السجن الكبير
الرسالة السابقة
العنوان : السجن الكبير
القسم: #العاطفي
الرقم: 24
السؤال:
انا عندى مشكلة ......
انا عندى ٢٠ سنه ومخطوبة و خطيبي بحبه بجنون وهو كمان بيحبني جدا
دلوقتى انا عايزاه يتعود يتصل ويسالنى بتعملى اي وكدة وقولي انا طالع ونازل وبعمل كذا . حتي مكالمه واحدة بس مش عارفة
وبحاول اخليه يتعامل جدا بس بحس انه مش بيعرف او مش بيحب يتكلم كتير . انا مش بقول انى عايزة اشغله وارغي بس يكلمنى مش بيعمل كدة وبحاول برضه اخلية يتعود يقولى هو بيعمل اية مش بعرف . وانه يهتم ويبقي ورايا فى الموبيل ويقولى لا روحى لو انا فى حتة او لا متنزليش او متروحيش بس مش عارفة اتكلم معاه ازاى الصراحه.
انى متاكدة مليون المية لو سبته مرنتش عمره ما هيرن ابدا عشان كدة مش عارفة اعمل ايه ومخنوقة
هو حاليا بيكلمني كام مرة فى اليوم بس انا اللي باتصل بيه كتير
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
طيب الإجابة باختصار .
انتي مش دقيقة في حكمك , ومزوداها شوية .
مشاعر الأنثي ( خاصة اللي بتكون حساسة أكتر ) بتكون اعلي بكتير من مشاعر الرجل .
الأنثي بتحب تحس ان شريك حياتها (خطيبها - زوجها) مهتم بيها , وانه قدامها , وانه محسسها بالأمان , ولو عليها هي انها تبقي معاه 24 ساعة .
بس الشاب غير كدة , رغما عنه بيحب انه يكون فيه مزيج بين حياته العاطفية (خطيبته او مراته) , وبين باقي نواحي حياته , سواء شغل او مذاكرة او اصحاب او القعاد علي القهوة او الكورة او التليفيزيون .
ابلغ جملة اتقالت في وصف الفرق , ان لما بيحصل زواج , الزوج بيكون كل حياة الزوجة , لكن الزوجة بتكون جزء من حياة الزوج .
ده شئ حتمي , وهو متعلق بالتكوين السيكولوجي لعقل الرجل و الفوارق الجوهرية بين الذكر و الأنثي , فكل اللي اتقال ده , مش عيب ولا خطأ ولا ذنب الرجل , لكن هو شئ في تكوينه ولا يد له فيه .
و المشكلة لو ان الانثي معرفتش ده ,فهي هتزهق الراجل في عيشته , فعلا هتخليه يكره حياته , وفعلا مش بعيد انه يفسخ معاها الخطوبة لو مخطوبين , او يطلقها لو متجوزين .
انتي بتطلبي من الرجل شئ مش هيقدر عليه ابدا , انتي كأنثي ممكن تفضلي قدام شريك حياتك 24 ساعة في اليوم , 7 ايام في الاسبوع من غير ما تزهقي , الراجل بيزهق بسرعة , ده شئ في تكوينه .
فانتي حذاري انك تحاسبي الراجل بنفس معاييرك انتي , وحذاري انك تفسري قلة اتصاله بيكي انه مش بيحبك ولا بيهتم بيكي .
وعلي كلامك انه هو بيتصل بيكي كذا مرة يوميا , أصلا كتير من الرجالة مش بيعملو كدة , فانا متعجب انتي ازاي شايفة ان ده قليل .
ده في حالة انه اتصل بيكي مرة واحدة يوميا فلازم تتفهمي و تقدري ده , فما بالك انه بالفعل بيتواصل معاكي بمعدل كبير .
-------------------------------------------------------------------------------
والمشكلة انك لما تستمري في المطالبة باكتر مما يتحمله , ان ده بيستنزف من صبره , ومن قدرته علي التحمل , وهييجي في مرة و هيرمي الدبلة في وشك , فعلا مفيش حد بيستحمل كدة .
ارجوكي سيبك من الافلام الرومانسية و الروايات العاطفية , الحياة الواقعية مختلفة ومعاييرها بعيدة عن اللي بيتكتب في الروايات .
مشاعر الرجل بيتم ترجمتها في مواقف عملية , انه يحبك بعمق , انه يضحي عشانك , انه مينجرفش ورا اي اغواء من واحدة تانية عشان هو بيخاف ربنا , انه لما يحصل خلاف معاكي يكون ذكي و حكيم في قراراته و افعاله , مش انسان اهوج متسرع يبعتلك ورقتك مع اول خلاف بينك و بينه . .
هو ده المعني الحقيقي للحب , مش انه يتصل بيكي 10 مرة يوميا , حرام عليكي فعلا .
الشاب لما بيخطب واحدة – مهما كان بيحبها بجنون – مش عايز يحس انه مقيد , انه مسجون , انه مراقب , الشعور ده متعب جدا , وممكن يخليه ينهي الخطوبة فورا لو حسه .
اكيد انتي من حقك تتطمني عليه و تعرفي بشكل عام هو عمل ايه اليوم , بس مش انه يحس انه في سجن مركزي و ان فيه كاميرات بتتابعه .
مش انه يعرف ان فيه "ديون" يومية عليه انه يتصل بالهانم 10 مرات يوميا , ده شئ فوق الوصف فعلا .
ارجوكي , خففي شوية من ضغط العاطفة اللي عندك , وخليه فيه نوع من التوازن و الحكمة في التعامل , و اعرفي انك جزء من حياته مش كل حياته , ده شئ محدش هيعرف يتدخل فيه , ومفيش امل في تغييره .
من حقك ان قلبه ميكونش فيه مساحة لاي انثي تانية, لكن لو كان قلبه فيه مساحة عشان نادي الزمالك , وشوية عشان قعدة القهوة , وشوية عشان الواد سحس صاحبه , وشوية عشان يشوف فيلم لهنيدي , وشوية عشان يروح اسكندرية لوحده , متضايقيش , بالعكس ده شئ صحي و سليم في الحياة الزوجية , ولازم تتأقلمي مع الوضع ده , لأن أصلا الحياة كلها ماشية بنفس الوتيرة . .
و اخيرا , لازم تقرأي الكتاب بالغ الأهمية "الرجال من المريخ النساء من الزهرة" فعلا الكتاب مهم ليكي , ومحتاجة تقريه بالكامل , مش هبالغ لو قلتلك ان استقرار حياتك الزوجية المقبلة معتمدة علي فهمك للكتاب ده .
بالتوفيق يا رب