيتك و هو عارف انك بتحبيه , فهو تلقي دعوة كاملة منك لممارسة الزنا , حتي لو مكانش الموضوع في بالك .

 

و الاسوء انها مش مرة و عدت , لا ده تم التكرار مرات كتيرة , حتي وصل الأمر للحمل , ولا حول ولا قوة الا بالله . .

 

عشان بس تتعرفي علي شناعة اللي حصل , يكفي إنك تعرفي ان "الحد الشرعي" للزنا , بيكون 100 جلدة لما الشاب او الفتاة يكون غير متزوج , ولكن الحد الشرعي للشخص المتزوج الزاني هو : الرجم حتي الموت . .

 

فاهمة يعني ايه الرجم حتي الموت ؟ ؟ يعني لو ده كان تم في زمن الرسول صلي الله عليه و سلم , كانو جابوكي – ربنا يحفظنا – و يحفرو حفرة في الارض , وتقفي فيها , وبعدها ييجي عدد من الشباب معاهم طوب و حجارة , ويضربوكي بيها بكل شدة لغاية لما تموتي . .

 

شايفة ان العقاب بشع ؟ ؟   هو فعلا صعب جدا و محدش يقدر يتخيله , بس ده عقاب رباني موازي لحجم الجريمة الرهيبة اللي تم ارتكابها . .

 

الزنا بعد الزواج هو شئ شنيع , شئ مدمر فعلا للمجتمع , كفاية بس لو زوجك مثلا عرف , شوفي هيعمل ايه ؟ مش بعيد يقتلك و يقتله و ينتحر ,او انه يروح السجن تأبيدة , وكل ده بسبب شهوتك .

 

كفاية نظرة بناتك ليكي لما يكبرو شوية , ان كان حاليا مش فاهمين و مش عارفين , بكرة يعرفو لما يلاقو ان ليهم أخ "ابن حرام" .

 

عرفتي ليه ربنا سبحانه و تعالي جعل حد الزنا للمتزوج بهذا الشكل ؟ ؟

 

---------------------------------------------------------------------------------

 

الكلام الصعب اللي قلته من شوية , كان عشان تحسي ان الموضوع مش قليل , لكن بالتوازي , عايز اقولك ان الحل موجود . .

 

ولما باتكلم عن الحل , فباتكلم عن مغفرة ربنا ليكي , هي بالفعل موجودة و متاحة , و في ايدك بالكامل .

 

بل خلينا نقول حاجة ايجابية , كون إن ربنا ألهمك أصلا إنك تحسي ان ده غلط  , وانك تسعي لحل المشكلة , و انك تبعتي لصفحة علي الفيس عشان تستشيريهم في الحل , فده دليل إن ربنا سبحانه و تعالي يريد أن يتوب عليكي . .

 

شوفي المولي تبارك و تعالي بيقول ايه في سورة النساء (وَاللَّهُ يُرِيدُ أَن يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا)

 

ايوة , ربنا سبحانه و تعالي عايزك انتي يا فلانة انك تتوبي اليه , ربنا يحب هذا الأمر , بل هو يفرح بتوبتك اليه . .

 

افتحي المصحف حالا علي سورة البقرة , وافتحي الآيتين (268 و 269) منها , واقريها كلمة كلمة . .

 

( الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ) 

 

في البداية ربنا ذكر إن الشيطان بيوعدنا بالفقر , ويأمرنا بالفحشاء و العياذ بالله , واخدة بالك ازاي ربنا ربط بين الفحشاء و الفقر مع بعض , ده مؤدي لده بشكل حتمي . .

 

( وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ )

 

يعني إن كان الشيطان بيوعد بالفقر والفحشاء , فالله تبارك و تعالي يعدنا بالعكس , بالمغفرة الكاملة , والفضل الكبير منه , والفضل قد يكون في الدنيا (اموال , بنين , منصب) , او في الآخرة

 

والآية اللي بعدها مرتبطة بيها بشدة . .

 

(يُؤْتِي الْحِكْمَةَ مَن يَشَاءُ ۚ وَمَن يُؤْتَ الْحِكْمَةَ فَقَدْ أُوتِيَ خَيْرًا كَثِيرًا)

 

يعني الحكمة في التفكير , واتخاذ القرار السليم هو هبة يعطيها الله من يشاء من عباده , والشخص اللي هيؤتي الحكمة ديه , فهو عنده خير عظيم

 

 

 (وَمَا يَذَّكَّرُ إِلَّا أُولُو الْأَلْبَابِ )

 

يعني مش هيفهم الكلام ده و يطبقه الا اصحاب العقول , واللي بيفهمو .  .

 

شوفي الكلمات العظيمة متطابقة جدا مع الحال ازاي ؟  ؟

 

طب شوفي الحديث الجميل اللي في صحيح مسلم (لَلَّهُ أَشَدُّ فَرَحًا بِتَوْبَةِ عَبْدِهِ حِينَ يَتُوبُ إِلَيْهِ مِنْ أَحَدِكُمْ كَانَ عَلَى رَاحِلَتِهِ بِأَرْضِ فَلَاةٍ.) واللي وصف فيه الرسول صلي الله عليه و سلم كيف أن الله تبارك و تعالي يفرح بتوبة العبد اليه .

 

---------------------------------------------------------------------------------

 

فكون ان ربنا جعلك و سهل عليكي انك اتخذتي خطوة في سبيل انك تمسحي الذنب ده من حياتك , فلازم تعرفي انه عايزك تتوبي , وهيفرح بهذا الأمر .

 

فالخطوة في ايدك بالكامل . .

 

واللي لازم تعمليه , انك تمشي علي اللي هنقوله فورا , ومن غير اي تساهل ارجوكي .

 

 

• قومي فورا دلوقتي , وادخلي اغتسلي من اثار النجاسة اللي علقت بيكي من الفاحشة , واتوضي و صلة ركعتين توبة الي الله

 

و ركعتين التوبة , انك ببساطة تصلي ركعتين عاديتين , وبعد نهايتها , انك تعترفي الي الله بالذنب اللي عملتيه , وتستغفري عنه استغفار مستمر . .

 

 الاستغفار ميكونش بلسانك و بس , يكون بقلبك و عقلك و كيانك كله , تكون كل ذرة في جسمك حاسة بالاستغفار

 

 

• لازم تندمي في قلبك ندم حقيقي علي اللي حصل , لازم من جواكي يكون قلبك بيتقطع من اللي حصل , تكوني حاسة انك عملتي جريمة في حق المولي تبارك و تعالي , وحق بناتك

 

 

• لازم تنوي نية صادقة و اكيدة , انك عمرك في حياتك ما هترجعي للذنب ده ابدا , سواء مع نفس الشاب السافل او اي شخص غيره , و انك تكوني مستعدة انك تتقطعي حتت ولا انك تسلمي جسدك بالحرام مرة تانية , لازم تكون نية حقيقية  ,لان ربنا هيطلع عليها

 

 

• فورا و من غير نقاش , اقطعي اي تواصل مع الحيوان ده , من غير اي تفكير , اعمليله بلوك في من الفيس و الواتس , وغيري رقم تليفونك لو هو معاه , ولو هو معاكي في الشغل متروحيش الشغل اصلا , ولو جالك البيت اطرديه وصوتي و لمي الناس عليه , لازم يفهم انك خارج حياتك للأبد , اياكي تتواصلي معاه لاي سبب تاني , لاي سبب .

 

 

• لو هو معاكي في الشغل زي ما بتقولي اياكي ترجعي الشغل تاني , لانك هتشوفيه هناك , متعمليش نفسك ذكية و تقولي هروح الشغل  و مش هكلمه , ثقي انك لو رحتي الشغل يبقي هتكرري الجريمة تاني , متروحيش يعني متروحيش , وربنا هيرزقك بشغل تاني .

 

 

• لازم تسألي شيخ متخصص في الحكم الشرعي للجنين , محدش فينا في الفريق عنده القدرة علي الفتوي الشرعية , لازم تسألي حد متخصص , وتشوفي هيقولك ايه و تعمليه

 

 

• اياكي تنسبي الجنين لزوجك الحالي , ده بهتان عظيم , وجريمة جديدة و ذنب مش قليل .

 

 

• لو مش طايقة زوجك الحالي , وشايفة انك مش هتقدري تكملي معاه ابدا , ارفعي قضية طلاق , استشيري محامي وهو هيقولك تعملي ايه

 

 

• عوضي عن الذنب الرهيب اللي تم , بعدد كبير و مستمر من الطاعات والعبادات , واياكي تتواصلي مع الشاب ده لاي سبب , اعرفي ان اول تليفون هتعمليه معاه , فده معناه انك بتعمليله دعوة تانية لغرفة النوم , وساعتها متلوميش الا نفسك , لان النوع ده من الشباب السافل  , لا يسعي ورا حب ولا اهتمام بيكي , كل اللي عايزة هو اشباع هرموناته بالشكل القذر ده

 

-------------------------------------------------------------------------------------

 

وأخيرا . .

 

اعرفي ان ربنا , لو كان ألهمك طريق التوبة دلوقتي , فده ممكن ميتكررش تاني . .

 

ممكن يكون ربنا سبحانه و تعالي كاتبلك فرصة واحدة للتوبة دلوقتي , وممكن تكون بالفعل الفرصة الأخيرة , يا اما تتمسكي بيها و ترجعي لطريقه , وتهربي من النار و العياذ بالله  ,او انك تضيعيها , وبالتالي تلاقي نفسك في طريق مظلم مخيف . .

 

اعرفي ان الموت ممكن يكون مكتوبلك بعد ايام قليلة , محدش عارف هيموت امتي , فممكن يكون قدامك فرصة واحدة بس للرجوع لطريق ربنا , وانك تمشي في الطريق الي الجنة  . .

 

اياكي تتساهلي في طريق التوبة , اياكي تتواصلي مع الشاب ده مرة تانية , اياكي تستسلمي للشيطان مرة تانية  و تخليه يضحك عليكي . .

 

قومي حالا و صلي ركعتين التوبة , وواظبي علي القرب من الله , وثقي انه هيحل المشاكل واحدة ورا التانية . .

 

و ياريت تقرأي الرسالة ديه بالتفصيل , واللي بتتكلم عن التوبة , بعنوان : لذة المعصية 

​