كنت قريت مقالات عن اسرة ال سعود وازاي ان محمد بن سلمان هيكون اخر حاكم للسعودية بشكلها الحالي , وانها علي ايده هينتهي عصر الاستقرار مش عارف ليه انا حاسس بشوية شماته فيهم

​

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

شوف يا سيدي

 

المقال فيه جزء كبير من الصحة , وجزء تاني محدش هيقدر يحدد مدي صحته , وهو متروكة للزمن

 

المملكة الحالية هي الدولة السعودية التالتة , بعد ما نشأت الأولي في القرن الـ 18 , وعاشت 75 سنة تقريبا , ونشأت الدولة السعودية التانية في القرن الـ 19 , وعاشت تقريبا 72 سنة , ونشأت التالتة وهي الحالية في بدايات القرن العشرين , و عمرها داخل علي 100 سنة تقريبا . .

 

وكلا من الدول التلاتة , نشأت علي يد سلالة مؤسس الأسرة (سعود بن محمد بن مقرن ), الأولي انهارت تحت سنابك خيل ابراهيم باشا ابن محمد علي , وانهارت الثانية من صراع داخلي , و الثالثة لسة انهيارها في علم الله تعالي . .

 

نشأة الدول السعودية الثلاثة و انهيارها , ارتبط بسفك دماء , و نحر رقاب , و خيانة أقرب الناس , وأكل الحقوق , والقسوة الغير مبررة , وكانت انعكاس لسلسلة من المذابح للصراع علي العروش ,في الدول الأموية و العباسية و غيرها . .

 

و لو هنركز شوية مع الدولة التالتة , وهي الحالية , هنلاقي ان مؤسسها عبد العزيز , واللي أولا سيطر علي نجد و الحجاز عسكريا , بعدها سعي للزواج من اغلب القبائل , حتي يقال انه اتجوز فوق الـ 35 زوجة , الزواج كان بهدف طمأنة القبائل المختلفة ان نسلهم هيشارك في الحكم . .

 

و بالفعل بدأ نسل عبد العزيز في الظهور للدنيا , وصار عنده 36 ولد (تبقي منهم 9 حاليا ) , و 27 بنت , وقام بقتل الأمل لدي اي من اخوته في العرش من بعده . .

 

و قبل وفاته في الخمسينات , أصر إن الحكم بعده يكون لأبناءه بالترتيب , يعني ابن عبد العزيز ياخد الحكم , يليه اخيه (ابن لعبد العزيز ) مش ابنه (حفيد عبد العزيز) , وده عشان يعمل طمأنه للقبائل المختلفة في نجد و الحجاز , ان كل ولد من اولادهم هييجي علي الدور في الحكم , مش إن واحد من ابنائه يستأثر بالحكم لنسله , فتغضب باقي القبائل , ويشتعل النزاع من جديد . .

 

و فعلا تولي الحكم من بعد وفاة عبد العزيز 6 ملوك , كلهم ابناءه , ولم يأتي أحد من أحفاده كملك بعد , هم بالترتيب : سعود , فيصل , خالد , فهد , عبد الله , سلمان , وهو الحالي

 

و لازم تراعي الاختلافات بين الملوك الستة السابقين , وحتي باقي ابناء عبد العزيز , ففهد و سلمان , وكمان اخوتهم نايف وسلطان و تركي , كلهم من ابناء (الاميرة حصة السديري) فبيسموهم السديريين

بينما عبد الله ابن (الاميرة فهدة الرشيدي ) من قبيلة مختلفة

الملك خالد ابن (الاميرة جوهرة) وهي من آل سعود

الملك فيصل ابن (الاميرة طرفة) وهي من نسل محمد عبد الوهاب , فتسمي من آل الشيخ

فيه من ابناء عبد العزيز اللي تم استبعادهم تماما من اي مناصب , زي الامير بندر و الامير فواز واللي هما من ابناء (الاميرة بزة الثني) عشان هي من اصل مغربي

 

فالصراع بين إخوة ابناء عبد العزيز ده من سنين طويلة , و السديريون هما اللي اخذو نصيب الاسد فيه , وظلت نفوس باقي الأشقاء تغلي في صمت . .

 

---------------------------------------------------------------------------

 

ومع مرض الملك الخامس عبد الله في 2015 , لاح سؤال في الأفق , ايه اللي هيحصل لما يموت او يشيخ كل اولاد عبد العزيز ؟ ؟

لاشك حد من ابناء عبد العزيز هيكسر القاعدة , و هيجعل الحكم لابناءه هو , والمتربصين كتير , خاصة ان أغلب ابناء عبد العزيز الـ 35 , لديهم مئات الابناء والاحفاد , يعني ذرية عبد العزيز تتجاوز الالاف من غير مبالغة . .

 

و اصغر ابناء عبد العزيز (الامير مقرن ) كان عمره في 2015 , سبعين سنة , وبالتالي فناء جميع ابناء عبد العزيز مسألة وقت , وستحسم خلال سنوات معدودة . .

 

عبد الله كان من أم رشيدية (الاميرة فهدة) , ولما مات في 2015 , تمسك السديريون بالحكم , فنصبو شقيقه سلمان الملك , واللي كان بالفعل ولي العهد ايام عبد الله . .

 

بس ظهر السؤال , مين اللي هيكون ولي عهد سلمان , وبالتالي الملك التالي بعد وفاته ؟ ؟

 

تم استبعاد الامراء (بندر و طلال و عبد الإله و أحمد ) وكلهم ابناء عبد العزيز لأنهم مش سديريين , ولكبر سنهم الرهيب , ذهبت أذهان البعض للأمير مقرن , لكن لان أمه عسيرية (الاميرة بركة العسيري) فتم استبعاده وليا للعهد , وادوله منصب لطيف كدة يفرح بيه , نائب رئيس مجلس الوزراء , عشان ميتقمصش . .

 

و هنا أقدم سلمان (ابن حصة السديرية) علي خطوة جريئة , بتعيين محمد بن نايف بن عبد العزيز( نايف اخو سلمان و من نفس الام حصة السديرية , يعني محمد يكون ابن اخوه) وليا للعهد. .

 

و ده اول منصب رسمي لحفيد من احفاد عبد العزيز في سلك المُلك , كتمهيد له انه يجعله ملك من بعده . .

ومحمد بن نايف مش سهل , ابوه نايف (اخو سلمان , وابن حصة السديرية) كان وزير الداخلية لسنين طويلة وكان ولي العهد ونائب رئيس الوزراء لغاية لما مات في 2012

 

ومحمد نفسه بقي وزير داخلية زي ابوه , ومسك مناصب حساسه وعمره داخل في الستين , فخبرته في بيت الذئاب السعودي مش قليلة . .

و سلمان ضرب كرسي في الكلوب ,لما عين ابنه هو (محمد بن سلمان) وزير للدفاع , وخلاه في منصب (ولي ولي العهد) , يعني يا محمد يا ابن نايف , انت اه هتكون الملك , بس هتخلي ابني ولي عهدك عشان يقف في الطابور و يكون الملك من بعدك , وسلم و استلم يا سطي . .

 

متنساش ان بن نايف عمره ستين , بينما بن سلمان 33 سنة . .

 

هي صفقات بالكامل , وفعلا ده جحر ثعابين بيتفرسو بعضهم البعض , ولما تقرأ اللي حصل في الدولة السعودية التانية وانهيارها هتتعجب من دمويتهم . .

 

وفعلا استقر الامر , وسكت باقي الاخوة الغير سديريين , وفقدو الامل بعد ما بقي الملك و ولي العهد وولي ولي العهد التلاتة من السديريين . .

 

وظهر الشقاق واضح في الخلافات الحادة بين ولي العهد (بن نايف) , وولي ولي العهد (بن سلمان) , ووجد بن نايف نفسه محتار بين الملك اللي فوقيه و ابنه اللي تحتيه , و اللي هو ماسك وزارة الدفاع

 

---------------------------------------------------------------------------

 

و بدأت اصابع بن سلمان تتمسك بالحكم اكتر مع حرب اليمن , خاصة لما دخلها زي سبع البرمبة في 2015 , هو بيوعد الشعب السعودي انه هيخلصها و يجيب عبد الملك الحوثي تحت رجلين الملك سلمان ,قبل ما يخلص فنجان القهوة بتاعه . .

 

و لمدة 3 سنين , لا الحرب خلصت , ولا الجيش السعودي الهش استريح , ولا عبد الملك اتقبض عليه , لا صواريخ سكود بتبطل تقع فوق أراضي المملكة , ولا قهوة الملك سلمان انتهت . .

 

وهوب في يونيو 2017 , سلمان قرر يضرب باقي الكراسي في الكلوب , لما عزل بن نايف من منصب ولي العهد , و (رقّي) ابنه محمد , خطوة , فبقي ولي العهد فورا , يعني الملك القادم , وجعل منصب ولي ولي العهد فاضي حاليا , عشان محمد اللي يحدده في المستقبل

سلمان كان يهمه يعمل ده وهو عايش , لانه كدة أكسب محمد شرعية الواقع والملك موجود , لو كان سلمان مات وحصل كدة كانت هتكون مجزرة . .

 

خد بالك محمد بن سلمان مش اكبر ابناء سلمان , بل من اصغرهم (باستثناء اخويه تركي وخالد) وعنده اخوة اكبر منه كتير , منهم اللي 60 سنة , فسلمان اختار محمد لسبب معين انا مش عارفه , وارد يكون اقدرهم من وجهة نظر ابوه , او يكون ليه سيطرة غير معروفة , او جايز صراع امهات , زي ما حصل مع زوجات عبد العزيز . .

 

المهم ان باقي ابناء عبد العزيز خرجو من اللعبة , و مفيش بيلعب فيها حاليا الا هذا السفيه (محمد بن سلمان) واللي عمل في المملكة نفس اللي عمله بلحة في مصر , بيحرقها بالبنزين سريع الاشتعال . .

 

فهد و عبد الله و سلمان , كانو طغاة برضه بس عندهم نوع من حكمة الكبار , اللي تخليهم يلعبو بالراحة و هدوء , نفس نظام مبارك اللي كان ديكتاتور , بس ذكي , عارف ازاي يتجنب الصدام . .

 

لكن هذا السفيه اللي عمره 33 سنة , اول حاجة عملها انه سجن ولاد عمه فورا , و ثبتهم في فلوسهم , وكسر كبريائهم كنوع من إقرار الولاء ليه لما يكون ملك ,اول ما سلمان يتدفن في مقابر العود بالرياض . .

 

الملوك قبل سلمان كانو بيسرقو و يدمرو بس بذكاء , يحافظو علي الفرخة مصدر البيض الدهب , لكن هذا الأحمق بيجري ورا الفرخة بجنون عشان يسلخها . .

 

---------------------------------------------------------------------------

 

كاتب المقال اللي انت قريته ليه حق يتوقع انهيار الدولة خلال سنوات , واللي هيبدا غالبا بصراع سعودي سعودي , بين السديريين و غيرهم , او سديريين و بعضهم (محمد بن نايف هو سديري) , واللي هيقضي علي الدولة الهشة اللي جيشها بالفعل شاف الويل من مسلحين حركة انصار الله (الحوثيين)

 

انت ليك حق تشمت في هذه المملكة الظالمة , اللي باعت و سلمت "مجرة كونية هائلة من البترول"(علي حد تعبير الرئيس الامريكي هاري ترومان في الاربعينات) علي مدار حوالي 70 سنة لأمريكا بتراب الفلوس , والتراب ده ياريتهم حتي وزعوه بالعدل علي الشعب , ده كان لنفسهم , ولدعم الديكتاتوريات في كل مكان . .

 

​