العنوان : الهروب المستمر

القسم: #الاجتماعي

الرقم: 60

السؤال:

  

انا بشكر الجمهود الكبير المبذول فى صفحتكم بس انا عملت كل المستطاع عشان احل المشكلة مع جوزي بس مافيش فايدة وبصراحه انا كمان مابأتش احب قعده جوزى فى البيت

 

مانكرش اني بفرح اول مابسمع صوت مفاتيحه بتفتح الباب كل يوم بس حاسه انى مش شيفاه احساسي بالوحده والملل مش بحسه الا وهو فى البيت

 

انا جزء كبير منى مبقاش عايز يعيش معاه حاسه انها بقت ايام وبتعدى حتى علاقتى الزوجيه معاه مش عايزاها لانى بحس انها بقت الحاجه الوحيده اللى بقت بتربطنى به حتى مش بقيت بزعل منه ولا بغير عليه انا خايفه من نفسي انى اكرهه لانه بقى مهمل ليا جدا جدا مافيش حاجه بتجمعنا ولا بقى فى لغه حوار بينا

 

مش حابه اتكلم معاه حتى هوا مش حابب يقعد معايا ولا عايز يشوفنى انا متاكده ان اللى مصبره عليا زى اللى مصبرنى عليه هى البنت والولد اللى بينا وبس

 

فعلا أنا حاولت معاه بشتى الطرق ديما مش معايا  يا إما فى البيت نايم او بيلعب على الموبيل لدرجه إنه مش سامعنى أو على القهوه مع اصحابه

 

طب أنا فين من ده كله أنا مش موجودة مفيش حاجة بيحبها في حياته إلا الكورة و خلاص

 

بس اللى مخوفنى انه هو كمان مبقاش موجود انا عارفه انى زوجه عصبيه بس ده سببه اهماله ليا واحساسي بالوحده المميته فى وجوده حتي احيانا باضرب العيال لغاية لما احس بالجنون

 

 انا مش حطلب منكم تساعدونى لانى مش عايزة مساعدتكم انا بس نفسي اموت نفسي اموت اوى رغم انى مش ضامنه حتى حترتاح فى الموت ولا لا انا عاوزة اختفى ادعولى اختفى اتلاشي وبس

  

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 للأسف ديه مأساة كبيرة , ولابد تتحل عشان الوضع المؤلم ده يتغير . .

 

علي الوصف بتاعك , فـ 90 % من سبب المشكلة من عنده , وبالتالي 90 % من الحل في ايده هو مش إيدك انتي , لكن انتي عليكي تقومي باللي تقدري عليه عشان تنقذي البيت من الهدم . .

 

حتي لو مش عشانك , يبقي عشان اطفالك  , حرام عليكي و عليه انكم تخليهم يذوقو عذاب الانفصال في السن ده , خاصة إن أغلب حالات الطلاق اللي بتتم , بتكون بأسلوب :  وإذا خاصم فجر . .

 

فاللي هنعمله هنا , إننا هنقولك علي خطوات , ممكن يكون ليها تأثير في إعادة مناخ الألفة بينكم مرة تانية , حتي لو نار الحب القديم مش هترجع تاني , يبقي علي الأقل يكون فيه دفئ بسيط يخلي الحياة الأسرية محتملة ليكي و ليه و الأهم للأطفال . .

 

 يعني مثلا : قومي بالبحث عن المساحات المشتركة . .

 

 

بعدها شوفي مواعيد الماتشات اللي بيحبها , و عرفيه انك هتشوفي الماتش في البيت , من غير ما تقوليله اقعد اتفرج معايا , مرة ورا  التانية هتلاقيه قعد معاكي و شاف الماتش .

 

ان كان هو غلطان انه مش مهتم بيكي , انتي اعملي خطوة انك تهتمي بالحاجة اللي بيحبها , وشوية شوية هتلاقي مساحات مشتركة بينكم بقت موجودة . .

 

------------------------------------------------------------------------------------

 

كمان من ضمن المساحات المشتركة المهمة : الأولاد . .

 

اكيد هو كأب , هيحب أولاده اكتر من نفسه  ,فخلي الاولاد  و الكلام عنهم , محور تتناقشو فيه بشكل مستمر . .

 

مش قصدي انك تشتكيله او تقوليله ساعد معايا , لأ , انتي قوليله مثلا : فلان (اسم ابنك يعني) مهتم جدا بالرسم و التلوين و الصلصال , تفتكر احنا ممكن نعمل ايه عشان ننمي موهبته ؟ ؟

 

او ان فلانة (بنتك) , شكلها بتحب الانجليزي و حفظت كلمات كتير , يا تري نساعدها ازاي عشان تتفوق في اللغة ؟

 

خلي الاولاد محور للحديث الدائم بينكم , وميكونش الكلام مشاكل الاولاد و قرفهم عشان هو ميزهقش من البيت , لكن كلام ايجابي و مبشر . .

 

-----------------------------------------------------------------------------------

 

كمان من ضمن الخطوات المهمة لعلاج المشكلة : البحث عن ايه اللي مضايقه منك لإصلاحه . .

 

مفيش دخان من غير نار , وهو هروبه المستمر من البيت , أيوة فيه جزء كبير تقصير منه , لكن كمان ممكن يكون فيه سبب معين بيخليه يريح دماغه و يروح علي القهوة , انتي فتشي عن السبب ده لإصلاحه . .

 

انتي ذكرتي 3 نقاط مهمة , وفعلا هي نقاط خطيرة و ممكن تكون هي اساس المشكلة عنده . .

 

العصبية الرهيبة , الضرب المستمر للأولاد , الصوت العالي . .

 

فعلا فيه اسباب تخليه يطفش من البيت , هو مش بيهرب من فراغ . .

 

أرجع و أقول هو غلطان , الزوج اللي بيحافظ علي بيته اللي بيصلح المشاكل مش بيهرب منها , بس انت في ايدك خطوة مهمة من خطوات الحل . .

 

أكيد هو كزوج لما يرجع من الشغل طهقان و مقروف من كل حاجة برة , لما يلاقي البيت فيه ازعاج  ,وكهربا و عصبية و زعيق و عيال بتصوت , يا إما يضرب العيال و يضرب أم العيال , يا ياخد بعضه و يروح علي القهوة يروق اعصابه , وهو بيختار الحل الأسلم . .

 

انتي كزوجة عليكي دور مهم , وهو تهيئة البيت عشان يكون مكان مريح للزوج اللي جاي شقيان من برة , هو مش جاي من قرف المدير , وازعاج زمايله في الشغل , عشان يشوف صويت و صريخ في البيت . .

 

لازم لازم تعالجي مشكلة العصبية عندك , مش بس عشان تنقذي بيتك من الانهيار , كمان عشان صحتك النفسية , وكنا شرحنا بالتفصيل ازاي تعالجي أزمة العصبية في رسالة كابوس العصبية , ياتري عملتي منها ايه قبل كدة ؟ ؟

  

كمان ضرب الأطفال بالشكل ده , ده شئ خطير جدا , بالفعل بتأذيهم و بتدمريهم , ده مش حب ده تدمير . .

 

فعلا هتطلعيهم معقدين نفسيا بسببك , لما حد من اطفالك يرتكب جريمة لما يكون مراهق , اعرفي انك انتي السبب و ذنبه في رقبتك . .

 

مفيش اي مبرر لضرب الأطفال بالشكل ده , وبرضه كنا اتكلمنا بالتفصيل عن مشاكل الضرب و اسلوب تربية الأطفال في اكتر من رسالة في القسم النفسي و الاجتماعي . .

 

الصوت العالي لابد يتغير , كل شئ هييجي بالتدريب و انك تعودي نفسك , مفيش حاجة صعبة , محتاجة بس منك شوية ارادة و صبر . .

 

انتي يا فندم في ايدك مفاتيح كتيرة من الحل , فارجوكي ابدئي بيها فورا

 

---------------------------------------------------------------------------------------------

 

أخيرا لابد اتكلم عن الجانب الديني في البيت . .

 

مالم يكون البيت محاط مبني علي أساس متين من الدين , فأي محالات لإصلاحه هي كلام فاضي . .

 

التمسك بالصلاة ده شئ مش هامشي , وثقي إن تأثيره الإيجابي هيفوق توقعاتك . .

 

لازم تبدأي تحافظي علي الصلاة بقدر الإمكان , وتعلميها أولادك , وتفكري جوزك بيها , ثقي بإن أول ما الصلاة هتدخل من الباب ,المشاكل هتخرج من الشباك . .

 

أكيد الصلاة لوحدها مش هتحل المشاكل , ياما فيه ناس بتصلي و متمسكة بالدين و عندهم مشاكل اكبر , لكن هي عامل رئيسي في ارساء السكينة و الرحمة بينكم . .

 

متنسيش كمان ان الزواج مش حب و بس , ايوة الحب مهم , لكن اختفاءه مش معناه انهيار البيت , لكن معناه انك تبحثي عن وسائل لتقويمه . .

 

انتي في ايدك مفاتيح للحل  , ابدئي فيها من دلوقتي , وثقي ان ربنا مش هيخذلك . .

 

 

وهنا رسالة مهمة , بعنوان محاولات الإصلاح , فيها عدد من النصايح المهمة لنفس المشكلة