القصاص و رقة القلب
الرسالة السابقة
العنوان : القصاص و رقة القلب
القسم: #الاجتماعي
الرقم: 06
السؤال:
عندى ١٨سنه , في اولى كليه
مش مرتبطه ومبفكرش ف كده خالص
بس انا داخله الجامعه اول يومين ليا اهو . وحوليا الولاد رخمين اوى
يعنى انا كنت بسأل صحبتى أنا المفروض ابقي فى انهى مدرج راح واحد رادد مكنها وفضل يضحك مردتش عليه وكملت كلام مع صحبتى
مره تانيه ف نفس اليوم وانا خارجه من المدرج بشوف الدكتور جت ولا لسه لاقيت واحد بيقولى خدى يابت تعالى هنا وضحك لما كشرت دار وشه وسكت
انا بقي بيضايقنى اللى بيعملوه ده ومببقاش عارفه اتصرف ازاى بفكر اروح اشتكيهم بس يصعب عليا ان حد يطرد بسببي
انا مش فاهمه برضو هم بيعملوا كده ليه مع انى مختمره وف حالى ومبتعملش مع ولاد خااااااااااااالص لأى سبب مهما كان اى
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
شوفي يا ستي . .
لما حاول علماء النفس , تحليل ظاهرة المعاكسة و التحرش , كان في ذهنهم في البداية ان الدافع "الجنسي" هو المحرك الاساسي لهذه الظاهرة البشعة , خاصة ان كل التمليحات و الكلمات البذيئة في ذات الإطار . .
لكنهم بعد تحليل عميق , وجدو ان عدد كبير من المتحرشين و المعاكسين , عندهم دافع إضافي عن دافع الشهوة , واحيانا بيكون الدافع ده هو الوحيد , وبيتضائل قدامه دافع الشهوة نفسه . .
ألا وهو دافع "الصيد" . .
ايوة , هو بيصطاد , مش اكتر . .
تعالو نسيب السؤال ده شوية , ونعمل رحلة سريعة لبحيرة قارون في الفيوم , في الأربعينات من القرن العشرين , ايام ما كان لسة فيه خير و بركة في البلد . .
هتلاقي علي البحيرة عدد من وجهاء القوم , منتظرين الملك فاروق لما يشرف , لابسين البرنيطة المدورة الغريبة , وعلي عيونهم النضارة المدورة , وبعضهم لابس شورط بلون "كاكي"
وكلهم معاهم بنادق , وجنبهم الخدم (او العبيد) النوبيين , معاهم الذخيرة , والكلاب البوليسية ممسوكة من الحرس الخاص بيهم . .
جايين يعملو ايه ؟ ؟ جايين يصطادو بط من البحيرة . .
ولو حد راقبهم هيعرف معلومة مهمة جدا متعلقة بالصيد . .
هو إن كلما كانت البطة اللي هيصطادوها بطيئة الحركة , و يسهل توقع حركة طيرانها , وقريبة المدي , كلما قلت متعة الصيد حتي تزول . .
و كلما كانت البطة رشيقة , وسريعة , و بعيدة , كلما كان صيدها ممتع أكتر , وكلما تكالب عليها الوجهاء , ويتحدو بعض مين الجامد اللي هيقدر يوقعها . .
---------------------------------------------------------------------------
وكأن . .
حينما تكون الفريسة سهلة , وفي متناول الجميع , تزول شهوة صيدها فورا , و غالبا ما بيتجاهلوها أساسا . .
و كلما كانت الفريسة صعبة الوصول , وبعيدة المنال , و فيها العديد من التحديات , كلما تكالب عليها الصيادون , رافعين لواء التحدي بينهم , مين اللي هيقدر يجيبها الأرض . .
كمان لاحظي حاجة . .
اول ما يتم اصطياد الفريسة , بيتم تجاهلها فورا و محدش بيبص عليها , حتي لو وقعت علي الارض جنبهم . .
لأن الصياد اللي بيصطاد لشهوة الصيد مش عشان يبيع , هو مش بيحث عن دكر بط يعمل عليه ملوخية و رز , لكن بيبحث عن متعة إذلال ناصية كائن حر متمرد , صعب الوصول اليه , وبعيد المنال . .
و احفظي الكلمتين اللي فاتو دول , لانهم قاموس فهم الكائنات الحية , اللي بتعيش في مستنقعات الجامعة , ويعيثو فيها فسادا , باسم التحرش و المعاكسات . .
متنسيش (الكائنات ديه بتبحث عن متعة إذلال ناصية كائن حر متمرد , صعب الوصول اليه , وبعيد المنال)
بس خلاص سيبك من الفيوم , ونرجع عندك في الجامعة . .
---------------------------------------------------------------------------
زمان كان الدافع الرئيسي للحيوان اللي بيعاكس اويتحرش , هو إشباع شهوته وهي في عنفوانها , و ان كنا ننظر لما يفعله باحتقار و إدانة , فاحنا علي الاقل فاهمين السبب و الدافع . .
و اننا نتفهم الدافع مش معناها موافقين عليه , يعني لما حرامي يثبت واحد في الشارع و ياخد فلوسه , فاحنا فاهمين الدافع (الفلوس) , لكن بالطبع مش بنأيده . .
لكن مؤخرا و وبعد ما انتشرت الموبقات في موبايلات الشباب , وبقي عندهم خلاص اللي يشبع شهوتهم (ولو بشكل جزئي) , وبقي مش محتاج يتحرش او يعاكس عشان يشوف واحدة , اقل جمالا من اللي بيشوفه (ربنا يهدي الشباب) . .
ولكن . .
يظل لديهم شهوة تانية , مش عارفين يشبعوها , وهي شهوة الصيد . .
ايوة , هو عايز يكرر اللي كان بيعمله فاروق في بحيرة قارون , هو عنده نفس الهدف (متعة إذلال ناصية كائن حر متمرد , صعب الوصول اليه , وبعيد المنال) . .
و الإذلال المقصود بيه مش ان البنت تركع عند رجليه ,لكن انها تقع في شباكه , وتسقط اسيرة غرام عينيه المعمصين . .
اول ما بنت تسقط في الفخ ده – و البعض يقع بالفعل – هو كدة ارضي غروره المريض , واشبع شهوته العجيبة , وملئ الفراغ داخله , والناشئ عن فشله المتتالي في كل جوانب الحياة . .
اول ما تسقط , هيتعامل معاها زي ما فاروق تعامل مع البطة اللي اتقتلت , يللا سيبك منها و هات اللي بعده . .
هو ببساطة هيبدأ يتجاهلها , او يتقل عليها ,او يتعمق معاها في مستوي انيل في العلاقة , المهم انه هيبدأ يشوف البطة التالية , عشان يكمل هواية الصيد . .
---------------------------------------------------------------------------
ولاحظي حاجة خطيرة . .
ان متعته في الوصول لمين ؟ ؟
متعته في الوصول للكائن الحر المتمرد , صعب الوصول اليه , وبعيد المنال . .
وبالتالي لو هو في الكلية لقي واحدة "واقعة" او "سهلة" , فهي اصلا مش هتلفت اي انتباه ليه , لانها لم تمثل ليه اي تحدي , وبالتالي لم يشعر معاها بمتعة الصيد . .
هو بيبص للي يصعب الوصول اليه , و اللي غالبا بيكونو :
-
واحدة جميلة جدا , وتقيلة
-
واحدة مشهورة و "فيمص" زي ما بيقولو
-
واحدة غنية ومتريشة
-
واحدة حيية و عفيفة و مش بتختلط مع اولاد
وايام ما كنا في الكلية , كان المتحرشين – حتي السفلة منهم – بيركزو مع الانواع التلاتة الاولي , وبيعتقو النوع الرابع , وده بناء علي بقايا النخوة والدم اللي كان لسة في عروق الطلاب وقتها . .
فكان كل سهامه و رصاصاته , تنطلق من بندقيته الي الانواع التلاتة الاولي , واللي هو بيكون عارف انهم فاتحين باب التحدي , واللي هيقدر يوصل ,يكسب . .
و الحقيقة ان استبعاد النوع الرابع (اللي زيك) كان بناء علي إن , طالما هي محترمة و بتاعت ربنا , خلي عندنا دم و نسيبها في حالها , لكن الانواع التلاتة الاولي فاتحين الباب بشكل غير مباشر للاقتراب , بدليل انهم بيتعاملو بشكل منبسط مع الاولاد , وبيهزر و يضحكو عادي . .
عشان كدة احنا اصبنا بالدهشة بالتغييرات السيكولوجية و السيسيولوجية اللي اصابت المجتمع في السنين الاخيرة , واللي جعلت المتحرشين المنحطين , يصلو لقاع الانحطاط و يحفرو كمان اعمق منه ,لما يوجهو سهامهم للمختمرات و المنتقبات , و البنات اللي اصلا اختارو عدم الاختلاط بالشباب . .
فواضح ان جيل المتحرشين حاليا , هو نسخة محدثة و مشوهة في نفس الوقت , من المتحرشين القدامي , واللي دلوقتي بقم ينظرو للنقاب و الخمار و العفة علي إنها تحدي جديد , وعلي إنها طالما يصعب الوصول ليها ,فهي تمثل تحدي اكبر لابد من كسره . .
و هنا لازم نسيب اللي في ايدينا و نضرب كف علي كف , من الوضع المزري اللي وصل اليه مجتمعنا , واللي جعل العقل المختل للمتحرش الحالي , هيصيب الشيطان بالذهول بالفعل من طريقة تفكيره , ومن المستوي المدهش من السفالة الغير معقولة . .
فلازم يا ابنتي , تتأكدي انك بتتعاملي مع مريض نفسي بالكامل , من غير اي مبالغة , مريض محتاج تشخيص و حبوب مهدئة , وياريت جلسات كهربية كمان . .
عشان نفسي بس افهم متعته في "اصطياد" بنت منتقبة انت اصلا مشفتش وشها , ومتعرفش عاملة ازاي , في حين لو راح الاماكن المشبوهة اللي هو عارفها هيجيب كل اللي عايزه . .
هي بالفعل شهوة صيد ليس أكتر . .
وكنا اتكلمنا بالتفصيل عن نفس النقطة في رسالة : الصياد و الفريسة
---------------------------------------------------------------------------
طب والحل ؟ ؟
الحل انتي قلتيه , والغريب انك مش عايزة تطبقيه , عشان بس طيبة قلبك . .
انتي بمقدارك تبلغي عنه , بس مش عايزة خوفا علي مستقبله . .
يا سبحان الله . .
المولي تبارك و تعالي أكد لنا "ولكم في القصاص حياة يا أولي الألباب" ربنا مذكرش من فوايد القصاص الا فايدة واحدة (والفوائد كثيرة لكن ربنا ذكر أهمهم) وهي الحياة . .
فلو ان شخص عمل جريمة معينة , وانا كقاضي صِعِب عليا ,فانا بشجعه وبشجع غيره علي تكرارها , وبشكل ابشع . .
المثل يقول "من أمن العقوبة أساء الأدب" , فلما ييجي حيوان و يهزر معاكي , والموضوع يعدي , هييجي حيوان تاني اقذر منه , و هيقول تلميح قذر لواحدة تانية , ولما الموضوع يعدي , هييجي حيوان ثالث و يرفع سقف الجرائم كمان و كمان . .
لكن لما تيجي انتي و تقتصي من اول حيوان فيهم , ويتم عقابه بعقاب مؤلم , فباقي الحيوانات في الكلية هتتلم , و هيعرفو ان لو حد فيهم عايز يمارس قذارته , فيروح الزريبة اللي هو عايش فيها , لكن يسيب بنات الناس في حالهم . .
بالطبع سكوتك عليه جريمة ملهاش اي عذر , و انتي كدة بتشجعيه و تشجعي غيره علي تكرار ما فعل , وقد يكون بصورة اسوء . .
إياكي ان تتساهلي في اي جريمة تشوفيها قدامك , سواء في الكلية او غيرها , اي ضحية بيتساهل في اخذ حقه فهو مجرم , لأنه بيشجع المجرم علي استكمال جريمته . .
---------------------------------------------------------------------------
من فترة راح واحد للشيخ في المسجد , قاله يا شيخ فيه واحد ضحك عليا و خدعني في فلوس , وانا اعرف اخد حقي , اخده ولا اسامحه وأخذ الثواب من عند الله . .
الشيخ قاله هل قرأت الآية 39 من سورة الشوري ؟ ؟ (وَالَّذِينَ إِذَا أَصَابَهُمُ الْبَغْيُ هُمْ يَنتَصِرُونَ)
يعني من صفات المؤمن انه ينتصر لما يتظلم , وياخد حقه , مش انه يكون "درويش" و عايش ببلاهة و سذاجة . .
كل قيم العفو والمسامحة بتكون لما انا اللي ممكن اظلم , او ان اللي ظلمني استغفر ربنا , وجاي يعتذر و يطلب مسامحتي . .
لكن حد يسرقني و انا اقدر اخد حقي و اسكت , ديه مصيبة . .
طيب اقرأي الحديث الرائع ده , اللي رواه مسلم
عَنْ أَبِي هُرَيْرَةَ رضي الله عنه، قَالَ: جَاءَ رَجُلٌ إِلَى رَسُولِ اللّهِ صلى الله عليه وسلم فَقَالَ: يَا رَسُولَ اللّهِ! أَرَأَيْتَ إِنْ جَاءَ رَجُلٌ يُرِيدُ أَخْذَ مَالِي؟ قَالَ: "فَلاَ تُعْطِهِ مَالَكَ" قَالَ: أَرَأَيْتَ إِنْ قَاتَلَنِي؟ قَالَ: "قَاتِلْهُ" قَالَ: أَرَأَيْتَ إِنْ قَتَلَنِي؟ قَالَ: "فَأَنْتَ شَهِيدٌ" قَالَ: أَرَأَيْتَ إِنْ قَتَلْتُهُ؟ قَالَ: "هُوَ فِي النَّارِ".
واخدة بالك ان الرسول صلي الله عليه و سلم قاله ايه ؟ ؟
قال لازم تمنعه . .
طيب يا رسول الله و لو رفع عليا السلاح ؟ ؟
مقالش قوله خلاص يا حرامي , امشي و ربنا يعوض عليا , لأ , قال ارفع عليه السلاح انت كمان . .
طب يا رسول الله لو هو قلتني , متقلقش , انت في الجنة شهيد في صحبة الانبياء . .
طب يا رسول الله او انا اللي قتلته , متخافش برضه ,هو في النار , وانت غير مذنب . .
يعني الرسول صلي الله عليه و سلم اعطي رخصة بالقتل , للي جاي يظلمني , طالما ده الخيار الوحيد . .
احنا مش طالبين منك لا سلاح ولا خناق ولا قتل , طالبين انك تعاقبيه بكل الطرق القانونية . .
يعني لو ينفع تشتكيه اشتكيه فورا . .
لو تقدري تصوريه فيديو هو بيقول اي كلام زبالة و تفضحيه , افضحيه , اوعي تفسري حديث "من ستر مسلما" علي مزاجك , ستر المسلم ده لما تكتشفي ان زميلتك بتعمل معصية في الخفاء , لكن شخص فاسق بيجاهر بيها , والانيل انه بيأذي الناس , اللي زي ده لابد من كسر كبريائه فورا . .
اي حيوان زي دة , لما يتم فضحه , او فصله , او سجنه ,فانتي بتنقذي عشرات الفتيات العفيفات , واللي كانو هيتأذو بسبب نفس الحيوان لو كان حر , او حيوانات اخري كانو هيتشجعو لو هو فلت بعمله . .
اضرب المربوط يخاف السايب , قاعدة أساسية , وفعالة . .
لو قلبك رق عليه , وحسيتي ان حرام و بتاع , يبقي متلوميش الا نفسك لما تسمعي عن حادثة اغتصاب في الكلية , عملها حيوان كان المفروض يكون في السجن , لكن متسجنش بسبب رقة قلبك عليه . .
المولي تبارك و تعالي لما أكد علي المسلمين (وَلَا تَأْخُذْكُم بِهِمَا رَأْفَةٌ فِي دِينِ اللَّهِ إِن كُنتُمْ تُؤْمِنُونَ بِاللَّهِ وَالْيَوْمِ الْآخِرِ) في إقامة الحد , كان عشان يعلم ان فيه قلوب هترق , هتضعف لما يتقطع لحم الزاني و الزانية من الجلد المتواصل لهم . .
الحل في ايدك , متتردديش ارجوكي