العنوان : اختبارات الزواج

القسم: الاجتماعي

الرقم: 50

السؤال:

 

 

اهلا بيكو يا صفحة

 

انا حاليا بدور علي عروسة , و كنت قريت قبل كدة ان فيه حاجة زي اختبارات بتساعد علي ان الواحد يعرف صفات الزوجة اللي تناسبه و العكس , دورت ملقيتش حاجة كويسة فلو تقدرو ترشحولي حاجة يبقي كتر خيركم

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

  

أهلا بيك يا عريس . .

 

أنا سعيد انك سألت السؤال ده – علي رأي ابو اسماعيل – لأن الموضوع مهم , وقليل من الناس اللي بتفكر بطريقة علمية زيك كدة  . .

 

الواحد بيفرح لما يلاقي حد مهتم بتطبيق العلوم الإدارية و السيكولوجية في حياته العملية . .

 

بالفعل فيه عدد من اختبارات "التوافق الزوجية" واللي بيكون ليها 3 ادوار بالغة الأهمية , بيتم تصنيفها  بناء علي امتي بتستخدم الإختبار ده . .

 

• لو انت لسة بتدور و ملقيتش حد معين , فالاختبار بيكشفلك شخصيتك بشكل كامل ,  بيوضحلك مميزاتك و عيوبك , والأهم انه بيعرفك ايه علي أي اساس تختار شريكة حياتك

 

• ولو انت بالفعل لقيت واحدة , بس لسة ماخدتش قرار بالارتباط و الخطوبة , فالاختبار بينورلك و ينورلها الطريق عشان اتخاذ القرار يكون بناء علي اساس علمي , مش انطباع سريع قد يكون غير دقيق . 

 

• ولو بالفعل فيه اتنين متجوزين بقالهم سنين , و سواء حياتهم سعيدة مع بعض , او فيه بعض المشاكل الثانوية , او حتي فيه مشاكل عميقة , فالاختبار هنا مش هيحدد يكملو ولا لا , لكن هيعرف كل طرف فيهم ايه اللي يحبه الطرف  التاني و ايه اللي بيكرهه , ايه اللي عايزه و ايه اللي بيضايقه , وبالتالي الاختبار هيكون بمثابة قاموس لفهم متطلبات و معاناة الطرف الآخر , واللي بيسهل جدا التفاهم  المشترك بناء عليه . .

 

وكأن الاختبار قبل الاختيار بيسهل عملية اتخاذ القرار نفسها , ولو تم الاختيار بالفعل سواء خطوبة او كتب كتاب , بالاختبار بيخلي الطرفين يفهمو بعض بشكل أوضح , وبالتالي تخلو حياتهم من كتير من المنغصات . .

 

---------------------------------------------------------------------------

 

قبل ما نشرح الاختبار محتاجين نتكلم عن مصطلحين , قريبين شوية من بعض و فيه ناس بتتلغبط بينهم , بينما التمييز بينهم هو شئ مهم عشان نفهم أساس الاختبار نفسه . .

 

الاخلاق , والطباع . .

 

ببساطة الاخلاق , هي الصفات اللي يتفق عليها الجميع , العربي و الاوروبي , المسلم و المسيحي , المؤمن و غير المؤمن , زي الصدق , الامانة , الوفاء , الاهتمام , الجدية . .

 

الطباع مختلفة شوية , هي صفات قد يتفق فيها ناس و يختلف فيها ناس تانية , ناس شايفاها بالغة الاهمية , وهما عندهم حق , وناس شايفاها مش مؤثرة كتير, وبرضه عندهم حق  . .

 

يعني مثلا ان الشخص يكون بيحب القراءة , اه حب القراءة حاجة كويسة , بس مش من الحاجات الاساسية اللي بتوقع البيت , و الشخص محب القراءة مش بالضرورة كويس , والل مش بيحب القراءة مش معناه انه وحش . .

 

البنت اللي بتحب الأطفال , ديه حاجة نسبية , ومش مبني عليها السعادة الزوجية

 

فيه ناس بتحب تصحي بدري جدا , ناس تحب تسهر للفجر

 

فيه ناس محبة للدراسة الأكاديمية  , فيه ناس محبة للشغل العملي

 

فيه ناس اجتماعية مش بتلاقي سعادتها الا بالاختلاط مع الناس , فيه ناس متحفظة بتتعامل في الحدود الضيقة . .

 

كل ديه طباع , مفيش منها حلو ووحش , او حرام و حلال , كلهم كويسين بس حسب الاستخدام

 

حتي الحاجات اللي سهل نميزها ايجابي و سلبي  زي النشاط و الكسل , فهي لا تزال في الإطار المباح ,  فالكسل مش حرام طالما ممنعش عن عبادة او واجب أسري او منزلي عليك   . .

 

---------------------------------------------------------------------------

 

ايه بقي فكرة الاختبار ؟ ؟

 

انه بيقيس أربع حاجات بالتحديد . . .

 

• مميزاتك : انت كزوج ايه النقاط اللي انت متميز فيها ,  وتعتبر نقاط قوتك

• عيوبك :  ايه الحاجات اللي تعتبر نقاط ضعفك و بتعاني منها

• رغباتك  :  ايه الحاجات اللي انت عايزها تكون في شريكة حياتك

• المسموح : إيه العيوب اللي انت ممكن تقبلها في شريكة حياتك من غير ما هتكون بالنسبة لك أزمة كبيرة

 

وفي نفس الوقت , يكون فيه اختبار مماثل موجود عندها هي كمان , وبرضه هيقيس اربع حاجات مشابهة :

 

• مميزاتها كزوجة

• عيوبها الموجودة عندها

• رغباتها , ايه اللي عايزاه في الزوج

• المسموح : يعني العيوب اللي ممكن توافق عليها لو هي عندك

 

 

وعن طريق عمل توفيق matching  بين اجاباتك و اجاباتها , يتم تحديد مدي ملائمة كل منكم للآخر

 

لاحظ إن كل اللي هنقوله هنا هيكون بعيد عن الدين و الخلق , يعني مش هنذكر حاجات زي : بيصلي , صادق , وفي , بيصل الرحم , امين , لأن أساسا الحاجات ديه المفترض انها منتهية , وانها بالفعل موجودة عند الطرفين , احنا لسة مش هنناقش هي بتصلي ولا لا , هو هيخون مراته ولا لا

 

احنا بنركز بس في الطباع , اللي فيها نوع من الاختلاف حوليها  , او حتي لو هنناقش حاجات احنا متفقين عليها (زي النشاط و الكسل) فهي هتكون حاجات مش رئيسية ممكن غيابها يهد البيت

 

تعالي نشرح بتفصيل أكتر . .

 

---------------------------------------------------------------------------

 

لو قلنا ان محمد مثلا , راجل عنده مجموعة من المميزات  , منها : انه راجل مثقف و قارئ جيد (مش هنتكلم عن انه حافظ للقرآن أو إنه مش بياكل مال حرام , لأنها بالفعل منتهية) , ده كدة البند الأول

 

بس هو عنده عيب انه سريع الغضب شوية , البند التاني

 

ومن أهم رغباته في شريكة حياته انها تكون اجتماعية جدا, البند التالت

 

ومن العيوب المقبولة عنده , انها تكون كسولة شوية (الحد المقبول) , البند الرابع

 

وهو عايز يشوف مدي تطابقه مع هاجر , واللي لما جاوبت علي الاختبار , اختارت من أكبر مميزاتها انها نشيطة جدا

 

بس من عيوبها انها انطوائية شوية

 

ومن رغباتها في الزوج ان يكون متفاهم و حنون

 

و من العيوب المقبولة انه يكون انسان بسيط , مش لازم يكون ناجح ولا معاه الدكتوراه

 

 

هتلاحظ لما تطابق اجابات احمد و هاجر , وان علي الرغم ان الاتنين متدينين وعلي خلق و ولاد ناس محترمة , إلا إنهم مينفعوش لبعض خالص . .

 

هو من رغباته عايز انسانة اجتماعية تتعرف علي امه و اخواته و تروح هنا و هناك و تعمل نشاط اجتماعي , بينما من عيوب هاجر للأسف انها انطوائية شوية , وهو ان كان عيب مقبول علي العموم بس معاه هو هيكون مشكلة . .

 

وفي نفس الوقت من العيوب اللي هو يقبلها و يوافق عليها عدم وجودها انها تكون كسولة , مش فارقة معاه كتير , بينما هي من مميزاتها انها اصلا نشيطة بطبعها  . .

 

واخد بالك إن أكتر حاجة هو عايزها في مراته (الاجتماعية ) مش موجودة عندها للاسف , والحاجات اللي هو مش فارقة معاه كتير (نشيطة او كسولة) هي عندها الفعل

 

يعني نقاط قوتها (انها نشيطة) لا تعنيه في شئ , بينما نقاط ضعفها (انطوائية) بالنسبة له هتكون أزمة كبيرة

 

---------------------------------------------------------------------------

 

و العكس . .

 

هي تتمني انسان متفاهم و حنون و صبور , ديه اهم حاجة عايزاها في شريك حياتها , بينما عيبه للأسف انها سريع الغضب واللي غالبا هيتعارض مع رغبتها

 

وفي نفس الوقت هو عنده ميزة عالية جدا انه مثقف وواسع الاطلاع , بينما هي لا تبالي بالموضوع ده كتير زي ما باين من العيوب المقبولة اللي اختارتها . .

 

طبعا المثال اللي اتقال هنا هو مثال "محبوك" قوي , لكن  هو لتوضيح الفكرة . .

 

ولو ان نفس أحمد , اتقدم لرانيا , واللي لما هي اختارت من مميزاتها انها اجتماعية تماما , بس من عيوبها انها كسولة شوية

 

و لما اختارت من اهم رغباتها يكون انسان فاهم و متعلم و مطلع , وهي معندهاش مانع ان يكون من عيوبه انه يكون طبعه حامي , لأن هي صبورة اصلا . .

 

هنلاقي وقتها ان احمد و رانيا يتناسبو مع بعض بشكل كبير , لان نقاط قوة كل واحد فيهم , هي نفسها اكبر رغبات الشخص التاني , بينما عيوب كل واحد فيهم , هي نقاط مقبولة عند الطرف التاني  . .

 

وصلت الفكرة يا عريس ؟ ؟

 

---------------------------------------------------------------------------

 

فلما يتعمل الاختبار ده ليك قبل ما تختار اي بنت اساسا , هيسهلك انك تعرف حقيقة نفسك من بالتفصيل, بحيث لما تدور علي بنت , تبقي عارف بتدور علي ايه بالتحديد . .

 

ولو اتعمل و انت بالفعل هتخطب واحدة , وعايز تتأكد من مدي مطابقتك معاها , هيسهل ليكم انكم انتو الاتنين تعرفو مدي ملائمتكم لبعض , ويا تري نسبة المساحات المشتركة قد ايه , وكمية الاختلاف قد ايه . .

 

 بفرض إنك بالفعل موافق علي واحدة , او انك خطبتها , او انك متجوز بالاساس و عندك منها 6 اطفال , فالاختبار ده مش هيكون عشان يقولك تكمل ولا لا , لكن عشان يعرفك يا زوج , مراتك عايزة منك كذا كذا , وهي مستعدة تستحمل كذا كذا , ويا زوجة , زوجك من اهم اولوياته كذا كذا , وهو مستعد يسامحك في كذا كذا

 

وده بيجعل التعامل اكتر سهولة ويسر , فلو انت كنت بتحسب ان من اهم رغبات مراتك التورتة و عيد الميلاد و الهدايا و الدباديب , بينما هي كل ده بالنسبة لها حاجات هايفة , ويهمها اكتر من كدة انك تتواصل مع اهلها و اخواتها , وتكون اجتماعي اكتر , ساعتها هتعرف توظف وقتك و جهدك للحاجة اللي بتسعدها بشكل اذكي , وافضل  . .

 

وللأسف لأن أغلب الازواج و الزوجات مش بيمارسو اسلوب "الصراحة" في التعامل بينهم , فممكن هو يكون متضايق من شئ معين فيها , بس هو صابر و مش عايز يحرجها , او هي تتمني وجود شئ معين بيه , بس محرجة تقوله عليها , ويظلو سنين عايشين مع بعض , من غير ما حد يقول للتاني عايز ايه . .

 

ولو هي كانت طاحنة نفسها في البيت نضافة و ترويق بشكل مبالغ فيه لانها بتحسب ان ديه اولوياتك , بينما ده في الواقع لا يعنيك كتير , ويهمك اكتر ان هي تكون مثقفة و مطلعة و قارئة , ساعتها هتوفر شوية وقت من هنا عشان تحطه هنا لان ده يهمك اكتر  . .

 

الاختبار بينور الطريق لكل طرف فيهم عشان يفهم رغبات اللي قدامه  ,بفرض إن هو بالفعل متخذ القرار انه هيكمل معاه . .

 

---------------------------------------------------------------------------

 

وهنا ييجي سؤال محير . .

 

ازاي لما اجي اجاوب , هقدر اتحكم في نفسي عشان اعمل اختيار سليم للنقاط الاربعة , ونفس الموضوع بالنسبة لاختيارات الزوجة  . .

 

يعني لما هتيجي مساحة : اذكر مميزاتك كزوج , رغما عني هكتب حاجات كتير , حتي لو مش فيا , حتي لو حاولت ادعي الحيادية , ولما تيجي مساحة اكتب عيوبك , غصب عني هكتب حاجات ثانوية بسيطة غير مؤثرة , ومش هجيب سيرة الحاجات الحقيقية , عشان يبان ان انا مفيش زيي  . .

 

و نفس الموضوع بالنسبة للزوجة , ايه اللي هيعرفني ان الاجابات دقيقة و مظبوطة , مش هنقول حد فيكم هيكدب , بس بيكون فيه نوع من المبالغات اللي الشخص صعب جدا يتحكم فيها . .

 

وده فورا هيفقد الاختبار معناه و مغزاه , لانه معتمد علي مطابقة البيانات هنا و هنا . .

 

هنا الاختبار بيعمل حركة جميلة , يجبرك علي الدقة في الاختيار رغما عنك . .

 

و ده بيتم ان كتابة البنود الاربعة : المميزات , العيوب , الرغبات , المسموح , مش بيكون كتابة  ,ولا حتي اختيار , لكن بيكون ترتيب . .

 

يعني ايه ؟ ؟

 

يعني انا لو جيت في استمارة الاختبار , وجبتلك مثلا 30 ميزة من المميزات اللي بتكون في الازواج , وقلتلك اعمل علامة صح علي الحاجات اللي عندك

 

هتلاقي غصب عند انت مختار منهم 28 ميزة , وبتشاور عقلك في الاتنين التانيين , وهو مين هيعرف يحاسبك ؟

 

عشان كدة الاختبار مش هيسيبلك حرية الاختيار , لكن هيقولك , اعمل ترتيب للمميزات ديه , حسب قوتها فيك , واكتب رقم جنب كل ميزة من المميزات الـ 30 , بحيث يشير رقم 1 للميزة اللي موجودة فيك بشكل كبير جدا , ورقم 2 للي عندك بس اقل شوية , وهكذا لغاية لما تكون الارقام البعيدة (28 , 29 , 30 ) هي للمميزات اللي مش عندك خالص  . .

 

هنا هتكون انت مضطر رغما عنك , انك تختار انهي صفات بالفعل هي اكتر عندك , وحتي لو انت سبع البرمبة و مفيش زيك , لازم هيكون فيه ارقام قريبة و ارقام بعيدة , وهنا مش هتعرف تكدب او تغش حتي لو عايز . .

 

طريقة تانية , ان يتقال من ضمن المميزات التلاتين , اختار منهم بس 5 , وممنوع تعمل علامة صح علي اكتر من 5 , فهنا برضه هتضطر انك تختار اكتر 5 صفات موجودة فيك , و تستبعد الباقي , حتي لو انت عايز تقول انك جامد جدا في الباقي  . .

 

نفس الموضوع في اختيار عيوبك , اكيد انت مش عايز تعلم علي اي حاجة فيهم , بس لازم تحط رقم 1 عند اكتر عيب موجود عندك , ورقم 2 عند اللي بعده , وهكذا رقم 30 عند العيب اللي مش عندك خالص

 

او انك تختار خمس عيوب من الـ 30 , فلازم هتنقي منهم 5 حاجات اللي بالفعل عندك

 

و نفس الكلام يقال علي الرغبات  ,لو عليك انت هتختار كل حاجة ,ما انت في خيالك عايز شهرزاد , لكنك عشان هتحط ارقام  فلازم تحط رقم 1 عند اكتر رغبة ملحة جدا عندك , و 2 عند اللي بعدها في الاهمية لغاية لما تلاقي اخر ارقام هتكون عند الرغبات اللي هي انت عايزها ايوة , بس مش فارقة معاك كتير , او نفس الفكرة انك بس تختار 5 رغبات , مش هينفع تختار اكتر من كدة , فلازم هتعمل تفضيل

 

و في بند المسموح (العيوب المقبولة في الزوجة) بدل ما تستهبل و تختار عيب هايف عشان تجيلك السفيرة عزيزة , لازم تحط رقم 1 عندك اكتر عيب مسموح , ورقم 2 عند اللي بعده , وهكذا , لغاية رقم 30 عند العيوب الغير مقبولة خالص , او انك تختار 5 عيوب علي الاقل , عشان تكون الصورة كاملة . .

 

فكرة انك تحط ارقام  , او تختار 5 في كل بند , هتخليك محتاج تركز قوي , و تفكر كويس جواك , يا تري الاولوية عندي انها تكون منظمة و مرتبة في بيتها , ولا بتطبخ كويس ؟ عارف انك عايز الاتنين ولو عليك تختار كل حاجة , بس لازم تحدد انهي اولي , ساعتها هتعصر ذهنك في التفكير . .

 

لما تختار من مميزاتك , و نفسك تحط رقم 1 في كل المميزات , بس غصب عنك لازم تحدد يا تري الميزة بتاعت اني (رومانسي و طيوب و كيوت) بالفعل عندي و هي اهم ولا (بحب السفر و المغامرات) , ولا (نزيه و عمري ما بابخل علي بيتي) و هتلاقي رغما عنك لازم تعمل حاجات اولي من حاجات عشان الصورة عندك تبقي واضحة . .

 

و لما هي تختار بنفس المعايير , و بنفس الطريقة , هتلاقي ان الصورة اكتملت تماما, وان كل طرف بالفعل شرح كل شئ عن نفسه , و قدر يرسم خريطة واضحة عن نفسه , وعن تخيلاته في الطرق التاني . .

 

لازم الشاب و البنت يأدو الاختبار في نفس اللحظة , ومن غير ما حد يشوف اجابات التاني , لان لو حد جاوب قبل التاني و التاني شاف اجاباته , غصب عنه هيعمل اختيارات معتمدة علي اللي الاول قالها , وده مش صحيح , نفس فكرة ان ماتشات المرحلة التالتة من الدور الأول في كاس العالم لازم تتلعب في نفس اللحظة . .

 

وبالتالي انت عندك اختبار الذكر , مكون من 4 قوائم (مميزاته , عيوبه , رغباته , المسموح بيه عنده) , واختبار الانثي مكون من 4 قوائم (مميزاتها , عيوبها , رغباتها , المسموح بيه عندها)

---------------------------------------------------------------------------

 

خد بالك ان مجموع القوائم في الاختبارين 4 قوائم مش 8 , لأن فيه تشابه بين عدد من القوائم . .

 

ازاي ؟ ؟

 

لان ببساطة القائمة الخاصة بمميزاته في اختبار الذكر , هي نفسها القائمة اللي الخاصة برغباتها في اختبار الانثي , والقائمة الخاصة بعيوبه في اختبار الذكر  , هي نفسها القائمة الخاصة بالمسموح بيه عندها في اختبار الانثي , ولازم تكون القوائم متطابقة , عشان نعرف نعمل تقييم و مقارنة في النتائج

 

نفس الموضوع القائمة الخاصة برغباته في اختبار الذكر , هي نفسها الخاصة بمميزاتها في اختبار الانثي , والخاصة بالمسموح بيه في اختبار الذكر هي نفسها عيوبها في اختبار الانثي  , يارب تكون الصورة واضحة . .

 

و لاحظ ان مش مطلوب يكون فيه تطابق تماما في الاجابات  , يعني تجربة فاطمة و علي رضي الله عنهما مش هنعرف نكررها , يكفي يكون فيه توافق بشكل عام في 50 % علي الاقل بين (مميزاته - رغباتها) , (عيوبه – المسموح عندها) , (مميزاتها - رغباته) , (عيوبها - المسموح عنده)

 

فلو كان فيه توافق 50 % في القوائم ديه , وفيه عدد من الاختلافات مفيش مشاكل , خاصة لما كل طرف يطـّلع علي اجابات الطرف التاني , فيكون هو مستعد بشكل ما لنقاط ضعفها , ويكون برضه عارف هي ايه اللي عايزاه منه بشكل اساسي , و نفس الموضوع بالنسبة لها . .

 

يعني لما انت تكون عارف ان من رغباتها ان زوجها يكون جسمه رياضي , وانت شايف كرشك باظظ قدامك ازاي , ساعتها حتي لو تم الموافقة , هتعمل حسابك انك لازم تخس بعد الزواج . .

 

وهي لما تعرف ان من العيوب غير المقبولة عند الزوج ان تكون زوجته غير مثقفة , وقتها هتحدد ان من اولوياتها انها تقرأ و تطلع بشكل مكثف . .

 

واخد بالك الاختبار بينور الطريق ازاي لكلا من الطرفين , لمعيشة حياة صحية تكاد تخلو من المشاكل . .

 

---------------------------------------------------------------------------

نييجي بقي للقوائم نفسها  . .

 

هنا هنعمل سرد لأهم الصفات اللي بتتواجد في كل قائمة , ولاحظ ان القائمة مفتوحة , يعني انت لو حسيت ان لازم تضيف بند معين او تحذف بند , الموضوع بتاعك , انت اللي هتتجوز في الآخر

 

 

أولا قائمة مميزات الذكر (هي نفسها قائمة رغبات الانثي)

• نشيط

• مثقف و مطلع

• غني

• نزيه

• شيك

• رومانسي

• اجتماعي

• محب للسفر و المغامرات

• جاد

• كوميدي و مرح

• صبور و متفاهم

• خبير بالتعامل مع الناس

• لبق و متحدث جيد

• خبير بالتعامل مع الأطفال

• رشيق القوام

• وسيم

 

ثانيا : قائمة عيوب الذكر (وهي نفسها المسموح في قائمة الانثي)

• كسول

• غير مثقف

• انطوائي و غير اجتماعي

• عصبي و سريع الغضب

• غير رشيق

• فقير

• غير كوميدي

• ليس شيك او مهندم

• بخيل

• لا يحب العمل

• مسرف

• هناك تحكم او تدخل من الأهل فيه

 

ثالثا : قائمة رغبات الذكر (وهي نفسها مميزات الانثي)

• جميلة

• رشيقة

• نشيطة

• ماهرة في الطبخ

• اقتصادية و تحسن ادارة البيت

• خجولة و حيية

• اجتماعية

• تحب السفر و الترحال

• مثقفة و مطلعة

• خبيرة بتربية الابناء

• غنية

• من اسرة عريقة

• شيك و ذات ذوق جيد في الملابس

• تهتم بالنظافة اهتمام كبير

• صبورة

• جادة

• كوميدية

• محبة للسفر

 

رابعا  : قائمة المسموح عند الذكر (وهي نفسها العيوب في قائمة الانثي)

• كسولة

• غير مثقفة

• انطوائية و غير اجتماعية

• بخيلة

• ليست جميلة

• ليست رشيقة

• من اسرة فقيرة

• عصبية و سريعة الغضب

• ليس لديها ذوق في الهندام و الملابس

• لا تهتم بشكل مبالغ فيه في النظافة

• ليست كوميدية

• سيئة في الطبخ

• مسرفة

• تدخل اهلها في حياتها

• ليست ذات خجل كبير

 

---------------------------------------------------------------------------

 

لو لاحظت ان فيه تشابه في القوائم الاربعة , ديه حاجة لابد منها لان الصفات الانسانية هي هي , و اعتماد فكرة اختيار ارقام جنب كل قائمة , او اختيار 5 بنود في كل قائمة  ,هيعمل اجبار عند الذكر و الانثي انه بالفعل يذكر بس مميزاته , ويذكر كل عيوبه , ومش هيكون عنده القدرة علي التجمل . .

 

 

اعصر ذهنك ولو شايف صفات تانية غايبة لابد من اضافتها  , ضيفها فورا , واطبع كل قايمة نسختين , وابدا علي طول , وطمنا ايه الاخبار

​

أخيرا , هنا فيه نسخة من الملف بصيغة PDF  فممكن تحملها و تشتغل منها