وقتي و الفيسبوك
الرسالة السابقة
العنوان : وقتي و الفيسبوك
القسم: #النفسي
الرقم: 18
السؤال:
صباح الخير عليكم
انا كنت من اوائل الناس اللي عرفت الفيسبوك , من ساعة ما انتشر في مصر في 2007 , و يومها مكانش الفيس حلو كتير , لا فيه صفحات ولا جروبات ولا ناس كتير تعرفهم فكنت بدخل يمكن مرة كل كام يوم
بس حاليا بقي عندي مشكلة مع الفيس انه بياكل وقتي بشكل رهيب , يعني مش اقل من 3 او 4 ساعات يوميا , من اللاب للموبايل , من الجروبات للصفحات للايفينتات للشات , بقيت سجين جوة الزفت ده
من حوالي سنة تعبت جدا , وعملت عدم تفعيل لحسابي , بس مستحملتش اكتر من يوم واحد , و بقيت بافتحه اكتر من الاول
مش عارف اعمل ايه في الزفت ده تعبت نفسيا , وشغلي اتأثر , خاصة ان رئيسة القسم عندي قالتلي اكتر من مرة عليه و حذرتني افتحه في الشغل تاني , انا بقيت زي المدمنين
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
مساء الخير يا ريس
شوف يا سيدي
فيه قاعدة بتتقال (حينما لا تعلم ما هو ثمن السلعة , فاعرف انك أنت السلعة) , وهي بتطلق علي الخدمات المجانية بدءا من ايميلات جيميل , ومرورا بالفيس و الواتس و انستاجرام و فيبر و ايمو و كل الحاجات ديه اللي التهمت حياتنا . .
التمن الاساسي اللي بيتدفع من المستهلكين للبرامج دييه هو وقتهم و عمرهم اللي بيروح قدمها , واللي طبعا بيعمل مشاهدات اكتر للاعلانات , وبالتالي تزداد ارباحهم . .
بس برضه لازم نعرف حاجة . .
غلطان اللي يقول ان البرامج ديه شياطين معمولة عشان تدمرنا , لأن هي زيها زي اي حاجة تاني , ممكن تستفيد بيها بشكل كبير و تنفعك في دراستك و شغلك و حياتك , وممكن تدمر كل حاجة عندك , وكون انك مدمنها ديه مشكلتك في التعامل معاها مش مشكلتها هي . .
لو هتعد فوايد الفيس فهي كتيرة بالفعل , كفاية انها بتسهلك تتواصل مع ناس كتير انت بالفعل مكنتش عارف توصلهم , تكلم عمك في المنصورة و ابن خالتك في اسوان , و خالك اللي في كازابلانكا , وخطيبتك اللي راحت كوالالامبور , بتكلمهم وانت في المترو , ومن غير اي مصاريف
الفيس بوك بيربطك باحداث العالم فورا , تتابع ايه اللي بيحصل في كل مكان انت مهتم بيه , ربطك بالناس اللي تهم تسمعلهم , ربطك باصحابك و تتطمن عليهم اول باول , الكلمات اللي بتقراها ديه هي علي صفحة علي الفيسبوك , الفيس اداة هايلة , بس نحسن استغلالها , إطلاق الاحكام العامة زي (الفيس ده شيطان) كلام غير دقيق من شخص مش عارف يوازن بين فوايدة و اضراره . .
---------------------------------------------------------------------------
طب تعالي نتكلم عن مصادر تضييع الوقت في الفيس عشان نعرف بعدها ازاي نتجنبها :
-
الصفحات و الجروبات الهايفة , اللي يا إما بتعمل بوستات عاطفية شديدة التفاهة , او نكت معادة انت عارفها بالفعل , او اخبار الفنانة ام سحلول اللي اتجوزت تاني من قبل ما تخلص فترة العدة , او الصفحات الرياضية اللي مليانة رغي و صداع , او الصفحات اللي بتنشر معلومات ثقافية ضحلة انت في غني عنها , او حتي الصفحات والجروبات اللي بتعمل حاجات مفيدة , بس اللي مش بتعمل اكتر من ان هي بتعمل اعادة نشر للحاجات اللي بالفعل غرقت الفيس بالكامل .
-
الصفحات و الجروبات المفيدة , ايوة هي مصدر تضييع الوقت , لان انت مش محلل سياسي عشان تتابع اخبار الحرب في اليمن و تقرا تفاصيل كاملة , لا انت محرر فني عشان تعرف تحليل كامل لفيلم تامر الجديد , ولا انت سكرتير محمد صلاح عشان تتابع لحظة بلحظة الدوري الانجليزي العنيف بطبعه , الصفحات المفيدة , بتكون كويسة لما تشوف عنواين سريعة في 5 دقايق , مش الواحد يتنح قدامها لما عينه توجعه
-
منشورات الأصدقاء , و آه من وجع القلب من منشورات الاصدقاء , ويا سلام لو عندك كام الف صديق , هتلاقي النيوز فيد عندك مطحونة , من اللي بيقولك فلسفته في الحياة , واللي بيشكيلك من ظلم التاريخ , واللي بيصوت علي الدوري الإيطالي , واللي منفسنة من صاحبتها و ترزع كلمة مقصودة في الآخر , وحوارات بقي ملهاش آخر ,عايزة واحد فاضي لا بيدرس ولا بيشتغل ولا عنده زوجة واطفال , ولا عنده حياة اساسا , عشان يتابع زيد و عبيد
-
الشات , ويا سلام بقي لو واحد فاضي و عايز يطلع زهقه عليك , او واحدة تتسلي شوية و تعيش في فيلم المراهقات , او حتي حد من قرايبك اللي عنده اتساع في الوقت وانت معندكش
-
الالعاب , سواء في الفيس او الماسنجر وهي مش هتخلص , خاصة لو تحديت حد معين و عايز تجيبه الارض
-
إدارة صفحة او جروب , لما انت تكون ادمن في صفحة معينة او جروب , وتتابع بقي بوست بوست , وكومنت كومنت , ولايك لايك , وكلمة كلمة , ويا سلام لما تبقي مشهور علي الجروب و الناس كلها تستشيرك و تسالك , و انسي انك تعرف تتحكم في وقتك
- الجدال السياسي , تيجي شبكة رصد تنشر صورة لمرسي , يجيلك واحد ويشتم شتيمة , ييجي التاني و يشتم في السيسي نكاية في الاول , ييجي التالت و يشتم في الاتنين , ييجي الرابع ويشتم في الثورة , ييجي الخامس يدعي لمبارك بطول العمر , ييجي السادس يقوم يدعي علي عبد الناصر , ييجي السابع و يعمل اعلان عن صفحته في تعليق , تيجي التامنة و تقول يا جماعة ادخولو علي بروفايلي عشان انا بجري علي ايتام , وحوارات يا ريس
- الفضول : تيجي واحدة اسمها (الجنة طريقي) تعمل تعليق علي منشور في الجروب بابتسامة , وهي حاطة صورة طفلة محجبة بتقرا القرآن, تقول يا سلام علي التقوي و الورع , هوب تدخل صفحتها تشوف تكتب ايه , تلاقي عملت بوست عن فضل ذكر الله , تلاقي خمسة صديقاتها علقو علي البوست , تدخل في بروفايل واحدة واحدة فيهم , ايه ده , ديه واحدة فيهم محجبة وواقفة جنب راجل كبير ,يا تري ابوها ولا خالها , ولا مين , ايه ده , واحدة فيهم منقبة وبتتصور جنب وردة , معقول كدة ؟ ؟ ينفع يعني ؟ ؟ بص هناك , ده فيه واحدة منقبة بتتصور جنب واحدة لابسة بنطلون , ايه الموضوع , ده فيه واحدة عملت بوست عن صراحة و فيه 43 تعليق , يللا نقراهم , يا خبر , ده فيه ولاد بيعلقو عليها , مين دول , مين اللي عمل لايك برمز القلب ده ؟ ؟ ؟
الحاجات ديه و غيرها اللي بتمتص يومك و عمرك واحدة واحدة , وهتفاجئ انك بقالك 6 سنين متخرج , لا عملت ماستر ولا سافرت , ولا وفرت مبلغ , ولا خدت ايلتس , ولا خلصت MBA ولا حتي خرجت و اتفسحت بشكل كافي , ولا عملت اي هدف من اللي كنت بتحلم بيه من 5 سنين , بسبب ان وقتك بيتاكل من الهيافة ديه , ومش عارف تخرج من سجن الفيسبوك . .
---------------------------------------------------------------------------
طب و الحل ؟ ؟
كالعادة , اي حل لمشاكل ذاتية محتاجة ارادة و صبر و طولة بال و استمرارية , واللي من غير الحاجات ديه اي خطوات هتاخدها هتكون useless
هنقول هنا مجموعة من الخطوات , حاول تعملها كلها او اغلبها , هتلاقيها قللت كتير من الوقت المستهلك في مفرمة الفيسبوك , مش هتمنع ضياع الوقت لكن هتقلله . .
-
اعمل (عدم متابعة) لكل اصحابك علي الفيس , المهم و الهايف , الجدع و العفش , كتر البوستات و التعليقات بتعملك تشتيت غير طبيعي , متلغيش الصداقة لانهم هيفسروها غلط , عدم المتابعة كفاية انها تشيل كل بوستاتهم من النيوزفيد عندك , ولما يهمك تعرف الواد سيكا عمل ايه في البشلة اللي ضربت نفوخه , ابقي ادخل علي صفحته و هتلاقيه باعت كل التفاصيل
-
اعمل (عدم متابعة ) من كل الجروبات و الصفحات , و الغي اي اشعارات بتجيلك منها , لو عايز تعمل استثناء يبقي حاجات اقل ما يكون , يعني بالكتير تلاتة او اربعة من الصفحات و الجروبات , وتكون الحاجات شديدة الأهمية فعلا , عايز النيوزفيد عندك تبقي مهوية , فاضية , مفيهاش اي حاجة ,بحيث لما تدخل عليها كل شوية تلاقيها مملة و مفيهاش جديد , تقوم ترجع للشغل تاني , نفس الموضوع لو عايز تعرف الكلبة بتاعت اليسا اتعالجت من الاسهال ولا لا , ابقي ادخل علي جروب "محبي كلبة اليسا" و اطمن
-
اخرج من كل التطبيقات اللي انت مشترك فيها , انت مش ناقص ضياع وقت
-
شيل تطبيق الفيس من موبايلك , بتكون طريقة لطيفة انك تجبر نفسك انك متفتحوش من الموبايل و تضيع وقتك فيه
-
متخليش الفيس يعمل دخول اوتوماتيك في اللاب , سواء الشخصي او بتاع الشغل , كل مرة يطلب الايميل و كلمة السر , وده بيخليك تكسل انك تكتبهم كل شوية فيخلي دخولك اقل علي الفيس
-
الغي من الموبايل اي اشعارات يعملها برنامج الفيس او الماسنجر , عشان مش كل دقيقتين يزن عليك و يفكرك , انساه خالص طول ما انت شغال
-
اعمل حاجة زي الجدول بالنسبة لك , انا هافتح الفيس في الشغل كل ساعتين لمدة 10 دقايق , وفيه تطبيقات بتساعدك علي كدة
-
لما تنام اقفل الوايفاي عشان متمسكش الموبايل علي السرير و يسرح معاك الوقت
-
مش لازم لما حد يبعتلك علي الماسنجر ترد عليه حالا , عادي جدا سيب الرسايل تتراكم و افتحها مرة او مرتين في اليوم و رد عليهم كلهم سريعا , طبعا باستثناء الاب و الام
-
الغي الخاصية السخيفة في الماسنجر بتاعت الشات اللي بيطلع في دواير و كور ديه , بتنط عليك فجأة و تقطع اي حاجة بتعملها مع اي رسالة من حد , الغيها و افتح الماسنجر في وقت محدد
-
تجنب ادارة اي صفحة او جروب الا للضرورة القصوي , ومتقلقش صفحة محبي جزمة محمد صلاح هتعرف تصرف امورها من غيرك , سيبها خالص لواحد تاني بيحب الجزم , انت وقتك اهم . .
-
لو فيه واحد ولا واحدة انت متعود انه بيرغي كتير علي الماسنجر , الاول اعمله تلميح بالذوق ان انت مش فاضي , لقيته مش فاهم , سيب رسالته متقراهاش لمدة اسبوع و بعدها رد عليه ,انت آه هتخسره , بس احسن ما تخسرك حياتك بسبب وقتهم اللي بلا قيمة اللي مش عارفين يضيعوه فين . .
-
جرب تعمل عدم تنشيط لحسابك لمدة اسبوع مثلا , جرّب مش مصيبة كبيرة , هتلاقي ان نشاطك في الاسبوع ده اتغير فعلا
النصايح مش هتخلص , وفي الآخر هي ارادة وصبر و استمرارية , و فجأة في سنة 2023 , هتبص علي نفسك و تقول يا تري انا حققت اللي كنت باحلم بيه من 5 سنين , ولا ضيعت اغلب وقتي في جروب جزمة صلاح , وبشوف اللي بتعمله صديقات (الجنة طريقي)
اختار يا ريس بنفسك