العنوان : الإنطباع السلبي

القسم: #النفسي

الرقم: 93

السؤال:

 

صباح الخير

 

قررت فعلياً احكي أكتر حاجة مش حباها في نفسي ومستغرباها في نفسي جداا...

واحدة صاحبتي كانت لسه مبقلهاش ٦ شهور معانا في الشغل عملت حادثة كبيرة جداا وللأسف بقالها سنة بتتعالج وعملت عملية كبيرة جداا.. المهم ان بالصدفة اصحابها كلموني من يوم الحادثة لأني مكنتش قريبة منها بالدرجة دي، ومن يوم الحادثة لمدة ٣ شهور قعدتهم في المستشفى يوميا انا كنت معاها واوقات كنت بمشي من المستشفى ١٢ بليل والشغل سمحلي اني استأذن براحتي لحد ما تطلع.. لأن اختها ومامتها كانه معاها في الحادثة ومكنش في حد يقدر يساعدها غيري انا وواحدة صاحبتها تانية..

 

الفترة دي كانت فترة ضغط عصبي ونفسي علياا جامد جدا خاصة اني كنت بمر بأزمة نفسية بسبب بعد شخص ما وكان حواليها ناس بجد كلامهم مؤذي جداا وافعالهم كمان وكان بيحصل حاجات بتضايقني جدا ويوميا امشي متضايقة وكان وجعها وتعبها تاعبني جداا برضو..

 

كل ده الحمدلله عليه وربنا كريم.. بس اللي تاعبني انها لما خرجت من المستشفى بيتها بعيد عن بيتي جدا مكنتش بروحلها وزعلت مني بس انا كنت فعلا تعبت نفسيا ومش هقدر اروح المشوار وكنت متطمنة ان في ناس حواليها...

ورجعت الشغل من كام شهر بس مش عارفة ليه مش حاسة اني عاورة اقعد معاها ومحبش اتكلم معاها في حاجز نفسي كبير مني ناحيتها مش قادرة اتعامل لو جت تسلم عليا وهتقعد معايا ببقى من جوايا بقول يارب متقعدش 😔

 

مش عارفة ليه قلبي مقفول من ناحيتها، هى كان ليه دور في الحاجات اللي كانت بتضايقني بصراحة بس هى اصلا برضو كانت تعبانة وفيها اللي مكفيها.. غير كده انها بتتعامل بعشم اووي اللي هو اي حاجة انا اعملهلها ده بعد ما خرجت.. انا نفسيتي عامة مش مستقرة مريت بكام صدمة نفسية معتقدش اني خفيت تماما منهم.. بس الموضوع مزعلني خايفة هى تحس بجد اني مش عاوزة اتعامل معاها مع اني على اد ما بقدر مش ببين.. انا نفسي اعرف سبب اللي انا فيه ده وكل يوم ادعي ربنا يصلحلي قلبي يمكن هو زعلان مني 😔

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

أهلا بيكي . .

 

طيب الرد باختصار كالتالي : انتي مش غلطانة و هي عندها نسبة قليلة من الغلط , و حل الموضوع هييجي عن طريق انك تعملي شوية تغيير في تعاملك مع المشكلة ,  وده هياخد شوية وقت بس هتلاقي الازمة انتهت . .

 

و هنا التفاصيل

 

------------------------------------------------------------------------------

 

من ساعة ما حصلت الحادثة لها , وانتي عملتي عمل بطولي يندر ان حد يستمر عليه , وهو المواظبة علي مساعدتها في مرضها , وثقي ان ربنا هيكرمك من فضله و كرمه , وهتلاقي الاثر الطيب اللي عملتيه في الدنيا و الآخرة ان شاء الله . .

 

و بالتوازي مع ده , انتي محتاجة تعملي نوع من التعديل و التغيير في اسلوب تعاملك وتناولك للأمر , مش عشان اسلوبك غلط , لكن عشان الموقف نفسه مختلف عن المواقف المعتادة في الحياة العادية . .

 

و ده اللي هنلخصه في النقط كالتالي :

 

 

 

• أولا من المهم التفكير بأسلوب : اعملي الخير و ارميه في البحر , يعني ببساطة اعملي الشئ الصح واللي عليه ثواب كبير من رب العالمين , وبعدها انسيه تماما , ولا كأنه حصل , وده طمعا في الأجر الأكبر من المولي تبارك و تعالي , حينما يري ان قلبك كان بس بيتحرك في عمل الشئ ده رغبة في رضاه , مش عشان اي هدف تاني

 

 

 

• بالتوازي مع ده  , لازم يكون عندك منطق ان العطاء ممكن يكون محدود , ممكن عادي يكون بمقدار محدد مش مفتوح 100 % , وده لأن فتح حنفية العطاء فوق المطلوب , ممكن يعمل تدمير لباقي الجوانب اللي عند الشخص , حتي إن الرسول صلي الله عليه و سلم منع سيدنا سعد بن ابي وقاص انه يأمر بتوزيع اكثر من ثلث ماله بعد وفاته , لان اسرته لها حق مينفعش يتم تجاهله 

 

 

 

• بالتوازي كمان مع ده , لازم يكون عندك منطق حسن الظن في الناس , واللي ممكن يتم ترجمته لكلمة ( تكبير الدماغ عن اي انطباع او كلام سلبي ييجي منها )

• ياريت من جواكي يكون عندك نسبة من مسامحتها علي اللغبطة اللي هي عملتها , انا عارف انه موقف سخيف منها انها تطلب  طلبات متناقضة من كذا شخص , وبيعمل شوية احراج علي شوية من الاحساس بعدم جدوي مساعدتها , بس زي ما قلتلك لما تفكري انها كانت في وضع صحي متعب شوية , فممكن الواحد يعدي شوية من الاخطاء اللي ممكن تكون وقعت منها , وانتي عارفة انها من جواكي بتحبك و بتحترمك , وشايلة جميلك فوق راسها

 

 

• ياريت تبدأي في كسر الحاجز اللي بينك و بينها بقدر الإمكان , انا عارف ان الامر مش بايدك , بس حاولي بقدر الإمكان .

• و خدي بالك كسر الحاجة مش معناها انك تأذي نفسك أكتر من كدة بمعاناة خدمتها او تحملها , يعني لا بأس انها تكون علي مسافة نفسية منك , او يكون تعاملك معاها محدود , بس علي الاقل تكون نفسك صافية من ناحيتها , و بشوشة معاها و التواصل بينكم معقول

 

• دربي نفسك علي فن الاعتذار عن مهام معينة , او اشياء الناس تطلبها منك , و في نفس الوقت من غير مضايقة الشخص نفسه , الموضوع مش صعب بس عايز شوية تدريب , و غالبا بيكون العذر هو الانشغال الشديد مش انك رافضة تساعدي الشخص , وده تجنبا لاي مشكلة مشابهة مستقبليا ,سواء مع نفس البنت او حد غيرها

 

• من المهم انك تعملي تفكيك للمشاكل القديمة اللي قلتيها , انك تسيبيها زي ما هي ده مش حل للأزمة لكن تجاهل لها , امسكي ورقة و قلم و شوفي المشاكل القديمة واحدة ورا التانية , وشوفي ازاي تتحل او علي الاقل التقليل منها

 

• لو كانت بعض المشاكل القديمة غير قابلة للحل , او مش هتعرفي تحليها حاليا , يبقي علي الاقل ابدأي في التخفيف من اثارها النفسية عليكي , يعني حتي لو هي مستمرة , خليها ميكونش لها اثر سلبي عليكي عشان تقدري تمارسي حياتك بشكل طبيعي

 

• من المهم انك تتوقفي عن إظهار مشاعر عكس الباطن , علي الأقل بالنسبة لدائرتك القريبة , لازم تفضفضي و تتعاملي براحتك اكتر , , وتبحثي عن واحدة قريبة منك في الاسرة او صديقة تثقي فيها , عشان تفضفضي معاها بالكامل , ده حتي لو محلش المشكلة فهيخفف كتير من اثارها النفسية عليكي

 

• أخيرا كلمة "زعلان" لا تليق بوضعها كصفة لرب العالمين

 

 

ربنا يوفقك يا رب , ويفرج عنك الكرب