العنوان : المشاكل العشر

القسم: #النفسي

الرقم: 50

السؤال:

 

انا عندي 28 سنه بعاني من الانطوائيه والخجل و احترام الغير بطريقه مبالغ فيها ونفسي أخرج نفسي منهم بس مش عارفه ازاي

 

والمشكله اني ام لطفلين خايفه يوصلهم بطريقه اوباخري من خلال تربيتي ليهم الطباع السيئة دي واللي فعلا شوفتها فابني الكبير اللي عمره 5سنين هو اجتماعي جدا مع الاطفال من عمره فالكلام بس فاللعب بيلعب لوحده ومبيكلمش كبار غرب عنه خالص وبيتهيألي ده من انطوائيتي

 

عاوزه حل ياريت للموضوع ده لانه مسببلي حاله من الاكتئاب وبيخلي بعض الناس تقول عليا اني متكبره او اني عبيطه مش بعرف أخد حقي بس مع العلم انا فالمشاكل بسكت مش ضعف مني بس زي ما قلت هو احترام مبالغ فيه ومش عارفاله حل

 

وبالنسبه لي فعلا الانطواء سببلي عقدة نقص وهو نقص الناس من حولي وممكن يكون في شويه اضطراب الاضطهاد

 

ومش بعرف أجادل ولا ادافع عن نفسي وفعلا كل اللي بيتعاملو معايا بيقربو فتره وبعد كده بيبعدو بس ده نتيجه لعدم كلامي فمحدش بيحب يفضل يتكلم علي طول

 

بس عندي كمان عدم ثقة فالنفس ورهبه من الكلام مع الناس لان الكلام بيتسبب فدخولي فمشاكل ونتيجه لعدم معرفتي طريقة الرد واني مش بلاقي الكلام المناسب للرد فالمشاكل فساعتها فبسكت اولما أرد برد بطريقة تبين سذاجه متناهيه

 

مكنتش بيأثر فيا كلام الناس لدرجة انه من اربع سنين لما توفي والدي ملبستش اسود ومبينتش للناس حزن نهائي لدرجة ان الناس كاتو بيقولو اني مش زعلانه بس عمري ما كنت مهتمه لانه بالعكس انا كنت حزينه جدا ومنهاره بس مبينتش لحد وطلع ده عليا بعد كده بعصبيه مفرطه ويتهيألي كمان عدم الثقه فالنفس

 

سامحني بس انا فعلا تعبانه نفسيا لدرجة اني بحس ان الناس بتكلم عليا من ورايا هو ده عادي بس المشكله اني مش طايقه اسمع حتي حد بيتكلم عليا وحساها حاله نفسيه تستدعي النقاش

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

اهلا بيكي .

 

انتي ذكرتي عشر مشاكل بالتحديد في رسالتك واللي هي :

 

• الانطوائية

• الخجل الشديد

• الرهبة من الناس (اللي انتي بتظني انها احترام مبالغ فيه للناس)

• الاكتئاب

• عدم اللباقة  (مش بتعرفي تجادلي او تدافعي عن نفسك)

• عقدة النقص

• عقدة الاضطهاد (الناس بتتكلم عليا من ورايا)

• اختفاء الثقة بالنفس

• الحساسية المفرطة

• العصبية الشديدة

 

 

المشاكل العشرة ديه , سببت بعضها البعض , يعني فيه بعضها كان موجود عندك  واللي تسبب في صنع مشاكل تانية .

 

زي مثلا الخجل و الرهبة من الناس , اللي صنعت العزلة و الانطوائية  ,او اختفاء الثقة بالنفس اللي صنع التلعثم , وبالتالي عمل حساسية مفرطة , ومنها عقدة النقص و الشعور بالاضطهاد .

 

وبالتالي انتي بقالك سنين بتعاني بشدة من المشاكل العشرة اللي بتعصرك عصر في دوامات لا تنتهي , فانتي لم تجدي حل الا بالهروب داخل القوقعة الخاصة بيكي تحتمي بيها من أذي الناس , ومن معاناتك النفسية معاهم  .

 

وان كان بالفعل فيه ناس كتير مؤذيين  ,بس خلينا نقول ان المشكلة مش في الناس , لكن في تعاملك الحساس شوية معاهم , واللي صنع الأزمة ديه كلها .

 

بدليل ان السواد الأعظم من البنات اللي في سنك , بيقدرو يتعاملو عادي مع نوعيات اصعب من اللي انتي بتقابليها , وبيقدرو يفرضو نفسهم عليهم , و محدش يعرف يدوسلهم علي طرف .

 

فإن كان الناس فعلا متعبة  , لكن المشكلة عندك انتي و عايزين نحلها

 

كمان خليني اقول تقييم عام لحالتك , صحيح ان فيه عشر مشاكل تم ذكرها هنا , لكن نسبة تواجدهم  مش كلها كبيرة .

 

يعني ان كان فيه بالفعل عشر مشاكل , لكن ممكن نقول ان السبب الرئيسي فيها مشكلة واحدة , وهي القاطرة اللي بتجر وراها 9 عربيات تانية .

 

فاول ما نعمل اصلاح كامل للمشكلة الأصلية , هتلاقي المشاكل التسعة هتتحل بشكل تدريجي , وهتلاقي اثرهم بيختفي واحدة واحدة .

 

مشكلتك الأساسية يا فندم هي  :  الرهبة من الناس

 

---------------------------------------------------------------------------------

 

ومشكلة "الرهبة من الناس" هي اللي بالفعل صنعت اغلب المشاكل اللي انتي بتعاني منها .

 

لأنها صنعت حاجز كبير بينك و بين الناس ,  وجعلت تعاملك معاهم يكون بشكل مختلف , وبطريقة حذرة , وفيها نوع من القلق و الخوف .

 

و ده جعل عندك عقبات عديدة في التواصل الطبيعي مع الناس , وفيه التعامل بشكل سلس و سهل , وخلاكي تفكري كذا مرة قبل ما تقولي حاجة , او تردي برد علي سؤال معين

 

فطبيعي يكون باقي المشاكل التسعة (  الانطوائية ,  الخجل الشديد , الاكتئاب , عدم اللباقة , عقدة النقص , عقدة الاضطهاد  , اختفاء الثقة بالنفس , الحساسية المفرطة , العصبية الشديدة ) , طبيعي انها تتواجد و بشكل ثابت في ذهنك  , وفي تعاملك مع الناس .

 

الرهبة من الناس صنعت الخجل في التعامل , والتلعثم و عدم اللباقة , وبالتالي ده رسم كل ابعاد عقدة النقص و الاضطهاد عندك , وطبيعي انه يدفعك لمساحة الانطوائية و الاكتئاب , وانك تشعري بالحساسية و العصبية كرد فعل للي بيحصل .

 

اذن مربط الفرس هنا هو مشكلة الرهبة من الناس , واللي لازم نشوفلها حل , وقتها هتتفك شفرة باقي المشاكل التسعة , وهتلاقيهم بيختفو واحدة ورا التانية .

 

---------------------------------------------------------------------------

 

طب نحلها ازاي ؟ ؟

 

اولا عايزك تقري عدد من الاسئلة القريبة كتير من سؤالك , واللي فيها اجابات تفصيلية عن عدد من المشاكل :

 

الحساسية المفرطة , العزلة الإختيارية , أعراض الإكتئاب , كابوس العصبية 

 

ثانيا , حاولي تمشي علي الخطوات اللي هنقولها , واللي هتساعد في حل مشكلة الرهبة من الناس , وكمان هتخفف من اثر المشاكل التسعة الملحقين بيها .

 

 و علي قد  جديتك و اهتمامك و صبرك علي علاج نفسك , علي قد النجاح اللي هتشوفيه , وعلي قد تكاسلك او قلة صبرك او احباطك , علي قد استمرار المشاكل معاكي .

 

 

• لازم تضعي في اعتبارك اولا ان المقياس الدقيق و الحقيقي لقياس الناس هو  "إن أكرمكم عند الله اتقاكم" , مش اي مقياس تاني .

 

وبالتالي لما تنظري بالمقياس ده للناس , هتلاقي ان الرهبة الفارغة اللي كتير من الناس بتضعها هي علي "فاشوش" , وان اغلب الناس ديه لا تساوي عند الله اي مثقال يذكر .

 

بل ان التجارب عودتنا علي ان اقرب الناس لربنا هما اكثرهم تواضعها و بساطة و سلاسة و سهولة في التعامل , افتكري الرجل اللي شاف الرسول صلي الله عليه و سلم فاترعب , فالرسول كان عايز يعمل تبسيط للرجل و قاله "انا ابن امرأة كانت تأكل القديد بمكة" يعني هون علي نفسك, انا انسان بسيط لا متكبر ولا متسلط  , وتعامل معايا ببساطة .

 

اول ما تتمكني من وضع المعيار ده في بالك , هتلاقي الدنيا بقت اسهل شوية في التعامل , وهتلاقي ان "البلالين" المنفوخة لناس كتير , هي في النهاية لا شئ , وانك عملتي حساب لناس اكبر من الحجم الطبيعي

 

لو تمكنتي من ضبط المعيار ده بشكل سليم , هتستريحي جدا في نقطة "عقدة النقص" , و "عقدة الاضطهاد"

 

 

• كوني نفسك و متتصنعيش .

 

كتير من مشاكل التلعثم و الارتباك , بسبب ان الشخص  مش عايز يظهر حدود شخصيته الحقيقية , ومتضايق منها , و عايز يكون زي فلان او علان في طلاقته و لباقته  .

 

و ديه مشكلة عميقة في بناء الشخصية , ان انتي اساسا لازم تتصالحي مع نفسك داخليا  وتؤمني ان الناس هتحبك و هتتقبلك زي ما انتي , مش لما تتصنعي شخصية معينة , بل انك لما ترتدي ثوب مش خاص بيكي , الناس هتنفر منك لاحساسك انك مزيفة و متصنعة .

 

اتكلمي مع الناس ببساطة و هدوء , وقولي الرد اللي ييجي في بالك , متحسيش بالارتباك وانتي بتتكلمي , متقوليش ردود مملة ثابتة زي "تمام , صحيح , عندك حق" , لا اتكلمي ببساطة , قولي رايك , اعترضي بهدوء , ضيفي وجهة نظرك , والناس هتسمعك عادي متقلقيش .

 

وتوقفي عن الارتباك لما حد يكلمك , هدي اعصابك تماما , واتكلمي بمنتهي العفوية , ومتحسيش ان كلامك هيكون عبيط او ساذج , بالعكس كلامك هيكون سليم طالما انتي مقتنعة بيه

 

 

• متسكتيش لو اتظلمتي

 

متخليش حد يدوسلك علي طرف , متخليش حد يظلمك و انتي ساكتة , فيه استثناءات قليلة (الوالدين , الزوج لو كان فيه تفاهم متبادل) لكن بشكل عام متسيبيش حقك , فيه فرق بين الطيبة و البلاهة , وده شرحناه بالتفصيل 

 

 

مش معني انك تاخدي حقك انك تزعقي او تقلي ادبك , لا بالهدوء و بالراحة و خدي حقك تالت و متلت , عشان الناس تعرف انك مش "علي نياتك"

 

الصبر المستمر علي الظلم هيولد عندك طاقة غضب متراكمة , وهتزود القلق اللي عندك

 

 

• اكسري حاجز الانطوائية

 

وهو سهل يتكسر بس محتاج منك شوية تدريب , شوية ارادة و رغبة حقيقية .

 

و التدريب ييجي عن طريق انك تفتحي حوار مع ناس متعرفيهاش , عارف الموضوع صعب و متعب بس هو كدة في الاول بس , شوية شوية هتلاقي الموضوع سهل

 

يعني اركبي المترو , وشوفي واحدة قاعدة جنبك وقوليلها , "تصدقي يا اختي  بنتي مغلباني معاها مش عارفة اعمل معاها ايه " بس كدة , هتلاقيها شبكت معاكي في الكلام , ومش بعيد تلاقي كام ست جنبيكي دخلو في الحوار .

 

عارف الموضوع صعب بس مش مستحيل , لو عرفتي تكسري الحاجز ده , هتلاقي نفسك اتغيرتي ايجابا , وهتحسي بفرق حقيقي

 

 

• الثقة بالنفس عندك مش مرض لكن نتيجة المشاكل السابقة , واللي لو اتحلت هتتحل فورا , متقلقيش منها

 

 

• اشغلي نفسك

 

الفراغ اكبر عدو ليكي , واللي هيخلي دماغك ووساوسك و هلاوسك تستمر بشكل دائم .

 

اعملي لنفسك جدول مستمر يملي عليكي يومك و ميسيبش اي وقت فراغ , بين اهتمامك ببيتك و زوجك و اولادك , وبين انك تتعلمي حاجة علي النت , انجليزي مثلا او هواية معينة .

 

بين انك تقري كتب او روايات , تشوفي افلام وثائقية , تعدي علي زميلتك تتكلمي معاها , تحفظي صفحة من القرآن يوميا .

 

حتي لو في يومك حاجات "هايفة" مفيش مشاكل , يعني حتي لو هتشوفي مجلات الطبخ و الازياء , او هتشوفي فيلم كوميدي , هي مش مشكلة ,المهم متسيبيش نفسك للفراغ اللي هيدمرك

 

 

 

اتمني اكون افدتك , وتكون النصايح ديه قادرة انها تخرجك من القوقعة اللي انت عيشتي نفسك فيها بارادتك