من يوم ما بدأنا الثورة وانا باسئل نفسي هي المظاهرات ليها لازمة اصلا ؟ بحس اننا بنشتغل نفسنا و بنفرغ غضبنا و خلاص , لا فيه حاكم هيتخلع بمظاهرة , ولا فيه مظاهرة هتحمينا من رصاصة , او هترجع شهيد دمه راح , واديك شايف كل بلاد الربيع العربي اللي بدات بمظاهرات بقت عاملة ازاي

بلاش نضحك علي نفسنا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

شوف يا سيدي . .

لازم تفرق ما بين تقييم أهمية شئ لو لوحده ,او لو مشترك مع عناصر كتيرة معاه . .

لو هنغير السؤال و نخليه : هل المظاهرات لوحدها ليها تأثير في العملية السياسية ؟ ؟ . . الإجابة قطعا لا . .

 

كلامك سليم , مستحيل مبارك ولا بشار ولا القذافي اول ما يشوف مظاهرة "ارحل" هتصعب عليه نفسه و ياخد بعضه و يسلم الحكم و يمشي . .

المظاهرات مش هتوقف دبابة , مش هتكون عقبة قدام مجرم انه يضرب بالنار , مش هترجع الحق لاصحابه . .

 

لكن لو عدلنا السؤال و قلنا : هل المظاهرات كعنصر , ليه تأثير في العملية السياسية ؟ ؟

الإجابة ايوة ليها تأثير , لما تيجي مشتركة مع عوامل تانية متشابكة , وتقدر تهد نظام عتيد . .

خاصة إن المظاهرات غالبا بتكون الشرارة الأولي , اللي احيانا بتستحث باقي العوامل للإنطلاق , واللي لو انطلقت بالفعل بالتوازي مع المظاهرات , هتتكالب مع بعض لتفكيك النظام القائم , واللي لو تأخر او انعدم وجودها , وصارت المظاهرات وحيدة في الساحة , لافترسها النظام , والتهم المشاركين فيها . .

 

المظاهرات تبدو من وجهة نظرك حاجة عديمة الفائدة , لأنك مش شايف اثر ملموس ليها , وده زي اللي يقولك ايه فايدة اني ادرس رياضة , لو انا عايز ابقي طبيب , هعمل ايه بالتفاضل و التكامل , في حين كل شغلي مع جسم الإنسان , هو ببساطة عايز ترجمة فورية لاي حاجة بيعملها , و بيغفل دور التأثيرات التراكمية المتعددة , لكتير من الأشياء الضرورية . .

 

---------------------------------------------------------------------------

 

تعالي نسرد عدد من الآثار اللي بتعملها المظاهرات :

 

- هي بتأثر بمقدار مش قليل في شرعية الحاكم . .

وأرجو من أصحاب النظرة الأحادية السطحية في تقييم الأمور انهم يمشو بعيد شوية لان الكلام اللي هقوله مش هعجبهم . .

أي حاكم مهما كان ديكتاتور , فهو يهمه الشعور بالشرعية , الشعور ان الناس موافقة عليه , الشعور ان فيه استقرار لدي السواد الأعظم من شعبه , غياب الشعور ده مش معناه انه هيتنحي بالتأكيد , لكن علي الأقل بتنغص عليه حياته , و بتلقي ببعض الذعر في قلوب حاشيته (خاصة لو حركة المظاهرات واسعة) , وبتلقي بالشك في قلوب مؤيديه . .

 

ديه أهداف مش قليلة , وأول الغيث قطرة , ودفقات المياه قادرة علي شق الصخور , ورسم مسار الأنهار مع الزمن الطويل . .

إزالة الطمأنينة من نفس الحاكم الديكتاتور , في حد ذاتها هدف , حتي لو متمش تحقيق أي اهداف بعدها . .

المانيا النازية لما اجتاحت فرنسا في الحرب العالمية الثانية , و استولت علي باريس , و نصبت حكومة موالية ليها في مدينة فيشي , كانو يتمنو ان الشعب الفرنسي يدين لهم بالولاء ويتعامل معهم علي انهم واقع وحقيقة لن تتغير , زي ما عملت بولندا و النمسا بشكل جزئي

 

الفرنسيين كانو ألد أعداء الألمان , ولأن الجيش أغلبه اتفكك , و قوي المقاومة الشعبية مهما كانت فهي ضعيفة , فالشعب الفرنسي كان لما يمشي في شوارع باريس و يقابل اي ضابط او جندي او مواطن ألماني , كان بيبص الناحية تانية . .

بس كدة . . مجرد يلفت وشه بعيد عنه , كنوع من التجاهل , ورفض وجوده , ونوع من التمسك بالشرعية لحكومة فرنسا الحرة بقيادة ديجول , و رفض الوجود الألماني للأبد . .

 

مجرد لفت الوجه الناحية التانية كان بيعصب الألمان , لأنه كان بيأكدلهم ان مفيش استقرار ولا راحة ولا طمأنينة في البلد المحتلة ديه , واللي تمت ترجمته بعدها بسنوات في تحرير فرنسا بداية من معركة نورماندي . .

المظاهرات في اي بلد ديكتاتوري , بيكون ليها نفس التأثير , إن يا حاكم انت مش رئيسي , ومش موافق عليك , و هفضل ضدك ليوم الدين

 

 

- الإعتراض علي قرار , وديه حاجة مش قليلة . .

 

انت متخيل مثلا لو كانت صفقة الجزيرتين تمت في هدوء و سكينة و كام واحد اتكلم علي الفيس و خلاص كدة مع السلامة , متخيل ده تأثيره إيه ؟ ؟

هيظهر قدام السيسي المجرم , والحكومة السعودية اللي فرحانة بالجزر , والشعب السعودي المندهش من الصفقة , و تل ابيب اللي استلمت الهدية علي الترحاب والعالم كله , هيظهر قدام دول كلهم ان احنا مجرد مجموعة من البقر , خرفان , بهايم بتساق بالعصا , وارضنا بتتباع قدام عينينا و احنا معندناش ذرة كرامة او احساس او عزة نفس . .

 

وقتها اي خليجي هيبص للمصري نفس النظرة اللي بترميها للقواد , اللي بيبيع بنته او مراته عشان الفلوس , ده في حالة احنا سكتنا . .

لكن المظاهرات المستمرة اللي تلاحقت في عدد كبير من المدن , بأعداد كنا فقدنا الأمل فيها , سجلت موقف مهم , ان احنا كشعب مش موافقين , وان العر* هو اللي باعها , وانه حامي نفسه بقوة السلاح , ولو علينا احنا كنا (سامحوني علي اللفظ) انتهكنا عرضه لو عرفنا نوصله علي اللي عمله من إهدار كرامتنا في الأرض . .

 

بعد المظاهرات ديه , تقدر تمشي وانت رافع راسك ان انت جزء من الشعب المعترض , واللي رافض , واللي لو بايدك تدافع عنها بحياتك و دمك , لكن هنعمل ايه في حاكم خاين , وحكومة مستبدة , و جيش منزوع الكرامة , يفرط في تراب مصر . .

بعد المظاهرات تقدر تتكلم مع اي حد في اي دولة في العالم , وتعرفه ان الشعب قام و انتفض , وعمل اللي يقدر عليه , عشان التاريخ يسجل ده عنده , ومنفضلش عايشين بعار مرتبط بجيلنا . .

 

ولما ييجي واحد عبيط يسألك , يعني هي المظاهرات رجعت الأرض ؟ ولا وقفت البيع ؟ اعرف انه من ذوي التفكير المحدود , واللي هيفضل طول عمره يقيم الأمور بشكلها السطحي الغبي , وإن هو معذور , لأنه ضحية نظام تعليمي متخلف زرع جواه أسلوب ساذج في الحكم علي الأمور . .

 

 

- المظاهرات أحيانا بتخلي الحاكم يتراجع عن قراره, خاصة لو كان فيه مجال للتراجع مش قضية حياة او موت زي التنحي , وده اللي حصل في مصر سنة 77 قصاد السادات , و اللي خلي مبارك يفرمل مشروع التوريث من بعد مظاهرات 2005 في شارع رمسيس و نقابة المحامين , و اللي خلي ترامب يتراجع عن قراره بفصل اطفال اللاجئين من كام شهر , واللي خلي مرسي يوقف حظر التجوال في بورسعيد بعد كام يوم , كتير من القرارات اتغيرت او وقفت او اتفرملت بس من المظاهرات

 

 

- المظاهرات بتحيي الأمل لدي الشعب , وتزرع فيه الثقة , ان ممكن نعمل حاجة . .

اوعي تنسي ان الثقة و الأمل ديه هي اللي طلعتنا اساسا في 25 يناير , احنا مطلعناش لولا اننا عرفنا ان الفكرة نجحت بالفعل في تونس , وان بن علي هرب من ضغط الشعب (زائد خدعة في القصر الرئاسي) , عشان كدة طلعنا و احنا حاسين اننا هنقدر , وان بالفعل مبارك ممكن يطير . .

 

و قبل ما مبارك يتنحي , كان اللييبين والسوريين و اليمنيين بيحددو مواعيد لانطلاق مظاهراتهم , في فبراير و مارس يعني خلال اسابيع قليلة من مظاهرات مصر . .

النزول في الشارع بيصنع الحماس في نفوس و ارواح المشاركين , وبيزرع داخلهم الثقة اننا مش قليلين , و بيغذينا بالأمل , ان فعلا ممكن الدنيا تتغير بسببنا , ومين عالم كان ممكن يحصل ايه في صفقة الجزيرتين لو كنا صبرنا في الشارع أكتر من كدة

 

 

- المظاهرات بتبدأ سلسلة من التفاعلات السياسية الهامة . .

 

هو مبارك اتنحي ازاي صحيح ؟ ؟

اكيد مش المظاهرات اللي خلت مبارك يتنحي , مش معقولة الراجل ابو 70 سنة قلبة طيب للدرجادي . .

لكن المظاهرات سحبت الشرعية من عقول الملايين من المصريين , و نقلت حالة الغضب من الفيس و تويتر , للقهاوي و الورش و المصانع و الجوامع و الكنايس , و جعلت الألسن تتكلم بجدية لأول مرة عن ضرورة التنحي , وزرعت القلق في صفوف كتير من ضباط و جنود الجيش و الشرطة (خاصة صغار السن) , خوفا من المجهول اللي مش عارفينه , و جعلت واشنطن و لندن و باريس تترقب ايه اللي هيحصل . .

 

المظاهرات بدأت سلسلة التفاعلات , ومنها الشباب نزل , والمجرمين استخدمو السلاح , الشباب قاومو , وسُفكت الدماء علي يد مجرمي الشرطة , الناس غضبت , بدأ شبح الإضراب يتسلل لأماكن كتير , ظهر رعب الانشقاقات تقسم الجيش لو استمر سفك الدماء , فوصل الأمر من البيت الأبيض إن يا مبارك دورك انتهي , يللا مع السلامة . .

 

يا تري كان ده هيحصل من غير مظاهرات ؟ ؟

 

نأكد تاني , المظاهرات لوحدها عديمة القيمة ,لكن لما تشترك مع باقي العناصر الثورية , هتغير الشكل السياسي بالكامل . .

​