العنوان : الحساسية المفرطة

القسم: #النفسي

الرقم: 31

السؤال:

اترددت كتير قبل ما ابعت

 

بس انا تقريبًا شخصية فاقدة حاجات كتير ودا تحليلي لشخصيتي ع مدار حياتي

 

بحس ان شخصيتي ضعيفة فاقدة الثقة برتبك لما حد يقولي حاجة مهما كانت بسيطة لكن طول ما هي لسه جديدة ببقى فاقدة السيطرة ع القلق والتوتر وبنسي كل الكلام اللي مفروض اقوله

 

دايما ببص لنفسي بأني وحشة وحلوة كمان يعني مش عارفة ازاي بس انا عندي امل ف كل شيء حواليا بس ف نفس الوقت عندي خوف رهيب وخمول فظيع وبحس ان عقليتي قليلة وعاوزة اتعلم أكبر قدر من كل حاجة حواليا؟؟

 

حساسة جدا اي كلمة واي حاجة من اي حد حواليا بتأثر فيا بحاول بقدر الإمكان اني مفيش حاجة تأثر فيا بس للأسف مش مبعرفش بتيجي عليا لحظة وانهار

 

انا إنسانة متلغبطة شوية معلش

 

انا مش بحب أتصور وانا بضحك بحس شكلي بيبقى مش حلو نزلت صورة ليا عالواتس عندي مكنتش بضحك فيها بس شايفة اني شكلي حلو فيها..

 

لقيت صاحبتي بتقولي مش قولنا مرة اضحكي بعتلها صورة كنت بضحك فيها واتخدت اصلا بالصدفة لقيتها بتقولي بقا منزلة الصورة دي وسايبة اللي بتضحكي فيها دي احلى بكتير وفعلا لما نزلتها لقيت أصحابي كلهم مدحوا فيها ومع ذلك مازالت مش مقتنعة انها حلوة؟

 

كنت بقدم ف الكلية لقيت اللي بقدم ليها ورقي وانا ناقص ليا حاجة مش عارفة اعمل واحط ورقي فين قالتلي انتي لخمة كدا ليه؟ مضايقتش نهائي من الكلمة لاني كدا فعلاً بس انا مش حابة ابقى كدا

 

متفائلة لدرجة غبية يعني كل لما بيكون نفسي ف حاجة ومش بتجي مش بزعل بقول انه اكيد ربنا هيعوضني واني اكيد مسعتش عشان أحقق دا وبستني الفرصة اللي بعدها ومع ذلك كل فرصة بتجي تخد جزء من التفاؤل دا ولازالت متفائلة

 

حساسة جدا بعيط من أقل حاجة مع ان الفترة الأخيرة بحاول ابقى باردة وبيبقي بس لما شخص معين أو تقدر تقول الناس اللي بثق فيهم اوي  يقولي حاجة بعصبية أو تعليق ع تصرفاتي بعصبية بعيط زي بابا أو اخويا مثلا وبيكون رد فعلى عصبية برضو وبحاول مبقاش عصبية معهم

 

بحاول وبكره نفسي العصبية جدا  وبعيط جدا من عصبيتهم وعصبيتي

 

الدكتورة جت سألتني فجأة ع سؤال ف الشرح انا كنت مركزة معاها جدا والله بس اتفجأت من أنها سألتني ومعرفتش أجوب وكل حاجة طارت من دماغى ومش عاوزة أتعرض للموقف دا تاني من غير ما يكون عندي الشجاعة الكفاية اني أواجه؟

 

بحاول اغير من نفسي كتير ونجحت ومبسوطة اني بعمل كدا لاني بدأت احب شخصيتي أكتر.. بحاول ابقى راضية بحاول محقدش ع حد او اتمنى اللي مش ف ايدي مش اغير من واحدة احسن مني ونجحت فعلا

 

بس انا داخلة ع مرحلة جديدة من حياتي وخايفة اغلط خايفة من هوى النفس وبحاول احفظ ع كل حاجة كونتها فيا وتحافظ ع نقائي وإنسانيتي

 

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

انا عن نفسي تهت معاكي  

 

خلينا نقول ان انتي عندك عدد من الصفات المتنوعة و المختلفة , واللي بعضها ايجابي و بعضها سلبي , وانك عايزة تعملي تطوير كامل لاسلوبك و تعاملك مع الحياة . .

 

لما بنعمل تلخيص لسؤال طويل , بيكون اسهل علينا كتير في الرد عليه , وتحليله , واعطاء اجابة دقيقة . .

 

والحقيقة ان اغلب الصفات اللي ذكرتيها بتشير لوصف دقيق لاحد انماط الشخصيات في علم النفس , واللي بيطلق عليه اسم (self conscious characters)  , وهي ترجمتها الحرفية (الشخصية الواعية بالذات ) لكن ممكن نطلق عليها بمعني اوضح  (الشخصية بالغة الحساسية)

 

ده مش مرض ولا مشكلة , ده عبارة عن نمط , يعني نوع   , زي ما نقول الشخص كثير التفكير  ,او الشخص سريع القرارات , او شخص عاطفي . .

 

ديه انواع مش امراض , ولكن ان زادت الكمية اللي فيها عن الحد المطلوب بتبقي مشكلة كبيرة . .

 

و خلينا نقول ان من حسن حظك ان سنك صغير نوعا , يعني طالما انتي لسة في المرحلة الجامعية , فمن الطبيعي تواجد كمية من "الوعي بالذات" , او "الحساسية" في المرحلة ديه , وغالبا بتتغير و بتطور و بتقل , بعد التخرج و العمل و الزواج والاحتكاك الاكبر بالمجتمع . . .

 

---------------------------------------------------------------------------------

 

طب ايه هو "الوعي بالذات" اساسا ؟ ؟

 

هو ببساطة الشخص اللي بيكون عنده اهتمام زيادة شوية   ,او حساسية اكتر تجاه كل حاجة "فيه" او "عنه" . .

 

حاجة "فيه" , يعني حاجة خاصة بيه هو , شكله  , صوته , صورته علي الواتس, اداءه , الكلام اللي بيقوله , طريقة مشيه . .

 

حاجة "عنه" , يعني حد بيقول حاجة عنه , رأي الناس فيه , مين قال عنه ايه , تعليق اتكتب علي صورة , وهكذا . .

 

الشخص اللي عنده وعي بالذات  ,بيكون حساس اكتر , غالبا مرتبك اكتر , فاقد الثقة بالنفس , متردد شوية لانه بيفكر في الحاجة الف مرة قبل ما يقولها , عنده شوية قلق , لانه قلقان يا تري فلان قال ايه , وهكذا . .

 

وطبعا بيكون مصاحب بكمية لا بأس بها من الحياء والخجل , وشوية انطوائية  ,و عدم رغبة في  التعامل مع اي حد جديد . .

 

كمان الشخص "الواعي بذاته" يكون شديد التأثر برأي و كلام الآخرين , عشان كدة يفرح بمدحهم , ويتأثر كتير لنقدهم , و قد يبكي و ينهار لو جاء النقد من شخص بيحبه جدا . .

 

و ان كانت كل الصفات اللي قلناها حالا , هي موجودة عند اغلب الناس (ما عدا الباردين) , فالشخص اللي عنده "وعي بالذات" بتكون عنده بصفة زيادة اكتر , وبكمية اعلي . .

 

فانتي غالبا من النمط "الواعي بذاته" , واللي الناس بتقول عليه "حساس" , لكن زي ما قلنا هي مش مشكلة في ذاتها , لكن محتاجة تعملي نوع من ضبط المشاعر و السلوك بحيث تكون مناسبة  . .

 

---------------------------------------------------------------------------------

 

دلوقتي خلينا نمسك النقاط اللي انتي ذكرتيها في رسالتك الطويلة, ونتكلم في كل حاجة فيهم  . .

 

 

 

• فقدان الثقة بالنفس . .

 

 

 

• الارتباك غالبا جاي من فقد الثقة بالنفس  , وكمان مرتبط بنمط "الوعي بالذات" ,لأن زي ما قلنا الثقة معناها التعرف علي و الاطمئنان لامكانياتك , فانتي حاليا مش مطمنة انك ممكن تعملي شئ معين , فطبيعي ترتبكي و عينك تبقي في الارض و تتكهربي مع اي موقف غريب  . .

 

 

 

• نقطة انك شايفة نفسك "وحشة"  . .

 

 

 

• الاحساس بالمشاعر المتناقضة (وحشة – حلوة ) , (امل - خوف) , (خمول – نشاط)  , هو غالبا نتيجة الصراع اللي ما بين عقلك الباطن , اللي هو قلقان و متوتر , ومش مطمن يا تري انتي (حلوة و عندك امل و هتنجحي و تتفوقي) , ولا انتي (وحشة , مفيش امل , حاسة بخمول) , الصراع الداخلي اللي لا يهدئ عندك , بيخليكي شوية تشوفي ده وشوية تشوفي ده . .

 

 

 

• الحساسية الشديدة , وتأثرك بكلام الناس . .

 

 

 

• وصفك لنفسك "لغبطة" , ووصف الموظفة ليكي "لخمة" . .

 

 

 

• بالنسبة للتفاؤل الزيادة اللي عندك , و اللي ممكن نقول عليه "طيبة"  , او كلمة "علي نياتك", لازم نتكلم فيه شوية . .

 

 

واحنا كنا اتكلمنا بالفعل عن النقطة ديه بالتفصيل في رسالة  : بين الطيبة و البلاهة

  

• انتي ذكرتي تاني الحساسية , وزي ما قلنا هي من الصفات الاساسية لدي "الواعي بذاته"

 

 

• العصبية مش من الصفات الواجب توافرها في الواعي بذاته  ,لكن هي منطقية عندك في حالة اختفاء الثقة بالنفس و ظهور الارتباك , و وجود ضغط نفسي عليكي و شوية عصبية تجاهك

 

 

• موقف الدكتورة بس من الارتباك , فمتقلقيش

 

 

---------------------------------------------------------------------------

 

 طب والحل ؟ ؟

 

 احنا مش محتاجين نقول حل , لان في الاساس احنا مش قدام مرض نفس , لكن عند نوع من الشخصيات . .

 

لاحظي  ان مش كل الصفات ديه وحشة , وان فيه حاجات هي بالفعل ايجابية , بل خلينا نقول انها نادرة , فمتفكريش في التخلص منها , زي الطيبة و التفاؤل مثلا  . .

 

فخلينا نقول ان انتي محتاجة تعالجي حاجتين بالتحديد : الثقة بالنفس , واهتمامك برأي الناس . .

 

الثقة بالنفس لو اتحلت , هتحل : الارتباك , القلق , التوتر , اللغبطة

 

والاهتمام برأي الناس لو اتحل ,هيحل :   الحساسية , العصبية , التفكير المستمر 

 

فمجرد ما تركزي علي علاج النقطتين دول بالتحديد , هتلاقي ان اغلب مشاكلك اختفت , و انك اتغيرتي تدريجيا فيهم . .

 

ابدئي تدريجيا فيهم , وامشي فيهم خطوة خطوة , وهتلاقي منظورك للحياة بقي متغير تماما

 

--------------------------------------------------------------------------

 

وقبل ما امشي , لازم احذرك من مطبين متوقعين في سنواتك المستقبلية . . .

 

المطبين دول احيانا بيصيبو البنات اللي زيك (الطيبة المتفائلة) لما يبدئو احتكاك حقيقي بالحياة القاسية , وللأسف أحيانا بيقطم ضهرهم تماما . .

 

المطب الاول "الصدمة العاطفية" او "كسر القلب" . .

 

وهو اللي ممكن ييجي اما من شخص بيتسلي او مخادع او كاذب , ويكون فيه بداية علاقة اعجاب و حب من طرفك , بينما في الواقع هو بيتسلي , وبيقضي وقت لذيذ مش اكتر , ولما يزهق "يقلبك" فورا . .

 

وهو الشكل اللي سميناه قبل كدة متلازمة "شاب بيتسلي – بنت مخدوعة"

 

أو ممكن ييجي من شخص محترم و ابن حلال و مش بيتسلي  , بس يكون حب من طرف واحد , يعني انتي بتحبيه بشدة , وهو اما مش عارف اصلا , او يدرك الموضوع بس يعتذرلك بادب انه مش بيفكر فيكي , من غير ما يخدعك او يوعدك باي شئ . .

 

او ممكن ييجي من خطوبة جادة   وبعدها يحصل انفصال . .

 

او من زواج ثم طلاق . .

 

يعني حالات عادية زي اللي بتحصل لكتير من البنات . .

 

و ان كانت الصدمة العاطفية هي مؤلمة جدا لكل الفتيات  ,فهي اشد ايلام , واعمق جرحا لنمط انتي من البنات  . .

 

و ان كان اغلب البنات بيقدرو يتعافو بعد فترة من كسر القلب , فانتي هتاخدي وقت اطول , لأن الحزن كان مضاعف . .

 

بقول ده كله لأن النمط الواعي بذاته  ,حساس اكتر , فألمه و عذابه من اي صدمة عاطفية هيكون اكبر بكتير . .

 

و بالتالي تجنبي تماما ادخال قلبك في اي اعجاب او حب , الا لما تتأكدي ان الشخص ده بالفعل جاد  ومحترم و مش بيتسلي  . . 

 

و مترتبطيش بخطوبة او زواج , الا لما تعملي تقييم بشكل واسع لطباعه و خلقه , عشان تتأكدي من تناسبكم لبعض . .

 

 

 

ان كان التفاؤل المبالغ فيه  مناسب جدا لطفلة , ومسموح بيه كطالبة , و يعني مقبول شوية مطالبة جامعية ,  فهو خطر جدا لما تتخرجي و تواجهي الحياة . .

 

لأن التفاؤل المبالغ فيه بيصنع قدامك طريق رائع و هايل في الحياة , و بيعطيكي كمية ضخمة من الامل في المستقبل . .

 

فلما تواجهي الجانب الحقيقي القاسي من الحياة , هتفاجئي قد ايه الصورة متغيرة عن اللي انتي فكرتي فيها  , وقد ايه العالم "متوحش و قاسي" . .

 

و علي قد ما كان تفاؤلك عالي جدا , علي قد ما هيكون سقوطك مؤلم جدا . .

 

وارد طبعا متحصلش الصدمة ديه  ,بس خلينا نبص للنص الفارغ من الكوب . .

 

فلازم تعملي نوع من "تهدئة خواطرك" , و "النظر الواقعية للحياة" ,  متفرحيش كتير بالمستقبل , بالطبع نكون متفائلين بس مش بالشكل اللي يعمينا عن واقع الحياة . .