عبث المشاعر
الرسالة السابقة
العنوان : عبث المشاعر
القسم: #العاطفي
الرقم: 20
السؤال:
قابلت بنت في الكلية من كام يوم و اتكلمنا حاجة بسيطة
بعد كدا قابلتها صدفة فى الكلية روحتلها واتكلمت معاها مرة تانى فرحت خالص وكان كلام بسيط ببنى وبينها خاصة أنها محترمة جدا جدا جدا وجميلة جدا مش ناقصة اى حاجة ..
وبعد كدا اتقابلنا كذا مرة تانى من غير مواعيد فى الوقت ده بكون انا رايح كلية تانى عشان العملى وكدا ولازم مر بالكلية بتاعتها وفى الوقت ده بيكون عنها فى فرق ساعتين بين المحاضرات تمام... وتعرفنا على بعض أكتر بس انا ولا فى دماغى كنت فاكر صداقة تمام....
ااه نسيت كنت قبل كدا كنت متعصب ومش طايق اى حد قابلتها بعد كدا زاعقت بصوت عالى زعلت وعيطت تانى يوم جبتلها ورد وتاسفت ليها وفرحت جدا جدا بعد كدا جابتلى هدية مش عارف اقبلها ولا لا
كنت بحكى مع حد عزيز عليا على اللى حصل ده قالى انى فى كلية وهى فى كلية حوار الحب والكلام ده مش ها ينفع لأنى لسة لما أخلص و ادخل الجيش والشغل وأكون نفسى ممكن تكون اتخطبت او تتجوز وقتلى عشان ميحصلش زعل وعقدة او صدمة سواء ليا او ليها فيما بعد لازم وبالاخص انها جميلة جدا جدا
سمعت النصيحة وروحت أقولها وافهمها تمام.. روحت وقابلتها عشان افهمها الوضع الدنيا هتمشى ازاى قولتلها عايز اقولك حاجة قالتلى وانا كمان وقاعدنا نعوم على بعض اللى يقول الأول بعد كدا هى قالت انا بحبك هاااااا وانا اللى جاى اقولها كل حاجة خلاص ونبعد مش عرفت أتكلم قولتلها وانا كمان تمام
انا اعمل اي أبعد أكمل ولا ده شغل مراهقة وأي بالظبط ؟
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
طيب نصيحة فعلا لازم تسيبها . .
لسة سنك صغير و سنها صغير ,غير ان انت لسة قدامك كذا سنة علي ما تكون جاهز , واي ربط ليها دلوقتي انت بتعذبها معاك . .
خد بالك هي مش بتحبك , هي بتحسب انها بتحبك , هي شايفة كدة , بس فعليا الحب اعمق و اقوي من مجرد كام مرة اتقابلتو صدفة . .
الروايات العاطفية و الافلام الرومانسية بوظت دماغنا , و خلتنا نحسب اننا بنحب بسرعة و حوارات بقي الصدفة و الكتب اللي تقع علي الارض و الكلام ده , صدقني الحياة اكبر و اعمق من كدة بكتير . .
هي حاليا قلبها مش متعلق بيك , بس لو استنيت اكتر من كدة هيتعلق واحدة واحدة , ووقتها انك تسيبها هيكون الموضوع اصعب و مؤلم جدا ليك و ليها . .
عايز فعلا تكسب فيها و في نفسك ثواب , سيبها حالا , و متكملش معاها ولا تشوفها تاني , خاف ربنا فيها عشان ربنا يباركلك في حياتك و يكرمك دايما , اعتبرها زي اختك اللي انت تتمني ان محدش يكسر بقلبها و لا يلعب بعواطفها سواء قاصد او مش قاصد , كدة هتكون بتعبث بمشاعرها . . .
لو انت سبتها دلوقتي , هي هتعيط شوية وهتضايق حبتين , وشوية شوية هتنساك ,وتشوف حياتها و دنيتها و مستقبلها . .
لكن ارجوك , اياك تكمل معاها , والا قلبها هيتعلق بيك اكتر و اكتر , وهتحبك فعلا بجد , وقتها لما تسيبها هتكون بتقتلها . .
اياك تخليها تتعلق بيك اكتر من كدة , عاملها بما يرضي الله عشان ربنا يباركلك في حياتك , وحط دايما أوامر الله فوق اي حاجة تانية .
مش لازم تبعتلها رسالة وداع ولا كلمتين صعبين , سيبك من الحوارات ديه , انت بس ابدأ تجاهلها , ومتخليهاش تشوفك , لو هي عندك علي الفيس ولا الواتس اعملها بلوك , ولو شفتها في الجامعة قولها هاي من بعيد و خلاص و اياك تكلمها , خليها تحس انك نسيتها , ومتديش تفسير . .
هي هتضايق شوية , هتعيط شوية , وخلاص الموضوع مش كبير . .
ارجوك متتنازلش عن ده . .
بالتوفيق يا رب .