حاولت بطرق كتير و مفيش حاجة بتظبط

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة  :

في الحديث المشهور اللي رواه مسلم , قال رسول الله صلى الله عليه وسلم : ( مَن صَلَّى الصُّبحَ فَهُوَ فِي ذِمَّةِ اللَّهِ ) 

في ذمة الله , اي في ضمانه و حفظه تعالي . . 

و صلاة الفجر (او صلاة الصبح , اسمين لنفس الشئ) , وهي من العبادات شديدة الأهمية , واللي متعود المسلمين علي تركها للأسف . . 

 

و بتبدأ المشكلة لما تظبط الموبايل انه يصحيك علي 7 ونص , عشان تلحق الشغل او الكلية , وكأنك لما تيجي تنام انت اصلا مقرر انك تنام علي صلاة الفجر , و تصحي عند شئ "أكثر أهمية" وهو شغلك او دراستك . . 

و صلاة الفجر , بجانب ثوابها العظيم , فهي بتقوم بتهيئة يومك بشكل جميل , نفسيا و بدنيا وعمليا . . 

 

نفسيا في إنك بتلاقي نفسك حاسس بنوع من الطمأنينة و الراحة والتفاؤل , وتكون مهيئ لاستكمال يومك بنفس النشاط. . 

و بدنيا ً ان بيكون عندك الفرصة انك تمارس نوع من الرياضة حتي لو بسيط , مشي او جري او دراجة , او سويدي , واللي ليه فوايد مش قليلة عليك باقي اليوم , وفي رشاقتك بشكل عام . . 

وعمليا ان بيكون عندك ساعة تقريبا متاحة , من بعد ما تصلي و تفطر , وقبل ما تروح الشغل او الكلية , واللي بتتيح لك انك تعمل تحضير او إعداد بشكل سريع لاي شئ متأخر عليك . . 

 

و بالعكس , انك تفوت منك صلاة الفجر , معناها بالضرورة استيقاظك مستعجل , متكركب عشان تلحق تاكل و تنزل حالا  , و هتلاقي اليوم بتاعك استمر علي نفس الوتيرة  , وبنفس الحالة النفسية ديه . . 

و الاستيقاظ لصلاة الفجر , يتواكب مع النهج الصحيح اللي بيتبعه أغلب شعوب العالم المتحضر , ان الشخص ينام بدري , يصحي بدري جدا قبل الشروق , يمارس رياضة  , يفطر افطار صحي , يروح الشغل بدري , و هكذا . . 

 

---------------------------------------------------------------------------

 

والانتظام في صلاة الفجر معتمد علي كلمة واحدة مفيش غيرها , لا منبه ولا حد يتصل بيك ولا تنام علي الارض ولا حاجة , هي كلمة واحدة لو تواجدت هتصحي كل يوم . . 

 

الاهتمام . . 

 

علي قد ما انت مهتم بالموضوع وهو في بالك , علي قد ما هتنتظم في الصلاة , وعلي قد ما الاهتمام قليل عندك , علي قد ما هتفشل في الانتظام في صلاة الفجر  . . 

استخدم  اي وسيلة بتساعدك علي الصحيان , اي وسيلة بس خليك مهتم و مصر عليها , وهتجيب نتيجة اكيد , واستخدم كل الوسائل الممكنة بس من غير اهتمام و جدية , و هتشوف انها هتكون ملهاش اي تأثير 

 

والاهتمام ده مش مجرد شعور بيكون في قلبك و السلام , ولا انك تنوي من جواك انك هتعمل كذا كذا, و خلاص , ولكن لابد ان  الاهتمام ده يتم ترجمته في صورة تنفيذ كل الاسباب المتعلقة بالوسيلة اللي هتفذها , وتحقيقها بالشكل الممكن, وتضحي عشانها . .  

فلو انت عارف انك المفروض تنام بدري شوية , وتاكل خفيف , ومتمسكش الموبايل علي السرير , و متشربش قهوة بالليل عشان متسهركش , فعلي قد ما انت جاد في تنفيذ الحاجات ديه , واللي اكيد هتكون تقيلة شوية علي قلبك , و بتضايقك شوية , بس علي قد ما تنفذها , علي قد ما هتشوف نتيجة ايجابية . . 

 

و برضه , علي قد ما انت هتكسل و تطنش و تتأخر في تنفيذ الخطوات ديه , فممتوقعش انك هتفوز بالجايزة الثمينة اللي اسمها صلاة الفجر . . 

الاهتمام مش شعور في القلب لكن خطوات تنفيذية عملية , لو متعملتش يبقي متسألنيش علي صلاة الفجر . . 

 

----------------------------------------------------------

 

والاهتمام كمان بيتم ترجمته في كلمات سحرية مرتبطة بيها : الاستمرارية , وطول البال , والصبر

و هنا هقول علي بعض الخطوات العملية , واللي لو نفذت بعضها هتفيدك كتير , بس أأكد تاني , من غير ما يكون فيه اهتمام , انسي اي نتيجة . . 

 

 

- كل خفيف بالليل , كتر الاكل هيخلي النوم اتقل , والصحيان اصعب , مهما كانت شهيتك مفتوحة امسك نفسك  ,ونصيحة متحطش قدامك اصلا في الطبق اكتر من كمية قليلة , والباقي يكون بعيد عنك , عشان متمدش ايدك و تملي تاني .

 

- متشربش اي منبهات بالليل , لا شاي ولا قهوة ولا نيسكافيه , الحاجات ديه بتسهر ,فهتنام متأخر ,فمش هتعرف تصحي , معلش خلي الكيف عندك يستني كام ساعة  .

 

- لما تمسك الموبايل وانت نايم علي السرير يبقي انت بتهزر , مش بس بتأخر نومك , انت كمان بتشتت ذهنك و بتوجع راسك و عينك , واللي هتصعب الصحيان علي نفسك .

 

- ركز قبل ما تنام و خلي فكرة الصحيان للفجر مهمة قوي , يعني ركز فيها كتير , لان سيكولوجيا لما الشخص بينام و ذهنه مرتبط بموعد صحيان محدد , بيكون منتبه جدا , بحيث مع اقل صوت للموبايل او حتي حد ندهله بينتبه  و ده اللي بيحصل لما تنام و انت عندك سفر تاني يوم بدري , بتقوم فورا عشان عارف اهمية الموضوع

 

- اتوضي و صلي ركعتين بنية انك تقوم للفجر , و نام علي وضوء 

 

- لح علي ربنا في الدعاء انه يرزقك نعمة صلاة الفجر , والكلام ده يوميا , و علي قد ما يكون الموضوع في قلبك علي قد ما هتلاقي نتيجة مدهشة

 

- لما تصحي متنامش بعد الفجر حتي لو نعسان , برمج نفسك و عقلك علي ان يومك يبدأ بعدها , اعمل فطار خفيف , شوية رياضة, قراية قرآن  , مذاكرة , شغل , بس افضل صاحي بعد الفجر , حتي لو هتعمل حاجة هايفة (بس مش حرام) زي انك تقرا قصة لميكي او تتفرج علي توج و جيري , او تلعب بلاي ستاشن , هتلاقي ان اول يومين هتبقي نعسان طول اليوم , بس خلال كام يوم هتلاقي جسمك اتعود علي المواعيد الجديدة

 

فيه خطوات مختلفة غير دول , والمشكلة زي ما قلنا مش في ايه الخطوات  ,لكن هل انت قادر تنفذها و تصبر عليها علي المدي الطويل ولا لا

وياريت تقرأ المشكلة ديه , اللي عن التقطيع في الصلاة

​