الخلافة الإسلامية وهم ؟
الرسالة السابقة
العنوان : الخلافة الإسلامية وهم ؟
القسم: #السياسي
الرقم: 18
السؤال:
عايز اعرف تقييمك لما داعش أعلنت إنها رجعت الخلافة تاني وخلت ابو بكر البغدادي بتاعهم الخليفة وامير المؤمنين وهو اصلا الناس ديه لسة مصدقة نفسها وعايزين يرجعونا لايام الخلافة تاني ايه الناس ديه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
الخلافة الإسلامية مش وهم , هي كانت حقيقة راسخة لعشر قرون , وظلت باسمها دون قوتها الفعلية 3 قرون بعدها , ومسقطتش إلا من اقل من 100 سنة , فمن ناحية الوهم فهي مش وهم . .
وكون إن هناك من يدعون الحديث بإسم الإسلام , أرادو استغلال الأمر لصالحهم , فهو لا يعني ضلال الفكرة من أساسها . .
لو إن فيه محتال , بينصب علي الناس باسم جامعة السوربون في مصر , ووعد إنه يجيبلهم قبولات جامعية من غير شروط بس بالفلوس , فده لا يطعن في حقيقة إن الجامعة موجودة , وليها شروط و متطلبات للدخول , وجود النصاب باسمها لا يعني بالضرورة فساد الجامعة . .
و الحقيقة إن إيمان البعض بوهم إعادة الخلافة الإسلامية , و الحديث عن جرائمها و مآسيها لهو ثمرة سلسلة من السياسيات الثقافية و الإعلامية و التعليمية , واللي مورست علي كل شعوب "سايكس-بيكو" لمدة قرن كامل , و استبدال فكرة الحاكم الواحد للبلاد , بالقومية المنفصلة , واللي جعلت كل دولة لوحدها تتغني بأمجادها , مما سهل علي احفاد مؤسسي سايكس بيكو القيام بكل الاختراقات الممكنة حاليا . .
تعالي نرجع بالتاريخ لورا شوية . .
---------------------------------------------------------------------------
مع وفاة الرسول صلي الله عليه وسلم , وقبل ان يقومو بدفن جثمانه الكريم , اجتمع كبار الصحابة فورا للبت في أمر بالغ الخطورة , ولا يحتمل التأجيل – حتي للقيام بدفن الجثمان – وهو الإجابة عن سؤال , من سيخلف الرسول صلي الله عليه و سلم , وكيف سيكون نظام الحكم . .
وجد المسلمين أن القرآن و الحديث لم يتناولو أمر الحكم بشئ من التفصيل , زي ما حصل في نقاط أخري – زي المواريث مثلا – فكان عليهم الاجتهاد . .
تم اختيار أبي بكر ثم عمر ثم عثمان ثم علي , و كان الاختيار كل مرة بيتم بعمل شوري بين الخليفة و كبار الصحابة المحيطين به . .
حتي أتي معاوية رضي الله عنه (لا يقال إلا رضي الله عنه لأنه صحابي ), وابتدع فكرة التوريث لابنه يزيد و باقي ذريته , و نشأت الدولة الأموية . .
تلتها الدولة العباسية و باقي الدول المتلاحقة , وآخرها العثمانية . .
و علي الرغم من المآسي العديدة التي كان يقوم بها كثير من الخلفاء , من اقتراف الكبائر , وإسالة الدماء , وأيضا التحالف مع العدو أحيانا , إلا أن فكرة الخلافة ظلت صامدة وقوية ولا تتأثر كثيرا . .
فظلت للبلاد راية واحدة مرفوعة , وخليفة يُهتف باسمه , ويدعي له علي المنابر , وزكاة تجمع , وصدقات توزع , و وزارات ترعي شئون المسلمين و غير المسلمين في أصقاع البلاد . .
والأهم , هو نفير الجهاد , واللي كان بيدعي إليه لو اي جيش أتجنن في عقله , وقرر يعتدي علي أي قطعة من أراضي الخلافة . .
لم تكن تجربة ناجحة 100 % , لكنها كانت تؤدي عملها بمقدار كبير , وبها وصلت الدولة إلي حدود الصين و روسيا , و اجتاحت اوكرانيا و المجر و اليونان و بلاد البلقان , و من غرب أوروبا اسبانيا و البرتغال حتي حدود فرنسا و إيطاليا . .
لم يكن الخلفاء معصومين , وكان بعضهم سفاحين ويقتلون بعضهم بعضا, لكن كان للإسلام راية تدافع عنه , وتجيش الجيوش باسمه . .
و ده اللي أرعب أوروبا لغاية بداية القرن الـ 19 , وعرفو ان بقاء الباب العالي في اسطنبول , حتي لو كان رمزا فقط , حتي لو كان عضم في قفة , حتي لو كان جثة حية , بقاء اسم الخليفة و بلاد الخلافة هيعوق كل شئ عندهم . .
هيعوق إنشاء إسرائيل في قلب العالم الإسلامي , هيعوق السيطرة علي قناة السويس في مصر , هيعوق امتصاص بترول الخليج , هيعوق احتلال المشرق و طمس هويته . .
عشان كدة اول ما خلصت الحرب العالمية الأولي سنة 1918 مكانش ينفع يبقي فيه اي انتظار, وتعاون كلا من (فرانسواه بيكو) السياسي الفرنسي , و(مارك سايكس) السياسي البريطاني , لتقسيم تركة "الرجل العجوز" اللي هي الخلافة العثمانية المحتضرة بعد هزيمتها في الحرب العالمية الاول لما تعاونت مع الامبراطورية الألمانية و الامبراطورية النمساوية المجرية . .
وكان التقسيم سهل , مصر و السودان والاردن والخليج و فسلطين والعراق لبريطانيا , الجزائر و المغرب و تونس و سوريا و لبنان لفرنسا , متبقاش الا ليبيا اللي كانت ايطاليا اخدتها بالفعل , وإيران اللي كانت تحت حكم اسرة قاجار العلمانية .
أما تركيا فلما عرفو ان فيه ظابط جيش يكره الخلافة كراهيته للموت اسمه اتاتورك , سابوه يمسك البلد , وفعلا أول حاجة عملها إنه عزل الخليفة و أنشأ الجمهورية التركية و صار أول رئيس لها . .
وتحت السيطرة البريطانية علي فلسطين نشأت اسرائيل , وتدهور حال مصر من سئ الي اسوء , فرنسا كانت سعيدة بتغيير الهوية الثقافية لبلاد المغرب العربي , و تسهيل العديد من الإنقلابات في سوريا , حتي صعود أسرة الأسد في اول السبعينات . .
أما الخليج فبوصلة أسره الحاكمة بالكامل توجهت إلي واشنطن بدلا من لندن بعد الحرب العالمية التانية , والأمر اللي جعلهم ألعوبة في يد البيت الأبيض و حاكمه . .
ولما كانو عارفين إن ممكن تيجي اجيال جديدة – زينا كدة – و ممكن تقرأ التاريخ و تحن لايام ما كان عندنا كرامة , وكنا كلمة واحدة , و يتعجبو من الخيانة العلنية اللي بنشوفها من 22 حاكم عربي بلا استثناء , و اسرائيل الكاسب الأكبر من كل مآسي الشرق الأوسط , لما كانو عارفين اننا ممكن نشعر بالحنين للايام ديه , فكانت المدارس لازم تزرع القومية داخل كل بلد علي حدة , عشان يؤمنو ان احنا كويسين و الباقي ولاد لذين اعداء . .
وهكذا اشترك التعليم مع وسائل الإعلام مع رجال الدين المأجورين , في إقناع الأجيال الحالية بالالتفاف علي رئيس البلد ,أو ملكها أو أميرها أو سلطانها , و بذل الروح و الدم من أجل "الوطن" وهي الكلمة التي يترجمها رجال الحكم كما يشائون . .
وصارت النتيجة كالتالي :شعوب تكره جيرانها العرب , جيوش تقتل شعوبها , فتنة طائفية مستمرة , ثروات منهوبة للغرب , وشعوب لا تجد ما تأكله , و الاستئذان من سيدهم في واشنطن قبل القيام باي خطوة . .
---------------------------------------------------------------------------
يعني هي الخلافة هتحل ده ؟ ؟
الخلافة مش هتحلها لو ظل الناس بنفس الفكر الأحمق اللي بيعيشو عليه حاليا ,لابد من تغيير الفكر في البداية , عشان المواطن السعودي يعرف إن الرباط و أم درمان و أنطاكيا مثلها مثل ابها و تبوك و الإحساء , ويفهم المواطن المصري ان عدوك هو تل ابيب وواشنطن , مش الدوحة ولا انقرة , ويفهم المواطن الجزائري ان المواطن المغربي هو أخوك مش عدوك , وهو اللي كان بيساعدك لما فرنسا كانت بتحرق الجزائر . .
لما تتغير القناعات , ساعتها اختيار عاصمة الخلافة مش هيفرق , اسيوط زي درنة زي عنتاب زي نواكشوط , لما يكون وزير التعليم من المنامة مش هيكون بحريني ولا لما يكون وزير الصحة من سوسة مش هيكون تونسي , لما يكون وزير الدفاع من القضارف مش هيكون سوداني , لكن هيكونو كلهم من الوطن الإسلامي . .
وقتها اختيار حاكم واحد للأمة الإسلامية , هيكون بناء علي كفائته وخبراته و قيمه و أمانته , مش علي اسمه أو لونه أو أصله او اتولد في مدينة ايه . .
مش هيكون عندنا مشكلة ان حاكم البلاد كلها يكون مولود في موريتانيا , ويكون وزير الصحة مولود في صنعاء , ووزيرة التعليم مولودة في أنقرة , ووزير الدفاع مولود في وهران . مش هنقول ده سوداني و ده مصري و ده جزائري وده تركي , لكن هنقول انه مواطن بلاد الخلافة . .
عايزين نتعامل مع الـ 22 بلد عربي , زي ما بنتعامل مع المحافظات في مصر , فيه حاجة اسمها مينفعش وزير يمسك يكون من دمياط مثلا ؟ ؟ ولا لو العدو احتل الواحات البحرية ملناش دعوة هما يدافعو عن نفسهم ؟ ؟
أمريكا فيها 50 ولاية بينهم اختلافات ثقافية و اقتصادية و علمية , هل بيتم اختيار الرئيس او الوزراء او المسؤولين بناء علي هو مولود في انهي ولاية ؟ ؟
اول ما تكون النفوس جاهزة للمفهوم ده , ساعتها اسرائيل مش هتاخد معانا غلوة , حرب طويلة استنزافية ليهم و هنصفيهم واحد واحد , قبل كدة انسي . .
ده مفهوم الخلافة زي ما المسلمين الأوائل طبقوه , وزي ما احنا بنحلم بيه ,لا عايزين ابو بكر البغدادي ولا ابو محمد الجولاني , ولا داعش ولا قطع رقاب أسري , ولا تطبيق أحكام إلا بالمعايير الصحيحة لها . .
لو انت لسة مش شايف ان الخلافة حاجة كويسة , كما تشاء , انت لسة متأثر بالصورة السلبية اللي شفتها في داعش , أو متأثر بالخيالات اللي درستها في المدارس و شفتها في القناة التانية , ده رأيك و انت حر فيه , لكن متشتكيش لما تلاقي نفسك بتموت من الجوع و مواطني باقي الدول العربية بيتفرجو عليك و هما بياكلو فشار . .
أسوء حاجة عملتها داعش إنها ربطت جرايمها بالخلافة , وبرفع راية "العقاب" السوداء وهي راية الرسول صلي الله عليه و سلم في الحروب , فارتبط في ذهن الجميع كلمة الخلافة بمذابح داعش , وجعلتهم يكرهونها , ولو انت من اللي مش قادر يفرق بين فكرة سليمة , وتطبيق سلبي , فهي مشكلتك مش مشكلة الخلافة . .
انا كمسلم أؤمن إن الخلافة جاية لا ريب , وهتكون علي منهاج النبوة زي ما وعد الرسول صلي الله عليه وسلم , في الحديث اللي رواه الإمام أحمد (قال رسول الله صلى الله عليه وسلم: تكون النبوة فيكم ما شاء الله أن تكون، ثم يرفعها الله إذا شاء أن يرفعها، ثم تكون خلافة على منهاج النبوة فتكون ما شاء الله أن تكون، ثم يرفعها الله إذا شاء أن يرفعها، ثم تكون ملكًا عاضًا فيكون ما شاء الله أن يكون، ثم يرفعها إذا شاء الله أن يرفعها، ثم تكون ملكًا جبرية فتكون ما شاء الله أن تكون، ثم يرفعها الله إذا شاء أن يرفعها، ثم تكون خلافة على منهاج النبوة)
كلامي يبدو إنه خيالي ؟ ؟
هو يبدو خيالي لأننا عايشين في واقع مؤلم دموي , بعد ما انحطت القيم , وانهارت الأحلام , لكني علي ثقة مطلقة بتحقيق النظام الشامل السليم للخلافة في يوم من الأيام , سواء انا لحقته أو في عهد أولادي أو أحفادي أو حتي بعد ألف سنة .