العنوان : الحرب الأسرية

القسم: #الاجتماعي

الرقم: 46

السؤال:

 

صباح الخير عليكم جميعا

 

شوفت صفحتكم حالا قبل ما ابعت و ربنا وحده اللى عالم بحالت آسفه جدا انى هطول عليكم و شاكره زوقكم و سعه صدركم فى الرد 

 

مبدئيا انا بدات اتساءل هل فعلا انا بقيت ببالغ فى مشاعرى ولا فعلا المواقف تستاهل احساسي ده

 

انا ع خلاف دايم بولدتى و من زمان جدا انا حاليا ٢٣ سنه و افتكر الخلافات دى بدات احس بيها من و انا فى اولى او تانيه ابتدائى و طبعا الوضع مع مرور الايام كان بيتفاقم

 

عمرى ما هنسي يوم ما نيمتنى ع الارض و انا لسه ٧ سنين و قعدت فوقى و نزلت ضرب فيا و بقه يغمى عليا و اصحى ولا ٥ مرات و هى لسه بتضرب فيا كل ده علشان طلبت منى انظف الشقه و مرضتش

 

طول عمرها بتفرق بينى انا و اخواتى فى المعامله و دايما تقولهم اختكم غيرانه منكم انتى بتغيرى منهم ليه ؟! و ربنا وحده يعلم مقدار حبي لاخواتى

 

مره و انا فى اعدادى روحت اشترى هدوم و هى بتفاصل مع الراجل بيقولها سعر قالتله ليه كل ده متخدهاش انت و تجيب الفلوس دى  , لو فضلت احكى عن كسره نفسي من موقف ذى ده و ان لغايه الوقتى و بعد اكتر من ١١ سنه كل ما اشوف الشخص ده بحسنى عريانه قدامه مع انى متاكده انه اصلا مش فاكرنى 

 

انا اللى امى عمرها ما دعتلى بحاجه عدله و كل دعواتها ربنا ينتقم منك ربنا ما يكتبلك فرح ابدا اللهى ما تشوفى يوم عدل فى حياتك حسبي الله و نعم الوكيل فيك

 

انا مش مستوعبه ان ممكن ام تدعى ع بنتها كده و اكتر حاجه بتكسرنى ان دى معاملتها معايا انا و بس هى كويسه جدا مع اخواتى للعلم انا الكبيره و بعدى٤

 

تعرفوا و الله من كتر سوء معاملتها انا كنت بشك ان انا مش بنتها وانها مش امى

 

كنت دايما شايفه السند فى ابويا و بستعوض بيه كسره نفسي لغايه ما دخلت الجامعه و قررت اغترب علشان ارتاح من الضغط ده و مع الوقت عرفت انه مش بس اسوء منها لا ده غالبا هو سبب قلبتها عليا

 

امى يوم ما اشترى حاجه لنفسي تفضل تعيط و تتنكد و ممكن تدعى عليا عادى جدا , موبيل بقه لبس بقه

 

اول مره ارتبطت كان و انا فى اولى ثانوى و بالرغم من كل الخلاف الا انى كنت دايما بحكلها ع كل حاجه بعملها و فى المقابل مهما اكون مامنالها ع سر بتروح تقول لابويا و ممكن تكون حاجه مينفعش تتقال اصلا

 

المهم مره هى كلمت الولد اللى ارتبطت به و قالتله انت حبيتها ع ايه دى شيخ الغفر اقسم بالله انه فضل يذلنى بالكلمه دى لغايه اخر مره كلمته فيها

         

مره شديت معاها فى اجازه من اجازات الكليه و لقيتها بتقولى انا هستحملك ع راي ابوكى كلها كم شهر و ترجعى المدينه الجامعيه و نخلص منك وقتها مصدقتهاش لان ابويا فى وشي بيعاملنا كويس جدا و بالعكس بيغالط تصرفاتها و بيقولى امك استحمليها هى كده طول عمرها

 

بس للاسف مره صحيت بليل و انا راحه اشرب سمعته بيقولها نفس الجمله و دى كانت اول صدماتى فيه

 

ع فكره هو اكتر من مره يكون عايز يطلقها او يتجوز عليها و انا اللى بقففي صفحها

 

مشاكلى معاه بدات لما دخلت الجامعه انا كنت شاطره جدا بس للاسف مجبتش المجموع اللى يدخلنى الكليه اللى كنت عيزاها و هو بعد ما طلعتلى تجاره قالى هدخل تجاره انجليزى و انا مكنش فى دماغى انا طلعت متحطمه من ثانوى اصلا

 

و فجأه و بدون اى مبررات قالى لا انا مش حمل مصاريفها و انا مهتمش وقتها ولا كنت اعرف الفرق بينهم مع العلم مصاريفها وقتها ٣ الاف و انا عارفه و هو عارف انهم ملاليم بالنسباله و خصوصا فترتها

 

 انا مع الوقت بدات احس انه استخسر فيا بس كنت بقول محصله بعضها الوضع بينى و بينه اتقلب اكتر مع اول حد اتقدملى و هو بيقولى فرصه و عايز يقلبنى و خلاص و كل مره يتقدم واحد يلا فرصه وافقى من غير حتى ما يسال عنه

 

و هكذا بقه كل اللى اتقدموا بنفس اللبص ده كده

 

عمرى ما هنسي يوم ما فهمنى ان فى واحد متقدملى علشان يعرفنى شكلا و معجب بيا و لما قعدت معاه و بساله ليه اتقدمتلى انا بالاخص قالى ابوكى هو اللى قالى عليكى متخيلين كسره نفسي

 

و انا فى ٣ كليه تعبت جدا و روحت لدكتور نفسي و كان تشخيصي نوبات هلع

 

للعلم اول مره جتلى النوبه كنت فى امتحان الترم اللى جتلى فيه النوبه تقديره جيد جدا لانها جت فى الامتحان قبل الاخير و السنه و نص اللى بعده كانوا سبب فى ان تقديرى العام يكون جيد  

 

امى جت معايا مره واحده و كان بعد وقت طويل جدا من بدايه علاجى جايه و مجهزه كلمتين تقولهم للدكتور و مستنيه يسقفلها و يقولها بنتك مريضه و متقلقيش هعالجهالك لكن للاسف من اول كلمتين قالها دى ع فكره بنتك ازاى تتكلمى كده ؟! و هى اتغمت فى نفسها

 

لما نزلنا من عنده بقولها يا ريت تبداى تراجعى نفسك بتقولى انتى مخبوله اصلا انتى و الدكتور بتاعك انتى اصلا قيلاله انك بتكرهينى مع العلم انا عمرى ما جبتله سيره مشاكل البيت لان بكل بساطه لما جيت بس افتح فى اى حوار ملهوش علاقه بنوبات الهلع كان بيقولى خلينا نركز فى المهم

 

انا فضلت سنه و نص بتعالج كل ما ابويا يتكلم معايا و كلامى ميعجبوش يشاورلى بايده انتى مجنونه ؟! و هى بقت تقولى انا هستحملك علشان تعبك !

 

تمر الايام و بعد ما خلصت جامعه روحت جبت قط اقسم بالله انها استكرته عليا و بقيت تدعى عليه و تبصله فى اكله و تقولى انتى بتصرفى عليه اد كده مع العلم انا بصرف عليه من فلوس شغلى و حتى الايام اللى مبشتغلش فيها باخد منابي فى الاكل و بقاسمه فيه

 

من سنه بالظبط و ذى الايام دى بدات الاوضاع تزداد سوء و كان بحجه القط و شدينا مع بعض جامد و بدات تقوم ابويا عليا لدرجه ان من نص شهر ١٠ لبعد نص ١٢ محدش منهم بيكلمنى وقتها قولت خلاص انا اخد بعضي و ارجع محافظه دراستى و اشتغل هناك و لما بلغتهم طبعا اعترضوا و بداوا يعدلوا معاملتهم و الحقيقي انا كنت متردده جدا فى الخطوه دى

 

الاوضاع بتسوء و بتسوء و قولتلهم انا هخلص التربيه دى و همشي

 

تعرف كانت نفسيتى تعبت جدا الفتره دى و بقيت كل ما تحصل مشكله اقولهم همشي و الله انا مكنتش بهدد انا بقول اللى انا المفروض اعمله و مستنيه منهم رجعه بس ابدا

 

لغايه ما فى مره قالتلى ما تغورى انتى فاكره نفسك بتهددينا وقتها بس قررت فعلا انى خلاص همشي

 

قبل ما امشي بمفيش اسبوعين موبيلى وقع فى المايه و لما طلبت غيره من ابويا مرضاش و وقتها بعت حلقي يومها قالى هجبلك ٥٠٠ ج و انا روحت اشتريته و لما رجعلته علشان اخد المبلغ قالى انتى مش خلاص جبتيه انا مفيش معايا فلوس

 

و نفس اليوم اللى حلف فيه ١٠٠ يمين انه معهوش ولا مليم نزل جاب لاخويا اله حاسبه باكتر من ١٥٠ ج

 

انا فعلا سبت البيت و كان اسوء احساس ان انا مكنتش بفتكرهم و ان انا فكرت انى لما هبعد هيوحشونى و احس بقيمتهم و الكلام  ده بس الواقع كان معاكس تماما

انا

كنت كل ما افتكرهم افتكر كسره نفسي و احزن عليها جدا

 

امى اول مره كلمتنى بعد ما سبت البيت بتقولى فين الاطباق الصينى اللى مش عارفه لونها ايه و اخدتى الشفشق اللى شكله معرفش ايه ليه ؟! هه اها و الله ده كان كل همها شويه الصينى مع العلم ان وربنا ما اخدت منهم حاجه و مع العلم برده انا اول مره نزلتلهم كان بعد شهرين و نص و اول حاجه اتسالت عنها هو شويه الصين هه اها و الله و يمكن هى لغايه الوقتى مسرقانى فيهم

 

 

لما سيبت البيت قابلت صديق و بقينا مقربين و هو سافر من فتره و طلب منى ارجع البيت علشان يكون مطمن عليا ع فكره انا عرفته ع اهلى و هو اتفاوض معاهم و قالهم هرجعها بس عاملوها احسن

 

انا رجعت البيت من شهرين تقريبا او اقل حاجه بسيطه و الاوضاع ذى الاول تقريبا و يمكن اسوء و اسوء ما فيها ان انا مبقاش فيا طاقه  , مفيش مصيبه بتحصل فى البيت الا و تلبسهالى

 

من فتره اختى بتسالنى ع بريمه حلق و انا قولتلها مشوفتهاش و انا فعلا ما شوفتهاش بعد كم يوم الاقى امى بتقول لابويا انا مش عارفه البريمه دى اتنطرت ولا اتاخدت بالايد انا كان ردى بكل تلقائيه احتمال اكون سرقتها قالت انتى حد وجهلك كلام و لا اللى على راسه بطحه

 

انا بقه كل احساسي انها فرقت بينا فى المعامله العاطفيه و هو فى المعامله الماديه  و فعلا انا بطلت احبهم و ده كاسرنى جدا و الله

 

انا عارفه انى جزء كبير من المشكله بس الجزء التانى مش راضى يعترف بمشكلته و انا فعلا مكنش ينفع اعيش طول عمرى بتعالج نفسيا و اللى تعبونى مش راضين يعترفوا بمرضهم اصلا

 

ربنا وحده اللى يشهد انا مفترتش بكلمه واحده عليهم اصلا هبعتلها الكلام ده بردكم عليه و اللى هتقوله هعمله

اسفه جدا جدا ع الاطاله و الله بس كان لازم افضفض

 

امى انا معرفش بس اللى اعرفه ان دى معامله امها معاها و هى البنت الكبيره لامها مع العلم نينتى كانت بتحبنى جدا و تقريبا نينه امى كانت بتعامل نينتى برده وحش و برده نينتى كانت البنت الاولى متفهمش تقريبا يورثه و تقريبا انا اللى عليا الدور !

 

ابويا انا عمرى ما انتبهت لسلوكه غير لما دخلت الجامعه و بعد الاحداث دى و بمراجعه الذاكره اكتشفت انه كان بيفرق بينى و بين اختى حتى فى المصروف و مش عارفه ليه اتغاضبت عن ده او اتعاملت معاه ع انه عادى هو بيعامل اخويا الصغير وحش جدا برده بس حظ اخويا ده ان امى بتحبه جدا

 

واظبت ع العلاج بالملى اول سنه ال٦ شهور اللى بعدهم بدات مهتمش و ماخدش الدوا ولا افتكره الا لما اتعب بس برده مكنش بيعدى يوم الا ما باخده حتى لو مش فى معاده

 

لما وقفت الدوا كان لان حسيت حياتى واقفه عليه حسيت كان له سلطه عليا لما انسي اخده اتعب كنت كارهه فكره انى مجبره اخده علشان ابقي كويسه فوقفته و من غير ما ارجع للدكتور

 

النوبه مش بترد بنفس حالتها انا تقريبا ببقه خايفه ترد و ده بيستمر لوقت قليل و فعلا مش هقدر ارجع للعلاج حتى و انا عارفه انى ممكن اكون لسه فى حاجه له بس نفسي اتعدل سلوكيا العلاج النفسي فى الاخر بقه مرهق لنفسيتى اد ارهاق تعبها النفسي !

 

للعلم عندى اكتئاب و حياتى بقت روتنيه و ملهاش اى لزمه و يوم بيجر يوم و نفسي اعمل حاجات كتير بس مش باخد الخطوات اللى توصلنى لاهدافى ولا حتى قادره احاول اخدها

 

انا زعلانه من نفسي جدا انا بقيت اوحش من اللى كان ممكن اتخيل انى اوصله فى يوم  , بقيت انانيه باكل اكلى لوحدى مستخسره فيهم اى حاجه عمرى ما كنت اتخيل ان يوم ما اوصل لمشاعر الكرهه تكون لاهلى

 

امى عايزه خدامه فى البيت اخواتى يوسخوا و انا انظف و انا رفضت ده انا متمرده و ده مش مخلينى سالكه معاهم مبعرفش اطاطى !

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

صباح النور عليكي

 

كالعادة مشكلة مركبة , ومتشابكة مع بعض , ومفيش حل مباشر او سهل بالنسبة لها .

 

ومشكلتها ان انتي بتجمعي ما بين معاناة المعاملة الزبالة اللي منهم , والمرض اللي مأثر عليكي بشكل كبير .

 

والمشكلة الأكبر ان مصدر المعاناة مش صديق او زوج او اخ , ده الأب و الأم اللي المفروض هما مصدر الحنان و الرعاية المستمرة .

 

ولو هنجاوب علي السؤال الخص بيكي في بداية الرسالة , لا انتي مش بتبالغي ولا حاجة , بالعكس انتي عندك تحمل اكتر من المتوقع , و كتير من الناس لو في مكانك كانو انفجرو فيهم من زمان .

 

تعالي نمسك عناصر الرسالة , ونقولك تعملي فيها ايه نقطة نقطة .

 

 

• الخلاف مع الوالدة

 

كل ما اعيد قراءة رسالتك اتسائل عن حقيقة المشكلة , بالفعل فيه لغز موجود .

 

يعني ده مش تعامل أم ابدا , ده حتي مش تعامل زوجة اب  , وقعدت افكر في سبب مقنع للي بيحصل  . .

 

يا اما فيه سبب انتي مش عارفاه , يا اما فيه شئ انتي مقولتيهوش , يا اما هي عندها اضطراب نفسي حقيقي .

 

و حتي النقطة اللي انتي ذكرتيها : ان امها كانت بتعاملها كدة , هي مش كافية كمبرر , يعني ممكن تكون سبب ان الام تكون باردة شوية  ,او عنيفة , بس اللي بتعمله هو عذاب مستمر , وبشكل غير معقول  .

 

حتي ربط مشكلة "النوبات" عندك , هو ربط غير موضوعي , لان وجود النوبات عندك المفترض يجعلهم يتعاملو معاكي بشكل افضل , ويتقبلو منك حاجات قد تكون غير مقبولة في الاوقات العادية , ففعلا ديه علامة استفهام محيرة .

 

هل مثلا في تعاملاتك معاها فيه شئ من الحدة او العنف , هل انتي بتأذيها بطريقة ما , فده رد فعلا ليكي ؟

 

فيه بعض الامهات ذوات النظرة المحدودة , بيتمنو ان يكون ابنهم الاول "ولد" , مش "بنت"  , فممكن يكون تعاملها معاكي بالمنطق ده من يوم ما اتولدتي , ده وارد

 

 

• الخلاف مع الوالد

 

و ده هيكون فيه نفس الكلام عن الام  ,ان فيه سبب معين احنا مش فاهمينه .

 

الا ان الاب كان ذكي شوية , فكان مخبي عنك شعوره , وكان بيتعامل معاكي بشكل احسن شوية , لغاية لما انتي عرفتي .

 

برضه مش واضح ايه هو السبب , غالبا لنفس السبب المجهول , اللي امك متضايقة منك عشانه .

 

والحقيقة اني مش لاقي حل مباشر لعلاج تعاملهم "المَرَضي" ده معاكي , حاولي تشوفي كبير في العيلة يوقفهم عند حدهم , ويخليهم يفوقو من الغيبوبة اللي هما فيها

 

 

 

• بالنسبة لارتباطك السابق .

لفت انتباهي كلمة " فضل يذلنى بالكلمه دى لغايه اخر مره كلمته فيها" , واضح ان ارتباطه بيكي مكانش عن حب او جدية , لكن عن تسلية , لان اللي بيحب شخص , بيخفف عن آلامه , مش يقعد يتريق عليه بكلمة سمعها عنه

 

كمان لما قلتي "كنت باحكيلها حاجات مينفعش تتقال" , ظهرت علامة استفهام ايه نوعية الحاجات ديه  , لان اصلا اي اتنين بيتعارفو او حتي مخطوبين , فالمفروض ان علاقاتهم بالكامل تكون سطحية و محدودة  .

 

كمان لما ذكرتي ان فيه صديق , و انه مش بيفكر في الجواز , لا و كمان جالكم البيت , هنا بتثار علامات تعجب .

 

اخشي ان اللي بيحصل هو شئ بعيد شوية عن القيم و الأطر السليمة , اللي نعرفها و متربيين عليها .

 

بل ان اغلب المشاكل المبعوتة للصفحة هنا , بيكون سببها ارتباط قلبي بين بنت متألمة , وشاب بيتسلي , ومش بيفكر في الجواز , زي ما اخينا بيعمل .

 

و باي طريقة غير مسموح انه يصرف عليكي , حتي لو بحسن نية , حتي لو بيتعامل معاكي زي اخته , حتي لو هتباتي جعانة , ده شئ غير مقبول .

 

زي ما بنقول النقاط اللي ليكي بنقول اللي عليكي , واول خطوة لعلاج اي مشكلة هي المصارحة التامة بينك و بين نفسك , عشان تتحل المشكلة بشكل سليم , لكن العند و المكابرة , هتقف عقبة قدام اي حل.

 

خدي بالك ان المشاكل كلها مرتبطة ببعض , كمان الحلول مرتبطة ببعض , ومفيش حل لنقطة , من غير ما هتتقاطع مع نقاط تانية في نفس الإطار .

 

احنا مش بنقيم اللي فات قد ما احنا بنتعلم دروس , عشان متقعيش في غلطة تانية , او مشكلة مشابهة في المستقبل .

 

---------------------------------------------------------------------------------------

 

 

• بالنسبة لمرضك

هو ده شئ لا يمكن السكوت عليه , يعني حتي لو مشاكل البيت اتحلت , فترك النوبات بتجيلك بشكل مستمر ممكن يقضي عليكي .

 

انتي احسنتي التصرف من البداية انك رحتي لطبيب نفسي , واتمني تتأكدي ان علاجه فعال و كويس , وانه فاهم حالتك , ولو كدة لازم تكملي معاه و تتابعي الدوا اول باول .

 

ولو شايفة الدوا مؤذي روحيله تاني و شوفي رايه  ,وهو ادري مش انتي اللي تتخذي قرار .

 

ولو شايفة ان الطبيب مش بيفيديك او مش فاهمك , شوفي واحد غيره فورا .

 

ولو اهلك مش مهتمين بده , سيبك منهم , وكملي انتي طريق علاجك .

 

ولو الفلوس مش مكفية معاكي , روحي لكل قرايبك و اطلبي منهم فلوس بشكل مباشر , وقولي كدة من غير كسوف , انا مش عايزة الفلوس عشان اتعايق ولا اتمنظر , انا عيانة و مش معايا فلوس , وابويا و امي مهملين , قوليها عادي و باعلي صوت لان ده حقك .

 

ارجو متتوقفيش عن العلاج ابدا , ومش انتي اللي تقولي اوقف الدوا , الدكتور اللي يقول .

 

--------------------------------------------------------------------------------------------

 

• بالنسبة للسكن بعيد

 

في الاحوال الطبيعية , بيكون ده مش حل , بس حاليا مش لاقي اي بديل للاسف , طالما الاب و الام عندهم الحماقة الكافية انهم مش عارفين يحتوو بنتهم او يصرفو عليها  .

 

للأسف مش قادر اقولك ارجعي البيت  ,وهما مستمرين في ايذائك بالشكل المستمر ده , والحل الوحيد انك تكملي زي ما انتي , وتحافظي علي نفسك بشكل كامل .

 

و المحافظة علي النفس معناها التمسك بالقيم و الاطر الدينية اللي مينفعش نخترقها لاي سبب , يعني مفيش اي تعامل مع شباب الا في اطار الشغل , و مفيش حاجة اسمها صحاب اولاد , ومفيش حاجة اسمها حد يصرف عليا , ومفيش حاجة اسمها التواصل مع الشاب غريب الاطوار ده  .

 

وجود عذر او سبب معين  , لا يبرر ابدا عمل تجاوز محدد , خاصة ان التجاوز ده اصلا مش هيحل المشكلة و لكن هيعمقها

 

يعني كون انك تعيشي بعيدة عن بيت الاب و الام , ده استثناء ممكن نقبله لان مفيش بديل , ولانه هيرحمك علي الاقل من العذاب اليومي , لكن ان يكون فيه صاحب او حد يصرف عليكي , ده ايه المشكلة اللي هيحلها ؟  ؟

 

و للأسف الشيطان هيتدخل في ذهن اي شاب بيعمل حاجة زي كدة , هيحس ان ليه حق عليكي بشكل ما , انتي مش بتتعاملي مع شخص بعفة سيدنا "يوسف" , في النهاية هو بشر , والشيطان هيتغلب علي اي حاجز طالما احنا فتحنا الباب .

 

الباب يتقفل تماما , و البدائل موجودة , وبالـ 2500 جنيه مشي حياتك و ربك هييسرها

 

 

سامحينا لو مكناش عارفين نجيب حل حاسم  ,لان للاسف التعامل الاحمق من الاب و الام دمر كل شئ , واللي زي دول لازم يتعاقبو علي اللي بيعملوه فيكي

 

ابدئي استقلي بنفسك واحدة واحدة , لغاية لما تقابلي شاب محترم  , عايز ارتباط حقيقي و جاد , وقتها مشاكلك هتنهي ان شاء الله لما تكوني في عصمة حد كويس .

 

و في نفس الوقت متتخليش عن علاجك ابدا , حتي لو هتتقلي علي كل قرايبك , اياكي تتكسفي منهم , لغاية لما ابوكي و امك يفهمو حجم الجريمة اللي بيعملوها

 

اخيرا حاولي تشوفي المشاكل ديه واللي تم حلها , واللي هتفيدك بشكل ما , فيها نصايح مهمة

 

رسالة  :  أعراض الإكتئاب

رسالة :  ابي يكرهني

رسالة :  بناء الشخصية

​

ربنا يوفقك يا رب