العنوان : الصفات المُرهقة

القسم: #النفسي

الرقم: 98

السؤال:

 

السلام عليكم ورحمة الله وبركاته

 

لو سمحت انا كنت عايزة حل لمشكلتي وهي اني مش بعرف اعرف عن مشاعري الإيجابية تجاه أي شخص أيا كان هو مين

 

يعني ممكن اكون بحب حد جدا واكن له كامل الاحترام والتقدير لكن هذا الشخص لا يعرف بذلك بل إنه قد لا يشعر بذلك مطلقا أو يحس بأني اتجاهله

 

كما أنني لا أستطيع البدأ بأي علاقة اجتماعية الا في نطاق العمل فقط فلا استطيع مثلا البدأ بصداقة مع شخصية وجدت انها تتوافق معي فكريا ومناسبة أخلاقيا وأشعر أن ذلك هو السبب في خسارتي لعلاقات كثيرة في حياتي كان من المحتمل أن تكون قوية جدا ده غير اني باتعامل بعصبية شديدة

 

وف المقابل استطيع التعبير عن عدم توافقي ف الرأي مع أي شخص وبقوة وبارعة جدا ف النهايات استطيع إنهاء العلاقة مع أي شخص يخطئ بحقي أو يتجاوز حدوده معي بل اني قد أحزن أن أخطأ شخص معي و ولم ارد الرد المناسب القوي الذي يتوافق مع شدة للموقف وقوته من وجهة نظري أود أن أعرف رايكم بذلك وهل هي مشكلة

 

مع العلم انا انطوائيه بشكل غير مبالغ فيه بس بحب اكون وحدى كتير ومش بزهأ ولا بمل من دا و كمان كل إلى يعرفنى بيوصفنى بالعند وفعلا انا بحس اني عنيده ف اوقات كتير

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

و عليكم السلام و رحمة الله . .

 

انتي عندك باقة من الصفات المرهقة ليكي انتي , وللي حواليكي , ونصيحة  أخوية , لابد من علاجها في اقرب وقت لأنها بالفعل هتأثر عليكي سلبا

 

ممكن تلاقي كلامنا فيه شوية "ضغط" عليكي , وممكن يضايقك , بس ربنا يعلم ان حرصنا علي مصلحة الشخص بتكون الدافع الوحيد لكتابة الرد بالكامل , مفيش اي دافع تاني . .

 

يعني من كلامك حسينا ان انتي عندك كمية من :

 

• العناد

• العصبية

• الجدال

• الإنطوائية

• كمية من الكبرياء

 

الصفات الخمسة دول مع بعض , كفيلة بجعل الناس تهرب منك , و بجعلك تعيشي منزوية طول حياتك بدون اصدقاء او حد مقرب منك , بل ان لو فيه شخص عايز يتقدملك و يكون شريك حياتك , مش هيستحمل الضغط العصبي ده , وهيشوف واحدة تانية تريح اعصابه .  . .

 

بعض الصفات ديه ممكن تكون بسبب أزمات عندك من طفولتك , وبعضها ممكن يكون من اساليب غير سليمة في التعامل معاكي من اسرتك , وبعضها ممكن يكون لاسباب شخصية , بس في المجمل انتي قادرة علي تغييرها , لأن اغلب طباع الإنسان قابلة للتعديل , لو هو تملك الإرادة الكافية , وكان عنده رغبة حقيقية . .

 

حتي لو موصلتيش في تغييرها لدرجة الإصلاح الكامل , فيكفي انك توصلي لدرجة التقليل منها  والتخفيف من آثارها , لانقاذ نفسك من اثارها المدمرة . .

 

و أنا أخشي انك لو تكاسلتي عن اصلاح الصفات اللي عندك , هتجدي نفسك تدريجيا ان دائرة معارفك و اصدقائك تتآكل و تتلاشي , وانك هتقضي اغلب اوقات حياتك وحيدة , وده شئ مؤلم فوق الوصف . .

 

-----------------------------------------------------------------------------

 

و لمحاولة إصلاح النقاط الخمسة اللي عندك , ممكن نقولك علي عدد من النصايح :

 

 

 

 

 

 

توقفي عن الجدال , احنا كعرب مش متعودين علي النقاش الهادي , وغالبا بنتعامل باسلوب احمق في الجدال و معندناش فقه اختلاف الآراء , فانتي ريحي نفسك , ارحمي اعصابك وتوقفي عن الجدال مع اي حد , لنفسك قبل ما يكون لحد تاني

 

في نفس نقطة الجدال , لابد تقاومي إغراء انك تردي علي شخص بيفتح موضوع , وبيقول رأي مخالف لرأيك , ديه أهم خطوة , انك بالفعل تكوني قادرة علي التحكم في نفسك, وانك تتوقفي عن الاشتراك في اي نقاش في مواضيع سياسية او فكرية او غيرها , سواء كان الكلام ليكي او لغيرك , جربي كدة تعيشي لمدة شهر من غير اي جدال هتجدي راحة نفسية غير مسبوقة

 

 

 

في نفس الإطار , ماذا عن المشاركة في عمل خيري , يعني شوفي جمعية خيرية , وشوفي ازاي تقدري تشاركي معاهم في نطاق وقتك و جهدك , حتي لو مرة في الشهر  , ثقي انك هتجدي اثار ايجابية عديدة من مشاركتك معاهم

 

 

 

كمان راعي لما تتكلمي مع الناس مشاعرها و افكارها , حطي نفسك دايما مكان الشخص اللي بتكلميه وشوفي هل هيكون الكلام ده مناسب ليه ولا لا , زيني كلامك بابتسامة هادية و اهتمام مستمر , هتجدي ان تواصلك مع الناس بقي بنتيجة مختلفة

 

أخيرا , هاتي كتاب "لغات الحب الخمس" لـ "جاري تشابمان" , اقريه هيفرق معاكي كتير

 

​