العنوان : العمدة

القسم: #الاجتماعي

الرقم: 27

السؤال:

 

 عندي مشكله ومش عارفه اتصرف ازاي

 

بقالي عشر سنين متجوزه وعندي تلات اطفال.كان الحال كويس وممشينها تمام بس من غير مانحوش ولا مليم كله بيتصرف علي الاكل والشرب وتعليم الاولاد .

 

جت الدنيا اتغيرت معانا كتير ومبقاش معانا حتي ندفع مصاريف المدرسه .بقا جوزي يستلف من اصحابه عشان المدرسه .دا غير مساعدات الاباء.بابايا ومامتي وباباه ومامته .

 

قولتله يشتغل شغلانه كمان مع الوظيفه .كل همه يقعد علي القهوه .ولامم اصحابه حواليه ومعارفه وولاد منطقته وعامل فيها عمده .يحل المشاكل .يطلعهم من الاقسام بعلاقاته في الداخليه .طيب بيتك وولادك ومراتك .هو انا اتأخرت ما انا اهو .طبعا ده رده

 

.جيت انا خرجت العيال من المدارس اللغات وقدمتلهم في حكومه مع انه رافض .بس موافقش إلا لما قولتله دا مامتك واختك هما اللي نصحوني بكده .ساعتها بس سكت .

 

 بعد كده لقيت مستوي المدرسه اقل ما يجب ان يقال .قولتله الحل اننا نقدم في اسكان الشباب تجيلنا شقه في مدينه جديده نقدم للولاد فيها واهي هتكون انضف من المنطقه الشعبي اللي عايشين فيها .ونبقا نيجي خميس وجمعه نبات في شقتنا هنا وتشوف باباك ومامتك ..انا بابايا في محافظه تانيه وعايشه مع اهله في القاهره

 

 طبعا كأني قولت شتيمه او ........قالي انا مش هسيب ابو يا وامي واختي .قولتله ما اخوك الكبير عايش بعيد عنهم وانت مصلحه بيتك وعيالك هي اللي طالبه كده .وبعدين فيها ايه لما نفكر في مستقبلهم ونعيشهم في مكان نضيف .قالي ما انا مش جايبك من الزمالك

 

وفضيلنا نتكلم ونرد علي بعض وفي الاخر جوزي انسان مش طموح  اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

للأسف زوجك عنده خلل في الأولويات , ومش قادر يستوعب المشكلة بصورتها الحقيقية  .

 

ان الشخص يهتم بشئون الناس و يساعدهم و يحللهم المشاكل هو شئ هايل , ولكن لما ده معناه انه اصلا ينسي دوره الاساسي كزوج و أب , ديه مشكلة كبيرة .

 

بس هنا نسأل سؤال الأول  ,  هو ليه اساسا بيعمل كدة ؟ ؟

 

ليه عامل عمدة علي الناس , وناسي ان اهل بيته بيشتكو وبيعانو  ؟ ؟

 

 أحيانا البعض بيحب ينشغل بالفعل بمشاكل الناس , و يتدخل في دهاليزها بشكل كبير .

 

وده لأن القيام بالدور المهم اللي انتي سمتيه "العمدة" بيملئ عنده احتياج مهم اسمه "الشعور بالتقدير" .

 

لأنه في حل المشاكل بيكون هو الآمر الناهي , يسمع من الطرف ده , ويوقف الطرف ده , ويفكر شوية , ويتخذ قرار عشان يمشي علي الجميع , في حين باقي "الشنبات" بتصنت ليه من غير ما تكسر له كلمة .

 

 

و ده بيملئ مشاعر "تقدير الذات" اللي اتكلمنا عنها في السؤال اللي اسمه "هرم مازلو" .

 

 و بعض اللي بيعملو كدة , بيكون للأسف هو محققش قبل كدة انجاز كبير في حياته و شغله  , وأحيانا بيكون عنده شعور بالنقص , عشان كدة عايز يملاه بالشعور انه بالفعل مهم و عمل انجاز .

 

وبعض اللي بيعملو كدة , هو عنده شوية "عزة نفس" , ونوع من "الكبرياء" , واللي بيجعله يهتم جدا انه يجعل الناس "تترص" قدامه  , وهو يملي شروطه و احكامه عليهم , ولازم يسمعو الكلام .

 

و البعض مش بيكون عن احتياج نفسي , قد ما هو عنده الشعور بحب الناس , وعايز بالفعل يخدم  بس للاسف هو مش فاهم انه بيدمر بيته كدة , وان خدمة الناس ممكن تتعمل في وقت محدد من غير ما يتعارض مع بيته او شغله او عياله .

 

والعجيب ان المشكلة في بيتكم بتتفاقم بشكل تدريجي مش فجأة , ومع كدة هو مش قادر يحس بالمشكلة اللي بتزيد و بتتراكم وبتتعقد .

 

فان اقساط المدارس تزيد , وهو يستلف , وبعدها تضطرو تغيرو مدارس الاطفال مع الاختلاف الكبير في المستوي , وهو لسة مصر علي نفس النمط الغريب في الاهمال .

 

-------------------------------------------------------------------

 

ولو هنتكلم في المشكلة التانية , فلو هتاخدي رأينا , انها مش بنفس أهمية او خطورة الأولي . .

 

لان بشكل او بآخر , ترك المنطقة اللي انتو فيها و الذهاب لمنطقة تانية , وان كان حاجة كويسة وايجابية الا انه مش الحاجة اللي موقفة المصالح  ,او هتعمل مشاكل حالية   .

 

يعني المشكلة الاساسية في زوجك هو خلل الاولويات عنده , مش المنطقة نفسها .

 

فلو انتو بقيتو في المنطقة , بس هو اتغير و بقي يروح الشغل , ويعطي زوجته و اولاده حقهم في الوقت , هتتحل المشكلة .

 

ولو انتو انتقلتو لمنطقة كويسة , وهو ظل بالاسلوب الغريب في توزيع وقته علي الناس , فالمشكلة باقية  .

 

فانتي اعملي نوع من "تجزيئ" المشكلة , ابدئي بس بالمهم دلوقتي , وركزي عليه , وسيبي نقطة العزال لمكان تاني لوقت لاحق .

 

خاصة ان ممكن يكون عنده نوع من التمسك بوالديه , وزي ما قلنا مش هي دي الازمة حاليا .

 

و ممكن قدام تعيدي طرح الفكرة , بس تقولي يللا نقدم عليها عشان حد من العيال يتجوز فيها قدام , متقوليش عشان نعيش فيها , ولما تيجي بعد سنين يكون لكل حادث حديث

 

 

وهنا هحاول اقول عدد من الخطوات , اللي ممكن تفيد في حل مشكلة "العمودية" ,واللي حاولي تطبقيها بالترتيب ,يعني ابدئي برقم 1  ,لو منفعش يبقي شوفي اللي بعده و هكذا

 

 

 

 

• الالحاح عليه . .

 

 

 

• البكاء . .

 

 

 

• الصمت معاه . .

 

 

 

• تشوفي كبير في عيلته . .

 

 

امشي علي الخطوات ديه بالترتيب , واتمني انها يكون ليها اثر في علاج الأمر . .