انا بس عايز افهم قبل ما اتجنن

 

يعني هو محمد سلمان عبيط عشان يقتل اللي اسمه جاشقججي بالاسلوب العبيط ده و هل قتله فعلا ولا بيغفلونا

واشمعنا يعني الدنيا كلها ظااطت اول ما واحد اتقتل يعني خلاص بقي هو اهم شخص في الكون

قول حاجة يا ادمن

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

اجابة سؤالك هتكون طويلة و مرهقة , ولو انت متأكد انك محب للسياسة و عندك صبر عليها خليك معانا

 

اللي متأكدين منه ان اختفاء جمال خاشقجي هو حدث غير عادي , ومش هيمر بسهولة .

منها اسباب كتير و متشابكة , واللي اساسها الاحتكاكات السياسية بين مراكز اقليمية مختلفة في المنطقة , ومنها الصراع السعودي - السعودي من داخل البيت الواحد علي العرش , ومنها الصراع السعودي الذي لا يهدئ مع شعوب المنطقة المجاورة , واللي تسبب بشكل او بآخر في قتل آمالهم و ثوراتهم .

 

التوانسة مش قادرين ينسو ان "بن علي" و "ليلي الطرابلسي" حاطين "رجل علي رجل" في جدة .

المصريين مش قادرين ينسو الدور المخزي للرياض في وأد ثورتهم , و في شراء أرضهم بتوقيع السيسي .

اليمنيين بينهم و بين آل سعود طار قديم من ايام حرب التلاتينات (1934) , ثم التدخل المصري السعودي الاردني السوفيتي , في الحرب الأهلية في الستينات (1962) .

 

و أخيرا الرياض اللي استضافت الطاغية "علي صالح" لما "اتحرق" في محاولة اغتيال له في صنعاء , و حاليا هي اللي بتقوم بعمل دك يومي في الاراضي اليمنية , في محاولة للقضاء علي تنظيم "أنصار الله" (الحوثيين) .

السوريين كمان مش قادرين ينسو ان الرياض السبب الرئيسي في التلاعب بثورتهم , لما دعمو عدد من الفصائل المسلحة عشان تعمل باجندتهم , و ده اللي عمل اعادة صياغة كاملة لمفهوم الثورة السورية , واللي تحول لصراع في إطار مختلف تماما .

 

اللبنانيين مش قادرين ينسو مرارة اختطاف سعد الحريري , وبعدها تقديم استقالته في خريف 2017 , بعد ما زار الرياض .

حتي المغاربة مكانوش بعيد عن الاحتكاك بالسعودية , لما وقفت المغرب علي الحياد في الحصار السعودي الامارتي لقطر , فعاقبتها الرياض بعدم التصويت لها لاستضافة مونديال 2026

 

التصرفات المتهورة للرياض في محاولة للعب دول اقليمي اكبر من حجمها , جعلها تصطدم رغما عنها بتطلعات شعوب , ورغبات حكام , و حقائق تجهلها .

---------------------------------------------------------------------------

 

طيب خلينا نتعرف سريعا علي "جمال بن احمد بن حمزة خاشقجي" , واللي بقي أشهر اسم في العالم .

 

هو مواطن سعودي , مولود سنة 1958 . و درس الصحافة في الولايات المتحدة , و ده السبب في طلاقته في الانجليزية .

اشتغل في بداية حياته كمراسل صحفي في عدد من الجرائد العربية الناطقة بالانجليزي , ويقال انه قابل بن لادن في افغانستان (ايام ما كان تنظيم القاعدة حبيب الرياض و واشنطن) .

 

و الحقيقة ان كل ده كان مجرد عمل صحفي , لكن انتقاله الحقيقي لعالم السياسة , واقترابه من الاسرة الحاكمة , لما الامير "تركي بن الفيصل بن عبد العزيز" (ابن عم محمد بن سلمان) , واللي كان وقتها السفير السعودي في لندن , الامير تركي اختار جمال كمستشار اعلامي ليه , لطلاقته في الانجليزية , ودراسته للاعلام .

 

وبعدها اتنقل الأمير تركي سفير للملكة في واشنطن , فاخد جمال معاه , لنفس المهمة , المستشار الاعلامي .

خد بالك ان اهم عاصمتين يهمو الملكة علي مدار التاريخ الحديث هما لندن وواشنطن , الاولي متحكمة بشكل ما في الشأن الأوروبي , والتانية متحكمة في باقي دول العالم .

 

فبيتم انتقاء السفراء اللي بيروحو لندن و واشنطن بعناية شديدة و غالبا بيكونو من اقرب المقربين للاسرة الحاكمة .

وحاليا السفير السعودي في لندن هو : محمد بن نواف (ابن عم بن سلمان ) , بينما السفير السعودي في واشنطن هو خالد بن سلمان (اخو محمد بن سلمان) .

 

فده بيظهر العناية الكبيرة لاختيار السفيرين دول بالتحديد , وده يؤكد كمان أهمية "تركي الفيصل" ودوره الحيوي في الاسرة المالكة .

فخاشقجي ببساطة كان الدراع الاعلامية في اهم عاصمتين في العالم , واللي كان عليه دور كبير لتبييض وجه المملكة .

 

لان في الفترة اللي عمل فيها خاشقجي مستشار اعلامي للسفارتين (2003 - 2007) كان الضغط السياسي علي الرياض هائل , لاتهامها في الضلوع في احداث 11 سبتمبر (15 واحد من الـ 19 المسؤولين عن 11 سبتمبر كانو سعوديين) , بالإضافة للتغييرات اللي اصابت المنطقة العربية بالكامل , بعد الاطاحة بنظام صدام في 2003 .

 

وبالتالي تم اختيار جمال لاجادته الانجليزية بطلاقة , ولانه دارس صحافة في الولايات المتحدة بالفعل , و لصلاته القوية عند الاعلاميين و بعض الساسة الاوروبيين و الأمريكان .

 

و في 2008 , كان من الاسماء اللامعة في البلاط السعودي , وكان مرافق لكتير من الامراء في رحلاتهم لاوروبا والولايات المتحدة .

و مع التسلق السريع لمحمد بن سلمان الحكم بداية من 2015 و حتي تنصيبه الحاكم الفعلي في 2017, ومع بداية حملات الاعتقال الغير معقولة لابناء العمومة , عرف جمال ان الوضع متغير , وان فكرة "النقد البناء" غير مطلوبة او مقبولة في رؤية الحاكم الجديد للمملكة , ذي الـ 33 ربيعا .

 

و هنا انسحب بهدوء من العاصفة السعودية , وقرر الانتقال ما بين واشنطن و عواصم اوروبية اخري , و فرغ وقته للكتابة في "واشنطن بوست" بعد ما تم منعه من جريدة الحياة , وهي جريدة لبنانية الأصل , سعودية السيطرة .

 

فيه بُـعد تاني في شخصية جمال , هو مش كبير بس ليه تأثير بمقدار ما . .

جمال خاشقجي من اصول تركية , اسرته انتقلو من اراضي الاناضول لاراضي الحجاز من قرون طويلة , و يمكن ده السبب اللي مخلي ملامح وجه جمال "اوروبية" اكتر منها "سعودية" ببشرته البيضاء المحمرة , وشعره البني .

ده اصلا لقب اسرته "خاشقجي" هي كلمة تركية , ومعناها "صانعي الملاعق" , لان ملعقة باللغة التركي اسمها "كاشوك" وبتتكتب (kaşık)

 

محبي اللغة التركي هيعرفو ان حرف الـ (ş) اللي هو زي (إس) بس تحته خط بيتنطق شين , وان حرف الـ (ı) اللي هو زي الـ (آي) بس من غير نقطة , بيكون قريب من حرف الـ (أو)

 

كمان اضافة (جي) في اخر كلمة معناها (صانع كذا) وحتي في مصر بنقول (مكوجي) , (سفرجي) , (عربجي) .

فاصول (جمال خاشقجي) التركية القت بظلال حتي لو باهتة , في تعامل الرياض معاه علي انه "مش سعودي الاصل" , و مع اوروبا علي اعتبار انه (من اصل اوروبي) , و مع تركيا علي اعتبار انه (ابن بلدنا و حفيد العثمانيين) .

 

و ده اللي عمق الازمة الدبلوماسية اكتر , بين الرياض وانقرة و واشنطن .

 

------------------------------------------------------------------------

 

طب هو خاشقجي كان معارض للسلطة ؟ ؟

 

صعب نقول عليه معارض , هو ظل طول حياته مدافع مخلص عن نظام المملكة , والأسرة الحاكمة , ولم يشذ خارج انغامهم , الا من شهور معدودة . .

و ده بدأ مع سيطرة محمد بن سلمان وزيرا للدفاع (2015) , ثم وليا للعهد و حاكم فعلي (2017) , واللي جمال شاف فيه "عيل من دور ولاده" , لا عنده سن يديله حكمة , ولا فطنة تعطيه مهارة القيادة .

 

وحتي من بعد سيطرة بن سلمان , كانت كل مقالات خاشقجي النقدية من سبيل "العتاب الخفيف" , و "النصح البسيط" , ولم يشق عصا الطاعة لآل سعود , ولا قال عليهم كلمة وحشة .

وفي الشهور الاخيرة , كان واضح لجمال ان الأمر مش مريح , لان حس ان بن سلمان "ايده غشيمة" و معندوش القدرة علي تمييز الاصدقاء من الاعداء .

 

ده اللي خلاه يقرر انه مش هيعتب المملكة في حياته , و انه هيظل يقيم ما بين الولايات المتحدة و تركيا , حيث اشتري بيت هناك , وخطب الباحثة السياسية التركية "خديجة جينكيز"

جمال اصلا كان متجوز من المواطنة السعودية الدكتورة "آلاء نصيف" , واللي كانت مسافرة له لامريكا في نوفمبر 2017 , الا ان السلطات السعودية منعتها عن السفر لمعرفتهم انها زوجته , ويقال انها ضغطت عليها عشان يتم الطلاق رغما عنهم , وتم الطلاق بالفعل .

 

خاشقجي راح القنصلية السعودية في اسطنبول – مكان مهو ساكن – في سبتمبر 2018 , عشان يستخرج ورقة "اثبات قيد" تثبت انه مطلق , عشان يعرف يتجوز في تركيا , متنساش ان تركيا بتمنع التعدد , يعني مكانش هينفع يتجوز خديجة مالم يثبت انه مطلق حاليا .

القنصل السعودي "محمد العتيبي" وقتها قالوه ان الاثبات مش متاح , وتعالي يوم 2 اكتوبر عشان نعملهالك .

 

بالفعل راح القنصلية في اسطنبول , و ساب تليفونه مع خديجة خارج السفارة , وهو متوجس خيفة من اللي ممكن يحصل , وقالها انا لو اتاخرت , ففورا اتصلي بـ "ياسين اقطاي" احد مستشاري الرئيس التركي , وهو اصلا صديق شخصي لجمال , لان ياسين اعلامي هو كمان .

 

بالفعل دخل جمال و مخرجش , خديجة قلقت , راحت لأمن القنصلية اللي قالولها انه خرج من بدري واحنا منعرفش عنه حاجة .

وهنا البداية الحقيقية للمأساة . .

 

و الباقي معروف لكل متابع : النفي السعودي في الضلوع , الاصرار التركي علي دور الرياض , الغضب الأوروبي من المهزلة ديه , الدهشة الامريكية من اللي حصل , الاستقطاب الحاد علي تويتر و فيس بين مؤيدين و معارضين , التسريبات اللي الكل بيتكلم عنها . .

ومش عايزين نعيد سرد اللي حصل , لكن عايزين نحلله و نتكلم عنه . .

 

تعالو نتكلم في 3 نقاط اساسية :

 

 

------------------------------------------------------------------------------

 

نبدأ بالسيناريوهات الممكنة . .

 

هو يا تري ايه اللي بالفعل حصل ؟ ؟

و لأننا مشفناش و مسمعناش , فمفيش قدامنا الا اننا نستنتج . .

 

خلينا نبدأ بالسيناريو ذي الاحتمالية الاقل , واللي البعض هيقولو انه مستحيل , لكنه وارد علي اي حال . .

ان جمال حي , مماتش .

 

زي ما قلنا مفيش في السياسة حاجات قطعية , وحتي لحظة كتابة السطور (13 اكتوبر) مفيش جثة , ولا دليل حقيقي ملموس علي قتله .

وارد يكون معتقل بالفعل في السفارة , او في بيت القنصل , او يكون تم تهريبه في مكان ما في اسطنبول ,او يكون تم تسفيره لمكان ما خارج الجمهورية التركية .

 

و الحقيقة ان ده لو حقيقي - ان جمال حي - فانا لازم ارفع القبعة احتراما للعبقرية السعودية في ادارة المشهد بالكامل , باتكلم بجد مش بهزر .

 

لانهم بالشكل ده هيكونو لفتو انتباه العالم كله لتصور معين (ان بن سلمان قتله) و هيكونو عملو نوع من التسريب الكاذب للسلطات التركية تفيد بمقتله , فتجعل انقرة رافعة لواء انه مات بالفعل , وباقي عواصم العالم القوية ماشية ثقة في الاستخبارات التركية . .

ولما يكون فيه صمت تام من الرياض لفترة , فده بيجعل كل المؤيدين لانقرة واثقين اكتر في مصرع و تشريح جثة جمال , وصوتهم يعلي بالزعيق و الشتيمة في الرياض . .

 

وهوب بعد اسبوع و لا اتنين , يظهر جمال معافي , مبتسم , في مكان ما , ويقول يا جماعة انا بخير و ايه اللي بتقولوه ده . .

وديه هتكون ضربة غير محتملة لأنقرة و حلفائها , وهتكون "جون" شديد الروعة للرياض , في تسديد صفعة مؤلمة و مهينة للرياض وواشنطن مع بعض . .

 

وده نفس اللي حصل بشكل ما في سبتمبر و اكتوبر ونوفمبر 2013 في مصر , لما طلعت اشاعات قوية جدا ان السيسي مات , وان ده بديله , و رغما عن الكثير من معارضي السيسي , كانو مقتنعين بل و مدافعين عن الرأي ده , خاصة لما السيسي عن عمد اختفي تماما عن الاعلام وكان بيظهر بصور ثابتة .

 

مكناش عارفين وقتها ان ديه لعبة كاملة من المخابرات , تسريب اشاعة غير صحيحة , تسريب تأكيدات عليها , الصمت الحكومي , وبل و "التخبط" المتعمد عشان يأكدو القناعة .

 

وهوب , نلاقي في صيف 2014 , السيسي ماشي بكل اريحية و ثقة , وهو بيحلف القسم الجمهوري , فمؤيدي السيسي بيزغرطو و شمتانين , ومعارضي السيسي حسو بلهيب الألم و الإهانة و الخداع الاحباط . .

 

نرجع لخاشقجي . .

سيناريو انه حي يبدو خيالي صح ؟ ؟ انا كمان مش مصدقه ,بس عالم السياسة علمنا اننا نحط كل الاحتمالات و نفكر فيها حتي لو كانت شديدة الجنون . .

ولو حد متابع "ضاحي خلفان" اكبر الابواق الاماراتية تأييدا للرياض , بقاله كام يوم بيؤكد 100 % ان جمال حي , وهيظهر . .

زي ما قلنا فكرة مجنونة وشبه مستحيلة , لكن نحطها في بالنا . .

 

------------------------------------------------------------------------

 

السيناريو الراجح والمؤلم ان جمال انتقل جوار ربه بالفعل . .

لان صعب علي جهاز مخابرات بثقل المخابرات التركية , انها تعتمد مسار معين و تأكد عليه , مالم يكون عندها تأكيد يصل لحد اليقين . .

 

و السيناريو الراجح هو : ان السلطات التركية عاملة رقابة شاملة , باجهزة تكنولوجية متقدمة علي القنصلية السعودية , خاصة لما دخل جمال . .

 

وان بالفعل هما حصلو – بواسطة الاجهزة ديه – علي تسجيلات صوت واضحة لتخدير جمال , ثم قتله ,ثم تقطيعه . .

ولان التصنت علي اي سفارة او قنصلية هو عمل مخالف للقانون الدولي , ولان تركيا مستحيل تقول انها تصنتت , فكان لازم تجيب "حجة" مقنعة كمصدر للتسجيلات . .

 

و كانت ساعة أبل فكرة هايلة . .

والفكرة اللي قالوها , ان جمال عمل تزامن synchronization بين الساعة اللي في ايده , والايفون اللي مع خديجة خارج السفارة . .

 

وهنا فيه علامة استفهام تكنولوجية . .

فمن الصعب جدا علي ساعة أبل حتي أحدث اصدار (Series 4 ) انها تكون قادرة علي التواصل مع الايفون , علي مسافة قد تصل لـ 20 متر , وعبر حوائط , واضح ان ديه اشتغالة واضحة . .

كمان الساعة مفيهاش مكان لوضح خط تليفون عشان يرفع علي باقة , واكيد مش هيفتحوله الواي فاي في السفارة . .

 

فديه كانت حجة عشان تبرر وجود تسجيلات واضحة , تم التلميح بوجودها ولسة متعرضتش . .

 

و هنا اردوجان عرف انها باضتله في القفص . .

 

 

و هنا هيكون فيه 3 خيارات , يصعب جدا توقع ايهم الارجح . .

 

اما ان اردوجان يبيع دم خاشقجي , و يبيع مبدأه , ويبعت لبن سلمان ويقوله "كل سنة وانت طيب يا باشا , كلك نظر" . .

و وقتها بن سلمان هيشتري صمت انقرة ولو بمال الدنيا . ما يدفع يا عم , يعني هو شقيان في الفلوس ديه ؟ مهو كله من ارامكو و البترول . .

وقتها نتوقع تدفقات نقدية ضخمة , قادرة علي سد جزء كبير من مشاكل تركيا الاقتصادية . .

 

الخيار التاني ان اردوجان "يشلفط" بن سلمان و"يلسوعه" , بس بالراحة كدة وواحدة واحدة . .

و الشلفطة كنوع من كسر الانف السعودية المتكبرة , وتقليم اظافرها , خاصة ان الاتراك مش قادرين ينسو الدعم السعودي – الاماراتي للانقلاب الفاشل في 2016 , ده غير الخيانة السعودية لانقرة في ملف "حلب و ادلب"

 

و حتي ديه , اردغان هيعرف يكسب منها امريكا , لما "يكبرها" في الموضوع , وياخد صفها ضد حماقة بن سلمان , و بالمرة يحل مشاكل انقرة – واشنطن , واللي جابت الليرة التركية الارض . .

و بالفعل – بهدوء و من غير ما حد ياخد باله يوم 13 اكتوبر – تم الافراج عن "اندرو برونسون" القسيس الامريكي اللي كانت تركيا محتجزاه واللي بدأ القطيعة السياسية بين انقرة – واشنطن . .

 

و بعدها علي طول واشنطن اعلنت انها هتفرج عن "هاكان اتيلا" رئيس بنك "هالك" التركي , واللي كان محتجز في الولايات المتحدة , كنوع من عربون صداقة . .

وبالطبع مستحيل الفصل بين فك الازمة التركية الامريكية , بعيدا عن دم خاشقجي المسفوك .

 

و ده غالبا السيناريو المرجح عمله ,ان انقرة و واشنطن هيواصلو الضغط علي اعصاب الرياض لغاية لما يحرقوها . .

و في الاخر هيلمو الموضوع بشكل او باخر , بس بعد ما بن سلمان يشخلل شوية , و"يراضي الرجالة" و "يشوف الشاي بتاعهم" . .

في النهاية مفيش سياسي تقدر تثق في نزاهته او اخلاقه للاخر , ولكن هي تقاطعات و تعارضات في المصالح مش اكتر

 

الخيار التالت ,هو البحث عن بديل لبن سلمان .

ده ممكن حسب "المزاج" الأمريكي , كنوع من امتصاص غضب الشارع الامريكي علي الجريمة المروعة ديه .

و برضه مش هنعرف نحسم شئ لغاية لما نشوف بعنينا . .

 

-----------------------------------------------------------------------

 

كل ده كان النقطة الأولي اللي اسمها : السيناريوهات الراجحة .

 

طب ماذا عن النقطة التانية : لماذا جمال ؟

صحيح , سؤال محير , يعني ليه المخابرات السعودية سابت كتير معارضين و قفشو في ده بالذات ؟

هو بس مين قالك انها سايبة المعارضة في حالها ؟ ؟

 

عدد من معارضي اسرة سعود , تم محاولة اختطافهم و التنكيل بيهم , ونقلهم للرياض , عشان تصفي حساباتها معاهم .

ولو انت كنت قريت المقال اللي كتبناه من فترة بعنوان : مصير آل سعود 

​

كنا كتبنا فيه ازاي ذئاب الاسرة كانت بتنهش في بعضها بشكل مستمر , من وقت ما أقام "سعود بن محمد بن مقرن" دولته الأولي , ثم التانية ,ثم التالتة علي يد عبد العزيز , فأصلا الصراع الدموي بين الاسرة الواحدة ده الاصل فيهم .

فما بالك بقي لما يكون تحت ايد بن سلمان جيش و مخابرات و امكانيات غير محدودة .

 

وخاشقجي مش الحالة الاولي للانتقام من احد رموز المعارضة في الخارج , متنساش ان فيه امراء تانيين تم اختطافهم ونقلهم من اوروبا الي المملكة , زي :

 

واخيرا خالد بن فرحان , اللي لسة موجود في المانيا لكن يشعر برعب شديد من اختطافه لاي سبب , و بيتحسس خطواته في كل مكان بيروحه , خوفا من انتقام آل سعود .

 

عبد الله الشريف عمل فيديو بيجمع فيه حالات اختطاف المعارضين التلاتة هنا في الرابط ده 

​

وخاشقجي مش سهل بالنسبة لبن سلمان , لان تاثيره وضرره علي آل سعود يتخطي تأثير اي معارض سعودي عادي , بينشر علي تويتر و يعمل لنفسه فيديو علي اليوتيوب . حتي لو كان امير .

خاشقجي ليه مصداقية عالية عند الساسة والاعلاميين في اوروبا و امريكا , ده كان المستشار الاعلامي لاهم سفارتين سعوديتين في العالم , فهو بالفعل معاه خطوط التواصل متاحة , و ليه رصيد من المصادقية في الشارع العربي و الاوروبي و الامريكي بل و السعودي كمان .

 

صوت خاشقجي وكلماته كانت قادرة بالفعل علي التاثير علي المزاج العام الأمريكي ضد الرياض , وقادرة علي فضح و تعرية آل سعود لو هو كان عايز .

حتي لحظة اختطافه , معارضة خاشقجي كانت "لينة و سهلة" , لكن مين اللي كان يضمن لبن سلمان , ان خاشقجي هيفضل يطبطب عليه علي طول ومش هيطول لسانه عليه . .

 

وبالتالي بن سلمان , بخبرته المتواضعه و غروره المتزايد , واللي سنة متخطاش الـ 33 , كان عايز يعيد تكرار سيناريو "اضرب المربوط يخاف السايب" وهو عارف ان اختطاف خاشقجي هيقطع اي لسان يحاول يتطاول علي شخصه او حكمه .

كمان انتهز فرصة ان خاشقجي موجود في تركيا بالفعل , الخصم اللدود للرياض في الوقت الحالي , فكان ليه هدف تاني وهو اتهام انقرة بالتقصير في حماية مواطن سعودي علي ارضها , و يبدأ ينال من انقرة .

 

و بني خطته الساذجة علي اختطاف خاشقجي حيا او ميتا , ونقله خارج البلاد , و البدء بارسال الاتهامات المستمرة لانقرة ان : فين المواطن بتاعنا يا تركيا ؟ ؟

الا ان الحماقة المدهشة في وضع أكثر الخطط سذاجة , وفيها عشرات من نقاط الضعف الكفيلة بنسف اي نجاح فيها , جعل الكفة تنقلب تماما , وسهام الشك تتجه بالكامل للرياض , ولشخص بن سلمان .

 

 

ونكمل السؤال بتاع : لماذا جمال , بس من منظور تاني .

 

وهو : ليه الاهتمام ده كله بجمال ؟

هو خلاص يعني ؟ ؟ محرر المسجد الأقصي ؟ ؟ طب يا عم ما فيه الاف الاطفال بتموت في فلسطين و سوريا و اليمن و بورما , غير الاعدامات في مصر و الصراع في ليبيا . .

ايه الهيافة اللي عندنا ديه , عشان نهتم بواحد مليونير مات , في حين اطفالنا بتموت من غير لا حس ولا خبر .

 

لا هي مش هيافة , و مفيش تعارض بين الاهتمام بده و الاهتمام بده . .

وان كان الاهتمام بمقتل اطفالنا و اعدام شبابنا بالغ الأهمية , فالاهتمام بمقتل خاشقجي علي نفس القدر , ومفيش روح أغلي من روح . .

 

والحقيقة الاهتمام الكبير لجمال , كان علي مستويين , وكل مستوي ليه دوافع و اسباب للاهتمام . .

المستوي العالمي , والمستوي العربي .

 

بالنسبة للمستوي العالمي , فجمال معروف بشكل كبير , هو احد الصحفيين العرب القلائل اللي ليه مساحات دائمة في الصحف و القنوات الاوروبية و الأمريكية , نتيجة سنين من التعامل معاه كمستشار اعلامي للمملكة .

كمان قدرته علي صياغة الاخبار , والتحليل السياسي جعله مطلوب بشكل كبير كنافذة للقارئ و المشاهد الغربي علي ما يدور في انحاء الجزيرة العربية , حتي ان كتير من الناس بيقارنو بينه و بين "حسنين هيكل" , مع فارق الفكر والتوجه . .

 

ولان عملية اختطافه وقتله كانت شديدة البشاعة , يعني مش اللي هي حادثة عربية , ولا فرامل سايبة , ولا شوية سم في عصير, ولا رصاصة طايشة , واللي كان وقتها السلطات السعودية هتتنصل تماما من اي يد لها فيه , بل و هتبكيه بدموع حارة , علي فقدان الوطن لواحد من اعز ابنائه . .

لا , ديه كانت عملية تجمع بين السذاجة و البشاعة , واللي دفعت كل حلفاء بن سلمان للهجوم عليه , بل والدعوة للحصار السياسي علي شخصه .

 

وبالنسبة للاهتمام العربي , كان الدافع مختلف .

و طبعا لما باتكلم عن الاهتمام العربي فقصدي اهتمام الشعب , مش الحكومات اللي لا بتهش ولا بتنش .

المواطن العربي (المصري , السوري , الليبي , اللبناني , اليمني , المغربي , التونسي , بل والسعودي ), اللي لسة مش قادر ينسي تأثير الاصابع السعودية و عبثها بوطنه بشكل وقح .

 

المواطن ده اللي وجد في الصراع السعودي – السعودي , فرصة للتشفي و الدعاء بتقويض هذا البناء الفاسد , و كان يتمني زوال الحكم الفاشي ده , كعقاب علي ما أفسد .

ولما وجد ان الحماقة السعودية تسببت في اراقة دم شخص , كتير منهم اول مرة يسمعو اسمه قبل كدة , عرفو بالغريزة ان هو برئ , لان قاتليه مجرمين .

 

و بالتالي كان بيدعي من قلبه ان دم خاشقجي يتحول للعنة علي قاتله , وانه يكون المسمار الاول في النعش الاخير لحكم آل سعود .

اهتمام المواطن العربي لخاشقجي مش لشخصه , بل ان كتير من المهتمين بشأنه دلوقتي لو قرأو مقالاته القديمة اللي بتدافع عن "فهد" , و "عبد الله" , وبيتناول الارهاب بالصورة الامريكية , هيتحول تأييدهم له لكراهية كبيرة .

 

اهتمام المواطن بيه لأنهم شافو فيه رمز لتحدي أسرة سعود , لما شاف ان الاسرة فازت في الجولة الأولي واريقت دماؤه بالفعل , تمني ان الجولة التانية يري فيها انتقاما إلهيا مما حدث

 

--------------------------------------------------------------------------------

 

نوصل للنقطة التالتة و الأخيرة . ماذا بعد جمال خاشقجي . .

اللي يظن ان حادث اختطاف و اغتيال جمال هيكون امر سهل , فهو غير قارئ للسياسة .

لأن الاغتيال ده حصل في فترة حرجة جدا لبن سلمان , واللي بيحاول جاهدا ضبط السفينة السعودية وتوجيه دفتها , وسط امواج عاتية لا ترحم , سواء داخلية او خارجية .

 

وممكن نلخص الضغوط الكبيرة اللي فوق دماغ بن سلمان , في تلات انواع , هنرتبها من الاسهل للأصعب :

 

 

نبدأ بالاسهل فيهم علي بن سلمان , الرأي العام يعني رأي رجل الشارع العادي .

والحقيقة ان مش من الانصاف اننا نتجاهل البند ده بالكامل , لان المواطن الخليجي عموما , وان لم يكن مهتم بالسياسة وولاة الأمر علي مدار قرنين تقريبا ,فده مش لازم يكون حال ثابت , وممكن يتغير .

 

احنا كنا فاقدين الأمل تماما في الشباب العربي , وفوجئنا كلنا بيقظة في خمس دول عربية , زلزلت عروش الطغاة , صحيح انها كانت يقظة مؤقتة وتم الالتفاف عليها , لكنها غير متوقعة .

و زي ما الفيس و تويتر كان ليه دور مش قليل في تشكيل وعي الجيل الحالي في بلاد الربيع العربي , وجعله مختلف تماما عن جيل آبائهم , فنس الأمر يقال علي الشباب السعودي .

 

كمان متنساش ان "حـَلب البقرة السعودية" من واشنطن بدأ يأثر بشكل حقيقي علي مستوي الدخل لكتير من المواطنين , واللي علي عكس المصريين مش متعودين اساسا علي البهدلة .

والعولمة المنتشرة في بقاع الارض , جعل الكذب ملوش رجلين , و ان فئات من الشعب هتكون فاهمة وواعية للي بيحصل .

حتي و ان كنت تري استحالة وجود حراك شعبي حقيقي الان , فممكن يكون شئ تراكمي , زي ما ممارسات مبارك الغبية علي مدار 10 سنين (2001 - 2011) جعلت الشعب ينتفض , من التأثير التراكمي .

 

فالرأي العام السعودي , وان كان ضعيف الاثر دلوقتي , فبن سلمان مش قادر يتجاهله حاليا .

ولا شك ان اغتيال خاشقجي بالاسلوب الحيواني ده , ادهش قطاع كبير من الشارع السعودي , وهما بيتعجبو من خيانة العهد , للشخص اللي كان النظام السعودي بيتغني باناشيد الثناء و المدح فيه بالامس القريب .

 

كمان الفضيحة الدولية للرياض و لملكهم هي إهانة شديدة , يعني ان سرقت اسرق جمل , مش تبقي سفاح و أهبل في نفس الوقت .

اكيد هما مش فرحانين و سيرة بلادهم جاية علي لسان طوب الارض , من سخرية واستهزاء من حماقة فريق الاغتيال , مرورا بالادانة الرهيبة لدمويتهم , و انتهاء بالدهشة من خيانة القريب .

 

بالطبع لازال فيه نوعية من العقول اللي تسبح بحمد الملك و ولي العهد , وهي دائمة التأييد الأعمي للحاكم "طال عمره" بس دول مش باتكلم عنهم , لانهم أقل من اننا نعمل حسابهم .

​

-------------------------------------------------------------------------------

 

البند التاني : الأسرة المالكة .

 

قلنا في مقال "مصير آل سعود" ان السيطرة علي العرش هي نتيجة مطاحنات و صراعات خفية لا تنتهي بين اكتر من 7 الاف أمير من ابناء واحفاد و ذرية عبد العزيز , المؤسس الأول .

ودايما عرق العصبية و القبلية هو اللي بيكون الغالب في اتخاذ القرارات , فبن سلمان متأكد ان بقاؤه علي الكرسي مرتهن بموافقة – او علي الاقل بصمت- السواد الأعظم من الامراء .

 

لانه عارف ان وجود "قلق" و "اضطراب" , و "حالة رفض" لشخصه وسط الامراء , هيخلخل عرشه فورا , و هينتهي بالعزل زي ما حصل مع عمه "سعود بن عبد العزيز" سنة 1964 , او بالاغتيال زي ما حصل مع عمه التاني "فيصل بن عبد العزيز" سنة 1975 .

وان مهما كان حوله حرس و قيادات و ولاء , فكل ده ممكن ميكونش ليه اي تأثير, اما بمواجهة قوة عسكرية اقوي , او بتغيير الولاء نفسه بين يوم و ليلة .

ومتنساش ان بن سلمان عارف انه عمل سابقة في تاريخ المملكة الحديث , لما اعتقال اولاد عمومته في فندق "ريتز كارلتون" , وكسر كبريائهم جميعا , واجبرهم علي قبول الأمر الواقع , ان الحكم هيكون سلماني , مش سعودي , و ان العِرق السديري هو المتغلب رغما عنكم .

 

و ده جعل القصر اللي هو متحصن فيه , هو هش من الاساس , وممكن يطير من نفخه بالفعل , او من اجماع عدد من الامراء علي الاطاحة بيه .

وحادث خاشقجي كان بمثابة الصفعة المؤلمة جدا , علي وجه بن سلمان , فيما يتعلق بقيادته للمشهد السعودي .

يعني لما هو فرد نفسه "انا الملك" رغما عن انوف المئات من اولاد عمومته , وهما استسلمو لان اي خطوة عصيان معناه الاعدام ,فبدء هو يتولي الدفة , وهو عايز يعمل نجاح سريع و حاسم , بحيث يقنع اولاد عمه و الشعب انه بالفعل قادر علي قيادة البلاد .

و مع فشله المتتالي في اليمن , و في ملف الحصار القطري , والملف السوري ,و في مواجهة ايران , وفي التعامل مع واشنطن . كان يتمني تحقيق نجاح في ملف خاشقجي .

 

لكن الفضيحة المدوية للحادث الفاشل بالشكل ده , كانت ورقة التوت الأخيرة اللي كانت بتستر بن سلمان .

لأن الصفعات السياسية المؤلمة اللي جاية من انقرة وواشنطن و لندن و باريس بشكل متتابع , رسمت ابتسامات التشفي علي وجوه اغلب امراء الاسرة , واللي شايفين حماقة بن سلمان ازاي كانت السبب فيما حدث .

 

واللي مشعروش بالتشفي , شعرو بالغضب الرهيب , اللي جعل سيرة الرياض علي كل لسان , و اظهرها بمظهر الهمجي الغبي , يعني لا هو قاسي زي هتلر , ولا هو طيب و خانع دوليا زي السيسي ,لا ده متآمر و أهبل في نفس الوقت .

وده – و ان مكانش هيسبب انقلاب مباشر عليه – لكنه علي الاقل هيفقد هيبته تماما في قلوبهم , وهيكون لسان حالهم بيقول : مش قادر علي صحفي اعزل , هتقدر علي أمراء آل سعود بكل قدراتهم ؟ ؟ ؟

 

ده غير ان بعضهم طمع في انه يلفت انتباه واشنطن , كبديل محتمل لهذا الارعن , طالما لاح علي وجه واشنطن الغضب من بن سلمان , والتفكير في تغييره

 

--------------------------------------------------------------------

 

نوصل للبند الأكثر أهمية , والأقوي أثرا , وهو : الرأي العام العالمي .

 

ولما تتبع تاريخ أسرة سعود في إنشاء الدولة التالتة في بدايات القرن العشرين , نجد ان عبد العزيز كان دايما بيختار الجانب الأضمن و الأئمن لنفسه , وهو كسب ود أقوي عاصمة في العالم وقتها , وكانت لندن .

عبد العزيز عرف انه بجيشه الهش , ممكن يتغلب علي سنابك خيل اهل نجد او فرسان الحجاز , بس مش هيعرف يصمد امام مدافع الملك جورج الخامس , القابع في قصر بانكجهام , في لندن .

 

وبالتالي مع بداية تأسيس المملكة , كسب وده فورا , وقاله "انا بتاعك يا باشا" .

و مع الاكشافات الهائلة للبترول من التلاتينات و الاربعينات , عرف عبد العزيز ان معاه ورقة قوية هتجعل علاقة تبادل المصالح قائمة علي اساس صلب وقوي . .

 

لندن محتاجة البترول , وهو محتاج الشرعية الدولية و موافقة التاج البريطاني , كحاكم ابدي هو و ذريته في البلاد .

و بالفعل لندن اخدت البترول , وعبد العزيز اخد الشرعية , وبقي زيتهم في دقيقهم و الدنيا زي الفل .

و مع انكسار بريطانيا الحاد في الحرب العالمية التانية , وسطوع شمس واشنطن كقائد جديد للعالم , فورا عبد العزيز باع لندن , و قدم قرابين الولاء للبيت الأبيض , و بدأت صنابير البترول تتدفق للسفن ذات الاعلام الامريكية و ليست البريطانية .

 

و عاشت الرياض وواشنطن شهور عسل طويلة , بمبدء سلم و استلم ,الضرع السعودي بيتم حلبه يوميا عشان يتدفق في شرايين الصناعة والخدمات الامريكية , باسعار زهيدة , بالإضافة الي عقود شراء السلاح الامريكي التي لا تنتهي . .

و بالمقابل حماية امريكية مستمرة للرياض , و لملوكها القابعين في القصر الملكي من نسل عبد العزيز , وضمان لحكمهم للأبد .

ويمكن لم ينقطع هذا الود في "العلاقة الحميمة" بين العاصمتين الا مرتين , مرة في حرب 1948 , لما ساند عبد العزيز الجيوش العربية لمحاربة العصابات الصهيونية بالمساعدات المالية , لكن في الآخر "هاري ترومان" كان عارف ان كل ده "ذر الرماد علي العيون" , وانها بس لتنفيس الغضب علي شعوبهم , لكن في الحقيقة لن تقدم او تؤخر , وهو ما حدث .

 

و المرة التانية في 1973 , لما ابنه "فيصل" قفل صنبور البترول في حرب اكتوبر , واللي كان لفترة محدودة , والبعض بيفسروه لاسباب اقتصادية لصالح المملكة اكتر منها مساندة للجيشين المصري و السوري, وفي النهاية كان برضه قفل لمدة محدودة .

لكن سرعان ما عاد الحب و الود لاعلي درجاته , خاصة لما "فهد" فتح لهم المملكة علي البحري سنة 1990 , للإطاحة بصدام حسين .

وحتي لما الرياض عملت رعاية لحركات "الجهاد الاسلامي" في اواخر التمانينات ودعمت القاعدة بشكل كبير ,كان ده بأمر أمريكي , بهدف كسر انف الاتحاد السوفيتي وكبريائها في افغانستان , علي يد "المجاهدين الأفغان" , واللي كان التمويل والدعم سعودي بامتياز .

حتي وقتها المملكة و مصر كلاهما سهلو سفر عشرات الآلاف من معتنقي الفكر الجهادي الي كابول , للمساعدة علي إذلال ناصية السوفيت , بأمر البيت الأبيض كأحد معارك الحرب الباردة بين قطبي العالم .

 

و حتي عند وقوع احداث 11 سبتمبر , محصلش اي نوع من العداء بين الرياض وواشنطن , لتعاون المملكة بالكامل مع بوش في "محاربة الارهاب" , وقامت بمحاربة و اصطياد كل من كان مؤيد لبن لادن و القاعدة , مع انهم كانو حبايبهم من كام سنة .

والفترة ديه كلها لم تجد واشنطن او باقي العواصم الاوروبية اي حرج من التعاون بل و الصداقة العميقة مع الرياض , باعتبار ان المملكة هي دولة متحضرة و شريكة في محاربة الفكر المتطرف , والاهم من كدة ان عندهم اشولة رز , و بحار من البترول , وعقود شراء السلاح , وده اللي عايزينه .

 

ده غير ان الزعماء الأوروبيين كانو بيعملو تسويق لاسرة سعود , علي انها حائط الصد الحليف للغرب , في مواجهة "المد الايراني" , خاصة بعد الثورة الاسلامية في 1979 ,و الحرب العراقية الايرانية في التمانينات .

و مكانش وقتها بينتقد المملكة , الا بعض الحقوقيين ذوي الاصوات الخافتة , زي المدافعين عن حق قيادة المرأة للسيارات , اعداء حكم الاعدام , انصار حقوق الصحافة .

 

لكن في النهاية الاصوات ديه كلها كانت اقل تاثير علي الراي العام للشعوب الاوروبية و الامريكية , في انها تقطع التعاون مع "الدجاجة ذات البيض الذهب المجاني" , يعني مش هييجي جاك شيراك ولا هيلموت كول و يخسر صفقات سلاح هائلة لان فهد مش عايز الستات تسوق , في الاخر هي اشياء مقبولة . .

 

ويمكن اللي فاكر الفيلم الوثائقي المشهور"فهرنهايت 911" , انتاج سنة 2004 , واللي مخرجه "مايكل مور" حاول بكل امكانياته الفنية انه يربط ما بين "فهد" , و"بن لادن" , وازاي ان كل اعمال الارهاب هي جاية علي مزاج و هوي أسرة سعود . .

لكن بالرغم من كدة مكانش فيه قناعة كبيرة لدي الشعب الامريكي بحقيقية الكلام ده , ونجح "جورج ووكر بوش" في التجديد 4 سنوات اضافية في نوفمبر 2004

 

----------------------------------------------------------------------------

 

لكن مع بداية العِقد التاني من القرن الواحد و عشرين , وبداية ثورات الربيع العربي بدأت اشارات و علامات في الظهور للعلن , كانت في البداية خفيفة و باهتة ,لكنها ازدادت وضوح بشكل تدريجي . .

 

وممكن نذكر منها مثلا :

- احتضان طاغية هرب من بلده والشعب ثار عليه (بن علي)

- الدعم الكامل لطاغية ثار عليه الشعب و خلعه (مبارك)

- احتضان طاغية تاني في خضم ثورة عارمة عليه (صالح)

- الدعم المشبوه لبعض فصائل الثورة السورية , ماديا و معنويا و عسكريا , مما أدي بشكل او بآخر لدعدشتها وانهيارها

- التدخل عسكريا في دولة مجاورة لانقاذ عرش حاكمها من بعض حركات الاضطراب الشعبي (البحرين)

- حصار دولة لاسباب سياسية بالكامل (قطر)

- التدخل في شئون دولة أخري عبر احتجاز رئيس وزرائها (لبنان)

- التدخل العسكري الفج في دولة تانية (اليمن), واللي لو كان ليه اسباب ممكن نفهمها (القضاء علي الحوثيين) , فهو تسبب في اعداد مهولة من الضحايا