العنوان : أختي العدوانية

القسم: #النفسي

الرقم: 88

السؤال:

 

لو سمحت اختي عندها 19 سنة عدوانية بتحب تتخانق مع الناس وتتخانق معانا

 

لسانها سليط ممكن تكسر اي حاجة او تحدفنا باي حاجة طبيعتها مختلفة تماما عننا بتغلط فينا وبتغلط في امي وتتخانق معاها وتشتمها عادي

 

من صغرها من اول الاعدادي وابتدت تظهر بمشاكلها وابتدت تاذي فينا لما لقيت مش بنقدر عليها انا واختي بقيت تستقوي علينا وتشتم وتضرب واحنا مش بنعرف نجاريها

 

كل ذكاءها وفهمها في المشاكل والمصايب بس لكن في اي حاجة مش بتفهم  الصح والغلط الاصوال مالهاش كبير

 

من فترة اتعرفت علي شاب  وابتدت تتكلم معاه علي اننا بنعذبها في البيت وانها ضحية واننا وحشين جدا معاها وان امي بتعذب فيها وقصص من تاليفها مش حقيقة بتخترعها وتقولها  ان امي بتضربها بحديدة  واننا بنعاملها وحش انا واختي 

 

ومرة قالت اننا ضربنها وقررنا انها تسافر البلد عند اعمامي وتتحبس  ومرة تصور شنطة العلاج بتاعة البيت كله وتقول ان كمية العلاج ده بتاعتها  بتحاول تظهر بانها ضحية ومريضة واننا شياطين عشان تضغط عليه انه يجي يخطبها وينقذها مننا وحورات لا حصر لها

 

واخر واحد قال مفيش مشكلة عضوية ده مشكلة نفسية  وجه اتقدملها فعلا قالت محدش يتعامل معاه تماما وفهمته انه ميتعاملش معانا لاننا وحشين وبالاخص امي يعتبر انها مش موجودة ابتدي يعاملنا بصورة غريبة ومعاملة انه مالناش اي وجود او اعتبار وكل ده وهي خايفة يتعامل معانا يكتشف حقيقة كذبها وقصصها الكذب عننا وكل الضغط ده عليه جه بعد خطوبتي  انا واختي مكنتش متحملة اننا نتخطب قبلها مع اننا اكبر منها  باربع اعوام وخمسة

 

دايما في قلق من ناحيتها انها ممكن تاذينا عشان تفتح حوار معاه ممكن تخترع اي حاجة مش موجودة  وانها في مشكلة تعبنا من تصرفاتها واسفة علي الاطالة (بابا وماما منفصلين ومفيش بينهم اتفاق وفي مشاكل من صغرنا في البيت وتفكك اسري لعدم اتفاق الام والاب وبتحس ان مالهاش كبير مع العلم اننا كلنا بنات)

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

اهلا بيكي . .

 

من الواضح ان عندها ازمة كبيرة , والمتمثلة في إنها تشعر بمشاعر الإضطهاد + عقدة النقص + الكذب الغير مبرر .

 

اللي عندها مش إضطراب نفسي , لكن مشكلة سلوكية , لأن أغلب الناس اللي بتعاني من إضطرابات نفسية بيكون مش مدرك ان هو بيعمل حاجة غلط , هو من جواه بيكون مقتنع انه صح و ان الناس هي الي غلط  , وده بيكون باين جدا في امراض نفسية مشهورة زي الذهان  او السكيزوفرينيا او الوسواس القهري .

 

لكن اللي عندها نوع من الحيل الدفاعية اللي بيمارسها عقلها الباطن عشان يحقق واحد من كذا هدف محتمل :

 

• إما إن عندها مشكلة في التقدير , محدش كان بيقدرها من طفولتها , وبالتالي لجأت للسلوكيات الغير معتادة ديه للحصول عليه , متنسيش ان أهم بند في هرم مازلو للاحتياجات الإنسانية هو الشعور بالتقدير

 

• وإما يكون رد فعل قاسي علي العنف الغير مبرر الي اتعرضت ليه في طفولتها , ضرب الأطفال باستمرار هو أكبر جريمة ممكن يرتكبها الأبوين ضدهم , خاصة مع وجود بدائل كتير للضرب . الضرب ممكن يستخدم بكمية محدودة و لأسباب معينة و بأسلوب صحيح , لكن اللي بيعمله أغلب الآباء و الأمهات هي كارثة

 

• ممكن يكون بسبب التمزق الأسري اللي عانت منه , صحيح ان انتي و باقي اخواتك مريتي بنفس الظروف لكن مش كل الناس متشابهة في التعاطي مع الأزمات , فده ممكن يكون احد ردود الأفعال العنيفة تجاه معاناتها الإجتماعية

 

• أخيرا ممكن يكون ده طبع في شخصيتها , أحيانا الطبع العنيف بيكون بسبب تعاطي الأم أدوية غير مناسبة أثناء الحمل , و فيه أطباء قالو ان الأزمات النفسية و الاجتماعية و الضغط العصبي اللي ممكن الحامل تمر بيه بيأثر علي الطفل بالشكل ده

 

-------------------------------------------------------------------------------------

 

طب ماذا عن الحل ؟ ؟

 

بناء علي الأسباب الاربعة المحتملة السابق ذكرها , احنا ممكن نستنتج الحل المناسب .

 

 

• أولا فكرة ذهابها لطبيب نفسي أو أخصائي , فكرة قد تكون جيدة , فيه عدد من أساليب التحليل النفسية (المدرسة الفرويدية) لإلقاء الضوء علي الأسباب الحقيقية للأزمة , وبالتالي علاجها

 

• كذلك الطبيب او الأخصائي , ممكن يمارس معاها العلاج السلوكي المعرفي CBT  , واللي بيعمل تغيير بمقدار ما في قناعات و افكار الشخص , و بيكون عنده قدرة علي تغيير السلوك  , وكمان في مشكلة الكذب المستمر

 

• الطبيب النفسي ممكن يكتبلها عدد من الأدوية , اللي هتساعد علي هدوء اعصابها , وقليل حدة العصبية و النرفذة اللي عندها , وبالتالي تجنب جزء كبير من المشكلة

 

• ذهابها للطبيب مش هينفع الا بموافقتها , ديه حاجة مفيهاش إجبار , وبالتالي لازم تطلع من شخص هي بتحبه و تحترمه  , زي والدها او خطيبها , لكن منك انتي أشك انها توافق

 

• حاولو تصنعو جزء من التقدير اللي هي ممكن تكون بتبحث عنه باستخدام المشاكل ديه ,  امدحو فيها سلوكها الإيجابي حتي لو كان قليل , وامدحو فيها جمالها او خفة دمها , الحاجات ديه بتفرق جدا

 

• لما تغلط فيكم يفضل عدم السكوت , السكوت لما هي تغلط هيشجعها تزود في الغلط و تستمر فيه , حاولي تشوفي اسلوب يجمع بين الحزم و الهدوء لايقاف اي خناقة من قبل ما تبدأ

 

• تعاملي معاها كصديقة مش كند لو منافس ليها , قربي منها اكتر و اسمعي منها لو فيه حاجة مضايقاها

 

• جيبيلها هدية كل فترة , حتي لو شئ رمزي ,  الحاجات ديه بتفرق جدا

 

• اخرجي معاها و اعزميها علي العشا برة في مطعم ما , ومتتكلميش معاها في اي حاجة فيها مشاكل , اسمعي منها بس , ومتقوليلهاش اي نصايح

 

 

أظن لو مشيتي علي الخطوات ديه , هتلاقي نتيجة ايجابية ان شاء الله